Galuega—O se Faamanuiaga po o se Avega Mamafa?

“E leai se tasi mea lelei i le tagata na ona ia . . . faafiafia lona loto i mea lelei i ana galuega.”—Failauga 2:24.

“E MATUĀ vaivai lava pe a mānava mai i le galuega.” O le manatu lenā, o se tagata se toʻatasi mai ni tagata faigaluega se toʻatolu e tusa ai ma se suʻesuʻega na faia talu ai nei. E lē o se mea e faateʻia ai le iai o lagona faapena i tagata e masani ona pagatia i mafatiaga ona o le faigaluega ovataimi, ma e ō foʻi ma ave isi galuega i le fale e fai ai; ae seāseā ona faamālō atu le pule iā i latou.

Ona o le tele o mea e fai, ua manatu ai le toʻatele o tagata faigaluega, ua pei i latou o ni tagata faatauvaa i se pisinisi telē e leai se alofa. E masani ona lē fiafia le pule pe afai e iai se manatu fou o se tasi. E masani foʻi ona aafia ai manatu o tagata e uiga i le galuega. E lē fiafia ai foʻi i le galuega ma lē manaʻo ai e faia le mea aupito sili. E oo ai ina ʻinoʻino le tagata i lana galuega ma avea ai o se avega mamafa.

 Iloiloina la Tatou Vaaiga

I nisi taimi, e lē mafai ona tatou suia o tatou tulaga. Ae peitaʻi, e mafai ona suia la tatou vaaiga. Afai ua e iloa ua taaʻina oe i vaaiga lē lelei e uiga i le galuega, e lelei ona e iloilo le silafaga a le Atua, faapea taʻiala e fesootaʻi ma lenei mataupu. (Failauga 5:18) Ua iloa e le toʻatele, o le iloiloina o nei taʻiala, ua maua ai le fiafia ma le loto malie i a latou galuega.

O le Atua, o Lē e sili ona galue mamafa. O le Atua, o sē e galue. Atonu e tatou te leʻi manatu faapena iā te ia, ae o le auala lenā ua ia uluaʻi faailoa mai ai o ia lava i le Tusi Paia. O loo amata le faamatalaga a le Kenese i le faapea mai, na faia e Ieova le lagi ma le lalolagi i le amataga. (Kenese 1:1) Seʻi manatu i le tele o matafaioi eseese sa faia e le Atua ina ua ia faia mea—o ia o se tusiata, o sē faamaopoopo, o se inisinia, o se tufuga, o sē sili lona silafia i le filifilia o mea, ma le faia o polokalame, o se saienitisi, o sē e poto i le faia o le ola, o se fai lafumanu, o sē faia gagana, ma le tele o isi mea.—Faataoto 8:12, 22-31.

O le ā le lelei o galuega a le Atua? Ua faapea mai le Tusi Paia, “ua lelei,” “ua matuā lelei lava.” (Kenese 1:4, 31) O le mea moni, “ua tala mai e le lagi le mamalu o le Atua,” ma e ao foʻi iā i tatou ona vivii atu iā te ia!—Salamo 19:1; 148:1.

Ae peitaʻi, e leʻi muta le galuega a le Atua i le faia o le lagi ma le lalolagi, ma le uluaʻi ulugalii. Na fetalai Iesu Keriso le Alo o Ieova e faapea: “O loo galue loʻu Tamā e oo mai lava i le aso nei.” (Ioane 5:17) Ioe, o loo galue pea Ieova i le tausia o mea ola uma na ia faia, ma laveaʻiina ona tagata tapuaʻi faamaoni. (Neemia 9:6; Salamo 36:6; 145:15, 16) O loo ia tofia foʻi tagata, o ē ua taʻua o ‘le ʻau faigaluega faatasi ma le Atua,’ e fesoasoani i le faataunuuina o isi galuega.—1 Korinito 3:9.

E mafai ona avea galuega ma faamanuiaga. Pe e lē o faapea mai le Tusi Paia o le galuega o se mala? I le Kenese 3:17-19, e te ono manatu ai na faasalaina e le Atua Atamu ma Eva ona o lo la fouvale i le tuu atu lea o galuega mamafa iā i laʻua. Ina ua faasalaina na uluaʻi tagata, na fetalai atu le Atua iā Atamu: “E te ʻai foʻi au mea e ʻai ma le afu o ou mata, seʻia e toe foʻi atu i le eleele.” Po ua faamalaia uma ai ea i inā galuega?

E leai. Na i lo o lea, ana lē usiusitai Atamu ma Eva, semanū e lē mafai ona faalautele atu le tulaga o le Parataiso i Etena i lenā taimi. Na faamalaia ai e le Atua le laueleele. Sa manaʻomia ai ona afu ma tigā se tagata i le saʻilia o mea e ola ai mai le eleele.—Roma 8:20, 21.

