“Ua Tala Mai le Tala Lelei”

“E matuā matagofie i luga o mauga o vae o lē . . . ua tala mai le tala lelei.”—ISAIA 52:7.

1, 2. (a) O ā mea mataʻutia o loo tutupu i aso taʻitasi? (e) O ā lagona o tagata pe a faalogo pea i tala lē lelei?

I ASO nei, ua fiu tagata o le lalolagi i le tele o mau tala lē lelei. Pe a ki a latou leitiō, latou te faafofoga atu i lipoti taufaamataʻu o faamaʻi oti o loo pagatia ai le lalolagi. Latou te maimoa i tala fou o le televise i ata faagalogatā, o tamaiti fia aai o loo fetagisi mo se fesoasoani. Latou te faitau i nusipepa i se pomu na pa ma faatamaʻia ai fale, ma fasiotia ai le toʻatele o tagata e lē sala.

² Ioe, e mataʻutia mea o loo tutupu i aso taʻitasi. O loo faasolosolo ina leaga le tulaga o lenei lalolagi. (1 Korinito 7:31) Na taʻua i se nusipepa i Europa i Sisifo, e iai taimi e peiseaʻī ai o le a “faatamaʻia“ le lalolagi aoao. E lētioa a toʻatele tagata ua faapopoleina ona o le anoanoaʻi o tala lē lelei! I se suʻesuʻega na faia e faatatau i tala fou o le TV Amerika, na fesiligia ai se tagata i sona taofi e uiga i na tala fou, ma o lana tali e lē taumatea ua faaatagia mai ai faalogona o le faitau miliona o tagata: ‘E ese loʻu mafatia pe a uma ona ou matamata i tala fou. E lē o ni tala lelei. E leai se faamoemoe e maua mai ai.’

Le Tala e Ao Ona Faalogo i ai Tagata Uma

3. (a) O le ā le tala lelei ua faalauiloa mai e le Tusi Paia? (e) Aiseā e tāua ai iā te oe le tala lelei o le Malo?

³ Pe e iai ea se tala lelei i lenei lalolagi atuatuvale? Ioe, e iai! O se faamāfanafanaga le iloa, ua folafola mai e le Tusi Paia se tala lelei. O lenā tala lelei e faasino atu i le aveesea e le Malo o le Atua o maʻi, oge, solitulafono, taua ma mafatiaga uma. (Salamo 46:9; 72:12) Pe lē o tala ea na o loo fia faafofoga i ai tagata? Ioe, o le manatu lenā o Molimau a Ieova. O le pogai lea, ua lauiloa ai i latou i so o se mea i a latou taumafaiga faifai pea, e talaʻi atu le tala lelei o le Malo o le Atua i tagata o atunuu uma.—Mataio 24:14.

4. O ā vala o la tatou talaʻiga o le a iloiloina i lenei mataupu ma le isi o loo mulimuli mai?

⁴ O lea la, o le ā e mafai ona tatou faia ina ia faaauau ai pea ona faia se sao lelei ma taulau manuia i le talaʻiga o le tala lelei, e oo lava i oganuu e faalēfiafia mai tagata? (Luka 8:15) O le a fesoasoani se otootoga puupuu o ni vala tāua se tolu o la tatou talaʻiga e faia ai faapea. E mafai ona iloiloina (1) le māfuaaga tatou te talaʻi ai; (2) o la tatou feʻau e ao ona talaʻia; ma le (3) o auala tatou te faaaogāina i le talaʻiga. Pe a saʻo i taimi uma le māfuaaga tatou te talaʻi ai, ia manino la tatou feʻau, ia lelei auala e faaaogā, o le a mafai ai ona maua e tagata eseese i le lalolagi aoao, le avanoa e talia ai le tala e sili ona lelei—o le tala lelei o le Malo o le Atua. *

 Le Māfuaaga Tatou te Talaʻia ai le Tala Lelei

5. (a) Muamua, o le ā ua uunaʻia ai i tatou e talaʻi? (e) Aiseā ua avea ai le usiusitai i le poloaʻiga a le Tusi Paia ia talaʻi o se faailoaga o le alofa i le Atua?

