E Leoleoina e Ieova i Latou e Faatalitali iā te Ia
E Leoleoina e Ieova i Latou e Faatalitali iā te Ia
“Ia leoleoina pea lava aʻu e lou alofa ma lou faamaoni.”—SALAMO 40:11.
1. O le ā le talosaga a Tavita iā Ieova, ma ua faapefea ona taliina lenā talosaga i aso nei?
NA MATUĀ “faatalitali” Tavita, le tupu o Isaraelu iā Ieova ma sa ia faapea mai, “ona faasaga mai ai lea o [Ieova] iā te aʻu, ua faafofoga mai foʻi o ia i laʻu alaga.” (Salamo 40:1) Na ia iloa e puipuia e lē aunoa e Ieova i latou e alolofa iā te Ia. O lea la, na talosaga atu ai Tavita iā Ieova ina ia leoleoina pea o ia. (Salamo 40:11) E aofia ai Tavita i tane ma fafine faamaoni o ē o le a maua le toe tū e “sili ona lelei.” O loo manatua pea o ia e Ieova e oo mai i le asō, o se tasi o le a maua lenā taui. (Eperu 11:32-35) Ua faamautinoa mai lona lumanaʻi i se auala sili ona lelei. Ua tusia lona igoa i le ‘tusi faamanatu’ a Ieova.—Malaki 3:16.
2. E faapefea ona fesoasoani le Tusi Paia iā i tatou ia malamalama i le uiga o le leoleoina e Ieova?
2 E ui lava na soifua tagata faamaoni o loo taʻua i le Eperu mataupu e 11 a o leʻi soifua Iesu i le lalolagi, ae sa ōgatusa o latou olaga ma fetalaiga a Iesu: “O lē faapelepele i lona ola, e faamāumau e ia i ai; a o lē ʻinoʻino i lona ola i lenei lalolagi, e maua ai pea e ia e oo i le ola faavavau.” (Ioane 12:25) O le leoleoina la e Ieova o ona tagata, e lē faapea o le a lē oo i ai ni puapuaga ma sauāga. Ae o le a puipuia i latou i se auala faaleagaga, ina ia mafai ona tausisia ai se tulaga lelei i luma o le Atua.
3. O le ā le faamaoniga e iloa ai na leoleoina e Ieova Iesu, ma o le ā le iʻuga?
3 Sa avea Iesu ma taulaʻiga o sauāga ma faifaiga, ma na oo ina taulau ona fili i le faaooina iā te ia o se maliu faalumaina ma le tigā. Peitaʻi, e leʻi faapea na lē faataunuu ai e le Atua lana folafolaga e leoleoina le Mesia. (Isaia 42:1-6) Ina ua toe faatūina Iesu mai i lona maliu faalumaina i le aso lona tolu, na faamaonia ai sa faafofoga Ieova i lana alaga mo se fesoasoani e pei lava ona faafofoga o ia i le alaga a Tavita. I lana tali atu iā Iesu na ia avatu iā Iesu le malosi e tausisia ai le faamaoni. (Mataio 26:39) Talu ai na leoleoina o ia i lenei auala, na maua ai e Iesu le ola e lē mafai ona oti i le lagi. E lē gata i lea, ua maua foʻi e le toʻatele o ē faatuatua i le togiola, le faamoemoe o le ola e faavavau.
4. O le ā le faamautinoaga ua avatu i Kerisiano faauuina ma “isi mamoe”?
4 E tatou te mautinoa e naunau ma e finagalo Ieova e leoleo ana auauna i aso nei e pei ona sa ia faia i aso o Tavita ma Iesu. (Iakopo 1:17) E mafai e uso toʻaitiiti faauuina o Iesu o loo totoe i lalolagi ona faalagolago i le folafolaga a Ieova: “Ia iʻu i le tofi e lē pala, e leai se leaga o i ai, e lē mamae lava, o loo teu i le lagi mo outou, o ē o leoleoina e le mana o le Atua, i le faatuatua, ia iʻu i le faaolataga ua saunia, e faaalia mai i ona pō e gata ai.” (1 Peteru 1:4, 5) E mafai foʻi e “isi mamoe” o ē e iai lo latou faamoemoe e ola i le lalolagi, ona faatuatua i le Atua ma lana folafolaga e pei ona taʻua e le faisalamo: “O outou na uma lava o ona tagata amio Atua, ia outou alolofa atu iā Ieova; e leoleoina e Ieova o ē faamaoni.”—Ioane 10:16; Salamo 31:23.