Ua faapea mai le Tusi Paia, o galuega, o se faamanuiaga e ao ona faapelepele i ai, ae e lē o taʻua mai, o galuega o se mala. Ia manatua, o le Atua lava ia, o sē e galue mamafa. O le faia o le tagata i lona faatusa, ua tuuina atu ai e Ieova i tagata le pule e tausia ai mea ola uma i le lalolagi. (Kenese 1:26, 28; 2:15) O lenā tofiga na tuuina atu e le Atua a o leʻi fetalaia atu e Ieova upu i le Kenese 3:19. Ana faapea o se mala le galue, semanū e lē taitai lava ona faatonuina e Ieova tagata ina ia faia ni galuega. Sa tele ni galuega a Noa ma lona aiga a o leʻi oo mai ma ina ua uma le Lolo. I le vaitaimi o le Faa-Kerisiano, na uunaʻia ai foʻi soo o Iesu ina ia galulue.—1 Tesalonia 4:11.

Ae ua avea foʻi galuega o se avega mamafa i aso nei. O mafatiaga, o toʻatugā, o le fiugofie, o le lē fiafia, o le agaga tauvā, o le taufaasesē ma faiga lē tonu, o ni “laau tuitui ma laau talatala” na ua taatele i galuega i aso nei. Ae o le galuega lava ia, e lē o se mala. I le Failauga 3:13, ua taʻua ai i le Tusi Paia ia galuega ma ona fua, o se meaalofa mai le Atua.—Tagaʻi i le pusa “Feagai ai ma Omiga Mai Galuega.”

E mafai ona e viia le Atua i au galuega. E masani lava ona viiviia e tagata i le fale faigaluega ni galuega lelei. O galuega faapena, e ōgatusa ma le Tusi Paia. E faia e le Atua ana  galuega i se auala aupito sili ona lelei. Ua ia foaʻi mai iā i tatou taleni ma tomai, ma e finagalo o ia ina ia faaaogā o tatou tomai i ni auala aogā. O se faaaʻoaʻoga, na faatumuina e Ieova ia Pesaleli, ma Aliavu i le poto ma le faautauta ma le iloa lelei, e fai ai galuega matagofie a o fausia le fale fetafaʻi o Isaraelu. (Esoto 31:1-11) E faaalia i lenei mea, sa fiafia Ieova i galuega a tufuga atamamai, le tusia o ata, ma isi vala o a latou galuega.

E fesoasoani lenei mea iā i tatou e vaai ai i o tatou tomai ma galuega, o ni meaalofa mai le Atua, ma e lē tatau ona manatu māmā i ai. I lea, ua apoapoaʻia ai Kerisiano ina ia faia e peiseaʻī o loo suʻesuʻeina e le Atua a latou galuega: “O mea uma lava tou te faia, ia faia ma le loto, peiseaʻī ua faia i le Alii, a e lē o tagata.” (Kolose 3:23) Ua poloaʻiina auauna a le Atua ina ia filigā i le faia o galuega lelei, i lea, e mafai ai ona uaʻi mai tagata faigaluega ma  isi i le feʻau faa-Kerisiano.—Tagaʻi i le pusa “Faatatauina o Taʻiala a le Tusi Paia i Galuega.”

O lea la, e lelei ai ona fesili ifo iā i tatou lava, po o le ā le lelei ma le filigā o faia ai a tatou galuega. Po o le a fiafia le Atua i mea o tatou faia? Po o faamalieina i tatou i le auala o faia ai galuega ua tofia mai? Afai e leai, e mafai ona faaleleia.—Faataoto 10:4; 22:29.

O lau galuega ma lou itu faaleagaga. E ui lava e lelei le galulue mamafa, ae e iai se isi vala autū e maua ai le loto malie i le galuega ma lou soifuaga. O la tatou mafutaga ma le Atua. O le faaiʻuga lenei na faia e le tupu o Solomona, o lē sa galue mamafa ma olioli i oloa uma ma le soifuaga sologa lelei na ia maua: “Ia e mataʻu i le Atua, ma e anaana i ana poloaʻiga; auā o mea ia e tatau i tagata uma.”—Failauga 12:13.

E manino mai, e tatau ona tatou manatunatu po o le ā le finagalo o le Atua i so o se mea lava tatou te faia. Po o tatou galulue e ōgatusa ma lona finagalo, po o tatou faasagatau i ai? Po o tatou taumafai e faafiafia le Atua, po o i tatou lava? Afai e tatou te lē faia le finagalo o le Atua, o le a oo ina pagatia ai  ona o le atuatuvale, le tuua toʻatasi, ma le lē toe fiafia.

