Na Faafefiloi e PHILO le Tusi Paia ma Manatu o Tagata
Na Faafefiloi e PHILO le Tusi Paia ma Manatu o Tagata
I LE 332 T.L.M., na ō atu ai Alesana le sili ma ana ʻau i Aikupito. A o leʻi ō atu ma ana ʻau ina ia faatoʻilaloina foʻi isi atunuu, na ia faavaeina ai le aai o Alesania. Na avea ma taulaʻiga o aganuu a Eleni. Pe tusa ma le 20 T.L.M., na fanau mai ai le isi tagata lauiloa, o ana auupega e lē o pelu ma tao, a o filosofia po o manatu o tagata. O ia lea o Philo mai Alesania po o Philo o Iutaia, auā o ia o le tagata Iutaia.
Ina ua mavae le faaumatiaga o Ierusalema i le 607 T.L.M., na taape solo ai tagata Iutaia ma nonofo i isi atunuu, ma e toʻatele sa nonofo i Aikupito. E faitau afe na nonofo i Alesania. Ae peitaʻi, na iai faafitauli i tagata Iutaia ma tagata Eleni. Na mumusu tagata Iutaia e tapuaʻi i atua o Eleni, ae na amusia e tagata Eleni le Tusi Paia Eperu. Na masani Philo i na feteenaʻiga, ona sa aʻoaʻoina o ia i aʻoga i Eleni ma sa tausia aʻe o ia i talitonuga faa-Iutaia. Na ia talitonu o le lotu Iutaia, o le tapuaʻiga moni lea. Peitaʻi, e lē pei o le toʻatele, na saʻili e Philo se auala filemu e taʻitaʻia ai tagata o Nuu Ese i le Atua. Na ia manaʻo ina ia fiafia tagata i le lotu Iutaia.
Tuu ni Manatu Fou i le Tusi Paia
O le gagana na fanau mai ai Philo, o le faa-Eleni e pei o le toʻatele o tagata Iutaia i Alesania. O lea la o le faavae o ana aʻoaʻoga, o le faaliliuga Eleni o le Kenese e oo i le Malaki, e taʻua o le Septuagint. A o ia suʻesuʻeina lenā faaliliuga, na ia talitonu ai, e tele ni manatu faafilosofia i na tusitusiga, ma na poto tele ai Mose i “manatu faafilosofia.”
I senituri muamua atu, na faigatā ona talitonu tagata popoto o Eleni i nei tala e uiga i atua ma atua fafine, o sauʻai ma temoni— o tala tuu faa-Eleni i aso o le vavau. Na amata ona latou suʻesuʻe ina ia maua se uiga o na tala. Na faapea mai se tagata atamai i nei mataupu e suafa iā James Drummond e uiga i nei faiga: “E masani ona suʻesuʻe e le faifilosofia pe e iai se uiga lilo o nei tala tuu o le vavau, ina ia latou aʻoaʻoina ai se mea, ma atonu o le fuafuaga lenā a ē na fatuina nei tala auā e mataga ma valea tele.” O lenei faiga ua manatu i ai tagata o loo iai se uiga lilo o se tala ma e faaleagaga, ma o le auala lenā na taumafai Philo e faamatala ai le Tusi Paia.
O se faataʻitaʻiga, seʻi manatu i le Kenese 3:21 e faapea: “Ua faia foʻi ofu paʻu e Ieova le Atua mo Atamu ma lana avā, ua faaofu ai iā te i laʻua.” Na manatu tagata Eleni, e lē mafai ona faia e le Atua ni ofu, ona e mamalu tele lona tulaga. O lea la, na faia ai e Philo se uiga faafaatusa i lenā fuaiupu ma faapea atu: “O lenā ofu paʻu o se upu faafaatusa e faatatau atu i le paʻu o le tino o le tagata. Na muamua faia e le Atua le tomai e iloa ai se mea ma faaigoa iā Atamu, ona ia faia loa lea o le Ola. Na ia faia mulimuli le tino ma taʻua i se uiga faafaatusa, o ofu paʻu o le tino.” Na taumafai Philo e faauiga atu le faaofuina o Atamu ma Eva e tusa ma manatu faafilosofia.
