O Faafitauli i le Galuega

“O le faigaluega, o se mea e matuā fiafia ai ona e iloa ai, o loo tele pea ni mea lelei o loo tatou faia.”—Katherine Mansfield, o se tusitala (1888-1923).

PE E faapena lou manatu i le galuega e pei o le faamatalaga o i luga? O le ā so oe lava manatu i le galuega? Po ua e fiu i lau galuega? Po o le mea o e fiafia pea i lau galuega, ma masani ai ona e faigaluega ovataimi?

I le toʻatele, e masani lava ona alu uma lo latou taimi e faigaluega ai i le aso atoa. I nisi taimi, atonu e tatou te siitia atu ai i se isi nofoaga ona o le galuega. E mai lava i le taimi o le talavou e oo ina litaea mai galuega, ua iloa e le toʻatele, ua tele ina latou pupū atu i galuega. O nisi o i tatou, ua faamalieina i a tatou galuega. A o isi ua faatāua galuega, ona o le lelei o totogi, po ona o se tulaga maualuga, a o isi, ua vaai i le galuega ua na o se mea e faapasi ai le taimi, po o se faamaʻimau taimi foʻi.

E iai i latou e faigaluega ina ia maua ai mea e tausia ai i latou, e iai foʻi isi ua soona pupū i galuega; a o isi ua maliliu ona o tulaga i a latou galuega. O se faataʻitaʻiga, e tusa ai ma se lipoti a le Malo Aufaatasi e faapea, e sili atu tagata ua pagatia ma maliliu ona o galuega “na i lo o ē uma ua maliliu i “taua, fualaau faasāina ma le ʻava malosi.” E lē gata i lea, na lipotia mai i le nusipepa a Lonetona, o le Guardian e faapea: “E sili atu i le lua miliona tagata e maliliu i tausaga taʻitasi ona o faalavelave faafuaseʻi i galuega, po o faamaʻi . . . O le aafia i le pefu, o vailaau, le paʻō ma ave o uila malolosi, ua pogai ai le kanesa, le maʻi fatu ma le pē o le tino.” O isi mea e lua e sili atu ona leaga i tulaga o galuega i aso nei, o le faafaigaluega o tamaiti ma le faafaigaluega faamalosi o tagata matutua.

I le ma lea, ua taʻua foʻi e Steven Berglas, le “matuā vaivai o le tino ma le mafaufau.” Ua ia faamatalaina le tagata faigaluega filigā o sē ua ausia se tulaga maualuga, ae ua na ona ia lagona ai le “matuā atuatuvale ma le loto mafatia ona ua ia manatu, ua puʻea faamanu i ofaga o ia i le galuega, ua lē mafai ona ia suia lana galuega pe maua ai se loto fiafia.”

Eseesega o le Galue Mamafa ma le Soona Pupū i Galuega

Talu ai o loo galulue tagata mo le tele o itula, o se mea lelei la ona iloa le eseesega o ē e galulue mamafa, ma i latou ua soona pupū i galuega. E toʻatele ua soona pupū i galuega,  ma le manatu o se mea e saogalemu ai i se lalolagi fevaevaeaʻi; a o tagata e maelega i galuega, ua manatu o se mea talafeagai ma o se tiute tauave e faamalieloto. O ē ua soona pupū i galuega, ua oo ina lē amanaʻia isi mea tāua i le olaga; ae o ē galulue mamafa, latou te iloa le taimi e uma ai le galuega, ma uaʻi atu i isi mea tāua; e pei o le auai i le faamanatuina o a latou faaipoipoga. A o tagata ua soona pupū i galuega, e matuā fiafia e galulue ovataimi; ae lē faapena lagona o tagata galulue mamafa.

I aso nei, ua faamamafa ai e le lalolagi le galue ovataimi soo e faapea, o se mea lelei. Ona o le iai o telefoni feaveaʻi, ua masani ai ona galulue pea nisi pe a toe foʻi i le aiga. Afai e masani ona faigaluega pea le tagata pe a toe foʻi i le fale i aso uma, o le a oo lava ina afāina ai o latou ola.

O ā manatu o nisi i na uiga lē lelei? Ua iloa e tagata popoto i lenei mataupu, ua amata ona faia e tagata soona pupū i galuega lotu i fale faigaluega. Na lipotia mai i le nusipepa o le San Francisco Examiner e faapea, “ua matuā fiafia le toʻatele ona ua faia lotu i fale faigaluega.”

Ua faapea mai se lipoti talu ai nei e faatatau i le nofoaga autū o le poto faatekonolosi, i Silicon Valley, i le Iunaite Setete: “E toʻatele tagata ua vaea mai galuega, ua liliu atu i le Atua ma le Tusi Paia.” Po o le ā lava le aogā o lenā mea, e toʻatele tagata i le lalolagi ua iloa ua fesoasoani le Tusi Paia i a latou galuega, ma iʻu ai ina latou ola i ni olaga lelei.

E faapefea ona fesoasoani le Tusi Paia iā i tatou e maua se vaaiga saʻo i le galuega? Pe e iai ni taʻiala faale-Tusi Paia ina ia tatou taulau ai i le feagai ai ma luʻi i fale faigaluega i aso nei? O le a taliina e le mataupu lea e sosoo mai nei fesili.