Ua fautua mai Steven Berglas i ē ua matuā vaivai ona o galuega, ina ‘ia saʻili se isi mea latou te iloa e aogā, ma e fiafia i ai ina ia faamalieina ai i latou.’ E leai lava se isi mea e sili atu ona aogā e mafai ona faia na i lo o le auauna i Lē na foaʻiina mai iā i tatou ia tomai ma le mafaufau e faia ai galuega aogā. O le faia o galuega e faafiafia ai le Atua, o le a tatou maua ai le loto malie. Na silafia e Iesu o le galuega na tofia atu e Ieova na te faia, sa pei o se mea ʻai na faamalieina ai, ma faamalosia ai o ia. (Ioane 4:34; 5:36) Ia manatua, ua valaaulia i tatou e le Atua, o Lē silisili ona galue mamafa, ina ia avea ma ‘ʻau faigaluega faatasi’ ma Ia.—1 Korinito 3:9.

O le tapuaʻi i le Atua ma le tuputupu aʻe faaleagaga, ua sauni ai i tatou mo tiute tauave ma galuega tauia. Talu ai o le galuega e masani ona tumu i omiga, feteenaʻiga, ma mea e manaʻomia, e mafai la e lo tatou faatuatua ua mauaa, ma le tulaga faaleagaga, ona aumaia le malosi lea tatou te manaʻomia, a o taumafai ina ia avea ma tagata faigaluega po o pule e sili atu ona lelei. I le isi itu, o le faigaluega i lenei lalolagi lē amio-Atua, e iloa ai mea e manaʻomia ona faamalosia ai lo tatou faatuatua.—1 Korinito 16:13, 14.

Le Taimi o le a Avea ai Galuega o se Faamanuiaga

O i latou o loo galulue mamafa i le taimi nei e auauna i le Atua, e faamoemoe i le taimi o le a ia toe faafoʻisia ai le Parataiso, ona faatumuina ai lea o le lalolagi atoa i galuega aogā. Na valoia e Isaia e faapea: “Latou te faia fale, ma latou mau ai; latou te totō tovine, ma latou aai i o latou fua. Latou te lē fai fale ina ia mau ai nisi; latou te lē totō ina ia ʻai ai nisi; . . . e uma lava i ē ua filifilia e aʻu mea na faia e o latou lima.”—Isaia 65:21-23.

Maʻeu se faamanuiaga o le a iai galuega i lenā taimi! O le iloaina o le finagalo o le Atua mo oe, ma gaoioi e ōgatusa ma lenā finagalo, tau ina ia e iai faatasi ma i latou ua faamanuiaina e Ieova ma ia e vaai pea ‘i mea lelei i au galuega uma.’—Failauga 3:13.

[Faamatalaga faaopoopo i le itulau 8]

O le Atua, o Lē sili ona galue mamafa: Kenese 1:1, 4, 31; Ioane 5:17

[Faamatalaga faaopoopo i le itulau 8]

E mafai ona avea galuega ma faamanuiaga: Kenese 1:28; 2:15; 1 Tesalonia 4:11

[Faamatalaga faaopoopo i le itulau 8]

E mafai ona viia le Atua i au galuega: Esoto 31:1-11; Kolose 3:23

[Faamatalaga faaopoopo i le itulau 8]

O lau galuega ma lou itu faaleagaga: Failauga 12:13; 1 Korinito 3:9

[Pusa/Ata i le itulau 6]

Feagai ai ma Omiga Mai Galuega

Ua faavasega e fomaʻi omiga i galuega o se lamatiaga i lou soifua. E faapogaia ai le puta papala, mafatiaga o le mafaufau, ma e ono iʻu ai ina pule i le ola. O le upu faa-Iapani mo lea mea, o le karoshi, “maliu ona o le soona galue.”

O le tele o vala eseese i le galuega, e māfua ai ona oo i mafatiaga. E pei o le suia o itula faigaluega po o tulaga, o faafitauli mai pule, le suia o tiute tauave a se tasi po o le ituaiga o galuega, o le litaea, po ua faateʻa mai le galuega. Ina ia faafetaiaʻia na omiga, ua taumafai ai nisi e suia le galuega. A o isi e latou te lē taʻu atu i isi na omiga, ae ua oo ina aliaʻi mai ai isi āuga o le olaga, ma o le tulaga masani lava, o le aiga. O nisi ua oo ina tigā o latou faalogona, ma oo ai ina mafatia le mafaufau.

Ua lava ta oso ia Kerisiano e feagai ma omiga e māfua mai i galuega. Ua saunia e le Tusi Paia taʻiala e faamalosia ai i tatou i taimi faigatā, faatasi ma ni iʻuga aogā mo lo tatou lelei faaleagaga ma tau i faalogona. O se faaaʻoaʻoga, na fetalai Iesu: “Aua tou te popole i le aso a taeao; auā e popole le aso a taeao i ana lava mea. E tatau i le aso lona lava leaga.” O le fautuaga i inei, ia taulaʻi atu i faafitauli o le aso lenei, ae lē o a taeao. I lea, e tatou te lē soona faatetelē ai o o tatou faafitauli, ma ʻalofia le faateleina omiga e oo mai iā i tatou.—Mataio 6:25-34.