Seʻi manatu foʻi i le Kenese 2:10-14, o loo faamatalaina ai vai i le faatoʻaga o Etena, ma o loo taʻua ai vaitafe e fā, o loo tafe atu i le faatoʻaga. Na taumafai Philo e suʻe ni uiga lilo po o ni uiga faafaatusa o nei vaitafe e fā. Ina ua uma ona ia faamatalaina le laufanua, na ia faapea mai: “Atonu e iai ni uiga faafaatusa o lenei fuaiupu, o vaitafe e fā o faailoga ia o amioga e fā.” Na ia manatu o le vaitafe o Pisona e faatusaina ai le amio mamā, o Kaiona o le faailoga lea o amioga mamalu, o Tikarise ua faatusaina ai le maumauaʻi, ma le vaitafe mulimuli o Eufirate ua faailogaina ai le fai mea tonu. O lea la, e faaleagaga uiga o nei vaitafe.
Na faaaogā e Philo upu faafaatusa e faamatalaina ai tala o mea na faia e le Atua, e pei o le fasiotia e Kaino o Apelu, le lolo i aso o Noa, le faaeseeseina o gagana i Papelu, ma le tele o upu moni faavae o le Tulafono a Mose. E pei ona faaalia i le faaaʻoaʻoga i le palakalafa muamua atu, e masani ona ia taʻu atu le uiga moni o le mau, ona faaalia lea o lana filosofia agaʻi i ai: “Atonu o se mea lelei lo tatou iloa o loo iai se uiga faafaatusa o ia upu.” I tusitusiga a Philo, e masani
ona matilatila mai uiga faafaatusa ae ua mou atu ai le uiga moni o le Tusi Paia.O Ai le Atua?
Na finau Philo i le iai o le Atua i ni faataʻitaʻiga malolosi. Ina ua uma ona faamatalaina le laufanua, o vaitafe, le lalolagi ma fetu na ia faaiʻu mai e faapea: “E sili ona ofoofogia le auala na faia ai le lalolagi, ma e pei lava na faia e se tasi e atamai ma atoatoa lona poto. Ona o nei mea, ua tatou maua ai le manatu, o loo soifua le Atua.” E lelei lenei manatu.—Roma 1:20.
Ae ina ua faamatalaina e Philo uiga o le Atua o Le ona le malosi uma lava, na matuā see ese o ia mai le upu moni. Na faapea mai Philo o le Atua “e leai ni ona uiga patino” ma “e lē masuʻesuʻeina.” Na faalēaogā e Philo taumafaiga ina ia iloa le Atua i lona faapea mai, “e valea tele le taumafai ona fai ni saʻiliga ina ia malamalama i uiga patino o le Atua.” O lenei manatu e lē mai i le Tusi Paia ae mai le filosofia o le tagata faapaupau o Plato.
Na taʻua e Philo, e lē masuʻesuʻeina le Atua ma e lē talafeagai ona taʻua o ia i se suafa patino. Na ia fai mai: “E talafeagai nei manatu auā e lē mafai ona avatu ni suafa i le Atua soifua.” Pagā le sesē o lenei manatu!
Ua taʻua manino i le Tusi Paia e iai le suafa o le Atua. Ua taʻua i le Salamo 83:18: “O oe, e ou le suafa o Ieova, na o oe lava o le Silisili ese i le lalolagi uma.” Ua tusia i le Isaia 42:8 fetalaiga a le Atua: “O aʻu o Ieova, o loʻu igoa lea.” Aiseā na aʻoaʻo ai e Philo o se tagata Iutaia poto i le Tusi Paia, o le Atua e leai sona suafa? Talu ai ua ia faamatalaina e lē o le Atua o le Tusi Paia, a o se atua e lē mafaamatalaina e tusa ma filosofia Eleni.
O le ā e Tupu i le Tagata pe a Oti?
