Amuia i Latou e Manatu Mamafa i o Latou Manaʻoga Faaleagaga

I TAEAO pe a feala aʻe manulele, latou te tausagi mo sina taimi ona felelei ese lea e suʻe ni meaʻai. I le afiafipō, latou te toe foʻi mai i o latou faamoega, tausagi mo sina taimi, ona momoe lea. I nisi vaitausaga latou te tautuufua ma fanafanau ai. E faapena foʻi olaga o isi manu.

E ese mai ai la olaga o tagata. E moni tatou te aai, momoe ma fananau, ae o le toʻatele lava e lē o faamalieina i na mea. E tatou te fia iloa le mea tonu e tatau ona fai ma fia maua se olaga faamalieina. E tatou te moomoo foʻi mo se lumanaʻi fiafia. O nei vala ua faaalia ai se itu tutasi o le tagata, o lona ola faaleagaga po o lona manaʻoga mo mea faaleagaga.

Faia i le Faatusa o le Atua

Ua faamatala mai e le Tusi Paia le māfuaaga o le iai o le itu faaleagaga o tagata: “Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laʻua o le tane ma le fafine.” (Kenese 1:27) O le faia o i tatou i le “faatusa o le Atua,” ua mafai ai ona tatou faaali atu nisi o ona uiga patino e ui lava i lo tatou pisia i le agasala ma tulaga lē lelei atoatoa. (Roma 5:12) O se faataʻitaʻiga, e mafai ona tatou faia le tele o mea. E mafai foʻi ona tatou maua le poto, iloa le mea tonu, ma faaalia le fealofani. E lē gata i lea, e mafai ona tatou toe tomānatu i mea na tutupu i le taimi ua mavae ma fuafua lelei mo le lumanaʻi.—Faataoto 4:7; Failauga 3:1, 11; Mika 6:8; Ioane 13:34; 1 Ioane 4:8.

E iloa le iai o lo tatou itu faaleagaga i lo tatou naunau e fia tapuaʻi i le Atua. E lē mafai ona tatou mauaina le fiafiaga moni, pe a lē iai sa tatou faiā lelei ma le Atua. Na fetalai Iesu: “Amuia ē matitiva i le agaga.” O lona uiga, e amuia i latou o ē manatu mamafa i o latou  manaʻoga faaleagaga. (Mataio 5:3) O lea la, e tāua tele ona faamalieina lenā manaʻoga i upu moni faaleagaga e uiga i le Atua, o ana faatulagaga ma lona finagalo mo le fanau a tagata. O fea e mafai ona tatou mauaina ai na upu moni faaleagaga? E maua mai i le Tusi Paia.

“O Lau Afioga o le Upu Moni Lea”

Na tusi Paulo: “O Tusi Paia uma lava e mai le Agaga o le Atua ia, e aogā foʻi ia e aʻoaʻo ai, e aʻoaʻi ai, e faatonu ai.” (2 Timoteo 3:16) E ōgatusa upu a Paulo ma fetalaiga a Iesu lē na tatalo i le Atua e faapea: “O lau afioga o le upu moni lea.” O se faiga atamai le faatusatusa o a tatou talitonuga ma tapulaa a lea Afioga, o le Tusi Paia lea.—Ioane 17:17.

E ala i le faatusatusa o a tatou talitonuga ma le Afioga a le Atua, ua tatou faaaʻoaʻo ai i tagata Perea, o ē na faamautinoa lelei ua ōgatasi aʻoaʻoga a Paulo ma le Tusi Paia. Na i lo le faitioina, na faamālō atu Luka iā i latou ona o le agaga sa latou faaalia. Sa ia tusi e faapea, “auā ua latou talia le upu ma le fiafia tele, ua saʻili i Tusi i lea aso ma lea aso, pe moni ia mea.” (Galuega 17:11) I le iloaina o feteenaʻiga o aʻoaʻoga faalotu ma aʻoaʻoga tau amio lea ua taatele i aso nei, o se mea lelei lo tatou faaaʻoaʻo i faaaʻoaʻoga a tagata Perea.

O le isi auala e mātaulia ai upu moni faaleagaga, o le iloa lea o le auala o loo aafia ai olaga o tagata. (Mataio 7:17) O se faataʻitaʻiga, o le ola aʻe e tusa ai o upu moni faaleagaga, e mafai ai ona avea se tasi ma tane po o tamā e sili ona lelei, se avā po o se tinā e sili ona lelei, lea e saosaolaumea i le faamalieina ma le fiafia o le aiga. Na fetalai Iesu: “E sili ona manuia o ē faalogo i le afioga a le Atua, ma tausi i ai.”—Luka 11:28.