⁵ Seʻi o tatou iloiloina le vala muamua—o le māfuaaga tatou te talaʻi ai. Aiseā tatou te talaʻia ai le tala lelei? O le māfuaaga lava e tasi e pei ona sa faia e Iesu. Na ia fetalai: “Ou te alofa i le Tamā.” (Ioane 14:31; Salamo 40:8) Muamua lava, ua uunaʻia i tatou ona o le alofa i le Atua. (Mataio 22:37, 38) Ua faafesootaʻi e le Tusi Paia le alofa i le Atua ma le naunau i le talaʻiga, e pei ona tusia: “Auā o lenei lava le alofa i le Atua, ia tatou tausi i ana poloaʻiga.” (1 Ioane 5:3; Ioane 14:21) Po ua aofia i poloaʻiga a le Atua le “ō atu e fai nuu uma lava ma soo”? (Mataio 28:19) Ioe. E ui o fetalaiga na sa faia e Iesu, ae o le mea moni o Ieova e ona. E faapefea? Na fetalai Iesu: “Ou te lē fai fua foʻi se mea, a e peitaʻi, faapei ona aʻoaʻo mai e loʻu Tamā iā te aʻu, o mea ia ou te tautala atu ai.” (Ioane 8:28; Mataio 17:5) O lea la, o le tausia o le poloaʻiga ia talaʻi, ua faaalia atu ai iā Ieova tatou te alolofa iā te Ia.

6. O ā auala ua uunaʻia ai e le alofa i le Atua i tatou e talaʻi?

⁶ E lē gata o le alofa mo Ieova e uunaʻia ai i tatou e talaʻi, ae tatou te mananaʻo foʻi e faalēaogāina pepelo a Satani faatatau iā Ieova. (2 Korinito 4:4) Ua faatupu e Satani masalosaloga i le amiotonu o le pulega a le Atua. (Kenese 3:1-5) O le avea ma Molimau a Ieova, ua tatou naunau ai e faaalialia le taufaaleaga a Satani ma faamamaluina le suafa o le Atua i tagata. (Isaia 43:10-12) O se isi māfuaaga ua tatou talaʻi ai, ona ua tatou iloa uiga o Ieova ma ona ala. Ua tatou māfana vavalalata atu iā te Ia ma ua iai se faanaunauga malosi ia taʻu atu i isi lo tatou Atua. O le mea moni, o le agalelei o Ieova ma ona ala amiotonu, ua tatou matuā olioli ai ma naunau e talanoa atu i isi e uiga iā te Ia. (Salamo 145:7-12) Ua tatou lagona e ao ona tatou taʻu atu lona viiga ma talanoa i lona “lelei” i ē o le a faalogo.—1 Peteru 2:9; Isaia 43:21.

7. E ese mai i le alofa i le Atua, o le ā le isi māfuaaga tatou te talaʻi ai?

⁷ E iai foʻi le isi māfuaaga tāua e faaauau ai ona talaʻi atu: Tatou te mananaʻo moni lava e avatu le mapusaga i tagata ua fiu i le anoanoaʻi o tala lē lelei, ma ē ua mafatia i omiga. O le faia faapea, ua tatou taumafai ai e faataʻitaʻi iā Iesu. O se faaaʻoaʻoga, seʻi tagaʻi i le mea o faamatalaina i le Mareko 6.

