“O Lē Ua Mafaufau ua Faautauta o Ia i Lona Ala”

O LE tagata mafaufau, e tomai i le faatautaia o so o se mea, ma e poto, e atamai i le faia o faaiʻuga, e vave i le faia o tonu lelei, e faaalia le tofā mamao ma e faautauta. E lē o sē e faaʻoleʻole pe faufau leaga. Ua faapea mai le Faataoto 13:16: “O tagata mafaufau uma, e taʻitasi ma amio poto ia.” Ioe, o le mafaufau po o le faautauta, o se uiga e manaʻomia.

E faapefea ona tatou mafaufau pe faautauta i o tatou olaga i aso faisoo? E faapefea ona tatou mafaufau i filifiliga e tatou te faia, i le auala e feagai ai ma isi, ma le auala e tali atu ai i tulaga eseese e tulaʻi mai? O ā taui o le tagata faautauta? O ā āuga leaga e latou te ʻalofia? Ua tuuina mai e Solomona le tupu o Isaraelu tali aogā i nei fesili, ia ua tusia i le Faataoto 14:12-25. *

Ia Filifili ma le Atamai Ou Ala

O le faia o filifiliga atamai ma taulau manuia ai i le olaga, e manaʻomia ona iloa le eseesega o le saʻo ma le sesē. Ae peitaʻi, ua lapataʻi mai le Tusi Paia: “O i ai le ala ua tonu i le manatu o le tagata; a o lona taunuuga, o ala ia e oti ai.” (Faataoto 14:12) I lea, e tatau ai ona tatou iloa le eseesega o le mea e saʻo moni, ma le mea e foliga mai e saʻo. O le faaupuga “o ala ia e oti ai,” e faaalia ai, e matuā tele ala taufaaʻoleʻole o loo iai. Seʻi manatu i nisi o mea e ao ona tatou iloa ma ʻaloese ai.

O tagata mauoloa ma taʻutaʻua o lenei lalolagi, e masani ona manatu i ai o ni ē e faaaloalogia e ao ona viiviia. O lo latou taulau i mataupufai a tagata ma tulaga tautupe, e ono foliga mai ai e saʻo le auala lea o loo latou faia ai mea. Ae faapefea auala ia o loo tamaoaiga ai pe taʻutaʻua ai le toʻatele o tagata faapena? Pe e saʻo ma talafeagai i taimi uma o latou ala? O loo iai foʻi ni tagata e maelega i a latou tapuaʻiga. Ae po o faamaonia e lo latou faamaoni ma le maelega, e saʻo o latou talitonuga?—Roma 10:2, 3.

E iai foʻi le ala e foliga mai e saʻo ona o le uiga taufaaʻoleʻole. Pe a tatou fai filifiliga i le mea e saʻo e tusa ma o tatou lava manatu, tatou te faalagolago lea i o tatou loto, o se taʻiala faaʻoleʻole lenā. (Ieremia 17:9) O se loto fuatia ifo e lē malamalama ma e lē aʻoaʻoina, e ono iʻu ai ina manatu, e saʻo le auala sesē. O le ā le mea o le a fesoasoani iā i tatou e filifilia le auala saʻo?

O se mea tatau lo tatou suʻesuʻeina ma le filigā o upu moni loloto o le Afioga a le Atua, pe afai e mananaʻo e avea i tatou o ni ē “ua masani ona lagona ina ua aʻoaʻosooina e iloa le lelei ma le leaga.” E lē gata i lea, e tatau ona aʻoaʻosooina le mafaufau e ala i le faatatauina o taʻiala o le Tusi Paia. (Eperu 5:14) E tatau ona tatou faaeteete, ia aua neʻi ui atu i se auala e foliga mai e saʻo ma liliu ese ai mai ‘i le faitotoʻa vaapiapi e tau i le ola.’—Mataio 7:13,14.

Pe a “Faanoanoa le Loto”

Pe e mafai ona fiafia pe a faanoanoa o tatou loto? Pe e mafai i le ʻataʻata ma mea faafiafia ona aveesea ai le faanoanoa ua leva ona mauaa i le loto? Pe e atamai ona faagalo  faalogona faanoanoa i le inuina o le ava malosi, le faaaogāina o fualaau faasāina, po o le taumafai e aveesea na faalogona e ala i le ola i se olaga amioleaga? O le tali, e leai. Ua faapea mai le tupu poto: “A o ʻataʻata lava, ua faanoanoa le loto.”—Faataoto 14:13a.

