E Mafai Ona Tatou Onosaia so o se Faigatā!
E Mafai Ona Tatou Onosaia so o se Faigatā!
PO UA e feagai ea ma se faigatā i lou olaga? Po ua e lotovaivai ai ma lē mafai ona onosaia lenā faigatā? Pe e te manatu ea i nisi taimi, e leai se isi o maua i lea faafitauli ma ua leai se vaifofō? Afai o le tulaga lenā, aua le faavaivai! Ua faamautinoa mai e le Tusi Paia, e mafai e le Atua ona fesoasoani iā i tatou e onosaia so o se faigatā tatou te fesagaʻia.
Ua faailoa mai e le Tusi Paia e oo i auauna a le Atua “tofotofoga eseese.” (Iakopo 1:2) Ia mātau le upu “eseese” (faa-Eleni poi·kiʹlos). E tusa ai ma le faaaogāina o le upu i aso anamua, o le uluaʻi upu Eleni, o lona uiga “matalasi” po o le “felanulanuaʻi,” ma ua faamamafa ai “tofotofoga eseese.” O lea la, i se gagana faafaatusa, o “tofotofoga eseese” e pei e felanulanuaʻi. Ae ui i lea, o loo lagolagoina i tatou e Ieova ina ia mafai ai ona onosaia na tofotofoga. Aiseā ua tatou mautinoa ai?
“Le Alofa Tunoa Uiga Eseese o le Atua”
Ua taʻua e Peteru, ua maua Kerisiano i “tofotofoga eseese.” (1 Peteru 1:6) Na ia taʻua i lana tusi mulimuli ane, le “alofa tunoa uiga eseese o le Atua.” (1 Peteru 4:10) O le upu uiga eseese, e tutusa ma le uiga o le upu Eleni lea na talanoaina muamua. Na taʻua e se tagata atamai o le Tusi Paia e faatatau i lenei faaupuga: “E tāua tele lenei manatu. . . . Ona ua taʻua le alofa tunoa o le Atua i lenei upu o le poikilos, o lona uiga, ua mafai e le Atua ona foʻia so o se tulaga faigatā i so o se tagata.” Ua ia faapea atili mai: “E leai ni tulaga e tulaʻi mai, leai ni faalavelave faafuaseʻi, po o se manaʻoga tugā e lē mafai e le Atua ona feagai ma foʻia ona o lona alofa tunoa. E mafai e le Atua ona taulima mea uma e tutupu i le olaga. O lenei upu o le poikilos, ua tatou mafaufau ai i le matalasi ma le felanulanuaʻi o le alofa tunoa o le Atua, lea e mafai ona fesoasoani iā i tatou e onosaia faigatā uma.”
O le Alofa Tunoa o le Atua, Tatou te Onosaia ai Faigatā
E tusa ai ma le faamatalaga a Peteru, o se tasi auala e iloa ai le alofa tunoa o le Atua, e ala i tagata eseese o loo faia aʻe ai le faapotopotoga Kerisiano. (1 Peteru 4:11) E tofu uma lava auauna a le Atua ma meaalofa faaleagaga, po o tomai ia e avea ma puna o faalaeiauga iā i latou o feagai ma faigatā. (Roma 12:6-8) O se faaaʻoaʻoga, o nisi o le faapotopotoga o ni faiaʻoga iloga o le Tusi Paia. O a latou upu e faia ma le tofā mamao e uunaʻia ai isi e tumau. (Neemia 8:1-4, 8, 12) E faia e lē aunoa e isi ni asiasiga faaleoleo mamoe i aiga o i latou e manaʻomia le fesoasoani. O na asiasiga e faalaeiauina ai ma ‘faamāfanafana loto.’ (Kolose 2:2) Pe a faia e ovasia na asiasiga e faamalosia ai le faatuatua, ua latou faaooina atu se meaalofa faaleagaga. (Ioane 21:16) Ae o loo iai foʻi isi i le faapotopotoga ua mātauliaina i le māfana, alofa ma le faapelepele i feutagaʻiga ma uso talitonu o ē o loo faanoanoa ona o faigatā. (Galuega 4:36; Roma 12:10; Kolose 3:10) O le alofa ma le fesoasoani a na uso ma tuafāfine, o se faailoaga mataʻina lea o le alofa tunoa o le Atua.—Faataoto 12:25; 17:17.
‘O le Atua e Ana le Faamāfanafanaga Uma’
Ua saunia e Ieova le faamāfanafanaga. “O le Atua foʻi e ana le faamāfanafanaga uma; o lē na te faamāfanafanaina mai iā te i matou i lo matou puapuaga uma lava.” (2 Korinito 1:3, 4) O loo tali mai Ieova i a tatou tatalo mo se fesoasoani, e ala i le poto o loo i le Tusi Paia ma le malosi ua saunia e lona agaga paia. (Isaia 30:18, 21; Luka 11:13; Ioane 14:16) E mafai ona tatou loto tetele e ala i le folafolaga na tusia e Paulo. Na ia faapea mai: “Ua faamaoni le Atua, o lē na te lē tuuina atu outou i le faaosoosoga e sili i se mea ua outou lavatia, a e sauni foʻi faatasi ma le faaosoosoga se mea e sao ai, ina ia outou lavā oono.”—1 Korinito 10:13.
Ioe, po o le ā lava le ituaiga o tofotofoga e pei e felanulanuaʻi mai, ae e iai lava le faailoaga o le alofa tunoa o le Atua e fesoasoani iā i tatou e onosaia ai. (Iakopo 1:17) Ua fetaui lelei ma talafeagai le lagolagosua a Ieova i ana auauna, e tusa lava po o le ā le eseese o tofotofoga po o faigatā, ma o se faamaoniga tāua lenā o le “poto uiga eseese o le Atua.” (Efeso 3:10) Pe e te ioe i ai?
[Ata i le itulau 31]
E fesoasoani Ieova iā i tatou e onosaia faigatā