8. O le ā le mea ua faaalia i le tala i le Mareko 6 e faatatau i faalogona o Iesu mo tagata?

⁸ Na toe foʻi ane aposetolo mai le talaʻiga ma faamatala iā Iesu mea uma na latou faia ma aʻoaʻo atu. Na silafia e Iesu le lē lavavā o le ʻauaposetolo, o lea na fetalai atu ai, ia latou ō faatasi seʻi “mapu aʻe teisi.” O lea na latou ō ai i se vaa, ma malaga atu i se nofoaga tuufua. Ae na mulimuli atu tagata iā i latou, ua taufetuli atu i le matafaga agaʻi i le nofoaga na latou iai. O le ā le mea na faia e Iesu? Ua faapea mai le tala: “Ua na silafia le motu o tagata e toʻatele, ona mutimuti vale ai lea o lona alofa iā te i latou, auā ua faapei o mamoe i latou e leai so latou leoleo; ona aʻoaʻo atu lea  o ia iā te i latou i mea e tele.” (Mareko 6:31-34) Sa uunaʻia e le alofa mutimutivale Iesu e faaauau ona talaʻi atu le tala lelei e ui i lona lē lavā. E manino sa tele le alofa o Iesu i nei tagata.

9. O le ā le mea ua tatou aʻoaʻoina mai le tala i le Mareko 6 e tusa ai ma le māfuaaga saʻo e talaʻi ai?

⁹ O le ā le lesona ua tatou aʻoaʻoina mai i lenei tala? Ona o i tatou o ni Kerisiano, ua iā i tatou la le tiute tauave e talaʻi le tala lelei ma le faia o soo. Ua tatou iloa la tatou matafaioi e faalauiloa le tala lelei, ona o le finagalo o le Atua ia ‘faaolaina tagata uma lava.’ (1 Timoteo 2:4) Ae peitaʻi, tatou te manatu i la tatou talaʻiga e lē gata o se tiute tauave, ae o se galuega alofa foʻi. Pe afai tatou te naunau moni lava i tagata e pei ona sa faia e Iesu, o le a uunaʻia i tatou e o tatou loto ia faia le mea e silisili ina ia faaauau ona talaʻi atu le tala lelei iā i latou. (Mataio 22:39) O le iai o māfuaaga lelei faapena e auai ai i le talaʻiga, o le a uunaʻia ai i tatou e talaʻi atu le tala lelei e aunoa ma le faavaivai.

O la Tatou Feʻau —Le Tala Lelei o le Malo o le Atua

10, 11. (a) Ua faapefea ona faamatala e Isaia le feʻau o loo tatou talaʻia? (e) Na faapefea ona “tala mai le tala lelei” e Iesu ma ua faapefea i auauna a le Atua i aso nei ona mulimuli i lana faaaʻoaʻoga?

¹⁰ O le vala lona lua o le talaʻiga, o le feʻau lea tatou te talaʻia atu i isi. O le ā le feʻau o tatou talaʻia? E manaia le faamatalaga a Isaia e uiga i le feʻau o loo tatou faailoaina atu: “E matuā matagofie i luga o mauga o vae o lē ua fai mai le tala lelei, o lē logologo mai le manuia, ua tala mai le tala lelei; ua faailoa mai le olataga; ua fai mai iā Siona, O loo pule lou Atua.”—Isaia 52:7.

¹¹ O le faaupuga tāua i lenā mau, “o loo pule lou Atua,” ua faamanatu mai ai iā i tatou le feʻau e ao ona faailoa atu, o le tala lelei lea o le Malo o le Atua. (Mareko 13:10) Ia mātau foʻi, ua faailoa i lenei fuaiupu le logolelei o la tatou feʻau. Ua faaaogā e Isaia ni faaupuga e pei o le “olataga,” “tala lelei,” ma le “manuia.” I le faitau selau o tausaga ina ua mavae Isaia, i le uluaʻi senituri T.A., na faataunuu ai e Iesu le valoaga lenei i se auala mataʻina. Na ia faia e ala i lana faaaʻoaʻoga maelega o le faasalalauina atu o le tala i se mea e sili ona lelei—o le Malo o le Atua lea o loo fotuaʻi mai. (Luka 4:43) I aso nei, aemaise lava talu mai le 1919, ua mulimuli ai Molimau a Ieova i le faaaʻoaʻoga a Iesu e ala i le finafinau e faalauiloa atu le tala lelei o le Malo o le Atua lea ua faavaeina, ma faamanuiaga o le a ia aumaia mo tagata.