O le ʻataʻata, e ono ufiufi ai le faanoanoa, ae e lē mafai ona aveesea ai. Ua taʻua i le Tusi Paia: “O le mea ma lona tausaga i mea uma.” O le mea moni, e iai “ona pō e tagi ai, ma ona pō e ʻataʻata ai; o ona pō e taufaitagituʻi ai, ma ona pō e sasaa ai.” (Failauga 3:1, 4) Pe a loto mafatia pea, e tatau ona faia ni laasaga e foʻia ai e ala i le saʻilia o se taʻitaʻiga lelei. (Faataoto 24:6) * E itiiti aogā o le ʻataʻata ma mea faafiafia. I le lapataʻi mai faasaga i faafiafiaga lē tatau ma le soona faaalu o le olaga i mea faafiafia, ua faapea mai Solomona: “O le iʻuga foʻi o le olioli, o le faanoanoa lea.”—Faataoto 14:13e.

E Faapefea Ona Faamalieina Lē ua Tuumuli i Lona Loto pe e Lē Faatuatua ma Lē Amio Lelei?

Ua faapea mai le tupu o Isaraelu: “O lē ua tuumuli i lona loto, e maʻona o ia i ona lava ala; a o le tagata amio lelei, e maʻona o ia ai ona lava ala.” (Faataoto 14:14) E faapefea ona faamalieina le tagata lē faatuatua ma lē ua amio lelei i iʻuga o a la gaoioiga?

O se tagata e lē faatuatua, e lē manatu mamafa e tala atu se tala i le Atua. O lea la, e lē tāua i lenā tagata le faia o le mea tonu i le silafaga a Ieova. (1 Peteru 4:3-5) E malie lenā tagata i iʻuga o lona olaga manaʻo tele i mea faitino. (Salamo 144:11-15a) A o le tagata lelei, e naunau lona loto i mea faaleagaga. I mea uma na te faia, e pipii atu lava i tapulaa amiotonu a le Atua. E faamalieina lea tagata i iʻuga o mea na te faia auā, ua fai Ieova ma ona Atua, ma e lē mafaatusalia lona fiafia ona o le auauna atu i le Silisili ese.—Salamo 144:15e.

Aua le ‘Talia Upu Uma’

I le faatusatusaina o ala o le tagata mafaufau ma ala o lē ua faigofie, ua taʻua e Solomona: “O lē ua faigofie, e talia e ia upu uma; a o lē ua mafaufau, ua faautauta o ia i lona  ala.” (Faataoto 14:15) O le tagata mafaufau e lē ʻolegiagofie. Na i lo o le talitonu i mea uma e faalogo i ai, pe faia e isi tonu mo ia, e na te fuafua lelei ana gaoioiga. E na te aoao mai mea moni uma e mafai ona maua, ma e gaoioi o ia ma le poto.

Seʻi fai ma faaaʻoaʻoga le fesili, “Pe e iai se Atua?” O le tagata faigofie, e naunau o ia e talia talitonuga taatele, po o talitonuga o tagata lauiloa. Ae o le tagata mafaufau, e na te iloiloina le mea moni. E manatunatu i mau e pei o le Roma 1:20 ma le Eperu 3:4. Pe a oo i mataupu faaleagaga, o le tagata faautauta, e lē na ona ia talia manatu o taʻitaʻi lotu. E na te “tofotofo i agaga [po o faamatalaga], pe mai le Atua.”—1 Ioane 4:1.

Maʻeu le atamai o le utagiaina o le fautuaga ina ia ‘aua le talia upu uma’! E tatau ona manatua lelei lenei fautuaga e i latou ua maua tiute tauave o le aʻoaʻia o isi i le faapotopotoga Kerisiano. E tatau i le tagata e faia aʻoaʻiga ona ia maua faamatalaga uma e uiga i le mea na tupu. E tatau ona ia faalogologo lelei, ma maua mea moni mai i itu uma, ina ia logo lelei ma ia lē faaituʻau lana aʻoaʻiga.—Faataoto 18:13; 29:20.

‘O le Tagata ua Faitogafiti, ua Inosia o Ia’

I le faasino atu foʻi i le eseesega i le va o le tagata poto ma le tagata valea, ua faapea mai le tupu o Isaraelu: “Ua mataʻu le tagata poto, ma ʻalo ese i le leaga; a o le vale, ua faamaualuga o ia ma nofo faatalanoa. O lē itagofie ua amio faavalea o ia; o le tagata foʻi ua fai togafiti leaga, ua inosia o ia.”—Faataoto 14:16, 17.

