Ua Latou Lotomalilie e Avea o ni Misionare

“E FAI taulaga ma le loto ou tagata.” (Salamo 110:3) E tāua nei upu i le ʻauaʻoʻoga e toʻa 46, o le vasega lona 118 o le Aʻoga Faale-Tusi Paia a le Olomatamata o Kiliata. Na faapefea ona latou sauniuni e auai i lenei aʻoga, lea e aʻoaʻoina ai tagata o le a avea ma misionare, ina ia mafai ona latou faamalieina manaʻoga faaleagaga o tagata i atunuu mamao? Na faamatala e Mike ma Stacie o ni sui o le vasega lona 118 e faapea: “Ua fesoasoani le ola i se olaga faafaigofie e ʻalofia ai lo ma tosina ese, ma ia faamuamua ai mea faaleagaga. Ua ma maumauaʻi ia ave le faamuamua i sini faaleagaga ina ia ʻalofia ai le saʻilia o mea faaletino.” I le pei o Mike ma Stacie, ua lotomalilie isi tagata uma o le vasega e avea o ni misionare, ma o loo latou talaʻia le tala lelei o le Malo i konitineta eseese e fa o le lalolagi.

Na matuā olioli le aofia e 6,843 a o uaʻi atu i le polokalame o le faauuga na faia i le Aso Toonai o Mati 12, 2005. Na taʻitaʻifono Theodore Jaracz, o se sui o le Vaega Pule a Molimau a Ieova. Ina ua māeʻa ona faafeiloaʻi atu ma le māfana i ē na auai mai atunuu eseese e 28, ona ia faauaʻi atu loa lea i le aogā o aʻoaʻoga faale-Tusi Paia. Na taʻua e le failauga se faamatalaga a se faiaʻoga taʻutaʻua i Amerika, e suafa iā William Lyon Phelps e faapea: “O le tagata ua poto i le Tusi Paia, o le tagata lea ua aʻoaʻoina lelei.” E ui e tāua aʻoaʻoga masani, ae e sili atu ona tāua aʻoaʻoga faale-Tusi Paia. Ua fesoasoani i tagata e ave i fale le poto o le Atua lea e taʻitaʻia ai i le ola e faavavau. (Ioane 17:3) Sa faamālō le uso o Jaracz i le ʻaufaauu ona o le finagalo malilie e faia ni sao, i le polokalame tau aʻoaʻoga faale-Tusi Paia, lea ua faia i le silia i le 98,000 faapotopotoga a Molimau a Ieova i le lalolagi aoao.

Timaʻiga Talafeagai mo le ʻAufaauu

Ina ua māeʻa le faafeiloaʻiga, ona talanoaina loa lea o le mataupu a William Samuelson na faavae i le Salamo 52:8, “Le Auala e Pei ai Oe o se Olive Lauolaola i le Maota o le Atua.” Na ia taʻua le faaaogāina faafaatusa e le Tusi Paia o le olive, o se faailoga o le fua tele mai, matagofie ma le mamalu. (Ieremia 11:16) I le faatusatusa o ē na aʻoʻoga i ni olive, na faapea mai le failauga: “O le a outou matagofie ma mamalu i le silafaga a Ieova, a o outou faia ma le faamaoni le galuega o le talaʻia o le Malo i o outou tofiga faamisionare.” E manaʻomia e le olive ni aa malolosi ina ia ola ai i taimi o  lāmala, ma e manaʻomia foʻi e le ʻauaʻoʻoga ona faamalosia lo latou faavae faaleagaga, ina ia onosaia ai le lē ano mai o tagata, teteega, po o isi tofotofoga latou te fesagaʻia i le auaunaga i se atunuu fou.—Mataio 13:21; Kolose 2:6, 7.

Na talanoaina e John E. Barr, o se tasi mai le Vaega Pule e toʻatolu na lauga ai le matua, “O Outou o le Masima o le Lalolagi.” (Mataio 5:13) Na ia taʻua e faapea, e pei ona puipuia e le masima se meaʻai mai le pala, e faapena ona iai se aafiaga faasaoola o le talaʻiga o le feʻau o le Malo a misionare i ē faalogo, i le puipuia o i latou mai le faaleagaina o amioga lelei ma le faaleagaga. Na faalaeiauina i se leo mālū e le uso o Barr i latou, ina ia tausisia le ‘filemu’ ma isi. (Mareko 9:50) Na ia apoapoaʻi atu: “Ia atiaʻe fua o le agaga, ma ia tausaafia ma tauagafau a outou upu ma amioga i taimi uma lava.”

Na faamamafa e Wallace Liverance o se faiaʻoga i Kiliata le matua, “Ia Nofo Pea i le Vaa a o Folau i le Vasa Loaloa.” E pei ona mafai e se vaa o loo folau i le vasa loaloa ona agaʻi i le itulagi saʻo, e faapenā ona fesoasoani “uiga loloto o le Atua”—o upu moni ia e uiga i ana fuafuaga ma le faataunuuga—ina ia agaʻigaʻi ai i luma faaleagaga se tasi. (1 Korinito 2:10) O le tumau i ogāsami papaʻu faaleagaga e ala i le faamalieina i “mataupu muamua o le afioga a le Atua,” o le a faalavelavea ai lo tatou agaʻigaʻi i luma ma e mafai foʻi ona ‘faavaatuʻia ai i la le faatuatua.’ (Eperu 5:12, 13; 1 Timoteo 1:19) Na faaiʻu le lauga a le uso o Liverance i lona faapea mai: “Ia avea le ‘loloto o le tamaoaiga o le poto atoa ma le silafaga a le Atua,’ ma fesoasoani iā te outou i o outou tofiga faamisionare.”—Roma 11:33.

