Talaaga o le Soifuaga

E Faatamaoaigaina e Ieova Ē Tausi i Lona Ala

FAAMATALAINA E ROMUALD STAWSKI

Na avea le itu i mātū o Polani ma vaega e sili ona malosi ai fetauaʻiga, ina ua pa le taua lona lua a le lalolagi iā Setema 1939. O loʻu naunau e fia iloa, na ou alu ai i le tafā o taua e latalata ane ina ia matamata ai, ae faatoʻā iva na o oʻu tausaga. E mataʻutia mea na ou vaaia—o loo fau solo tino o tagata feoti i le malae ma le asu ua matuā māfiafia. E ui lava sa ou mafaufau i se auala ou te toe taunuu ai ma le saogalemu i le fale, ae na fetuleni mai ni fesili i loʻu mafaufau: “Aiseā ua lē taofia ai e le Atua nei mea mataʻutia? O lē fea itu taua o loo iai o ia?”

I LE taufaaiʻuiʻuga o le taua, na faamalosia ai tama talavou ina ia galulue mo le malo o Siamani. O se tasi e musu, sa tautau i luga o le laau, e faapipii ai le faailoga i luma o le fatafata “faalata.” O le taulaga lea matou te nonofo ai o Gdynia, e tū i le va o itu taua nei e lua. Na alamū solo pulufana ma pomu i luga aʻe o o matou ulu a o matou ō atu i fafo o le taulaga e ti vai, ma o i inā na oti ai loʻu uso laʻitiiti o Henryk. Ona o nei tulaga mataʻutia, na ave ai i matou e toʻafā e loʻu tinā i se nofoaga e faia i lalo o le palapala ina ia saogalemu ai. Na oti ai i inā loʻu uso e igoa iā Eugeniusz faatoʻā lua tausaga le matua i le lipi.

Na ou toe fesili ai foʻi: “Aiseā ua lē fesoasoani ai le Atua iā i matou? Aiseā ua ia lē taofia ai nei puapuaga?” E leʻi maua ni tali o aʻu fesili e ui lava o aʻu o se Katoliko maelega ma toʻaga i le lotu.

 Ua Ou Talia le Upu Moni

Na maua tali i aʻu fesili mai se tasi ou te leʻi faatalitalia. Na ola le taua i le 1945, ma i le amataga o le 1947, na asiasi atu ai se Molimau a Ieova i lo matou aiga i Gdynia. Sa talanoa i ai loʻu tinā ma na ou lagonaina nisi o mea na la talanoa i ai. Na logoleleia ana faamatalaga, o lea na matou taliaina ai se valaaulia i se sauniga faa-Kerisiano. I se masina mulimuli ane, na ou aufaatasi atu i se vaega o ni molimau ma talaʻi atu i isi e uiga i se lalolagi fou lea o le a lē toe iai ni taua ma faiga sauā, e ui ou te leʻi malamalama lelei e uiga i le upu moni. Na matuā faafiafiaina ai aʻu.

Na ou papatiso i se fonotaga na faia i Sopot iā Setema 1947. Iā Me i le tausaga na sosoo ane ai, na amata ai ona ou galue o sē talai faataimi atoa, e faaaogā ai le tele o le taimi e talaʻia ai le feʻau o le Tusi Paia i isi. Na matuā tetee faifeʻau o lo matou nuu i le galuega, ma taumafai e faaoo mai ni sauāga. O lea, na osofaʻia i matou e ni tagata, tauʻai i maa ma sasa faamoʻamoʻa. I se isi taimi, na uunaʻia e taupousa ma faifeʻau ni tagata ina ia toe osofaʻia i matou. Na matou sulufaʻi i le ofisa o leoleo, peitaʻi na latou siʻomia le fale ma taufaamataʻu atu o le a latou sasaina i matou. O le iʻuga, na ō mai ni leoleo e puipuia ma toe momoli i matou i o matou aiga.

E leai se faapotopotoga i le oganuu lea na matou talaʻi ai i lenā taimi. O nisi taimi, matou te momoe ai i fafo i le pō. Na matou fiafia auā na faaauau pea le galuega talaʻi e ui i na tulaga. I aso nei, o loo iai ni faapotopotoga malolosi i lenā oganuu.

Auaunaga i Peteli ma le Puʻeina Faapagota

I le 1949, na valaaulia ai aʻu i le aiga Peteli i Łódź. Maʻeu se faaeaga! Ae e leʻi umi ona ou nofo ai i inā. Iā Iuni 1950, pe ā o se masina a o leʻi taofia la matou galuega, na puʻea faapagota ai i matou ma isi uso o le Peteli. Sa ave aʻu i le falepuipui ma faamalosia e tali a latou fesili i se auala sauā.

