“Inā Suʻesuʻe Ifo ia iā te Outou”

“Inā tofotofo ia outou iā te outou, po ua outou i le faatuatua; inā suʻesuʻe ifo ia iā te outou.”—2 KORINITO 13:5.

1, 2. (a) Aiseā e leaga ai pe a tatou lē mautonu i o tatou talitonuga? (e) O le ā le tulaga na iai i Korinito na ono māfua ai ona faalētonu isi i le auala e ao ona savavali ai?

A O FAIMALAGA se tamāloa i nuu maotua na oo atu ai i le magalua o le auala. Sa faalētonu ma lē iloa le auala e ao ona ui ai, o lea la na tuufesili ai i tagata feoaʻi mo se fesoasoani peitaʻi, na feteenaʻi a latou faamatalaga. Na lē mafai ona faaauau lana faigāmalaga ona o le fenuminumiaʻi. E mafai foʻi ona iai se aafiaga faapena iā i tatou, ona o le lē mautonu i o tatou talitonuga. O lenā lē mautonu e mafai ona afāina ai lo tatou faia o filifiliga, ma faalētonu ai po o lē fea auala e savavali ai.

² Sa ono iai se aafiaga faapena i nisi i le faapotopotoga Kerisiano i Korinito i Eleni i le uluaʻi senituri, ina ua aliaʻe se faafitauli. Sa luʻia e “aposetolo silisili” le pule a Paulo i le faapea atu: “O ana tusi e mamafa ma malolosi ia; a o lona tino pe a nofo mai e vaivai lea, ma lana upu e faatauvaa lea.” (2 Korinito 10:7-12; 11:5, 6) O lenā manatu na ono faapogaia ai le faalētonu o nisi i le faapotopotoga i Korinito i le auala e ao ona savavali ai.

3, 4. Aiseā e tāua ai iā i tatou le fautuaga a Paulo i tagata Korinito?

³ Sa faavae e Paulo le faapotopotoga i Korinito i lana asiasiga i inā i le 50 T.A. Na nofo o ia i Korinito i le “tausaga atoa ma masina e ono, ua aʻoaʻo atu iā te i latou i le afioga a le Atua.” O le mea moni, “e toʻatele foʻi tagata Korinito o ē na faalogo ua faatuatua i latou, ma ua papatisoina.” (Galuega 18:5-11) Na matuā naunau Paulo i le itu faaleagaga o ona uso talitonu i Korinito. E lē gata i lea, na tusi atu tagata Korinito iā Paulo mo ni fautuaga i ni mataupu patino. (1 Korinito 7:1) O lea la, sa ia avatu ai iā i latou ni fautuaga lelei.

⁴ Na tusi Paulo: “Inā tofotofo ia outou iā te outou, po ua outou i le faatuatua; inā suʻesuʻe ifo ia iā te outou.” (2 Korinito 13:5) O le faatatauina o lenei fautuaga, na puipuia ai na uso i Korinito mai le lē mautonu i le ala e ao ona savavali ai. E mafai foʻi ona puipuia ai i tatou i le ala lava e tasi i aso nei. O lea la, e faapefea ona tatou mulimuli i le fautuaga a Paulo? E faapefea ona tatou tofotofoina i tatou po ua tatou i le faatuatua? O ā mea e aofia ai i le suʻesuʻe ifo iā i tatou lava?

“Inā Tofotofo ia Outou iā te Outou, po ua Outou i le Faatuatua”

5, 6. O le ā le faavae e tofotofoina ai i tatou po ua tatou i le faatuatua, ma aiseā e sili ai ona lelei lenei faavae?