Ua faamanatu mai e upu a Iesu iā i tatou fetalaiga a lona tamā iā Isaraelu anamua e faapea: “O aʻu o Ieova, lou Atua, o loo aʻoaʻo iā te oe i mea e aogā, o loo taʻitaʻiina oe i le ala e te ui ai. E! ana uaʻi mai ou taliga i aʻu poloaʻiga, po ua tusa ma se vaitafe lou manuia; ma lau amiotonu, e tusa lea ma peau o le sami.” (Isaia 48:17, 18) E mautinoa o le a faagaeetia i latou uma o ē fiafia i mea lelei ma le amiotonu i lenei valaaulia māfana!

E Lē Fiafia le Toʻatele e Faalogo i le Upu Moni

Sa avatu e le Atua lenā valaaulia māfana i tagata Isaraelu, talu ai sa faasesēina i latou i pepelo faalotu. (Salamo 106:35-40) E tatau foʻi ona tatou leoleo faasaga i aʻoaʻoga sesē. Na tusi Paulo e faatatau iā i latou ua faapea mai o Kerisiano: “Auā e oo i ona pō latou te lē mafafai ai ona talia o le aʻoaʻoga e ola ai, a e tusa ma o latou lava tuʻinanau, latou te faapotopoto ai aʻoaʻo mo i latou, ina ua feū o latou taliga; latou te liliu ese foʻi o latou taliga i le upu moni.”—2 Timoteo 4:3, 4.

Ua faataligatuli taʻitaʻi lotu i mea ua faia e tagata lea e faamalieina ai o latou faanaunauga sesē, e pei o le faitaaga, mulilua, tauatane ma le onā. Ua faaalia manino mai e le Tusi Paia, o i latou uma e fiafia e faia nei mea, “e lē fai mo latou tofi le Malo o le Atua.”—1 Korinito 6:9, 10; Roma 1:24-32.

 E manaʻomia le loto tele ina ia ola aʻe e tusa ai o faatulagaga a le Tusi Paia, e ui lava e tauemu mai nisi, peitaʻi e mafai lava ona faia faapea. O nisi o Molimau a Ieova sa avea muamua i latou ma ni ē na pulea e fualaau faasāina, onā, faitaaga, fasitagata, gaoi ma pepelo. Peitaʻi, ua latou ave i fale le Afioga a le Atua ma i le fesoasoani a le agaga paia, ua latou faia ai ni suiga i o latou olaga ma ‘savavali ai e tusa ma le Alii.’ (Kolose 1:9, 10; 1 Korinito 6:11) O le mauaina o se filemu ma le Atua, ua mafai ai ona latou maua se olaga faamalie loto, ma se faamoemoe o se lumanaʻi fiafia lea o le a tatou iloiloina.

Ia Faamoemoe i le Malo

Ua folafola mai e le Tusi Paia o le a maua e tagata usiusitai le filemu moni, e ala i le Malo o le Atua. Na tatalo Iesu: “Ia oo mai lou malo. Ia faia lou finagalo, I le lalolagi e pei ona faia i le lagi.” (Mataio 6:10) Ioe, e na o le Malo lava o le Atua e mafai ona faataunuuina lona finagalo i le lalolagi. Aiseā? Talu ai e ala i lenā Malo o i le lagi lea ua pulea nei e Iesu Keriso, o le a faamaonia ai le tonu o le pule silisili ese a le Atua i le lalolagi.—Salamo 2:7-12; Tanielu 7:13, 14.

Ona o ia o le tupu o lenā Malo, o le a faasaʻoloto ai e Iesu Keriso tagata usiusitai mai noanoataga uma, lea e aofia ai le pule malosi a le agasala tuufaasolo mai iā Atamu ma ona āuga leaga o le maʻi ma le oti. Ua faapea mai le Faaaliga 21:3, 4: “Faauta, ua i ai le afioaga o le Atua faatasi ma tagata . . . E sōloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.”

O le a filemu le lalolagi. Aiseā ua tatou mautinoa ai i lenā tulaga? Ua maua le tali i le Isaia 11:9: “Latou [tagatānuu o le Malo] te lē faia se mea leaga, latou te lē faaumatia foʻi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.” Ioe, o le a malamalama lelei tagata uma i le Atua ma usiusitai iā te ia. Pe ua faamāfanafanaina ea oe i lenā tulaga? Afai o lea, ua tatau nei loa ona ave i fale  le “malamalama o Ieova” lea e matuā tautele.

