Le Saʻiliga o se Olaga Faamalie Loto

O ALAPATI o se tamā fiafia, ma e iai sana fanau e toʻalua. Peitaʻi, e leʻi faamalieina moni lona olaga. Sa ia taumafai e saʻilia sana galuega. E lē gata sa ia auai i faiga faapolotiki, ae sa avea foʻi o ia ma se tasi o sui o le vaega faaupufai faa-Komunisi i lona nuu.

Peitaʻi, e leʻi umi ae lē toe fiafia Alapati i vaega faa-Komunisi. Na ia taofia uma loa ana fesootaʻiga ma i latou, ma o lona faanaunauga ia tausia lelei lona aiga. Sa tāua iā te ia le fiafia o lona aiga. Ae ui i lea, e leʻi faamalieina o ia ma e leʻi maua se olaga faamalie loto.

Ua taatele i aso nei le tulaga e pei ona oo iā Alapati. E faitau miliona i latou ua saʻili atu i le poto faalelalolagi, filosofia, ma lotu ina ia maua ai se olaga faamalieina. I vaitausaga o le 1961-1969 i atunuu tauatiaʻe, e toʻatele tagata aemaise lava i talavou sa fouvale faasaga i amioga ma aganuu ua leva ona iai. Ina ia maua se olaga faamalieina, sa saʻili atu ai talavou i faiga faafilosofia a faifeʻau, taʻitaʻi lotu, atoa ai ma le faaaogāina o fualaau faasāina. Peitaʻi, e augapiu ma se fiafiaga moni na maua mai ai. Na i lo lea, na faatupulaʻia ai le faaaogāina e talavou o fualaau faasāina ma le faia o amioga lē mamā, lea na matuaʻi paʻū maulalo ai amioga tatau tau amio.

Ua loa taimi o saʻilia pea e le toʻatele le fiafiaga moni, e ala i le tamaoaiga, tulaga tau pule ma aʻoaʻoga. O nei auala e lē faamalieina ai foʻi. Na fetalai Iesu: “E lē ola se tasi i le tele o ana mea ua iā te ia.” (Luka 12:15) Na i lo  lea, o le faanaunauga e tuliloa le saʻilia o mea faitino, e masani lava ona aumaia ai faanoanoaga. Ua faapea mai le Tusi Paia: “A o ē manaʻo i le fia mauʻoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia. Auā o le manaʻo i tupe, o le pogai lea o mea leaga uma lava; ua mananaʻo tele i ai nisi, . . . ua tuʻia ai ua ati i latou e i latou i puapuaga e tele.”—1 Timoteo 6:9, 10.

O lea la, e faapefea e se tasi ona maua se olaga fiafia ma faamalie loto? Pe moni ea e leai se auala e fesoasoani iā i tatou e mauaina ai? Ma le mautinoa lava e leai. Seʻi o tatou iloiloina le tali i le mataupu o sosoo mai, o le faamalieina lea o se manaʻoga tāua o tagata uma.

[Ata i le itulau 3]

Po o le a fesoasoani ea iā te oe le tamaoaiga, pule, ma aʻoaʻoga e maua ai se olaga faamalie loto?