Na aʻoaʻo e Philo o le agaga, e ese mai le tino o le tagata. Ua ia taʻua le iai o le tino ma le agaga o le tagata. Pe e mafai ona oti le agaga? Mātau le faamatalaga a Philo: “A o tatou feola, e pei lava ua oti o tatou agaga ma tanu i o tatou tino e pei ua iai i se tuugamau. Peitaʻi, pe a oti [le tino], ona tuusaʻoloto lea o le agaga mai le tino leaga ma e ola pea.” Na manatu Philo, e faafaatusa le oti o le agaga. E lē mafai ona oti ae e ola pea lava pea.
Peitaʻi, o le ā le aʻoaʻoga a le Tusi Paia e tusa ai ma le tulaga o le tagata pe a oti? Ua fautuaina i tatou e le faisalamo e aua le faatuatua i alii. O le ā le māfuaaga? “E alu ese lona agaga, e foʻi atu i le eleele na i ai o ia; e faaumatia i lea lava aso ona manatunatu.” (Salamo 146:3, 4) Pe a faaumatia ona manatunatu, e na te lē toe lagona ni fiafiaga po o ni mafatiaga.
I le taʻitaʻiga a le Atua, na faamatala manino ai e Solomona le uiga o le oti e faapea: “O ē ua ola, ua latou iloa e oti i latou; a o ē ua oti, latou te lē iloa se mea.” E tusa ai ma lea tulaga, na faalaeiau ai Solomona: “O mea uma ua e iloa e faia e ou lima, inā faia ia ma lou malosi; auā e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Failauga 9:5, 10) E manino le mata o le vai, o ē feoti latou te lē iloa se mea. E latou te lē iloa mea o loo faia mo i latou e ē o loo ola.
Ina ua maliu Philo, e leʻi toe uaʻi atu tagata Iutaia iā te ia. Ae peitaʻi, na fiafia pea iā te ia i latou ua faapea mai o Kerisiano. Na manatu Eusipio ma isi taʻitaʻi lotu, na faaliliuina Philo i le faa-Kerisiano. Na taʻua o ia e Ierome, o se tasi o Tamā o le lotu. Na faasaoina pea e ē na fulitua i le faa-Kerisiano moni tusitusiga a Philo na i lo tagata Iutaia.
O tusitusiga a Philo na oo atu i se suiga faalotu. O ana aafiaga ua taʻitaʻia atu ai ē ua taʻua o Kerisiano e talia le aʻoaʻoga e lē faale-Tusi Paia, o le ola pea o le agaga pe a
oti le tagata. O le aʻoaʻoga a Philo e uiga i le Lokou po o le Upu, ua fesoasoani i le faaauilumaina o le aʻoaʻoga o le Tolutasi lea e lē faale-Tusi Paia ma o se aʻoaʻoga a lotu ua fulitua i le faa-Kerisiano moni.Aua Neʻi Faasesēina
I lana suʻesuʻega o tusitusiga Eperu, na faamautinoa ai e Philo, e na te lē o “misia so o se uiga faafaatusa semanū e natia ai i gagana faigofie a le Tusi Paia.” Ae peitaʻi, na taʻua e Mose e tusa ma le Tulafono a le Atua i le Teuteronome 4:2: “Aua tou te faaopoopo se upu i upu ou te fai atu ai iā te outou, aua foʻi tou te aveeseina ai se upu; ina ia outou tausiusi i poloaʻiga a Ieova lo outou Atua ou te fai atu ai iā te outou.” Na faanenefu e Philo faatonuga manino o loo i le Tusi Paia, tainane lava o ni ana fuafuaga lelei.
Na taʻua e Peteru: “E leʻi usiusitai i matou i tala o le vavau ua fatua ma le poto, ina ua matou faailoa atu iā te outou le mana ma le afio mai o lo tatou Alii o Iesu Keriso.” (2 Peteru 1:16) E lē pei o tusitusiga a Philo, o faatonuga a Peteru i uluaʻi Kerisiano, sa faavae i mea moni ma le taʻitaʻiga a le agaga o le Atua, “o le Agaga lea e tupu mai ai le upu moni.”—Ioane 16:13.
