Lipoti a Ē Faalauiloa le Malo

O Tagata Faamaoni e Viia ai Ieova

I LE lalolagi aoao, ua lauiloa ai Molimau a Ieova i lo latou faamaoni, e lē gata o ē laiti ae o ē matutua foʻi. Ia manatu i ni faaaʻoaʻoga mai konitineta e tolu o le lalolagi.

O Olusola, e 17 ona tausaga, e nofo i Nigeria. I se tasi aso a o foʻi atu i lona aiga mai le aʻoga, na ia maua ai se ato tupe i le lotoā. Sa ia avatu le ato tupe i le pule aʻoga. Sa faitau e le pule aʻoga le tupe, o le aofaʻi ₦6,200 tupe Nigeria, (ae tusa ma le U.S.$45). Na faafoʻi atu e le pule aʻoga le ato tupe i le faiaʻoga e ana le ato. I le loto faafetai o le faiaʻoga, na ia avatu ai iā Olusola le ₦1,000 tupe Nigeria (e tusa ma le U.S.$7), ma fai atu i ai e totogi ai lona pili o le aʻoga. Ina ua iloa e isi tamaiti aʻoga, sa latou tauemu iā Olusola. Ina ua mavae ni nai vaiaso, na faailoa atu ai e se tamaitiiti aʻoga na gaoia lana tupe, o lea, na faatonu atu ai i faiaʻoga ina ia suʻe tamaiti uma lava. Ae na faapea atu le faiaʻoga iā Olusola, “Sau oe e tū i ī. Ou te iloa e te lē gaoi, ona o oe o se Molimau a Ieova.” Na maua le tupe i ni tama se toʻalua ia foʻi na ula iā Olusola, ma sa faasalaina i laʻua. Na tusi mai Olusola: “Ua ou matuā fiafia lava ona ua lauiloa aʻu o se Molimau a Ieova e lē gaoi, ma i lea ua viia ai Ieova.”

Ina ua savali atu mai lona aiga i se tasi aso, na maua ai e Marcelo, o se tagata Argentina se atopaʻu i se mea e lē mamao atu ma lona fale. Na ia ave le ato paʻu i le fale ma la tatalaina ma lana avā le ato. Na matuā faateʻia i laʻua ona o le tele o le tupe sa iai, ma ni siaki ua uma ona sainia, o se tasi o na siaki, e tusa ma le tasi le miliona peso. Ae i se pepa na la maua i le atopaʻu, na iai le numera o se telefoni. Sa telefoni atu le ulugalii i lē e ona le atopaʻu ma fuafua e avatu le ato i le mea e faigaluega ai Marcelo. Ina ua taunuu atu lē e ana le ato, sa foliga popole le tamāloa. Ae na fai atu le pule o Marcelo e aua le popole, o ia o se tasi o Molimau a Ieova. Na avatu e lē ona le atopaʻu iā Marcelo se taui e na o le 20 peso (e tusa ma le U.S.$6). Na matuā ita le pule o Marcelo i le tamāloa, auā sa fiafia lava o ia i le faamaoni o Marcelo. Ona o lenei mea, na maua ai e Marcelo le avanoa e faamatala atu ai e faapea, ona o ia o se Molimau a Ieova, e manaʻo ai e fai le mea tonu i taimi uma lava.

I Kyrgyzstan na maua ai e Rinat, e ono tausaga se ato tupe a se fafine e nofo latalata ane. Sa iai i le ato se tupe e 1,100 som (e tusa ma le U.S.$25). Ina ua toe faafoʻi atu e Rinat le ato i le fafine, sa ia faitauina le tupe, ona fai atu lea i le tinā o Rinat, o lea e leiloa le 200 som. Na fai atu Rinat e na te leʻi aveina le tupe. Ona ō uma lea o i latou e saʻili le tupe ma maua ai e lata ane i le mea lea na maua ai le ato tupe. Na maofa le fafine ma faailoa atu lona loto faafetai iā Rinat ma lona tinā, muamua, ona o le toe faafoʻi atu o le tupe, ma lona lua, ona o le tausiga o ia e lona tinā i amioga faa-Kerisiano.