E tatau ona faalagolago atu Kerisiano i le malosi mai le Atua, ae lē o lo latou lava malosi. Pe a tatou lagona ua tauāu ina tatou faavaivai, e mafai ona aumai e le Atua le filemu, ma faafiafia i o tatou loto, ma tuuina mai le atamai ina ia feagai ai ma so o se tulaga faigatā. Na tusi Paulo: “Ia outou loto tetele i le Alii, ma le malosi o lona mana.”—Efeso 6:10; Filipi 4:7.

Mulimuli ane, o le a tatou maua ai iʻuga lelei e ui lava i tulaga faigatā. O tofotofoga, e mafai ona tatou liliu atu ai e saʻili iā Ieova, ma faatuatua iā te ia. E mafai foʻi e na mea ona uunaʻia ai i tatou, ia atiina aʻe se tagata faa-Kerisiano, ma finafinau ai i taimi o omiga. Ua apoapoaʻi mai Paulo e faapea: “Ua tatou mitamita foʻi i puapuaga, ina ua tatou iloa o le puapuaga e tupu ai le onosai, o le onosai e tupu ai le mautinoa, o le mautinoa e tupu ai le faamoemoe.”—Roma 5:3, 4.

O lea la, e mafai ona avea omiga, ma uunaʻiga e tatou te tutupu aʻe ai faaleagaga, na i lo atuatuvalega ma faanoanoaga.

[Pusa/Ata i le itulau 7]

FAATATAUINA O TAʻIALA A LE TUSI PAIA I GALUEGA

O uiga ma amioga a se Kerisiano i le galuega, e pogai ai ona fiafia isi tatou te faigaluega faatasi, i le feʻau a le Tusi Paia. I lana tusi iā Tito, na apoapoaʻi atu ai Paulo i ē e faigaluega, ina “ia usiusitai i latou i o latou lava [pule], ia latou taumafai ona faafiafia i ai i mea uma lava, aua neʻi faatau upu i ai. Aua neʻi latou gaoi, a ia faaalia e i latou ua latou faamaoni aʻiaʻi, ina ia viia ai i mea uma lava ona o i latou le aʻoaʻoga a le Atua lo tatou Faaola.”—Tito 2:9, 10.

Seʻi manatu i le mea na tusi atu ai se tamāloa faipisinisi i le ofisa ulu o Molimau a Ieova i le lalolagi: “Ua ou tusi atu e talosagaina se faatagaga e faafaigaluega ai Molimau a Ieova. Ou te manaʻo e faafaigaluega i latou auā ua ou iloa o i latou o ni tagata faamaoni, maufaatuatuaina, ma e lē faaʻoleʻole iā te aʻu. E na o le pau lava tagata ou te faatuatuaina, o Molimau a Ieova. Faamolemole ou te moomia se fesoasoani.”

O Keli o se tamaʻitaʻi Kerisiano e faigaluega i le ofisa o se aʻoga. Ona o le lē femalamalamaaʻi, na fai atu ai e se tasi la te faigaluega ni upu masoā iā te ia i luma o isi tamaiti aʻoga. Na faapea mai Keli, “Sa tatau ona ou vaavaai totoʻa ina neʻi faalumaina le suafa o Ieova.” O lea, i aso e lima na sosoo ai, na mafaufau ai Keli i se auala e mafai ona ia faatatauina ai taʻiala a le Tusi Paia, e pei o le Roma 12:18: “Afai e mafaia iā te outou, ia outou nofo lelei ma tagata uma lava.” Sa ia tusi faatoese atu e ala i le i-meli, i le tamaʻitaʻi lea. Na valaaulia ai e Keli ina ia faatali mai pe a mānava seʻi o la talanoa ma faalelei le faafitauli. Ina ua la faia faapea, na gau le loto o lea tamaʻitaʻi ma faailoa atu le atamai o le mea ua faia e Keli. Sa ia faapea atu iā Keli, “Ua ou iloa, ua mafaia lenei mea ona o lau lotu,” ma sa la feopoopotaʻi a o la faatofā. O le ā le faaiʻuga a Keli? “E lē mafai lava ona tatou sesē, pe afai e tatou te faatatauina taʻiala a le Tusi Paia.”

[Ata i le itulau 4, 5]

E toʻatele tagata faigaluega ua manatu ua pei i latou o ni tagata faatauvaa i se pisinisi telē e leai se alofa

[Faamatalaga i Ata]

Japan Information Center, Consulate General of Japan in NY

[Faamatalaga i Ata i le itulau 8]

Globe: NASA photo