Pe afai e te naunau e tapuaʻi i le Atua o le Tusi Paia, e te manaʻomia la taʻitaʻiga moni, ae lē o ni manatu o tagata. E te manaʻomia le poto saʻo iā Ieova ma lona finagalo, ma e te manaʻomia foʻi le lotomaulalo ina ia avea ai o se tagata suʻesuʻe ma le faamaoni. Pe afai e te suʻesuʻe le Tusi Paia ma lenā uiga lelei, o le a oo ina e iloa le ‘tusi paia, lea e mafaia ona faapoto ai iā te oe e iʻu ai i le faaolataga i le faatuatua ua iā Keriso Iesu.’ O le a e iloa ai o le Afioga a le Atua e mafai ona e ‘atoatoa ona lelei ai, ma saunia lava i galuega lelei uma lava.’—2 Timoteo 3:15-17.
[Pusa/Ata i le itulau 10]
O LE AAI SA NOFO AI PHILO
Na nofo ma faigaluega Philo i Alesania i Aikupito. Ua loa ona mātauliaina lenei aai i ona faletusi ma felafolafoaʻiga a tagata atamamai.
Na aʻoaʻoina tamaiti e faiaʻoga lauiloa o le aai. Na matuā taʻutaʻua le faletusi o Alesania i le lalolagi. Na oo ina matuā faatumulia lea faletusi i le faitau afe o tusi, ma sa saʻili e i latou na vaaia le faletusi ia kopi o tusitusiga uma.
Mulimuli ane, na faasolo malie ona mou atu le taʻutaʻua o Alesania ma le poto sa iai. Na ave e emeperoa Roma le faamuamua i o latou lava aai, ma na oo ina lauiloa aganuu o Europa. Na paʻū Alesania i le senituri lona fitu T.A., ina ua faatoʻilaloina le aai. E oo mai i le asō ua matuā faanoanoa pea le ʻautusitala ona ua lē toe iai lenā faletusi taʻutaʻua, ma ua faapea mai nisi, ua faalavelavea ai le agaʻigaʻi i luma o tagata.
[Faamatalaga i Ata]
L. Chapons/Illustrirte Familien-Bibel nach der deutschen Uebersetzung Dr. Martin Luthers
[Pusa i le itulau 12]
FAAMATALAGA FAAFAATUSA I ASO NEI
O le uiga o lea mea, “o le faaalia atu o se mataupu e ala i ni tagata ma gaoioiga faafaatusa.” Ua masani ona faauiga atu tala ua faaaogā ai upu faafaatusa i mea sili ona tāua o loo natia. E pei o Philo mai Alesania, ua faamatala e nisi taʻitaʻi lotu i aso nei le Tusi Paia i lenā lava auala.
Ia iloilo le Kenese mataupu e 1-11, lea o loo faamauina ai le talafaasolopito i le faia o le tagata e oo atu i le faataapeapeina o tagata i le olo o Papelu. Ua faapea mai le New American Bible o se faaliliuga faa-Katoliko e faatatau i lenā vaega o le Tusi Paia: “Ina ia malamalama tagata Isaraelu o ē sa tatau ona faasaoina upu moni o loo i nei mataupu, sa tatau ona faailoa atu i ni faaupuga e masani ai tagata i na ona pō. O le māfuaaga lea, e tatau ai ona matuā manino le eseesega o upu moni mai i o latou ofu.” O lona uiga e lē tatau ona malamalama i le Kenese 1-11 e tusa ma faaupuga ua tusia ai. E pei ona ufiufi le tino e le ofu, e faapena foʻi ona ufitia isi uiga loloto o nei tala.
Ae peitaʻi, na aʻoaʻo e Iesu, o na tala o loo i le tusi o Kenese o ni mea moni lava na tutupu. (Mataio 19:4-6; 24:37-39) Na ioe Paulo ma Peteru i na tala. (Galuega 17:24-26; 2 Peteru 2:5; 3:6, 7) E teena e tagata aʻoga faamaoni o le Tusi Paia faamatalaga e lē ōgatusa ma le Tusi Paia.
[Ata i le itulau 9]
Le molī o le ava i Alesania
[Faamatalaga i Ata]
Archives Charmet/Bridgeman Art Library