12. O le ā le aafiaga o le tala lelei o le Malo i ē e taliaina?

¹² O ā aafiaga o lenei tala lelei o le Malo i ē e taliaina? I le pei lava o aso o Iesu, ua maua foʻi e tagata i aso nei le faamoemoe ma faamāfanafanaga ona o le tala lelei. (Roma  12:12; 15:4) Ua avatu ai i ē loto faamaoni le faamoemoe, auā ua latou aʻoaʻoina māfuaaga autū e talitonu ai i taimi e sili ona lelei i le lumanaʻi. (Mataio 6:9, 10; 2 Peteru 3:13) O lenā faamoemoe, ua matuā fesoasoani i ē matataʻu i le Atua ina ia fiafia ai pea. Ua taʻua e le faisalamo, e lē ‘matataʻu i latou i le tala leaga.’—Salamo 112:1, 7.

O se Feʻau o le a ‘Fusifusi ai Ē Loto Momomo’

13. Ua faamatalaina faapefea e Isaia faamanuiaga o le a maua i le taimi nei e ē taliaina le tala lelei?

¹³ E lē gata i lea, ua aumaia e le tala lelei o loo tatou talaʻia le mapusaga ma faamanuiaga i le taimi nei. E faapefea? O nisi o faamanuiaga na faamatalaina e Isaia ina ua ia vavalo: “Ua i oʻu luga le Agaga o le Alii o Ieova; auā ua faauuina aʻu e Ieova e talaʻi le tala lelei i ē ua tigāina, ua ia auina mai aʻu e fufusi i ē loto momomo, e talaʻi le saʻolotoga i le tafeaga, ma le matuā tatalaina o ē ua fusifusia. E talaʻi le tausaga e talileleia mai ai e Ieova, ma le aso e taui ai ma sui e lo tatou Atua; e faamatalaloto i ē faanoanoa uma lava.”—Isaia 61:1, 2; Luka 4:16-21.

14. (a) O le ā le mea ua faaalia e le faaupuga ‘fusifusi i ē loto momomo’ e faatatau i le feʻau o le Malo? (e) E faapefea ona tatou faaaʻoaʻo i le manatu mamafa o Ieova mo ē loto momomo?

¹⁴ E tusa ai ma lenā valoaga, e ala i le talaʻia o le tala lelei, o le a fusifusia ai e Iesu ‘ē ua loto momomo.’ Maʻeu se faamatalaga fetaui na faaaogā e Isaia! E tusa ai ma se tasi lomifefiloi o le Tusi Paia, o le upu Eperu ua faaliliuina i le “fusifusi” ua “masani ona faaaogā pe a ‘fusi’ se manua ma togafitia i se vailaau ina ia pē ai.” E ono tāʻai e se tamaʻitaʻi tausimaʻi alofa le vaega o le tino o se tagata ua faamanuʻalia ina ia fesoasoani i ai. I se auala faapena, ua fesoasoani ai tagata talaʻi alolofa i ē loto fiafia ua mafatia. Ua latou faaaʻoaʻo i le manatu mamafa o Ieova e ala i le avatu o le fesoasoani iā i latou na. (Esekielu 34:15, 16) Ua taʻua e le faisalamo e uiga i le Atua: “E faamālōlōina e ia ē ua loto momomo; e fufusi e ia o latou manuʻa.”—Salamo 147:3.

Le Auala na Suia ai e le Feʻau o le Malo Olaga o Isi

15, 16. E faapefea i mea na tutupu i soifuaga o isi ona iloa ai o loo fesoasoani ma faamalosia ē ua mafatia e le feʻau o le Malo?

