E Aogā le Tusi Paia E te Maua ai le Fiafiaga Moni

E UI e lē o se tusi faafomaʻi, ae ua faamatala mai i le Tusi Paia āuga lelei po o āuga leaga e mafai ona aafia ai le mafaufau po o le soifua mālōlōina o se tagata, ona o faalogona. Ua faapea mai le Tusi Paia: “O le loto fiafia, e fai ma vailaau aogā lea; a o le loto faanoanoa e mamago ai ivi.” Ua tatou faitau atili ai e faapea: “Afai e te faavaivai i le aso vale, ua itiiti lava lou malosi.” (Faataoto 17:22; 24:10) O lagona faavaivai, e mafai ona aveesea ai le malosi, ma lē naunau ai e faia ni suiga pe saʻili foʻi se fesoasoani.

E mafai foʻi ona aafia le itu faaleagaga o se tagata ona o le loto vaivai. O tagata e lagona ua lē toe aogā i latou, e masani ona manatu e lē taitai mafai ona latou maua se mafutaga vavalalata ma le Atua, ma maua ai lona finagalo malie. O Simone, lea na taʻua i le mataupu ua mavae, sa lē talitonu, “o ia o se tagata e mafai ona fiafia mai i ai le Atua.” Ae peitaʻi, pe a tatou vaavaai i le Tusi Paia, tatou te iloa ai, o loo silasila alofa mai le Atua iā i latou o taumafai e faafiafia lona finagalo.

O Loo Silasila Alofa Mai le Atua

Ua taʻu mai e le Tusi Paia iā i tatou, e “latalata mai Ieova i ē ua loto momomo; ua ia faaola foʻi i ē ua loto nutimomoia.” E lē inosia e le Atua “le loto momomo ma le nutimomoia,” ae ua ia folafola mai, na te “faamāfanafana i ē ua loto maulalo, ma faamāfanafanaina loto o ē ua loto momomo.”—Salamo 34: 18; 51:17; Isaia 57:15.

Na silafia e Iesu, le Alo o le Atua i se tasi aso, e tatau ona malamalama ona soo i lenei mea moni, e silasila le Atua i mea lelei i loto o Ana  auauna. O lea, na ia faamatala atu ai se tala faatusa e faapea, e silafia e le Atua se manu iti pe a paʻū i le eleele; o se mea e manatu māmā i ai le toʻatele o tagata. Sa ia faamatilatila atu foʻi, e silafia e le Atua mea uma e uiga i le tagata e tusa lava pe laʻitiiti lava, e oo lava i le aofaʻi o lauulu i ō latou ulu. Na faaiʻu e Iesu lana tala faatusa i le faapea atu: “O lea aua tou te matataʻu ai; e sili outou i manu iti e tele.” (Mataio 10:29-31) * Na faailoa atu e Iesu, e tusa lava po o a faalogona o tagata e uiga iā i latou lava, ae e tāua i le silafaga a le Atua tagata e faatuatua iā te ia. O le mea moni, ua faamanatu mai ai e le aposetolo o Peteru iā i tatou e faapea, “e lē faailogaina tagata e le Atua; a e peitaʻi o le mataʻu iā te ia i nuu uma lava, ma fai le amiotonu, ua talia i latou e ia.”—Galuega 10:34, 35.

Ia Faasagatonu o Tatou Manatu

Ua uunaʻia i tatou e le Afioga a le Atua ia faasagatonu o tatou manatu agaʻi iā i tatou lava. Na tusi Paulo e faapea: “Aua o le alofa tunoa ua tuuina mai ai iā te aʻu, ou te fai atu ai iā te outou uma, aua le faasili le manatu o se tasi i le mea ua tatau ona manatu ai, a ia māmā le manatu, ia tusa ma le tofiga o le faatuatua ua taʻitasi ma tofu ai mai le Atua.”—Roma 12:3.