⁵ I se tofotofoga, e masani ona iai se faavae po o ni tapulaa e fua i ai le tofotofoina o se tagata po o se isi mea. I lenei tulaga, e lē o tofotofoina o tatou talitonuga, ae o i tatou taʻitoʻatasi. O loo iai se faavae atoatoa ona lelei e fua i ai le tofotofoina o i tatou. Ua taʻua i se pese na fatuina e le faisalamo: “E sao le tulafono a Ieova, e faafoʻisia mai ai le agaga; e faamaoni poloaʻiga a Ieova, e faapotoina ai lē ua faigofie. E tonu feʻau a  Ieova, e faafiafia ai le loto; e mamā poloaʻiga a Ieova, e malamalama ai mata.” (Salamo 19:7, 8) O loo iai i le Tusi Paia tulafono saʻo, feʻau tonu, poloaʻiga faamaoni ma mamā a Ieova. O le feʻau o loo iai, o le faavae lelei lea e fua i ai le tofotofoina o se tasi.

⁶ Ua faapea mai Paulo e uiga i le feʻau mai le Atua: “O loo ola le afioga a le Atua, o loo matuā galue foʻi, o loo sili foʻi lona maai i pelu uma e faatau maai itu, o loo vaevae foʻi e oo lava i le vavaeeseina o le loto ma le agaga, o gaugātino foʻi ma aano o ivi, o loo faamasino foʻi i manatu ma filifiliga o le loto.” (Eperu 4:12) Ioe, e mafai e le Afioga a le Atua ona tofotofoina o tatou loto, le tagata moni i totonu. E faapefea ona faatatauina e le tagata lava ia i lona olaga lenei feʻau aogā ma malosi? Ua taʻua manino e le faisalamo le auala e mafai ai ona faia lenei mea. Na ia pese: “Amuia le tagata . . . e naunau o ia i le tulafono a Ieova; e mafaufau foʻi o ia i lana tulafono i le ao atoa ma le pō.” (Salamo 1:1, 2) O le “tulafono a Ieova” o loo maua i le Afioga a le Atua, le Tusi Paia. E ao ona tatou fiafia e faitau le Afioga a Ieova. E mautinoa, e ao ona faatulaga ese se taimi e faitau ai le Tusi Paia ma manatunatu loloto foʻi i ai. A o tatou faitau, e ao ona suʻesuʻe ifo iā te i tatou lava po o talafeagai o tatou olaga ma mea o tusia ai.

7. O le ā le auala sili e tofotofoina ai po ua tatou i le faatuatua?

⁷ O le auala sili lenei e tofotofoina ai po ua tatou i le faatuatua, o le faitau ma manatunatu loloto i le Afioga a le Atua, ma suʻesuʻe po o le ā le tele o talafeagai ai a tatou amio ma mea ua tatou aʻoaʻoina. E mafai ona tatou fiafia ona ua tele le fesoasoani ua maua e malamalama ai i le Tusi Paia.

8. Ua faapefea ona fesoasoani lomiga a le “auauna faamaoni ma le mafaufau” iā i tatou e tofotofo ai po ua tatou i le faatuatua?

⁸ Ua saunia e Ieova aʻoaʻoga ma faatonuga e ala mai i lomiga a le “auauna faamaoni ma le mafaufau” ia o loo faamatalaina ai le Tusi Paia. (Mataio 24:45) O se faaaʻoaʻoga, seʻi manatunatu i le pusa ua faaulutalaina “Fesili e Mafaufau Loloto i Ai” o loo i faaiʻuga o mataupu o le tusi Faalatalata Atu iā Ieova. * O se avanoa lelei e mafaufau ai pe faapefea ona e faatatauina iā te oe lava mea ua maua mai lenei vala o le tusi! E tele mataupu ua talanoaina i a tatou mekasini o le Olomatamata ma le Ala Mai!, ua fesoasoani foʻi iā i tatou e tofotofo ai po ua tatou i le faatuatua. Na faapea mai se fafine Kerisiano e uiga i mataupu o le tusi o Faataoto o loo i lomiga talu ai nei o Le Olomatamata: “E ese le aogā o nei mataupu. Ua fesoasoani iā te aʻu e iloilo po o tusa aʻu upu, amio ma oʻu mafaufauga ma tapulaa amiotonu a Ieova.”

9, 10. O ā sauniuniga a Ieova ua fesoasoani i le tofotofoina o i tatou po ua i le faatuatua?