¹⁵ Ua faaalia e le tele o mea moni na tutupu i olaga o isi, le auala ua fesoasoani ai le feʻau o le Malo ma faamalosia ai ē loto momomo. Seʻi o tatou talanoa e faatatau iā Oreana, o se tinā matua i Amerika i Saute o lē na lē toe fia ola. Na amata ona asiasi se Molimau a Ieova iā Oreana ma faitau iā te ia le Tusi Paia ma Laʻu Tusi o Tala o Le Tusi Paia. * I le taimi muamua, na faalogologo le fafine i le faitauina o le tusi a o taoto i lona moega ma moeiini ona mata, o nisi taimi e mapuea ai. E leʻi umi, ae amata ona ia faia se taumafaiga e saofaʻi i luga o lona moega i le taimi e fai ai le faitauga tusi. I se taimi mulimuli ane, ua saofaʻi o ia i le nofoa i le potu mālōlō, ma faatalitali ai lona faiaʻoga o le Tusi Paia. Na sosoo ma le auai o le fafine i sauniga faa-Kerisiano i le Maota o le Malo. Talu ai le faalaeiauina i mea na ia aʻoaʻoina mai na sauniga, na amata ai ona ia ofo atu lomiga faale-Tusi Paia i so o se tasi lava e pasia lona fale. Na papatiso Oreana i le 93 o ona tausaga e avea ma se tasi o Molimau a Ieova. Na toe faafouina e le feʻau o le Malo lona faanaunauga e ola.—Faataoto 15:30; 16:24.

¹⁶ Ua avatu e le feʻau o le Malo se fesoasoani tāua e oo lava iā i latou ua iloa ua puupuu o latou soifua ona o se gasegase. Seʻi fai ma faaaʻoaʻoga, o Maria mai Europa i Sisifo. Na mafatia o ia i se gasegase tigāina ma ua leai se faamoemoe. Ina ua feiloaʻi atu i Molimau a Ieova, o le taimi lenā o loo matuā mafatia lava. Ae ina ua ia iloa le finagalo o le Atua, na toe maua ai ni māfuaaga e fiafia ai. Na papatisoina o ia e avea o se Molimau a  Ieova ma na matuā maelega i le talaʻiga. I tausaga faaiʻu e lua o lona soifuaga, sa tumau pea ona laufofoga fiafia ona o le faamoemoe. Na maliu Maria ma lona faamoemoe mautinoa i le toe tū.—Roma 8:38, 39.

17. (a) Ua faapefea ona aafia i le feʻau o le Malo olaga o ē taliaina? (e) O ā auala ua e iloa ai e oe lava ia le “faatusaʻoina o ē ua faanoʻunoʻu uma lava” e Ieova?

¹⁷ Ua faamaonia i na lipoti le mea ua faia e le feʻau o le Malo i soifua o isi o ē faanaunau mo upu moni o le Tusi Paia. E toe faamalosia i latou ua faavauvau ona o le maliu o sē ua pele, pe a latou iloa le faamoemoe o le toe tū. (1 Tesalonia 4:13) O tagata o loo ola matitiva ma tauivi e tausia o latou aiga, ua latou maua le fiafia ma lototetele pe a iloa e lē tuulafoaʻia e Ieova ē faamaoni iā te ia. (Salamo 37:28) O le fesoasoani a Ieova, ua mafai ai e i latou ua matuā lotomafatia ona maua le malosi manaʻomia e onosai ai, ma i nisi taimi ua mafai ona foʻia lenā gasegase. (Salamo 40:1, 2) O le mea moni, e ala i le mana o lana Afioga ua “faatusaʻoina o ē ua faanoʻunoʻu uma lava” e Ieova. (Salamo 145:14) O le mātauina o le auala ua faamāfanafanaina ai e le tala lelei o le Malo tagata lotomomomo i a tatou oganuu, ma faapotopotoga, ua faamanatu mai ai pea, o loo iā i tatou le tala silisili ona lelei i aso nei!—Salamo 51:17.