Leoleoina i le Itu Faaleagaga
5, 6. (a) Ua faapefea ona leoleoina tagata o le Atua i aso nei? (e) O le ā le faiā a le vaega faauuina ma Ieova, ae faapefea i latou e iai le faamoemoe e ola i le lalolagi?
5 I aso nei, ua saunia e Ieova sauniuniga mo le leoleoina o ona tagata i se auala faaleagaga. E ui e lē puipuia i latou mai le oo iai o sauāga po o faigatā ma mala taatele o le olaga, ae ua avatu e le Atua le fesoasoani ma faalaeiauga, ina ia mafai ona leoleoina ai la latou faiā māfana ma ia. O le faavae o la latou faiā, o le faatuatua i le sauniuniga alofa a le Atua, o le togiola. O nisi o nei Kerisiano faamaoni, na faauuina e le agaga o le Atua ina ia avea ma tupu faatasi ma Keriso i le lagi. Ua taʻuamiotonuina i latou o ni atalii faaleagaga o le Atua, ma ua faatatauina iā i latou upu nei: “O ia ua na laveaʻi mai iā te i tatou nai le pule a le pōuliuli, a ua na aumaia i tatou i le malo o lona lava Alo pele; o ia ua tatou maua ai le togiola, o le faamagaloina lea o agasala.”—Kolose 1:13, 14.
6 Ua mautinoa foʻi e le faitau miliona o isi Kerisiano faamaoni, e mafai e i latou ona maua aogā mai le sauniuniga o le togiola e le Atua. Tatou te faitau ai e faapea: “O le Atalii o le tagata na lē sau o ia ina ia auauna tagata iā te ia, a e peitaʻi ia auauna o ia, ma foaʻiina atu lona ola o le togiola mo tagata e toʻatele.” (Mareko 10:45) Ua tulimataʻia e na Kerisiano le taimi e olioli ai i le “saʻolotoga o le fanau a le Atua e manuia ai.” (Roma 8:21) I le taimi nei, ua latou faatāuaina la latou faauōga ma le Atua, ma ua taumafai ma le faamaoni e faamalosia lenā faiā.
7. O ā auala ua leoleoina ai e Ieova le itu faaleagaga o ona tagata i aso nei?
7 O le isi auala e leoleoina ai e Ieova le itu faaleagaga o ona tagata, o le saunia lea o se polokalame mo le aʻoaʻoina pea o mataupu faaleagaga. O le auala lea e mafai ai ona atili malamalama i latou i le upu moni. Ua faatautaia e Ieova ona tagata e ala i lana Afioga, lana faalapotopotoga ma lona agaga paia. Ua pei tagata o le Atua i le lalolagi aoao o se aiga faavaomalo, i lalo o le taʻitaʻiga a le “auauna faamaoni ma le mafaufau.” O loo gafa taulima lenei auauna ma le vaavaaia o manaʻoga faaleagaga ma pe a talafeagai ai e faapena foʻi ma manaʻoga faaletino o auauna a Ieova, e tusa lava po o le ā o latou ituaiga ma gagana po o tulaga i le olaga.—Mataio 24:45.
8. O le ā le mautinoa ua iā Ieova e uiga i ē amio Atua, ma o le ā lana folafolaga iā i latou?
8 E pei lava ona lē puipuia e Ieova Iesu mai osofaʻiga a ona fili, e faapena foʻi ona Ia lē puipuia Kerisiano i le auala lenā i aso nei. Peitaʻi, e lē o se faailoaga lenā o le lē fiafia o le finagalo o le Atua. Na i lo lenā, ua faamamafa ai lona matuā mautinoa, o le a lagolagoina e Kerisiano lana itu o le finauga i le pule silisili ese. (Iopu 1:8-12; Faataoto 27:11) O le a lē tuulafoaʻia e Ieova i latou e amio Atua, “auā e fiafia Ieova i le faamasinoga, na te lē tuua foʻi ona tagata amio Atua; e leoleoina i latou e faavavau.”—Salamo 37:28.