⁹ Ua tatou maua foʻi le tele o faatonuga ma faalaeiauga i sauniga a le faapotopotoga, fonotaga ma tauaofiaga. Ua aofia nei mea uma i sauniuniga faaleagaga a le Atua ua faia mo i latou na vavalo i ai Isaia: “O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foʻi e sili i mauga, ona gasolo ane ai lea o nuu uma i ai. E ō mai lava nuu e tele, ma latou faapea ane, Ō mai ia, tatou ō aʻe ia i le mauga o Ieova, . . . e aʻoaʻo mai foʻi o ia iā te i tatou i ona ala, ona tatou savavali ai lea i ona ala.” (Isaia 2:2, 3) E mautinoa o se faamanuiaga le iai o na faatonuga e uiga i ala o Ieova.

¹⁰ O se isi auala e tofotofoina ai i tatou, o fautuaga mai iā i latou o ē agavaa faaleagaga e aofia ai ma toeaina Kerisiano. Ua taʻua i le Tusi Paia e faatatau iā i latou: “Le au uso e, afai e maua se tagata i se tasi agasala, o outou o i la le Agaga, ia outou faafoʻi  mai lē ua faapeaina ma le loto o le agamalu. Ia faaeteete foʻi oe ina neʻi faaosoosoina oe.” (Kalatia 6:1) Ua tatou matuā lotofaafetai mo lenei fesoasoani ua mafai ai ona tatou faia ni suiga talafeagai!

11. O le ā e manaʻomia i le tofotofoina po ua tatou i le faatuatua?

¹¹ O a tatou lomiga, sauniga faa-Kerisiano ma toeaina tofia, o sauniuniga matagofie ia mai iā Ieova. O lea, o le tofotofoina po ua tatou i le faatuatua, e manaʻomia ai le suʻesuʻeina o le tagata lava ia. Pe a faitau i a tatou lomiga po o le faalogologo foʻi i fautuaga a le Tusi Paia, e ao ona fesili ifo iā i tatou lava: ‘Po ua faamatalaina ai aʻu i inei? Po o oʻu faia lenei mea? Po o oʻu pipii atu i aʻoaʻoga faa-Kerisiano?’ O o tatou uiga agaʻi i faamatalaga ua maua e ala mai i nei sauniuniga, e iai foʻi sona aafiaga i lo tatou itu faaleagaga. Ua taʻua i le Tusi Paia: “A e lē talia e le tagata faaletino o mea a le Agaga o le Atua; auā o mea valea ia iā te ia, . . . A o le tagata faaleagaga e faamasino e ia i mea uma.” (1 Korinito 2:14, 15) E ao ai la ona avea i tatou ma tagata faaleagaga e ala i le matuā lotofaafetai, ma talisapaia mea tatou te faitau ai i tusi, mekasini, isi lomiga ma mea e faalogo ai i sauniga, ma toeaina.

“Inā Suʻesuʻe Ifo ia iā te Outou”

12. O le ā e aofia ai i le suʻesuʻe ifo iā i tatou lava?

¹² O le suʻesuʻe ifo iā i tatou lava o lona uiga, e tatau ona iloiloina le tagata lava ia. Ioe, e mafai ona tatou maua le upu moni peitaʻi, o le ā le tele o loo tatou ola ai e tusa ma lea upu moni? O le suʻesuʻe ifo iā i tatou lava, e aofia ai le faaali atu o ni faamaoniga o i tatou o ni tagata matutua faaleagaga ma o loo matuā talisapaia sauniuniga faaleagaga.

13. E tusa ai ma le Eperu 5:14, o le ā le auala e iloa ai ua tatou matutua faaleagaga?

¹³ Pe faapefea ona iloa ua tatou matutua faaleagaga? Na tusi Paulo: “O mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.” (Eperu 5:14) E faamaonia ua tatou matutua faaleagaga e ala i lo tatou aʻoaʻoina soo o i tatou. E pei ona tatau ona toleni pea lava pea le tagata taaalo ina ia malosi lona tino ma manumalo i lana taaloga, e faapena foʻi ona tatau ona aʻoaʻoina pea i tatou e ala i le faatatauina o mataupu silisili o le Tusi Paia.