‘Laʻu Tatalo i le Atua mo i Latou’

18. Na aafia faapefea Paulo ina ua teena e tagata Iutaia le tala lelei, ma aiseā?

¹⁸ E toʻatele ua teena la tatou feʻau e ui lava o loo iā i tatou le tala e silisili ona lelei. E faapefea ona ono aafia ai i tatou i lenei mea? E pei foʻi lava ona aafia ai Paulo. Na masani ona ia talaʻi i tagata Iutaia, ae o le toʻatele o i latou na teena le feʻau o le faaolataga. Na matuā faanoanoa ai Paulo. Na ia faapea mai: “E tele loʻu faanoanoa, e lē aunoa foʻi le puapuaga o loʻu loto.” (Roma 9:2) Na alofa Paulo i tagata Iutaia na ia talaʻi atu i ai ma na faanoanoa ina ua latou teena le tala lelei.

19. (a) Aiseā e manino ai tatou te ono faavaivai i isi taimi? (e) Aiseā na mafai ai e Paulo ona faaauau pea ona talaʻi?

¹⁹ E tatou te talaʻia foʻi le tala lelei ona o le alofa. O lea la, e manino mai e tatou te ono faavaivai pe a teena e le toʻatele le feʻau o le Malo. Ua faaalia i lenā mea lo tatou manatu mamafa moni mo le tulaga faaleagaga o i latou o tatou talaʻi atu i ai. Ae peitaʻi, e ao ona tatou manatua le faaaʻoaʻoga a Paulo. Aiseā na mafai ai e Paulo ona faaauau pea ona talaʻi? E ui lava na mafatia o ia ma faanoanoa ona o le teena e tagata Iutaia o le tala lelei, ae e leʻi faavaivai ai Paulo iā Iutaia uma, i le manatu e tatau ona fesoasoani iā i latou.  Sa iai lona faamoemoe, o le a iai lava isi e taliaina Keriso. O lea la, e uiga i ona faalogona i tagata Iutaia taʻitoʻatasi, na ia tusi mai: “O le manaʻo lava lenei o loʻu loto, ma laʻu tatalo i le Atua mo Isaraelu, ia faaolaina i latou.”—Roma 10:1.

20, 21. (a) E tusa ai ma la tatou talaʻiga, e faapefea ona tatou mulimuli i le faaaʻoaʻoga a Paulo? (e) O le ā le vala o la tatou talaʻiga o le a talanoaina i le mataupu o loo sosoo mai?

²⁰ Ia mātau mea e lua na faamamafa e Paulo. O lona manaʻoga, ia maua e isi le faaolataga, ma na ia faatoga i le Atua e tusa ma lenā tulaga. I aso nei tatou te mulimuli foʻi i le faaaʻoaʻoga a Paulo. Tatou te matuā mananaʻo ia saʻilia i latou ua tatau i ai le tala lelei. Tatou te tatalo iā Ieova ina ia maua i latou na, ina ia fesoasoani iā i latou e mulimuli i le ala e maua ai le faaolataga.—Faataoto 11:30; Esekielu 33:11; Ioane 6:44.

²¹ Peitaʻi, ina ia faaoo le feʻau o le Malo i le toʻatele e mafai ai, e manaʻomia ona tatou uaʻi atu e lē gata i le māfuaaga ma le feʻau o tatou talaʻia, ae o le auala o loo tatou talaʻi ai. O le a talanoaina i le mataupu o loo sosoo mai lenā vala.

[Faamatalaga pito i lalo]

O le ā ua Ē Aʻoaʻoina?

• O ā māfuaaga tatou te talaʻi ai?

• O le ā le feʻau autū o loo tatou talaʻia?

• O ā faamanuiaga ua oo iā i latou e taliaina le feʻau o le Malo?

• O le ā e fesoasoani iā i tatou e faaauau ai pea ona talaʻi?

[Fesili mo le Suʻesuʻega]

[Ata i le itulau 18]

Ua faamalosia e le feʻau o le Malo ē ua lotomomomo

[Ata i le itulau 20]

Ua fesoasoani le tatalo iā i tatou e onosai ai i le talaʻiga