Vivii Atu Iā Ieova i le Aʻoga

UA MAUA e talavou Molimau a Ieova i le lalolagi, auala e vivii atu ai i le Atua i aʻoga, e ala i a latou upu ma amio. Ia mātau nisi o mea na tutupu ua faaalia ai lo latou maelega a o talavou.

Na tofia se talavou Molimau i Eleni e tusia se tala e uiga i le faaleagaina o le lalolagi. Ina ua uma ona tilotilo i le Watch Tower Publications Index (Tusi Faasino Mataupu), na ia maua ni manatu aogā i le Ala Mai! ma tusia le igoa o le Ala Mai! i le faaiʻuga o lana tala. Na taʻu atu e lona faiaʻoga iā te ia, o se tasi lea o tala aupito sili ona lelei faatoʻa faitau i ai. Na faaaogā mulimuli ane e le faiaʻoga faamatalaga ia i se seminā, ma na maua ai ni iʻuga lelei. Na filifili le tuafafine talavou e ofo i le faiaʻoga nisi lomiga o le Ala Mai!, o loo aofia ai le mataupu, “Teachers—What Would We Do Without Them?” Na viiviia e le faiaʻoga le mekasini o le Ala Mai! i le vasega, ma na mananaʻo ai isi tamaiti i ni mekasini. O lea, na ave e le tuafafine mekasini i le aʻoga ina ia mafai ona latou faitau ai i isi mataupu.

Na feagai se talavou Kerisiano i Benin, i Aferika, ma se tofotofoga e lē masani ai. E tusa ai ma le aganuu a lea atunuu, e auaufaatasi nisi mātua o tamaiti aʻoga e totogi nisi faiaʻoga e aʻoaʻo atili a latou fanau i ni mataupu faigatā. Ae peitaʻi, na filifili nei faiaʻoga e faia nei aʻoaʻoga i le taeao o Aso Toonaʻi. Na lē manaʻo i ai le talavou Molimau ma faapea atu: “O le Aso Toonaʻi, e talaʻi faatasi uma ai la matou faapotopotoga. O le taimi aupito sili lea ona ou fiafia i ai o le vaiaso, ma e lē mafai ona ou suia i se isi mea!” Na malie i ai lona tamā o se matua nofo toʻatasi ma o se Molimau, ma taumafai i isi mātua ma faiaʻoga ina ia suia le faasologa. Peitaʻi, na mumusu uma i latou na. Na filifili le teine talavou e lē auai i ia aʻoaʻoga. Na ia auai atu faatasi ma lana faapotopotoga i le talaʻiga. Na ulagia o ia e tamaiti o lana vasega, ma uunaʻia o ia e aua neʻi toe talaʻi ma ia lafoaʻia lona Atua. Na latou mautinoa o le a lē pasi nei ana suʻega. Ae peitaʻi, na iʻu i le lē pasi o suʻega a tamaiti ia na aʻoaʻoina e faiaʻoga na totogi, ae na pasi le suʻega a le tuafafine talavou lenei. E mautinoa lava, na muta ai i inā tauemuga. Ua faapea atu tamaiti iā te ia, “Ia faaauau pea ona e auauna i lou Atua.”

I le Malo o Czech, na tofia se teineitiiti e 12 tausaga le matua e faia se lipoti e uiga i se tusi. Na faalaeiauina o ia e lona tinā e faaaogā le tusi, Le Tagata Silisili o Ē Uma na Soifua Mai. Na amata lana lipoti i ni fesili: “O le ā so outou manatu? O ai le tagata silisili o ē uma na soifua mai?” Na ia faamatalaina Iesu, o lona soifuaga i le lalolagi ma ana aʻoaʻoga. Ona ia talanoaina lea o le mataupu e faaulutala e faapea: “Se Lesona i le Loto Faamagalo.” Na faapea atu lona faiaʻoga, “O se lipoti sili lea ona lelei ua ou faalogo ai mai iā te oe!” ma sa ia taliaina ma le fiafia le tusi. Na mananaʻo foʻi isi tamaiti i ni a latou tusi. I le aso na sosoo ai, na fiafia le teine e tufatufa atu tusi e 18.

Ua matuā fiafia na talavou e vivii atu iā Ieova i le aʻoga. E ao iā i tatou uma lava ona mulimuli i lo latou maelega.