O le tagata poto, e mataʻu i iʻuga o le uia o se auala sesē. O le mea lea, e faaeteete o ia ma talisapaia se fautuaga e fesoasoani iā te ia e ʻalofia ai le leaga. A o le tagata valea, e leai se mataʻu faapena. O lona faamaualuga ua ia lē amanaʻia ai ma le faasausili fautuaga mai isi. Ona o lona itagofie, ua gaoioi ai ma le valea.

O le faaupuga i le uluaʻi gagana ua faaliliuina i le “togafiti,” e lua ona uiga. I se uiga lelei, ua faailoa mai ai le mafaufau, faautauta po o le poto. (Faataoto 1:4; 2:11; 3:21) I se uiga leaga, e faasino atu le fuaiupu i manatu leaga po o ni mafaufauga e faitogafiti leaga.—Salamo 37:7; Faataoto 12:2; 24:8.

Afai e faasino atu le faaupuga i le uluaʻi gagana i togafiti leaga, e lē faigatā la ona iloa le pogai ua inosia ai lenā tagata. Peitaʻi afai e faasino atu i le itu lelei aiseā la e inosia ai se tagata e mafaufau? Ae, pe e lē moni ea e inosia le tagata mafaufau e i latou e leai ni mafaufau? O se faaaʻoaʻoga, o i latou e mafaufau lelei ma filifili ia lē avea o “ni ō le lalolagi,” e inosia i latou e le lalolagi. (Ioane 15:19) E amusia talavou Kerisiano o ē mafaufau lelei ma tutūmausalī e ʻalofia amioga leaga, e ala i le tetee atu i omiga leaga mai ē latou te tupulaga. E moni, e inosia tagata tapuaʻi faamaoni e le lalolagi lea o loo nofo toʻilalo iā Satani le Tiapolo.—1 Ioane 5:19.

“Ua Ifo Ē ua Amio Leaga”

E iai se isi itu, e eseese ai le tagata mafaufau ma lē ua faigofie. “O ē faigofie, e fai mo latou tofi le valea; a o ē mafaufau, e faapaleina i latou i le poto.” (Faataoto 14:18) O le leai o se tofā mamao, e faia ai e tagata faigofie mea valea. Ua avea lea ma ala o ō latou olaga. Ae o le poto, e faamatagofie ai lē ua mafaufau, e pei ona faamamaluina e se palealii se tupu.

Ua faapea mai le tupu poto: “Ua ifo ē ua amio leaga i luma o ē amio lelei, ma ē agasala, ua ifo i latou i faitotoʻa o lē amiotonu.” (Faataoto 14:19) I se isi faaupuga, o le a iʻu ina manumalo le lelei i le leaga. Seʻi manatu i le faateleina o le aofaʻi o tagata o le Atua i aso nei ma le olaga silisili ona lelei o loo latou olioli ai. O le vaai atu i faamanuiaga ua maua e auauna a Ieova, o le a uunaʻia ai nisi tagata tetee “e ifo” atu i le fafine faafaatusa faalelagi a Ieova, lea ua fai ma ona sui le vaega totoe ua faauuina e le agaga, o loo soifua i le lalolagi. Iā Amaketo, o le a faamalosia ē tetee e faailoa  mai, o le vaega faalelalolagi o le faalapotopotoga a le Atua, ua avea moni ma sui o le vaega faalelagi.—Isaia 60:1, 14; Kalatia 6:16; Faaaliga 16:14, 16.

‘Alofagia Ē ua Tigāina’

I le manatunatu i se uiga masani o tagata, ua faapea mai ai Solomona: “Ua inosia lē ua mativa e lē la te tuaoi; a e toʻatele o ē alolofa i le mauʻoa.” (Faataoto 14:20) E matuā moni lenei mea i tagata lē lelei atoatoa! O le taaʻina i le manatu faapito, ua latou fiafia ai i tagata mauoloa i lo o tagata matitiva. E ui ina toʻatele uō a le mauʻoa, ae e vave foʻi ona mavae atu e pei o ana ʻoa. E tatau la ona tatou ʻalofia le faia o uō e ala i le ʻoa po o le taufaasee.

