E Lē na o Galuega e Faaolaina ai, ae o le Alofa Tunoa

‘Ua faaolaina outou i le faatuatua, e lē ona o galuega, ina neʻi mitamita se tasi.’—EFESO 2:8, 9.

1. E faapefea ona ese Kerisiano mai isi tagata e tusa ai ma mea ua faia e le tagata lava ia, ma aiseā?

UA FAAMAUALUGA tagata i aso nei ona o mea ua latou faia, ma ua masani ona latou gugutu ai e faatatau i nei mea. E ese mai ai la Kerisiano. E latou te lē faamamafa naʻuā mea ua latou faia, e oo lava i mea e fesootaʻi atu ma le tapuaʻiga moni. Latou te olioli i mea ua faia e tagata o Ieova, ae latou te lē faasilisilia mea na latou faia. I le auaunaga iā Ieova, ua latou iloa e sili atu ona tāua le iai o le uunaʻiga saʻo e faia ai mea na i lo mea e ausia e le tagata lava ia. O le a maua e tagata uma le meaalofa o le ola e faavavau, e lē ona o mea na faia e le tagata lava ia, ae ona o le faatuatua ma le alofa tunoa o le Atua.—Luka 17:10; Ioane 3:16.

2, 3. O lē fea itu na mitamita ai Paulo, ma aiseā?

² Na iloa lelei e Paulo lenei mea. Ina ua uma ona tatalo faatolu mo se mapusaga mai  “le mea matuitui i le tino,” na ia maua le tali mai iā Ieova: “O loʻu nei alofa tunoa e lava lea e fesoasoani iā te oe; auā o le vaivai e faaatoaina ai loʻu mana.” Na talia ma le loto maulalo e Paulo le faaiʻuga a Ieova ma na ia faapea mai: “O lea ua tele ai lava loʻu fiafia i le mitamita i mea ua ou vaivai ai, ina ia tumau i oʻu luga le mana o Keriso.” E ao ona tatou faaaʻoaʻo i le uiga loto maulalo o Paulo.—2 Korinito 12:7-9.

³ E ui ina sa lauiloa Paulo i le faia o galuega faa-Kerisiano, ae na ia iloa o mea na mafai ona ia faia, e lē ona o sona lava tomai. Na ia taʻua ma le agaga faamaulalo: “Ua au mai iā te aʻu, lē aupito itiiti lava i le ʻau paia uma, lenei lava alofa tunoa, ina ia ou folafola atu i nuu ese le oloa faulaʻi o Keriso e lē masuʻesuʻeina lava.” (Efeso 3:8) E leʻi gugutu pe fia amiotonu naʻuā Paulo. “E tetee atu le Atua i ē faamaualuluga, a e foaʻi mai le alofa tunoa i ē faamaulalo.” (Iakopo 4:6; 1 Peteru 5:5) Po ua tatou mulimuli i le faaaʻoaʻoga a Paulo, i le manatu ma le loto maulalo ua sili o tatou uso na i lo i tatou?

‘Ia Manatu ua Sili Isi’

4. Aiseā e ono faigatā ai i isi taimi ona tatou manatu e sili isi i lo i tatou?

⁴ Na fautuaina e Paulo Kerisiano: “Aua neʻi faia se mea e tasi ma le finau vale, ma le mitamita fua; a ia taʻitasi outou ma manatu ma le loto maulalo, ua sili nisi iā te ia.” (Filipi 2:3) E ono faigatā lenei tulaga aemaise lava pe afai o tatou umia ni tofiga. Atonu e aliaʻe nei faigatā ona ua tatou aafia i le agaga tauvā lea ua taatele i le lalolagi i aso nei. A o tatou laiti, na uunaʻia ai i tatou e tauvā ma o tatou tei i le aiga po o tamaiti foʻi o le vasega i le aʻoga. E lē taumatea foʻi na uunaʻia i tatou ia avea ma tagata taalo sili ona lelei po o se tamaitiiti e sili aoao i le aʻoga. O le mea moni, e lelei ona faia le mea sili ona lelei i so o se gaoioiga talafeagai. Peitaʻi, e lē faia faapea e Kerisiano ina ia uaʻi tele mai tagata iā i latou, ae ina ia maua ni aogā mai ia gaoioiga ma atonu e aogā foʻi i isi. Ae ui i lea, e mataʻutia iʻuga o le manaʻo e avea oe ma tagata muamua ma viia ai oe e tagata. Aiseā?