14, 15. Aiseā e ao ai ona tatou faia taumafaiga filigā e suʻesuʻe ai mea loloto o le Afioga a le Atua?

¹⁴ Ina ia aʻoaʻo soo i tatou, e tatau ona tatou maua le poto, ma ina ia maua e ao ona faia suʻesuʻega a le tagata lava ia. Pe a faia e lē aunoa suʻesuʻega a le tagata lava ia, aemaise lava i mea loloto o le Afioga a le Atua, ona faigofie lea ona iloa le mea lelei ma le mea leaga. A o faagasolo tausaga, na talanoaina ai le tele o mataupu loloto i Le Olomatamata. O le ā sou manatu pe a oo i mataupu o loo talanoaina ai upu moni loloto? Pe tatou te lē faitauina ea na mataupu ona o loo iai “nisi upu faamatalagatā”? (2 Peteru 3:16) Na i lo lenā, ia tatou faia ni  taumafaiga ia malamalama i mea ua tusia ai.—Efeso 3:18.

¹⁵ Ae ā pe afai e faigatā iā i tatou ona faia a tatou lava suʻesuʻega? E tāua ona tatou taumafai e suʻesuʻe pe atiina aʻe sea faanaunauga. * (1 Peteru 2:2) Ina ia avea ma tagata matutua faaleagaga, e ao ona maua le malosi mai meaʻai aano faaleagaga, o upu moni loloto o le Tusi Paia. A aunoa ma lenā, o le a lē lava le malamalamaga e faia ai filifiliga saʻo. E iai isi mea e aofia ai i le matua faaleagaga i lo le na o le malamalama i mea. E ao ona tatou faatatauina i aso faisoo le poto ua maua mai suʻesuʻega filigā a le tagata lava ia.

16, 17. O le ā le timaʻiga na avatu e Iakopo e faatatau i le avea ma “ē anaana i le upu”?

¹⁶ Ua iloa foʻi po ua tatou suʻesuʻe ifo iā i tatou lava, e ala i a tatou gaoioiga e talisapaia ai le upu moni, o galuega ia o le faatuatua. I le faaaogāina o se talafaatusa e faamatala ai le iloiloina o i tatou lava, ua fai mai Iakopo: “Ia fai outou ma ē anaana i le upu, a e aua le na ona faalogologo i ai, o faasesēina ai outou e outou. Auā ai se tasi e faalogologo i le upu a e lē anaana i ai, e tusa ia ma le tagata ua vaavaai i le faaata i ona lava mata na fanau ma ia; auā ua vaavaai o ia iā te ia, ona alu ese lea, ua galo loa le uiga o ona mata. A o lē matuā matamata i le tulafono o le saʻolotoga ua atoatoa ona lelei, ma ua tumau i ai o ia, e lē se faalogologo ma le faagalogalo lenā tagata, a o lē anaana i le galuega, e manuia o ia i lona lava anaana.”—Iakopo 1:22-25.

¹⁷ Ua faapea mai Iakopo: ‘Ia matamata i le faata o le Afioga a le Atua, ma iloilo oe lava. Ia tausisi i le faia o lenei mea, ma ia suʻesuʻe oe lava e ala i le malamalama ua e maua i le Afioga a le Atua. O lea la, ia aua lava neʻi vave ona galo iā te oe mea na e vaai i ai. Ia faia ni suiga manaʻomia.’ E ono faigatā ona mulimuli i lenei fautuaga i nisi o taimi.