Po o le a E Talia le Feʻau o le Malo?

O le a aveesea e le Atua galuega uma lava a Satani ma aʻoaʻo tagata i ona ala amiotonu e ala mai i le Malo. O lea la, e lē o se mea e faateʻia ai, sa taulaʻi atu aʻoaʻoga a Iesu i lenā Malo. Sa ia fetalai: “E tatau ona ou folafola le tala lelei o le malo o le Atua, . . . auā o le mea lea na auina mai ai aʻu.” (Luka 4:43) Sa faatonu e Iesu ona soo ina ia folafola atu lenā feʻau i isi. (Mataio 28:19, 20) Sa ia valoia: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) Ua lata tele mai lenā iʻuga. Maʻeu le tāua tele o le taliaina e tagata loto faamaoni o lenā feʻau faasaoola!

O Alapati lea na taʻua i le mataupu ua muamua atu, sa faalogo i le feʻau o le Malo ina ua suʻesuʻe lana avā ma lona atalii faatasi ma Molimau a Ieova. I le taimi muamua sa lē talitonu Alapati. Na ia talosaga atu i se faifeʻau ina ia asiasi ane i lana avā ma lona atalii, pe maua ai se mea e sesē ai Molimau. Peitaʻi e leʻi manaʻo ai le faifeʻau. O lea la, sa mafaufau ai loa Alapati e faalogologo i se tasi o talanoaga faale-Tusi Paia ina ia suʻe ai se mea sesē. Ina ua uma le uluaʻi talanoaga, sa ia auai atu loa i le suʻesuʻega ona o lona faanaunauga ia aʻoaʻo atili nisi mea. Sa ia faamatala mulimuli ane le māfuaaga o le suia o lana amio i le faapea mai: “O le mea lenei ua loa ona ou saʻilia.”

O lea la, ua mafai ona faamalieina e Alapati lona manaʻoga faaleagaga, ma e leʻi toe faanoanoa ai. Na avatu e le upu moni mai le Tusi Paia iā te ia le mea ua loa ona ia saʻilia—le tali i le auala e foʻia ai faiga lē tonu ma faiga faapiʻopiʻo, lea ua taatele i mea fai a tagata ma se faamoemoe mo le lumanaʻi. Ua ia maua se olaga faamalie loto. Po ua faamalieina lou manaʻoga faaleagaga? O se mea lelei le faitau i fesili o loo lisiina atu i le pusa i le itulau e 6. Pe afai e te manaʻomia nisi faamatalaga atili, o le a fiafia Molimau a Ieova e fesoasoani atu iā te oe.

[Pusa/Ata i le itulau 6]

PO UA FAAMALIEINA LOU ITU FAALEAGAGA?

Po ua faamalieina oe i taumafa faaleagaga o loo e mauaina? E matou te valaaulia oe ina ia faitau i nei fesili, ma tilofaʻia po o lē fea fesili e mafai ona e tali saʻo mai i ai.

□ O ai le Atua, ma o ai lona suafa?

□ O ai Iesu Keriso? Aiseā na ia maliu ai? E mafai faapefea i lona maliu ona aafia ai oe?

□ Pe e iai se Tiapolo? Afai e iai, na faapefea ona avea o ia ma Tiapolo?

□ O le ā le mea e tupu iā i tatou pe a feoti?

□ O le ā le fuafuaga a le Atua mo le lalolagi ma tagata?

□ O le ā le Malo o le Atua?

□ O ā faatulagaga a le Atua e faatatau i amioga tatau?

□ O ā tiute tauave mai le Atua mo tane ma avā i aiga? O ā ni tapulaa faale-Tusi Paia o le a faateleina ai le fiafia i le aiga ?

Afai e te lē o mautonu i tali o nei fesili, e mafai ona e talosaga atu mo sau kopi o le polosiua O le ā e Manaomia e le Atua Mai ia i Tatou? O loo iai i lenei polosiua ua lomia e Molimau a Ieova i le toetoe lava 300 gagana, mataupu tāua e 16 mai le Tusi Paia, ma ua saunia ai tali faale-Tusi Paia o fesili o loo lisiina i luga.

[Ata i le itulau 4]

E iai manaʻoga faaleagaga o tagata e ese mai i meaola

[Ata i le itulau 5]

“Latou te faapotopoto ai aʻoaʻo mo i latou, ina ua feū o latou taliga.”—2 Timoteo 4:3

[Ata i le itulau 7]

O le a aumaia le filemu tumau e ala mai le Malo faa-Mesia o le Atua