5. O le ā le iʻuga o le agaga tauvā pe afai e lē faaeteete i ai?

⁵ Pe afai e lē faaeteete i uiga o le agaga tauvā ma le fia matamuamua, o le a lē ava ai ma faasausili se tasi. E ono oo ina lotoleaga i tomai ma faaeaga ua maua e isi. Ua taʻua i le Faataoto 28:22: “E faataalise i le fia mauʻoa le tagata mataoge [po o lē ua lotoleaga]; a e lē iloa e ia e oo mai le mativa iā te ia.” E ono aapa atu ma le fia pule i tulaga e lē tatau ona ia maua. Ina ia taʻutonuina ana gaoioiga, e masani ona ia muimui ma faitio i isi—o uiga nei e ao ona ʻalofia e Kerisiano. (Iakopo 3:14-16) Po o le ā lava le tulaga, ae ua mafai ona maua o ia i le uiga o le fia matamuamua ma le fiasili.

6. Ua lapataʻi mai faapefea le Tusi Paia e faatatau i le agaga tauvā?

⁶ O lea la, ua faalaeiauina e le Tusi Paia Kerisiano: “Aua neʻi avea i tatou ma ē mitamita  vale, aua neʻi feluʻiaʻi, aua neʻi felosiaʻi.” (Kalatia 5:26) Na talanoa Ioane e faatatau i se uso Kerisiano o lē na maua i lea uiga. Na taʻua e Ioane: “Na ou tusi atu i le ekalesia, a o Tioterifi, o lē fia sili iā te i latou, e lē talia i matou e ia. O le mea lea, pe a aʻu alu atu, ou te faamanatu ai lana amio o loo faia e ia, o loo tuaupua mai iā i matou i upu leaga.” Pagā se tulaga leaga e mafai ona oo i ai se Kerisiano!—3 Ioane 9, 10.

7. O ā mea e ao ona ʻalofia e Kerisiano i nofoaga o galuega lea e malosi tele ai le agaga tauvā i aso nei?

⁷ E ui i nei mea uma, ae e lē mafai e se Kerisiano ona matuā ʻalofia gaoioiga uma e faatauvā. O se faaaʻoaʻoga, i lana galuega e ono aafia i le tauvā ma se isi pisinisi o loo gaosia se oloa e tasi po o le ofoina atu foʻi o se auaunaga e tasi. E tusa lava po o le tulaga lenā e ao lava i se Kerisiano ona faia lana pisinisi i se tulaga ava i isi, alofa ma le magafagafa. E teena e le Kerisiano le faia o ni gaoioiga e lē tusa ma tulafono a le malo po o tapulaa faa-Kerisiano, ma e lē manaʻo e lauiloa o ia o se tagata e matuā tauvā. O le a lē manatu o ia, o le avea ma se tasi e sili ona lelei i so o se mea, o le mea silisili lea ona tāua i le olaga. Pe afai e tatau ona iai lenā agaga i se Kerisiano i le saʻilia o meafaitino, e sili atu ai la ona tāua le iai o lenā agaga pe a oo i mataupu tau tapuaʻiga!

Aua le Faatusatusa Atu i Isi

8, 9. (a) Aiseā e lē tatau ai i toeaina Kerisiano ona tauvā iā i latou lava? (e) Aiseā ua faatatau atu ai le 1 Peteru 4:10 i auauna uma a le Atua?