18. Aiseā e lē faigofie ai le mulimuli i le timaʻiga a Iakopo?

¹⁸ Seʻi fai ma faaaʻoaʻoga, o le matafaioi ia auai i le talaʻiga o le Malo. Na tusi Paulo: “O le loto e faatuatua ai, e oo mai ai le amiotonu; a o le gutu e taʻutino ai, e oo mai ai le ola.” (Roma 10:10) O le taʻutino atu e o tatou gutu o le faaolataga, e manaʻomia ai le faia o ni suiga. E lē faigofie i le toʻatele ona auai i le galuega talaʻi. O le maelega i le talaʻiga ma faatāua lea galuega i o tatou olaga, e manaʻomia atili ai ni suiga ma le tele o taumafaiga. (Mataio 6:33) Ae tatou te fiafia pe a avea ma ē anaana i le galuega a le Atua, auā e viia ai Ieova. O lea la, po o i tatou ea o ni tagata talaʻi maelega o le Malo?

19. O ā mea e aofia i a tatou galuega o le faatuatua?

¹⁹ O ā mea e aofia i a tatou galuega o le  faatuatua? Ua taʻua e Paulo: “O mea foʻi ua aʻoaʻoina ai outou, ma outou talia, ma outou faalogo i ai, ma outou vaai mai iā te aʻu, ia outou faia ia lava mea; ona iā te outou lea o le Atua e ona le manuia.” (Filipi 4:9) Ua iloa o i tatou o ni Kerisiano e ala i le faatinoina o mea ua aʻoaʻoina, talia, faalogo ma vaai i ai, o mea uma na e aofia ai i lo tatou tuuina atu faa-Kerisiano ma le faia o soo. Na poloaʻi mai Ieova e ala iā Isaia: “O le ala lava lenei, ia outou savavali ai.”—Isaia 30:21.

20. O ai tagata ua avea o ni faamanuiaga i le faapotopotoga?

²⁰ O se faamanuiaga i le faapotopotoga ia tagata aʻoga filigā o le Afioga a le Atua, o ē talaʻi ma le maelega le tala lelei, o ē le ponā lo latou faamaoni ma matuā sapasapaia le Malo. Ua latou saosaolaumea i le malosi o le faapotopotoga. Ua faamaonia le aogā o i latou, aemaise lava ona o loo toʻatele tagata fou e ao ona tausia. Pe afai tatou te manatuaina le fautuaga a Paulo ‘inā suʻesuʻe ia outou iā te outou po ua outou i le faatuatua, inā suʻesuʻe ifo ia outou iā te outou,’ o le a avea ai foʻi i tatou o ni aafiaga lelei i isi.

Ia Fiafia e Fai le Finagalo o le Atua

21, 22. E faapefea ona tatou fiafia e fai le finagalo o le Atua?

²¹ Na pese Tavita: “Loʻu Atua e, ou te fiafia e fai lou finagalo; o loo i totonu lava iā te aʻu lau tulafono.” (Salamo 40:8) Na fiafia Tavita e fai le finagalo o le Atua. Aiseā? Talu ai sa manatua e Tavita ia tulafono a Ieova. Na mautinoa e Tavita le ala e savali ai.

²² Pe afai tatou te manatua le tulafono a le Atua, tatou te mautinoa le ala tatou te savavali ai. Tatou te fiafia e fai le finagalo o le Atua. O le mea lea, seʻi o tatou matuā “finafinau” ai lava a o auauna atu iā Ieova mai i o tatou loto.—Luka 13:24.

[Faamatalaga pito i lalo]

Pe E te Manatua?

• E faapefea ona tofotofoina i tatou po ua tatou i le faatuatua?

• O le ā e aofia ai i le suʻesuʻe ifo iā te i tatou lava?

• O le ā le faamaoniga o lo tatou matutua faaleagaga?

• E faapefea ona fesoasoani galuega o le faatuatua tatou te suʻesuʻe ifo ai iā i tatou lava?

[Fesili mo le Suʻesuʻega]

[Ata i le itulau 23]

Pe e te silafia le auala sili e tofotofo ai oe po ua e i le faatuatua?

[Ata i le itulau 24]

E iloa ua tatou matutua faaleagaga pe a aʻoaʻo soo i tatou i Afioga a le Atua

[Ata i le itulau 25]

E tatou te suʻesuʻe ifo iā i tatou e ala i le ‘anaana i le galuega’ ae lē o le ‘faalogologo ma le faagalogalo’