Talu ai sa galue loʻu tamā i luga o se vaa e masani ona folau atu i Niu Ioka, sa faia e nei leoleo a latou saʻiliʻiliga ma taumafai e faamalosia aʻu e faapea atu o ia o se sipai mo le Iunaite Setete. Sa ou onosaia nei faiga sauā. E lē gata i lea, sa taumafai ni leoleo se toʻafā e uunaʻia aʻu e faia ni moliaga faasaga i le uso o Wilhelm Scheider, o lē sa vaavaaia la matou galuega i Polani. Na latou sasa oʻu mulivae i ni laau māfiafia. A o oʻu taatia i lalo ua ou lavatoto, ma oʻu faalogona ua lē mafai ona ou toe tatalia lenei mea, na ou alaga atu e faapea: “Ieova e, ta fia ola!” Na faateʻia i latou ma taofia loa le sasaina o aʻu. E leʻi leva ae momoe. Na oʻu toʻamālie ma toe maua loʻu malosi. Na faamautinoa mai e lenei mea iā te aʻu, e tali mai ma le alofa Ieova i ana auauna faamaoni pe a valaau atu iā te ia. Na faamalosia ai loʻu faatuatua ma iloa ai, e tatau ona tuu atu le faatuatuaga atoa i le Atua.

Na aofia ai ma ni moliaga pepelo i le lipoti mulimuli o a latou suʻesuʻega. Ina ua ou tetee atu, na tali mai se leoleo: “O le mea lenā e te faamatala i le faamasinoga!” Na fautua mai se pagota na ma potu faatasi ina ia aua le popole, auā o le lipoti mulimuli e faamaonia e se loia,  lea o le a ou maua ai se avanoa e faamaonia ai le sesē o a latou moliaga. O le mea lenā na tupu.

Le Galuega Femalagaaʻi ma le Isi Faafalepuipui

Na ou saʻoloto iā Ianuari 1951. I se masina mulimuli ane, na ou auauna ai o se ovasia femalagaaʻi. E ui i faasāsāaga, ae na matou galulue pea ma isi uso ina ia faamalosia faapotopotoga, ma fesoasoani i Molimau ua taapeape solo ona o faiga a leoleo. Sa matou faalaeiauina le ʻauuso ina ia faaauau pea i le faiva. I tausaga mulimuli ane, na lagolagoina ma le lototele e nei uso le ovasia femalagaaʻi, ma faia le galuega o le lolomiina ma tufatufaina o lomiga faale-Tusi Paia i se auala faalilolilo.

I se tasi aso iā Aperila 1951, ina ua tuua le sauniga, na puʻea faapagota ai e ni leoleo ua leva ona tulimataʻia maia aʻu i le auala. Talu ai na ou musu e tali a latou fesili, na latou aveina loa aʻu i le falepuipui i Bydgoszcz, ma fesiligia ai loa i lenā lava pō. Na faatonuina aʻu ina ia tū faalagolago i le puipui mo aso e ono ma pō e ono, leai se meaʻai po o se vai, ma mānavaina le asu o a latou tapaa. Na sasa aʻu i le uatogi ma faamū i le sikareti. Ina ua ou matapogia, na latou sasaa mai ni vai iā te aʻu ma toe tuu fesili mai. Sa ou faatauanau atu iā Ieova mo se fesoasoani ma sa ia tali mai.

E iai ni itu na lelei ai loʻu faafalepuipui i Bydgoszcz. Sa ou tufa atu ai le upu moni o le Tusi Paia i ē atonu e lē oo atu i ai le tala lelei. O le mea moni, sa tele ni avanoa e avatu ai se molimau. Ona ua siliga tali i seu faamoemoega o nei pagota, na latou faalogo ai ma ave i fale le tala lelei.

Ni Suiga Tāua se Lua

E leʻi leva talu ona faasaʻoloto mai aʻu i le 1952, ae ou feiloaʻi loa iā Nela, o se tuafafine maelega e talaʻi faataimi atoa. Sa galue o ia i le itu i saute o Polani. Mulimuli ane, na galue o ia i se fale na matou taʻua o se “fale tao falaoa,” lea na avea o se nofoaga faalilolilo e lolomi ai a matou lomiga. O se galuega faigatā tele, e manaʻomia ai le mataala ma le alofa lē manatu faapito. Na ma faaipoipo i le 1954, ma faaauau pea la ma auaunaga faataimi atoa seʻia oo ina maua la ma tama teine o Lidia. Na fai loa la ma faaiʻuga, ua tatau ona tuu le auaunaga faataimi atoa a Nela, ae foʻi i le aiga e tausi si a ma tama, ina ia mafai ai ona faaauau laʻu galuega femalagaaʻi.

