Pe e Mafai Ona Faaleleia Ou Faalogona ua Faamanuʻalia?

I LE tele o taimi o lona olaga, na lagona ai e Lena le lē fiafia iā te ia lava. Na ia faapea mai: “O tausaga na faaleagaina ai aʻu i faiga faaleituaiga a o ou laʻitiiti, ua maumau ai le tele o loʻu olaga. Sa ou lagona ua matuā leai lava soʻu aogā.” Na faapena foʻi Simone, i le toe tepa i tua i le taimi o lona talavou, na ia faapea mai ai, “I totonu o loʻu loto, sa oo iā te aʻu se lagona gaogao, ma ou talitonu ai ua lē toe iai soʻu aogā.” E foliga mai, ua taatele lava i aso nei le matuā lē fiafia ona o faalogona faapena. Ua faapea mai se tasi faalapotopotoga faufautua mo talavou i Ausetalia, e toetoe lava o le ʻafa o i latou e telefoni mai mo se fesoasoani, e faaalia, o loo “iai pea faalogona lē fiafia iā i latou lava.”

E tusa ma faamatalaga a nisi tagata popoto, e foliga mai, ua faia e isi tagata mea ua māfua ai ona lē fiafia nisi iā i latou lava. Ua tutupu mafaufauga faapena ona o le ʻotegia soo, le soona faitioina, ma le lafo i ai o upu faatigā ma le sauā. Po o le ā lava le pogai, ae e ono iʻu  ina faavaivaia ma faaleagaina ai na tagata. Na iloa i se suʻesuʻega faafomaʻi talu ai nei, o tagata e iai lagona lē mautinoa e uiga iā i latou lava, ua oo ina latou lē faatuatuaina i latou faapea ma isi, ua faaleagaina ai ma le lē iloa mafutaga vavalalata ma faigāuō māfana. Ua faapea mai le lipoti i lea suʻesuʻega, “O lona uiga, ua latou ‘faapogaia’ ai tulaga ia e sili ona latou fefefe i ai.”

O tagata e iai lagona faapena, e masani ona aafia i le mea ua taʻua i le Tusi Paia, o ‘manatunatu o ō latou lava loto.’ (Salamo 94:19) Ua latou lagona, e lē taitai ona toe aogā i latou. Pe a sesē se mea, e masani ona latou tuuaʻia i latou lava. E ui lava e viiviia e isi mea latou te faia, ae i o latou loto, latou te lagona o se mea faapaʻole ma o le a faaalia lava i se taimi mulimuli ane. Ona ua latou talitonu e lē tatau iā i latou se olaga fiafia, ua faia ai e le toʻatele amioga ua faaleagaina ai i latou lava, ma ua manatu ai ua lē toe mafai ona faasaʻo o latou ala. O Lena lea na uluaʻi taʻua, na oo i se tulaga matuiā o le lē toe ʻai, ona ua lē toe fiafia i lona olaga, ma ua ia faapea mai, “sa ou manatu, ua lē mafai ona toe faaleleia loʻu olaga.”

Po ua saisaitia i latou ua faamanuʻalia “manatunatu o o latou loto” i nei faalogona i o latou olaga atoa? Pe e iai se mea e ao ona fai e faaleleia ai na faalogona? Ua faataatia e le Tusi Paia taʻiala ma fautuaga aogā sa mafai ona fesoasoani i le toʻatele e taulau ai i a latou taumafaiga. O ā nisi o na taʻiala, ma ua faapefea ona fesoasoani i ē o mafatia ina ia fiafia o latou olaga? O le a faamatala mai i le isi mataupu lea e sosoo ai.