Leoleoina e Ala i le Alofa ma le Faamaoni
9, 10. (a) E faapefea i le faamaoni o Ieova ona leoleoina ai ona tagata? (e) Ua faaalia faapefea i le Tusi Paia e leoleoina e Ieova ona tagata faamaoni e ala i lona alofa?
9 I le tatalo a Tavita o loo faamauina i le Salamo 40, sa ia ole atu ina ia leoleo o ia e le alofa ma le faamaoni o Ieova. O le faamaoni o Ieova ma lona naunau i le amiotonu, ua ia taʻua manino ai ana tapulaa. O i latou e ola e tusa ai ma nei tapulaa, e lē oo iā i latou le tele o puapuaga, popolega ma faafitauli ia e oo iā i latou e faataligatuli i nei tapulaa. O se faaaʻoaʻoga, e mafai ona puipuia i tatou ma ē pele mai le tele o faafitauli e faanoanoa ai le loto pe afai e ʻalofia le faaaogāina o fualaau faasāina ma le soona inu i le ʻava malosi, amioga lē mamā tau feusuaʻiga ma se olaga sauā. E oo foʻi iā i latou ua see ese mai ala faamaoni o Ieova e pei o Tavita i nisi taimi, latou te mautinoa e avea le Atua ma “lafitaga” mo ē fai mea sesē ae ua salamō. E latou te taʻu atu ma le olioli: “E te leoleoina aʻu i le puapuaga.” (Salamo 32:7) Maʻeu se faailoaga o le alofa o le Atua!
10 O se isi faaaʻoaʻoga o le alofa o le Atua, o le lapataʻia lea o ana auauna e tausisia le vavae ese mai lenei lalolagi amioleaga, lea ua toe o se aga ona Ia faaumatia lea. Tatou te faitau ai: “Aua tou te mananaʻo i le lalolagi, po o mea o i ai i le lalolagi. Pe afai e manaʻo se tasi i le lalolagi, e lē o iā te ia le alofa i le Tamā. Auā o mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e lē mai le Tamā ia, a e mai le lalolagi.” O le utagiaina o lenei lapataʻiga ma gaoioi e ōgatusa ai, e mafai moni ona leoleoina o tatou ola e oo i le faavavau, auā ua faapea atili mai le mau: “E mavae atu foʻi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”—1 Ioane 2:15-17.
Leoleoina e Ala i le Mafaufau Lelei, Faautauta ma le Poto
11, 12. Ia faamatala le auala e leoleoina ai i tatou e le mafaufau lelei, faautauta ma le poto.
11 Na tusi le atalii o Tavita o Solomona, e uiga iā i latou e fia maua le finagalo malie o le Atua: “E faafeao le mafaufau iā te oe; e leoleo iā te oe le faautauta.” Na ia faalaeiau foʻi: “Ia maua le poto . . . Aua e te lafoaʻi iā te ia, ona tausia lea o oe e ia; ia e alofa iā te ia, ona leoleoina lea o oe e ia.”—Faataoto 2:11; 4:5, 6.
12 Tatou te mafaufau lelei pe afai tatou te manatunatu loloto i mea ua tatou aʻoaʻoina mai le Afioga a le Atua. O le faia faapea, e fesoasoani iā i tatou e maua le faautauta ina ia mafai ai ona faatulaga mea e ao ona faamuamua. E tāua tele lenei mea talu ai, ua iloa e le toʻatele o i tatou mai mea e tutupu, e māfua faafitauli pe a faamuamua ma le iloa po o le lē iloa foʻi e tagata mea e lē talafeagai. Ua tuu mai e le lalolagi a Satani iā i tatou sini, e pei o le saʻilia o le ʻoa, ia taʻutaʻua, maua le pule, peitaʻi ua faalaeiau i tatou e Ieova ia taulaʻi atu i mea sili ona tāua, o mea faaleagaga. O le lē taulau ona ave le faamuamua i mea faaleagaga, e malepelepe ai aiga, faaleagaina faigāuō ma mou atu ai sini faaleagaga. E tusa ai ma fetalaiga a Iesu, e seleseleina ai e se tasi lenei iʻuga lē manuia: “Se a le aogā i le tagata, pe afai na te maua le lalolagi uma, a e māumau lona ola?” (Mareko 8:36) O se gaoioiga poto pe a utagia le fautuaga a Iesu: “A ia outou muaʻi saʻili lona malo ma lana amiotonu; ona faaopoopoina atu lea o ia mea uma iā te outou.”—Mataio 6:33.
