Fesili Mai le ʻAufaitau

Po ua uiga atu le upu “atonu” i le Sefanaia 2:3 faapea, e lē o mautinoa e auauna a le Atua le mauaina o le ola e faavavau?

Ua faapea mai le mau: “Ia outou saʻili iā Ieova, outou uma ua agamalu i le nuu, o ē ua faia lana faamasinoga; ia outou saʻili le amiotonu, ia outou saʻili le agamalu, atonu e lilo ai outou i le aso o le toʻasā o Ieova.” Aiseā ua faapea mai ai lenei fuaiupu “atonu”?

Ina ia malamalama i le auala o le a feagai ai Ieova ma ona tagata faamaoni iā Amaketo, o le a fesoasoani le toe manatunatu i aʻoaʻoga a le Tusi Paia i mea o le a Ia faia iā i latou ua maliliu, a o leʻi oo i le faamasinoga. O nisi o le a toe tutū aʻe ma ola i le lagi, a o isi o le a toe tutū aʻe ma ola e faavavau i luga o se lalolagi parataiso. (Ioane 5:28, 29; 1 Korinito 15:53, 54) Afai e manatua ma tauia e Ieova i latou o ē na faamaoni ae ua maliliu a o leʻi oo mai Amaketo, e mautinoa foʻi o le a ia faia faapea i ana auauna ia o loo soifua i le aso o lona toʻasā.

Ua faalaeiauina i tatou i upu a le aposetolo o Peteru. Na ia tusi e faapea: “Na o Noa lē talaʻi le amiotonu, o lona toʻavalu lea na faaolaina, [e le Atua] ina ua au mai le lolo i le lalolagi faalēmataʻu; o aai foʻi o Sotoma ma Komoro ua na taui atu i ai i le olopalaina, ina ua lelefu, . . . na ia laveaʻi foʻi iā Lota o lē amiotonu . . . ua silafia e le Alii se mea e laveaʻi mai ai i ē amio Atua ai le tofotofoga, a e taofi i ē amio leaga e oo i le aso faamasino ina ia faasalaina i latou.” (2 Peteru 2:5-9) Na faasaoina e Ieova ia Noa ma Lota o ē na auauna ma le faamaoni iā te ia, a o aumaia le faaumatiaga i ē amio leaga. O le a faapena foʻi ona ia laveaʻiina ē amio atua, pe a ia aumaia le faasalaga i ē amio leaga iā Amaketo. O le a faasaoina le “motu o tagata e toʻatele” o ē amiotonu.—Faaaliga 7:9, 14.

O lea la, e lē o taʻua e le Sefanaia 2:3 le upu “atonu,” ona faapea ua iai se masalosaloga i le mana o Ieova na te faasaoina ai i latou ua ia finagalo malie i ai. O lona uiga, o le a lilo se tasi i le aso o le toʻasā o Ieova, pe afai e amata atu nei ona ia saʻili le amiotonu ma le agamalu. E faalagolago le faasaoina i le faaauau pea ona saʻili o le amiotonu ma le agamalu.—Sefanaia 2:3.

[Ata i le itulau 31]

“Ua silafia e le Alii se mea e laveaʻi mai ai i ē amio Atua ai le tofotofoga”