I le tausaga lava lenā, na ma fesagaʻia ai foʻi se isi filifiliga tāua. Sa tāpā aʻu ina ia auauna o se ovasia itumalo i se vaipanoa, lea e aofia ai le tasi vae tolu o Polani. Na ma iloiloina le mataupu faatasi ai ma le tatalo. Na ou iloa le tāua o le faamalosia o le ʻauuso o loo i lalo o faasāsāaga. E toʻatele nisi na puʻea faapagota, ma ua manaʻomia foʻi la ni faalaeiauga faaleagaga. Na ou taliaina le tofiga ona o le lagolagosua mai a Nela. Na fesoasoani mai Ieova iā te aʻu i le faataunuuina o lenei galuega mo le 38 tausaga.

Na Ou Vaaia le “Fale Tao Falaoa”

Sa vaavaaia e le ovasia itumalo i na aso le “fale tao falaoa,” lea na iai i se nofoaga faalilolilo. Na tulimataʻia pea e leoleo i matou, ina ia  taofia le galuega o le lolomiina o lomiga. O nisi taimi e taulau manuia ai, ae lē taitai ona matou matitiva ai i meaʻai faaleagaga. Na tausia pea i matou e Ieova.

E tatau i se tasi e galue i lenei galuega faigatā ma lamatia ai le ola, ona faamaoni, mataala, usiusitai ma ia alofa lē manatu faapito. O uiga lelei na e fesoasoani ina ia sologa lelei ai lenei galuega faalilolilo. Sa lē faigofie ona maua se nofoaga e talafeagai lelei mo lenei fale lomitusi. O nisi nofoaga e fetaui, ae o uso o loo iai i inā e leai se tofā mamao. Ae o isi vaipanoa, ua lelei uso, ae lē fetaui le nofoaga. Na lotomalilie nei uso e tuua a latou mea uma. Ou te matuā talisapaia nei uso ma tuafāfine, o ē na ou mauaina le faaeaga matou te galulue faatasi.

Tu mo le Tala Lelei

A o feagai ma taimi faigatā, na tuuaʻia i matou i le faia o ni gaoioiga e lē tusa ma le tulafono ma molia ai loa i le faamasinoga. Ma o se faafitauli lenei mea auā e leai ni lōia e tutū mo i matou. O nisi lōia e alolofa mai; ae e fefefe foʻi i tagata ma e lē mananaʻo e faia se mea e lē fiafia ai le malo. E ui i lea, na silafia e Ieova o matou manaʻoga, ma na ia faasaʻoina le mataupu i le taimi talafeagai.

Na ave i le falemaʻi o pagota Alojzy Prostak, o se ovasia femalagaaʻi mai Kraków, ona o le faileagaina i le taimi na fesiligia ai e leoleo. Na mataʻina ma faaaloalogia e isi pagota i le falemaʻi lenei uso, ona o lona tumau e ui i faiga faatautala. O se tasi o i latou o se lōia e igoa iā Witold Lis-Olszewski, o lē na faagaeetia ona o le lototele o le uso o Prostak. E tele ni taimi na ia talanoa ma folafola ai: “O le taimi lava ou te saʻoloto ai ma toe faia laʻu galuega, o le a ou tu mo Molimau a Ieova.” Sa ia faataunuuina lana folafolaga.

E mataʻina galuega fitā a isi lōia na galulue faatasi ma Witold. Ina ua vevela teteega, na latou tutū mo le ʻauuso pe ā e 30 faamasinoga i le masina—e tofu le aso ma le faamasinoga! Talu ai na manaʻomia ona matou felogoaʻi ma Witold e faatatau i o matou faamasinoga, na tofia ai aʻu ma te galulue mo tausaga e fitu.

E tele ni mea na ou aʻoaʻoina e uiga i galuega a loia i na aso. Na ou faalogologo i ni faamasinoga, mātauina manatu e logoleleia ma lē logolelei a lōia, aemaise auala na latou taulimaina ai faamasinoga, ma mau a i latou na molia. Na aogā uma na mea i o matou uso, o ē na avea ma molimau, na latou iloa ai faamatalaga e fai atu ma le taimi foʻi e filemu ai i luma o le faamasinoga.

