“Sauāina Ona o Lona Faatuatua”
“Sauāina Ona o Lona Faatuatua”
NA FAUSIA se maa faamanatu i se malae i le taulaga o Cernobbio, i le itu i mātū o Italia, e faamanatu ai tagata o ē na sauāina ma lē amanaʻia a latou aiā tatau. O se tasi o faamaumauga ua maua i lenei maa faamanatu, ua tusia ai le igoa o Narciso Riet. Na soifua mai o ia i Siamani, o ona mātua o ni tagata Italia, ma na avea Riet ma Molimau a Ieova i se taimi i le va o le 1930-1939. Na sauāina Molimau a Ieova i le taimi o le pulega a Hitila talu ai, na latou teena le faamuamua o Hitila na i lo Ieova le Atua moni.
Ina ua iloa e fitafita Siamani o loo aofia ai Riet i le aumaia o kopi o Le Olomatamata i nofoaga o faasalaga, na sola loa o ia i Cernobbio. O i inā na talosaga atu ai iā te ia e faaliliuina Le Olomatamata i le gagana Italia, ma tufa atu i uso talitonu o latalata ane. Ae na iloa e nisi ana gaoioiga maelega na fai. Na osofaʻia lona fale e se tasi o leoleo nanā ma lana vaega, puʻea faapagota o ia, ma na faamaonia lana “solitulafono” ina ua maua i lona fale ni Tusi Paia se lua ma ni tusi mai isi tagata! Na toe tipoti atu Riet i Siamani, faafalepuipui i le nofoaga o faasalaga i Dachau, ma na fasiotia o ia a o latalata ina ola le Taua Lona Lua a le Lalolagi. Na tusia i le maa faamanatu i Cernobbio, na “sauāina ona o lona faatuatua.”
O le faatuatua o Riet ma le toʻatele o isi Molimau na sauāina e fitafita Siamani, o se faalaeiauga lea i Kerisiano i aso nei ina ia tausisia le faamaoni iā Ieova, auā ua na o Ia lava i le aoao o mea e tatau ona tapuaʻi atu i ai. (Faaaliga 4:11) Na fetalai Iesu: “Amuia ē sauāina ona o le amiotonu.” E manatua e Ieova a latou gaoioiga ma o le a faamanuia i latou ona o le loto tetele.—Mataio 5:10; Eperu 6:10.