⁸ Ua faamatalaina i nei upu mai le Atua le uiga e ao ona iai i Kerisiano i la latou tapuaʻiga: “Ia taʻitoʻatasi ma faamasino i lana lava galuega, ona iā te ia lea o se mea e mitamita ai iā te ia lava, a e lē o se tasi.” (Kalatia 6:4) Ua iloa e toeaina o le faapotopotoga latou te lē tauvā, ae o loo galulue soosootauʻau. E latou te olioli i le lagolagosua a toeaina uma mo le lelei o le faapotopotoga. O lea la, latou te ʻalofia le agaga tauvā lea e mafai ona vevesi ai ma faataatia se faaaʻoaʻoga lelei o le autasi mo le faapotopotoga.

⁹ Talu ai o le tulaga matua, poto masani po o le tomai, atonu e sili atu ai ona lelei gaoioiga a isi toeaina na i lo isi po o le tele foʻi o lo latou malamalamaga. O le iʻuga, e eseese tiute tauave a toeaina i le faalapotopotoga a Ieova. Na i lo le faia o ni faatusatusaga, latou te manatua le fautuaga lenei: “Ia taʻitoʻatasi ma auauna o le tasi i le tasi i lea lava mea, e pei ona maua e ia o le mea alofa, e pei o auauna pule lelei a le alofa tunoa uiga eseese o le Atua.” (1 Peteru 4:10) O le mea moni, e faatatau lenei mau i auauna uma a Ieova, auā e mafai ona maua e i latou uma le meaalofa o le malamalamaga saʻo ma olioli uma i le faaeaga o le faiva faa-Kerisiano.

10. E na o le ā lava le auala e taliaina ai e Ieova la tatou auaunaga paia?

¹⁰ E pau le auala e fiafia ai le finagalo o  Ieova i la tatou auaunaga paia, pe afai e faia i le alofa ma le maelega, ae lē ina ia sili i tatou i lo isi. O le mea lea, e tāua le iai o le manatu saʻo agaʻi i mea tatou te faia e lagolagoina ai le tapuaʻiga moni. E ui lava e leai se tasi e mafai ona faamasinoina ma le saʻo māfuaaga o gaoioiga a isi, ae o Ieova o ia na te “fuatia loto.” (Faataoto 24:12; 1 Samuelu 16:7) O lea la, e ao ai ona tatou fesili ifo iā i tatou lava i isi taimi, ‘O le ā le uunaʻiga ua ala ai ona ou faia galuega o le faatuatua?’—Salamo 24:3, 4; Mataio 5:8.

Manatu Saʻo i la Tatou Galuega

11. O ā fesili e faatatau i la tatou talaʻiga e talafeagai ona iloiloina?

¹¹ Pe afai e tāua tele uunaʻiga ina ia maua ai le finagalo malie o Ieova, o le ā le tele e ao ona tatou manatunatu ai i a tatou galuega o le faatuatua? Pe a saʻo le māfuaaga e ala ai ona tatou faia le talaʻiga, pe e manaʻomia ea ona faia ni faamaumauga o galuega ua faia, ma po o le ā foʻi le tele? O ni fesili talafeagai nei, talu ai tatou te lē mananaʻo e faatāua le aofaʻiga o itula na i lo le galuega talaʻi.

12, 13. (a) O ā nisi o māfuaaga tatou te faia ai faamaumauga o la tatou auaunaga i le fanua? (e) O ā māfuaaga o lo tatou olioli pe a iloiloina le lipoti atoa o la tatou talaʻiga?

¹² Ia matau le mea ua fai mai ai le tusi, Ua Faamaopoopo Ina ia Faia le Finagalo o Ieova: “Sa naunau uluaʻi soo o Iesu Keriso i lipoti e faatatau i le agaʻigaʻi i luma o le galuega talaʻi. (Mareko 6:30) O loo taʻua i le tusi o Galuega e pe tusa ma le 120 tagata na iai ina ua liligi ifo le agaga paia i soo i le Penetekoso. E leʻi umi ae faaopoopo le aofaʻi o soo i le 3,000 ona oo atu lea i le 5,000. . . . (Galuega 1:15; 2:5-11, 41, 47; 4:4; 6:7) Maʻeu se faalaeiauga na maua e soo mai nei tala o faatelega!” O le māfuaaga foʻi lea, e taumafai ai Molimau a Ieova i aso nei e faia ni faamaumauga saʻo o galuega ua latou faia i le lalolagi aoao i le faataunuuina o fetalaiga a Iesu: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) Ua saunia e na lipoti se tala e mafai ona tatou malamalama ai i le galuega o loo faia i le lalolagi aoao. E faaalia ai po o gafea o manaʻomia ai se fesoasoani, o ā lomiga, ma pe fia foʻi le aofaʻi e manaʻomia ina ia faalautele atu ai le talaʻiga.