Pe afai o lea ua faagasolo se faamasinoga, e moe Witold i fale o aiga Molimau a Ieova. E lē faapea ona ua ia lē gafatia le tau o se potu o le faletalimālō, ae na ia taʻua: “Ou te fia malamalama atili i o outou talitonuga a o leʻi faia le faamasinoga.” E faafetaia ai lana fesoasoani, ona sa manuia le tele o faamasinoga. E tele ni taimi na ia tu ai mo aʻu, ae lē taitai ona ia taliaina se tupe e ofo atu iai. O le mea mautinoa, na ia teena foʻi le totogi mo faamasinoga e 30. Aiseā? Na ia faapea mai: “Ou te manaʻo e foaʻi se mea, e tusa lava po o le ā le itiiti i la outou galuega.” E mautinoa e telē se totogi o lana galuega. Sa iloa e le malo galuega a Witold, ae e leʻi faavaivaia ai o ia mai le fesoasoani iā i matou.

E lē lava upu e faamatala ai molimau lelei na faia e o tatou uso a o feagai ai ma na faamasinoga. E toʻatele tagata na ō atu e maimoaina faamasinoga ma faamalosia uso na tuuaʻia sesē. I le taimi na tele ai faamasinoga, na ou faitauina pe ā ma le 30,000 Molimau a Ieova na ō atu i le tausaga e tasi!

Se Tofiga Fou

Na tatala faasāsāaga o la matou galuega i le 1989. Na fausia ma faapaiaina se ofisa o Molimau a Ieova i le tolu tausaga mulimuli ane ai. Na ou fiafia e talia se tofiga e galue ai i inā i le Auaunaga o Faamatalaga Faafomaʻi. E toʻatolu i matou na galulue faatasi, e faamatala atu tulaga faa-Kerisiano o o matou uso na fesagaʻi ma mataupu e fesootaʻi atu i le toto.—Galuega 15:29.

 Ua ma fiafia ma laʻu avā ona o lenei faaeaga o le auauna iā Ieova i le galuega talaʻi. Na lagolagosua ma faalaeiau mai Nela iā te aʻu. Ou te matuā talisapaia lava o ia, auā po o le ā lava le taimi ou te pisi ai i tofiga i le auaunaga i le Atua, pe faafalepuipui ai foʻi, e lē taitai faitio i loʻu alu ese mai le aiga. I taimi faigatā, na te faalaeiau ai isi na i lo le mafatia i ona lava faalogona.

O se faaaʻoaʻoga, i le 1974, na puʻea faapagota ai i matou ma isi ovasia femalagaaʻi. O nisi o uso na latou iloaina le mea ua tupu, na latou mananaʻo e taʻu iā Nela i se auala filemu. Ina ua latou vaaia o ia, na latou fai atu: “Nela, ua iai le mea ua tupu.” I le taimi muamua sa popole o ia, auā o lona manatu ua ou oti. Ae ina ua ia iloaina le mea na tupu, sa ia faapea atu ma le toʻa: “Oi, o loo ola o ia! E lē o se taimi muamua lenei ua faafalepuipui ai.” Na taʻu mai e na uso iā te aʻu, ua matuā faagaeetia i latou i lona faatuatua.

E ui e tele ni mea faigatā na ma fesagaʻia i le taimi ua mavae, ae ua faatamaoaigaina e Ieova i matou ona o le tausi i lona ala. Maʻeu lo ma olioli i le vaai atu i la ma tama teine o Lidia ma lana tane o Alfred DeRusha, ua avea o se ulugalii Kerisiano lelei. Na la tausia aʻe la laʻua fanau tama o Christopher ma Ionatana e avea o ni auauna tuuina atu i le Atua, lea ua saga faateleina ai lo matou olioli. Ua avea loʻu uso laʻitiiti o Ryszard ma loʻu tuafafine laʻitiiti o Urszula ma Kerisiano faamaoni mo le tele o tausaga.

E leʻi tuulafoaʻiina e Ieova i matou, ma e matou te mananaʻo ia faaauau pea ona auauna atu iā te ia ma le loto atoa. Ua matou tofo i le moni o upu o loo i le Salamo 37:34: “Ia e faatalitali iā Ieova, ma e tausi i lona ala; ona faaeaina lea o oe e ia ina ia fai mou le nuu.” O loo matou tulimataʻia ma le loto atoa lenā taimi.

[Ata i le itulau 17]

Se sauniga na faia i le togālaau a se uso i Kraków i le 1964

[Ata i le itulau 18]

Faatasi ma laʻu avā o Nela, ma loʻu afafine o Lidia i le 1968

[Ata i le itulau 20]

I matou ma se tamaitiiti Molimau a o leʻi faia le taotoga o lona fatu e aunoa ma le toto

[Ata i le itulau 20]

I maʻua ma Nela, i le 2002

[Ata i le itulau 20]

I maʻua ma Dr. Wites le fomaʻi tipitipi o tamaiti, lea e faia taotoga e aunoa ma le toto i se falemaʻi i Katowice