Lamatiaga o le Fia Matamuamua
13, 14. O le ā le uiga o le fia matamuamua, ma aiseā e lē atamai ai i se tasi ona maua i lea uiga?
13 O le mea masani le iai o lagona naunau o le tagata iā te ia lava. Peitaʻi o le a iʻu i ni faafitauli, pe a oo ina avea na faanaunauga ma mea e sili ona tāua i le olaga o se tasi. O lea la, ina ia leoleoina la tatou faauōga ma Ieova, ua ia faatonuina i tatou ina ia ʻalofia le fia matamuamua. O le uiga o le fia matamuamua, o le “faamaualuga, fia sili ma manatu faatauvaa i isi tagata.” Pe lē moni lenā faamatalaga i le toʻatele o tagata i aso nei? O le mea mataʻina, ua valoia e le Tusi Paia, “o ona aso e gata ai” o le faiga leaga o mea a Satani, “e avea tagata ma e alolofa i latou iā i latou,” po o le fia matamuamua.—2 Timoteo 3:1, 2.
14 Ua iloa e Kerisiano le atamai o le usitaia o faatonuga a le Tusi Paia, ia taʻitasi ma vaavaai i mea a isi, alofa i isi e pei o oe lava iā te oe. (Luka 10:27; Filipi 2:4) E ono manatu tagata e lē talafeagai lenei mea, peitaʻi e tāua pe afai tatou te fia maua se faaipoipoga taulau manuia, faiā faaleaiga fiafia ma faauōga lelei. E lē tatau i se auauna moni a Ieova ona faamuamua ona lava faanaunauga ma lē tepa taulaʻi atu ai i mea e sili ona tāua. O le mea e sili ona tāua o le finagalo o Ieova le Atua o loo ia tapuaʻi i ai.
15, 16. (a) Aiseā e leaga tele ai le fia matamuamua, ma o ai na faataʻitaʻia mai lenā uiga? (e) O le ā le mea moni lava ua faia e se tasi pe a vave ona ia faamasinoina isi?
15 O le uiga o le fia matamuamua, e mafai ona faafiaamiotonu ai se tasi, faafiapoto ma faamaualuga. Ua taʻua mai ma le saʻo e le Tusi Paia: “O le mea lea ua e lē mautali ai oe le tagata o lē faamasino atu, auā o lou faamasino atu i se tasi, ua e faamasino ai oe e oe; auā o oe lē faamasino atu, ua e faia ia lava mea.” (Roma 2:1; 14:4, 10) Na talitonu taʻitaʻi lotu i aso o Iesu, ua matuā amiotonu i latou, o lea na manatu ai ua latou agavaa e faamasinoina Iesu ma ona soo. E ala i le faia faapea, na fai ai e i latou i latou lava ma faamasino. Ona o le manatu māmā i a latou lava agasala na toe faasala ai lava e i latou i latou.
16 Na avea Iuta, le soo o Iesu na faalataina o ia, ma se tasi e faamasinoina isi. I Petania, ina ua uu e Maria le tuafafine o Lasalo Iesu i se uu manogi, na matuā lē fiafia Iuta. Na faaalia lona lē lotomalie i le finau atu: “Pe se ā le mea na lē faatau ai lenā uu manogi i tenari e tolu selau, ma avatu ai i ē matitiva?” Ua faaauau mai le faamatalaga a le Tusi Paia: “Ua lē faapea ane ia, ina ua alofa o ia i ē matitiva, a ona o ia o le gaoi, ua iā te ia foʻi le ete tupe, ma na avea mea na fafao ai.” (Ioane 12:1-6) Seʻi aua lava neʻi o tatou pei o Iuta po o taʻitaʻi lotu, o ē na vave ona faamasinoina isi, ae na taʻusalaina ai i latou e i latou lava.