E mautinoa lava, tatou te lē mananaʻo e manatu ua sili i tatou i lo o isi, ma oo ai ina tatou loto vii; e tatou te lē mananaʻo foʻi e manatu faatauvaa iā i tatou lava. Na i lo lea, e tatau ona avea ma a tatou manulautī le maua o se manatu talafeagai e uiga iā i tatou lava, ma ia manatua e iai mea tatou te malolosi ai, ma mea e gata mai ai lo tatou mafai. Ua faapea mai se fafine Kerisiano: “E lē o aʻu o se tagata leaga; po o aʻu foʻi o se tagata sili ona lelei. E iai mea ou te lelei ai, ma mea foʻi ou te leaga ai, ma e faapena foʻi tagata uma lava.”

O le mea moni, e faigofie lava ona fai atu, ia faasagasagatonu ou manatu ae faigatā ona faatino. E ono manaʻomia ai ni taumafaiga se tele ina ia aveesea le soona manatu sesē ia atonu na iai e uiga iā i tatou lava mo le tele o tausaga. Ae peitaʻi, ona o le fesoasoani a le Atua, e mafai ai ona suia o tatou uiga, faapea la tatou vaaiga i le olaga. O le mea moni lava lenei o loo uunaʻia i tatou e le Afioga a le Atua e fai. E tatou te faitau ai: “Ia outou to ese le tagata tuai o loo ua leaga, e tusa ma le amioga faaanamua, e tusa ma tuʻinanau e faasesē ai. A e peitaʻi, ia toe fuataʻiina manaʻo o ō outou loto, ma ia oofu outou i le tagata fou ua faia e foliga i le Atua, i le amiotonu ma le amio lelei e faamaoni.”—Efeso 4:22-24.

O le taumafai ina ia ‘toe fuataʻiina o tatou mafaufau,’ e mafai ai ona suia o tatou uiga, mai se tasi e soona manatu sesē e uiga iā te ia, i se tasi ua fiafia iā te ia lava. Na oo ina talisapaia e Lena lea na taʻua i le mataupu ua mavae atu, e lē mafai lava ona suia ona faalogona iā te ia lava, seʻiloga ua tuuʻese lenei manatu e leai se tasi e mafai ona alofa pe fesoasoani iā te ia. O ā fautuaga aogā i le Tusi Paia na  fesoasoani iā Lena, Simone, ma isi ina ia toe fuataʻiina ai o latou loto?

Taʻiala a le Tusi Paia ua Maua ai le Fiafia

“Ia e tuuina atu iā Ieova o mea e te popole vale ai; o ia lava na te tausia oe.” (Salamo 55:22) O le mea muamua ma e aupito sili e mafai ona fesoasoani iā i tatou i le mauaina o le fiafia, o le tatalo. Ua faapea mai Simone: “So o se taimi lava ou te lagona ai le lotovaivai, ou te liliu atu ai iā Ieova ma talosaga atu mo lana fesoasoani. I na tulaga uma lava, sa ou lagona ai le malosi mai iā te ia ma lana taʻitaʻiga.” Ina ua faapea mai le faisalamo ia lafo atu iā Ieova mea uma tatou te popole ai, ua ia faamanatu mai e lē gata ina manatu mai Ieova, ae o loo ia silasila mai foʻi iā i tatou taʻitoʻatasi ua tatau i ai lana fesoasoani ma le lagolagosua. I le pō o le Paseka i le 33 T.A., na faanoanoa ai soo o Iesu ona o le mea na ia fetalai atu ai e uiga i le lata mai o lona maliu. Na ia faalaeiau i latou ina ia tatalo i le Tamā, ona ia toe faapea atu lea: “Inā ole atu ia, ona outou maua ai lea, ina ia atoatoa ai lo outou olioli.”—Ioane 16:23, 24.