 ¹³ O lea, o le lipotia atu o a tatou galuega, ua mafai ai ona faataunuuina i se auala e sili atu le faatonuga ia talaʻi le tala lelei o le Malo. E lē gata i lea, pe lē o faalaeiauina ea i tatou pe a faalogo i tala i galuega o faia e o tatou uso i isi atunuu o le lalolagi? Tatou te olioli pe a maua tala e uiga i le faatuputele ma le faalauteleina o galuega i le lalolagi aoao. E uunaʻia ai foʻi i tatou e faia atili nisi gaoioiga ma faamautinoa mai ai le faamanuia a Ieova. E tatou te matuā fiafia auā o loo aofia ai foʻi ma a tatou lipoti! O a tatou lipoti taʻitasi e laʻitiiti pe a faatusatusa atu i le aofaʻiga o le lipoti a le lalolagi atoa, peitaʻi e silafia e Ieova mea tatou te faia. (Mareko 12:42, 43) Ia manatua, a aunoa ma lau lipoti e lē atoa le lipoti i le lalolagi aoao.

14. E ese mai i le talaʻi ma le aʻoaʻo atu, o ā mea e aofia ai i la tatou tapuaʻiga iā Ieova?

¹⁴ O le mea moni, o le tele o mea e fai e se Molimau i le faataunuuina o ona tiute tauave o se auauna tuuina atu a Ieova, e lē o aofia ai i le lipoti. O se faaaʻoaʻoga, e lē aofia ai i le lipoti suʻesuʻega faale-Tusi Paia e lē aunoa a le tagata lava ia, auai ma faia se sao i sauniga faa-Kerisiano, tiute tauave i le faapotopotoga, fesoasoani i uso talitonu o loo manaʻomia le fesoasoani, lagolagosua tautupe i le galuega o le Malo i le lalolagi aoao ma isi mea. O le mea lea, e ui e tāua a tatou lipoti ona e fesoasoani e tausisia lo tatou maelega i le talaʻiga, ma ʻalofia ai le faifaiaga, ae e ao ona tatou iloa le fuafuaga moni o le lipoti. E lē tatau ona manatu i le lipoti e pei o se tusi pasi faaleagaga e agavaa ai mo le ola e faavavau.

“Maelega i Galuega Lelei”

15. E ui e lē na o galuega e faaolaina ai i tatou, ae aiseā e tāua ai?

¹⁵ E manino mai, e ui e lē na o galuega e faaolaina ai se tasi, ae e tāua tele. O le pogai lenā ua taʻua ai Kerisiano “o lona lava nuu, e maelega i galuega lelei,” ma faalaeiauina i latou e “manatunatu foʻi le tasi i le tasi, ina ia taufaatupu ai le alofa ma galuega lelei.” (Tito 2:14; Eperu 10:24) Na faamamafa atili e le isi tusitala o le Tusi Paia, o Iakopo e faapea: “E faapei o le tino ua oti ia pe a teʻa le agaga, e faapea foʻi le faatuatua ua mate pe a leai ni galuega.”—Iakopo 2:26.

