Fesili Mai le ‘Aufaitau
Fesili Mai le ʻAufaitau
Ina ua faalogo le ʻausoo e faapea, o Peteru lea sa i le falepuipui, o loo tū mai i le faitotoʻa, aiseā na latou faapea atu ai: “O lana agelu ia”?—Galuega 12:15.
Atonu sa manatu sesē le ʻauaposetolo e faapea, o se avefeʻau faaagelu ua fai ma sui o Peteru lea o loo tū i le faitotoʻa. Seʻi iloilo faamatalaga uma o lenei fuaitau.
Sa puʻe faapagotaina Peteru e Herota, o lē na faatonuina le fasiotia o Iakopo. O lea, na manatu ai le ʻausoo, o le a fasiotia foʻi Peteru. Sa noanoatia Peteru i maea uʻamea i le falepuipui, ma leoleoina e fitafita e taʻi toʻafā i le leoleoga. Ona oo lea i le tasi pō, sa faasaʻolotoina faavavega ai o ia ma taʻitaʻi atu i fafo mai le falepuipui e se agelu. Ina ua iloa ane e Peteru le mea na tupu, ona ia faapea lea: “Ua ou iloa nei, e moni, ua auina mai e le Alii lana agelu, ma ua laveaʻi mai o ia iā te aʻu ai le lima o Herota.”—Galuega 12:1-11.
Na alu atu loa Peteru i le fale o Maria le tinā o Ioane Mareko, o i inā sa faapotopoto ai le toʻatele o le ʻausoo. Ina ua tuʻituʻi atu o ia i le faitotoʻa, ona alu atu lea o le auauna teine e igoa iā Rosa e vaai po o ai. Ina ua ia lagona le leo o Peteru, na tamoʻe atu o ia ma taʻu atu i le ʻausoo ae na te leʻi aumaia o ia i totonu! E leʻi talitonu muamua le ʻausoo, o Peteru lea sa i le faitotoʻa. Ona sa latou manatu sesē e faapea: “O lana agelu ia.”—Galuega 12:12-15.
Pe sa talitonu le ʻausoo e faapea, ua fasiotia Peteru ma o lona agaga lea sa i le faitotoʻa? E leai, e lē o le tulaga lenā. Auā ua uma ona iloa e soo o Iesu le upu moni mai i le Tusi Paia e uiga i ē ua oti; latou te “lē iloa se mea.” (Failauga 9:5, 10) O le ā la le uiga o le tala a le ʻausoo ina ua latou faapea mai: “O lana agelu ia”?
Sa iloa e le ʻausoo i le faagasologa o tausaga, e fesoasoani agelu i tagata o le Atua. O se faaaʻoaʻoga, sa taʻua e Iakopo “le Agelu lava o lē na laveaʻiina mai aʻu ai le leaga uma lava.” (Kenese 48:16) Na fetalai atu Iesu i ona soo e faatatau i se tamaitiiti sa lotolotoi iā i latou: “Ia outou, neʻi tou faalēaogāina se tasi o i latou nei e faatauvaa; auā ou te fai atu iā te outou, o a latou agelu i le lagi e lē aunoa ona latou vaavaai i fofoga o loʻu Tama o i le lagi.”—Mataio 18:10.
Ua faaliliuina lenei mau e le Young’s Literal Translation of the Holy Bible le upu agʹge· los (“agelu”) o se “ave feʻau.” E foliga mai sa talitonu nisi tagata Iutaia e faapea, e tofu lava auauna taʻitoʻatasi a le Atua ma lana lava agelu; e pei o se agelu tausi. Ae o le mea moni, e lē o aʻoaʻoina e le Afioga a le Atua lenā manatu. Ae ina ua faapea atu le ʻausoo, “O lana agelu ia,” atonu sa latou manatu e faapea, ai o se avefeʻau faaagelu ua fai ma sui o Peteru lea sa tū mai i le faitotoʻa.