Na talanoaina e Mark Noumair o le isi faiaʻoga i Kiliata le mataupu, “Pe o le a e Ola e Tusa ai ma Ou Tofi Faaleagaga?” Ua silia i le 60 tausaga o maua e le Aʻoga Faale-Tusi Paia a le Olomatamata o Kiliata ni talaaga mataʻina, ona o le ‘tele o molimau lelei’ na faia e le ʻaufaauu o le aʻoga. (Kenese 31:48) Ua tuu atu foʻi lenei tofi i le ʻauaʻoʻoga o le vasega lona 118 a Kiliata. Na faalaeiauina e le uso o Noumair le ʻauaʻoʻoga ina ia faataʻitaʻi i tagata Tikoa i aso o Neemia, ma ia galulue ma le lotomaualalo faatasi ma le faapotopotoga ma isi misionare. Na fautuaina i latou ina ia ʻalofia uiga o “alii” faamaualuluga ia na taʻua e Neemia, ae ia lotomalilie e galulue e aunoa ma le fia matamuamua.—Neemia 3:5.

Mea na Tutupu i le Faiva ma Faatalatalanoaga

O le isi vaega na sosoo ai o le polokalame na faamatuaina, “Ua Tupu le Afioga a le Atua.” (Galuega 6:7) Na taʻitaʻia e le faiaʻoga i Kiliata o Lawrence Bowen, le toe faaataina e ē na aʻoʻoga o mea moni na tutupu i le galuega talaʻi, lea sa latou olioli ai a o auai i le aʻoga. Ua faaalia e nei mea na tutupu, lo latou folafolaina atu ma le maelega o le afioga a le Atua, ma na faamanuiaina a latou taumafaiga e Ieova.

Na faatalanoa e le uso o Richard Ashe ni sui o le aiga Peteli, o ē na fesoasoani i le sologa lelei o le aʻoga. Ua faaalia i a latou faamatalaga, le lagolagosua o le aiga Peteli i le ʻauaʻoʻoga ina ia latou maua aogā silisili mai le aʻoga. Ona sosoo lea ma le faatalanoaina e Geoffrey Jackson o nisi ua uma ona faauu mai le aʻoga i Kiliata. Na latou taʻua le tele o avanoa e maua i le olaga faamisionare, e avatu ai le viiga ma le mamalu iā Ieova. Na faapea mai se tasi na faatalanoa: “E mātauina e tagata mea uma e te faia o se misionare. E latou te faalogo, vaavaai, ma manatua.” Ioe, na malamalama le ʻauaʻoʻoga i le tāua o le faataatitia o ni faaaʻoaʻoga lelei i taimi uma. E moni lava, o le a aogā nei fautuaga pe a latou taunuu i o latou tofiga fou.

Na tauaaoina e Stephen Lett o se sui o le Vaega Pule le lauga faaiʻu na faamatuaina, “Ia Ō Atu o ni Ē Tauave ‘Vai Ola.’” (Ioane 7:38) Na ia taʻua aogā na maua e le ʻauaʻoʻoga i le lima masina na faia ai le aʻoga, e ala i le ave i fale o le afioga a le Atua. Ae o le a le mea e ao  ona fai e nei misionare fou i mea ia ua latou aʻoaʻoina? Na uunaʻia e le uso o Lett le ʻaufaauu ina ia faasafua atu ma le lē manatu faapito nei vai ola faaleagaga i isi, ina ia avea ai foʻi i latou ma “vaipuna, e puna i luga i le ola faavavau.” (Ioane 4:14) Na faapea atili mai le failauga: “Aua neʻi galo ona avatu le mamalu ma le viiga iā Ieova, le ‘puna o vai ola.’ Ia onosai a o aʻoaʻoina i latou ua tuua Papelonia le aai tele, lea ua augapiu ma se vai ola.” (Ieremia 2:13) Na faaiʻu e le uso o Lett lana lauga i lona faalaeiauina o le ʻaufaauu, ina ia faataʻitaʻi i le agaga ma le faatoanofotane, ma valaaulia isi e faapea: “‘Inā sau ia’; o lē fia inu, inā sau ia, atoa ma lē manaʻo i ai, inā ave fua ia le vai o le ola.”—Faaaliga 22:17.

Na faaiʻu e le uso o Jaracz le polokalame i lona faasilasilaina o alofaaga mai atunuu eseese. Na sosoo ai ma le faitauina o se tusi faafetai e se sui o le vasega faauu.

Pe e te lotomalie e auauna i se atunuu o loo manaʻomia ai ni tagata talaʻi? Afai e te finagalo i ai, ia tuliloa la ni sini faaleagaga e pei ona sa faia e tagata aʻoga ia na faauu. Ia selesele i le olioli ma le faamalieina e maua e sē e lotomalie e auauna iā Ieova—a lē i le auaunaga faamisionare i se isi atunuu, po o se faifeʻau talaʻi i se nofoaga latalata ane i le aiga.

[Pusa i le itulau 13]

FAAMAUMAUGA O LE VASEGA

Aofaʻi o atunuu o loo iai o latou sui: 8

Aofaʻi o atunuu ua tofia i ai: 19

Aofaʻi o tagata aʻoga: 46

Faatatauga o tausaga: 33.0

Faatatauga o tausaga i le upu moni: 16.5

Faatatauga o tausaga i le faiva faataimi atoa: 12.9

[Ata i le itulau 15]

Vasega Faauu Lona 118 o le Aʻoga Faale-Tusi Paia a le Olomatamata o Kiliata

I le lisi i lalo, e amata mai laina i luma ma faasolo i tua ma o suafa e lisi mai i le itu agavale e agaʻi atu i le taumatau.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.