16. O le ā le mea e sili atu ona tāua i lo galuega, ae o le ā e ao ona tatou faaeteete ai?

¹⁶ E tāua galuega lelei, ae sili atu ona tāua le uunaʻiga e ala ai ona fai. O lea la, e ao ona tatou iloiloina i nisi taimi uunaʻiga e faia ai ia galuega. Talu ai e leai se tagata e na te iloaina māfuaaga ua faia ai mea e isi, e ao ai la ona tatou faaeteete i le faamasinoina o isi. Ua fesiligia i tatou: “O ai ea oe lē faamasino atu i le auauna a le tasi?” E manino le tali: “E tumau ia pe paū i lona lava alii.” (Roma 14:4) O le a faamasinoina i tatou e Ieova le Alii o tagata uma, ma lana Faamasino tofia o Iesu Keriso, e lē na o galuega e faavae ai, ae o le uunaʻiga e ala ai ona fai, avanoa ua iai, alofa ma lo tatou maelega i le tapuaʻiga. E na  o Ieova ma Iesu Keriso e mafai ona faamasinoina ma le saʻo tatou, po ua tatou faia le mea na faatonuina ai Kerisiano e fai e tusa ai ma upu a Paulo: “Ia e taumafai ina ia avea oe ma lē ua fiafia mai i ai le Atua, o le faigaluega e leai se mea e mā ai, na te talaʻitonuina le upu moni.”—2 Timoteo 2:15; 2 Peteru 1:10; 3:14.

17. A o tauivi e faia le mea sili ona lelei, aiseā e ao ai ona tatou manatua upu o le Iakopo 3:17?

¹⁷ E malamalama Ieova iā i tatou, ma na te lē tāpā mai ni mea e faigatā tele. E tusa ai ma le Iakopo 3:17, “o le poto mai lugā” e ō faatasi ma le “agamalu.” O se mea lelei tele ma o se gaoioiga poto le faaaʻoaʻo iā Ieova i lenei vala. E lē tatau ona tatou faatutū ni sini e faigatā ma e lē mafai ona ausia, e lē gata mo i tatou a o o tatou uso foʻi.

18. Pe afai e saʻo o tatou manatu e faatatau i la tatou galuega ma le alofa tunoa o Ieova, o ā mea e mafai ona tatou faatalitalia?

¹⁸ O le tausisia o se manatu saʻo i a tatou galuega o le faatuatua ma le alofa tunoa o Ieova, o le a faatumauina ai lo tatou olioli o se faailoga lea e iloa ai auauna moni a Ieova. (Isaia 65:13, 14) E mafai ona tatou olioli i le sosia o faamanuiaga a Ieova i ona tagata, e tusa lava po o ā mea e mafai e i tatou taʻitoʻatasi ona fai. O le a faaauau ona tatou ole atu i le Atua i le “tatalo, ma le faatoga, atoa ma le faafetai” ina ia fesoasoani i le faia o le mea sili tatou te mafaia. O le faia faapea e lē mafesiligia le faataunuuina o upu nei, “o le manuia foʻi mai le Atua, o loo silisili lava i mea uma e manatu i ai, e leoleoina ai o [t]atou loto atoa ma o [t]atou mafaufau iā Keriso Iesu.” (Filipi 4:4-7) Ioe, e faamāfanafanaina ma faalaeiauina i tatou i le iloa e mafai ona faaolaina i tatou, e lē na o galuega, ae o le alofa tunoa o Ieova!

E Mafai Ona E Faamatala le Māfuaaga e Ao ai i Kerisiano Ona

• taumamao mai le gugutu e faatatau i mea e mafai ona faia e le tagata lava ia?

• ʻalofia le agaga tauvā?

• lipoti a latou gaoioiga faa-Kerisiano i le faiva i le fanua?

• ʻalofia le faamasinoina o uso Kerisiano?

[Fesili mo le Suʻesuʻega]

[Ata i le itulau 15]

“O loʻu nei alofa tunoa e lava lea e fesoasoani iā te oe”

[Ata i le itulau 17]

E olioli toeaina ona o le sao ua faia e i latou taʻitoʻatasi mo le lelei o le faapotopotoga

[Ata i le itulau 19]

A aunoa ma lau lipoti o le a lē atoa ai le lipoti i le lalolagi aoao