Ae faapefea pe afai ua faaalia i lo tatou suʻesuʻe ifo o i tatou lava ua tatou faafiafia tagata mauʻoa, ae vaai maulalo i tagata matitiva? E tatau ona tatou iloa, e taʻusalaina i le Tusi Paia le faaituʻau. Ua taʻua mai ai: “O lē ʻinoʻino i le la te tuaoi, ua agasala o ia; a o lē alofa i ē ua tigāina, amuia lava o ia.”—Faataoto 14:21.

E tatau ona tatou manatunatu iā i latou ua oo i tulaga faigatā. (Iakopo 1:27) E faapefea ona tatou faia o lenā mea? I le fesoasoani atu iā i latou e ala i “le ʻoa a le lalolagi nei,” e aofia ai tupe, meaʻai, se mea e nonofo ai, lavalava, ma le manatu mamafa iā i latou. (1 Ioane 3:17) Amuia lē e faaalia lona alofa i na tagata, talu ai ua faapea mai le upu, “e sili le manuia o lē na te foaʻi atu, i le manuia o lē na te talia mai.”—Galuega 20:35, LT.

O ā Iʻuga e Oo iā i Latou?

Ua faatatau le mataupu silisili e faapea, “o le mea e lūlūina e le tagata, o le mea lava lea e seleseleina mai ai e ia” i le tagata mafaufau atoa ma le tagata valea. (Kalatia 6:7) O le tagata mafaufau, e na te faia mea lelei, a o le tagata valea, e faitogafiti leaga. Ua fesili le tupu poto: “E lē ua sesē ea o ē fai togafiti leaga?” O le tali, ioe; “ua sesē” i latou. “A o i ai le alofa ma le faamaoni i ē fai togafiti (po o mea) lelei.” (Faataoto 14:22) O i latou e faia mea lelei, e olioli i le agalelei o isi, ma le alofa o le Atua.

I le faafesootaʻia o le manuia ma galuega mamafa, faapea le sootaga o le lē taulau ma le tele o upu ae leai ni galuega, ua faapea mai Solomona: “O i ai le mau i galuega uma; a o le upu a laugutu, na o le mativa e iʻu i ai.” (Faataoto 14:23) E moni lava, o loo faatatau le mataupu silisili lenei i a tatou taumafaiga faaleagaga. E tauia i tatou pe a galulue maelega i le galuega talaʻi, auā e mafai ona faalauiloa atu upu moni faasaoola o le Afioga a le Atua i le toʻatele o tagata. O le faia ma le faamaoni o auaunaga uma mo le Atua ma lana faalapotopotoga, e iʻu ai i le olioli ma le lotomalie.

Ua faapea mai le Faataoto 14:24: “O le pale o ē popoto, o la latou oloa lea; a o le valea o ē valelea, o le valea lava lea.” E ono uiga lenei fuaitau e faapea, o le atamai o loo taumafai tagata popoto e maua, o a latou oloa ia, ma e faapaleina pe faamatagofie ai i latou. A o ē valea, e na o le valea lava e maua. E tusa ai ma le faamatalaga i se tasi tusi, ua ono uiga atu foʻi lenei faataoto e faapea, o le “oloa, o se mea e faamatagofie ai i latou o ē e faaaogā tatau . . . [a o] ē valelea, e na o mea valea lava latou te maua.” Po o le ā lava le tulaga, e taulau manuia le tagata poto na i lo o le tagata valea.

Fai mai le tupu o Isaraelu: “E laveaʻiina tagata e le molimau faamaoni, a o le molimau pepelo, e tautala o ia i mea pepelo.” (Faataoto 14:25) E ui ina e moni lenei mea e tusa ai ma se tulaga faafaamasinoga, ae seʻi manatu la i lona faatatauina i la tatou faiva. O la tatou galuega talaʻi ma le faia o soo, e aofia ai le molimau atu o upu moni o le Afioga a le Atua. Ua laveaʻiina e lenā molimau tagata loto faamaoni mai lotu sesē ma faasaoina i latou. O le uaʻi totoa ifo iā i tatou lava ma la tatou aʻoaʻo atu, o le a faasaoina ai i tatou atoa foʻi ma i latou e faalogo mai iā i tatou. (1 Timoteo 4:16) A o faaauau pea ona tatou faia o lenei mea, seʻi o tatou mataala ia mafaufau ma faautauta i vala uma o le olaga.

[Faamatalaga pito i lalo]

[Ata i le itulau 18]

E tatau ona suʻesuʻe ma le filigā i upu moni loloto, ina ia tatou iloa le eseesega o le saʻo ma le sesē

[Ata i le itulau 18]

Pe e faamalieina moni se olaga manaʻo tele i mea faitino?