17. Ia faamatala le lamatiaga ona o le faamaualuga po o le avea ma se tasi e soona mautinoa.
17 O se mea e faanoanoa ai, ona o isi uluaʻi Kerisiano e ui ina sa lē gaoi e pei o Iuta, ae sa avea ma ē mimita ma faamaualuga. Na tusi Iakopo e faatatau iā i latou: “Ua outou mitamita i a outou upu faamaualuga.” Ona toe faaopoopo mai lea: “E leaga le mitamita faapena uma lava.” (Iakopo 4:16) E leaga le gugutu i mea ua tatou faia po o faaeaga ua maua i le auaunaga iā Ieova. (Faataoto 14:16) Tatou te manatua le mea na tupu iā Peteru, o lē na iai le taimi sa soona mautinoa ai ma gugutu e faapea: “E ui lava ina tausuai o tagata uma ona o oe, ou te lē tausuai lava aʻu. . . . E ui ina tā oti lava faatasi ma oe, ou te lē faafiti lava iā te oe.” O le mea moni, e lē tatau ona tatou gugutu e faatatau iā i tatou lava. Ua tatou maua mea uma lava ona o le alofa o Ieova. O le manatuaina o lenei manatu o le a puipuia i tatou mai le faamaualuga.—Mataio 26:33-35, 69-75.
18. O le ā le lagona o Ieova i le faamaualuga?
18 Ua taʻu mai iā i tatou e faapea: “E muamua le faamaualuga i le malaia; e muamua foʻi le loto faasiasia i le paū.” Aiseā? Ua tali mai Ieova: “O le faamaualuga, ma le loto fefete, . . . ou te ʻinoʻino i ai.” (Faataoto 8:13; 16:18) E lētioa ona toʻatamaʻi Ieova i le “loto faamaualuga o le tupu o Asuria, ma le faalialia o ona mata faasiasia”! (Isaia 10:12) Na faasalaina o ia e Ieova. Ua toeitiiti ona faasalaina foʻi lea e Ieova le lalolagi uma a Satani, ma ana taʻitaʻi faamaualuluga e tusa lava pe vaaia pe lē vaaia. Ia aua lava neʻi o tatou faataʻitaʻi i uiga loto maaa o fili o Ieova!
19. Aiseā e mitamita ai ae toe loto maulalo foʻi tagata o le Atua?
19 E lē o se mea leaga le mitamita o Kerisiano moni i le avea ma auauna a Ieova. (Ieremia 9:24) Ae i le taimi e tasi, latou te tausisia le loto maulalo. Aiseā? Talu ai ua “agasala tagata uma lava, ma ua lē oo i le viiga mai le Atua.” (Roma 3:23) O lea la, ina ia leoleoina o tatou tulaga o ni auauna a Ieova, e ao ona iā i tatou le manatu o Paulo, o lē na tusi: “Na maliu mai Keriso Iesu i le lalolagi, na te faaolaina o ē agasala,” ona ia faapea mai lea: “Ua sili musa aʻu nei iā i latou.”—1 Timoteo 1:15.
20. Ua faapefea ona leoleoina e Ieova ona tagata i aso nei, ma o le a faapefea ona ia leoleoina i latou i le lumanaʻi?
20 Talu ai ua faatulaga lua e tagata o Ieova o latou manaʻoga ina ia faamuamua ai manaʻoga faaleagaga, e mautinoa o le a leoleoina pea e Ieova i latou i le itu faaleagaga. E tatou te mautinoa foʻi, o le a leoleoina e Ieova ona tagata e lē gata i le itu faaleagaga ae i le itu faaletino foʻi, pe a oo mai le puapuaga tele. Pe a ulu atu i le lalolagi fou a le Atua, o le a latou taʻu atu: “Faauta, o lo tatou Atua lenei; sa tatou faatalitali iā te ia, ua ia faaolaina foʻi i tatou; o Ieova lava lenei, sa tatou faatalitali iā te ia; tatou te fiafia ma olioli i lana faaolataga.”—Isaia 25:9.
Pe E te Manatua?
• Na faapefea ona leoleoina le tupu o Tavita ma Iesu Keriso?
• Ua faapefea ona leoleoina tagata o Ieova i aso nei?
• Aiseā e ao ai ona ʻalofia le fia matamuamua?
• Aiseā e mafai ai ona tatou mitamita ae e loto maulalo?
[Fesili mo le Suʻesuʻega]
[Ata i le itulau 9]
Na leoleoina faapefea e Ieova ia Tavita ma Iesu?
[Ata i le itulau 11]
O ā auala ua leoleoina faaleagaga ai tagata o le Atua i aso nei?
[Ata i le itulau 12]
E ui lava tatou te mitamita e auauna iā Ieova, ae e ao lava ona tatou loto maulalo