“E sili le manuia o lē na te foaʻi atu, i lo lē na te talia mai.” (Galuega 20:35) E pei ona aʻoaʻo atu e Iesu, o le foaʻi atu, o le vala autū lea i le mauaina o se olaga fiafia. O le faatatauina o lenei upu moni o le Tusi Paia, e mafai ai ona tatou tepa taulaʻi atu i manaʻoga o isi na i lo le popole i o tatou lava vaivaiga. Pe a tatou fesoasoani atu i isi ma iloa lo latou tali mai ma le loto faafetai, ua matuā fiafia ai i tatou. Ua talitonu Lena, o le tufa atu e lē aunoa o le tala lelei o le Tusi Paia i isi, ua fesoasoani iā te ia i ni auala se lua. Ua ia faapea mai: “Muamua, ua ou maua ai le fiafia ma le lotomalie lea na fetalai i ai Iesu. O lona lua, ua ou maua ai le fiafia ona o le toʻatele o tagata e tali lelei mai.” O le foaʻi atu ma le lē taofiofia o i tatou lava, o le a tatou tofo ai i le moni o le Faataoto 11:25: “O ia foʻi lē faasūsū i nisi, e faasūsūina lava o ia.”

“O aso uma o lē ua tigāina, ua leaga ia; a o le loto fiafia, o le tausamiga e lē aunoa lea.” (Faataoto 15:15) E tofu uma lava i tatou ma filifiliga i le auala e tatou te manatu ai iā i tatou lava ma o tatou tulaga. E mafai ona pei i tatou o le tagata lea ua faitio i mea uma ma tigāina ai, pe e mafai foʻi ona tatou filifili ia saʻili le lelei i mea uma, ma maua ai “le loto fiafia” ma olioli e pei lava sa tatou auai i se tausamiga. Fai mai Simone: “Ou te taumafai lava i le mea e mafai ai, ina ia lelei oʻu manatu. Ou te pisi pea i le faia o aʻu lava suʻesuʻega ma auai i le faiva, ou te finafinau foʻi i le tatalo. Ou te taumafai foʻi ina ia aufaatasi pea ma tagata e fiafia, ma taumafai foʻi e fesoasoani ma lagolagosua i nisi o loto mafatia.” O uiga faapena, e maua ai le fiafiaga moni, e pei ona uunaʻia i tatou e le Tusi Paia: “Inā fiafia ia iā Ieova, ma olioli o outou o ē amiotonu; inā alalaga ia ma le fiafia o outou uma o ē ua faamaoni o outou loto.”—Salamo 32:11.

“E alofa le uō i aso uma lava; a e fanau le uso mo le aso vale.” (Faataoto 17:17) O le talanoa atu i sē ua pele,  po o se faufautua maufaatuatuaina, e fesoasoani iā i tatou e iloa ma aveesea ai faalogona lē lelei, a o leʻi lofitūina ai i tatou. O le talanoa atu i isi, e mafai ona fesoasoani iā i tatou ia saʻo la tatou vaai i mea. Ua ioeina e Simone e faapea: “E fesoasoani tele le talanoaina o mea. E manaʻomia ona e faamatala atu i se tasi po o ā ou lagona. O le tulaga masani, e na o le pau lava le mea e manaʻomia, o le faamatala atu lea i se tasi.” O le faia faapea, o le a fesoasoani iā te oe e iloa ai le moni o le faataoto lea e faapea mai: “O le atuatuvale i le loto o le tagata ua faavaivai ai o ia; a o le upu lelei e faaolioliina ai.”—Faataoto 12:25.

Le Mea e Mafai Ona E Faia

Ua uma ona tatou talanoaina na o ni nai taʻiala mai le tele o taʻiala mananaia ma le aogā mai le Tusi Paia, ia e mafai ona fesoasoani iā i tatou e aveesea faalogona leaga ma maua ai le fiafiaga moni. Afai o oe o se tasi o i latou o loo taumafai e faaleleia faalogona ua faamanuʻalia, matou te faalaeiauina oe ina ia iloilo totoʻa le Tusi Paia, le Afioga a le Atua. Ia aʻoaʻo ina ia atiina aʻe se faalogona mautinoa ma lelei e uiga iā te oe lava, ma lau faiā ma le Atua. O lo matou faanaunauga moni, tau ina ia aogā taʻiala mai le Afioga a le Atua, e te maua ai le fiafiaga moni i mea uma e te faia.

[Faamatalaga pito i lalo]

[Ata i le itulau 7]

O le ola e tusa ma taʻiala a le Tusi Paia, e maua ai le fiafiaga moni