Āuga Mataʻutia o le Oti

“PULE I LE OLA SE TEINEITIITI ONO TAUSAGA.” Na faatatau atu lenei ulutala e faateʻia ai i le oti mataʻutia o se teineitiiti e igoa iā Jackie. Na maliu lona tinā ona o se maʻi faigatā na aafia ai. A o leʻi oso i luga o le auala o loo sau ai le nofoaafi, na ia taʻu atu i ona tei e fia ‘avea o ia ma agelu, ina ia faatasi ma lona tinā.’

E 18 tausaga o Ian ina ua ia talosaga atu i le faifeʻau, e faailoa ane le māfuaaga na oti ai lona tamā i le kanesa. Na taʻutino e le faifeʻau, na manaʻo le Atua ia la faatasi ma le tamā o Ian i le lagi, ona o ia o se tamāloa lelei. O lona iloaina o lenā tala, na musu ai Ian e iloa lenei Atua sauā. Talu ai ua leai sona faamoemoe, sa ia saʻilia loa se olaga faamalieina i manaʻoga faaletino. O lea la, na ia matuā inu ai i le ʻava malosi, faaaogā fualaau faasāina, ma faia amioga lē mamā. Na matuā leaga lona olaga.

“O Ē ua Ola ua Latou Iloa e Oti i Latou”

O nei mea mataʻutia e lua na tutupu, ua faailoa mai ai aafiaga o le oti i olaga o tagata, aemaise lava pe a tupu faafuaseʻi. E moni ua iloa uma e tagata le mea ua fai mai ai le Tusi Paia: “O ē ua ola, ua latou iloa e oti i latou.” (Failauga 9:5) Ae o le toʻatele ua manatu māmā i lea mea moni. Ae a oe? Talu ai ua pisi tele le olaga i aso fai soo, ua lē mafai ai ona tatou manatunatu i le oti, ma ua vaai i ai o se mea e leʻi taitai oo mai.

Ua taʻua e le tusi, The World Book Encyclopedia e faapea: “Ua matataʻu le toʻatele o tagata i le oti, ma ua taumafai e ʻalofia le mafaufau i ai.” Peitaʻi, o se faalavelave faafuaseʻi po o se maʻi tugā e aafia ai le soifua, e faamalosia ai i tatou e fesagaʻia le mea moni e uiga i le oti. Pe atonu foʻi o se maliu o se uō po o se tauaiga, ua tatou toe manatua ai o le iʻuga lenei o tagata uma lava.

E masani lava i taimi o falelauasiga, e faapea mai ai i latou o loo faavauvau, e manaʻomia ona onosai ma lototele auā e lē uma aʻi aso o le olaga. Ioe, e moni lea manatu. Ua vave le faagasologa o taimi, ma ua fesagaʻia foʻi faafitauli o le olaga matua. Ona o lenā tulaga, ua lē o toe umi foʻi la ona oo mai lea o le oti. E tele maliu e fai ma e faigatā foʻi ona onosaia le toesea o uō ua leva ona masani ai. O le toʻatele o tagata matutua, ua latou tuufesili pea: “O afea o le a ou oti ai?”

Se Fesili Tāua

E ui e lē mafai e se tasi ona teena le oo mai o le oti, ae o loo fia malamalama tagata i le mea e tupu pe a mavae le oti. O le tele o faamatalaga feteenaʻi, ua faapogaia ai masalosaloga o tagata ma manatu ai i le oti o se mataupu e iʻuvale, e lē mafai ona malamalama i ai. Ua manatu tagata atamamai ona e na o le “pau lea o le olaga,” e tatau la ona e olioli i mea lelei uma i le tele e mafai ai.

Ae i le isi itu, e lē talitonu isi faapea o le oti o le iʻuga lea o mea uma. Peitaʻi, latou te lē iloa  po o le ā le mea e tupu pe a mavae le oti. O nisi e manatu o le a faaauau le olaga i se isi nofoaga e ola ai e faavavau, ae manatu isi o le a latou toe ola i se isi taimi i le lumanaʻi, ae i se isi ituaiga tagata.

O loo tumau pea ona tuufesili tauaiga faavauvau: “O fea o i ai ē ua maliliu?” I ni nai tausaga ua mavae atu, na taavalevale ese mai le auala se pasi na malaga atu ai se ʻau lakapi, ina ua fetoʻai faafuaseʻi ma se loli. Na maliliu ai tama taaalo e toʻalima. Ua faafaigatā e se tinā ona toe fai mea e masani ai i lona olaga, talu mai le aso na oti ai lana tama i lenei faalavelave. Ua ia fia iloa po o fea o i ai o ia. E masani ona asiasi i lona tuugamau ma talanoa leotele iā te ia mo se taimi umi. Ua ia tagi ma faapea mai: “Ou te lē talitonu e na o le pau lenei o le olaga, ae ou te lē o mautinoa foʻi i ai.”

Ioe, o o tatou manatu e faatatau i le oti, e aafia ai o tatou olaga i le taimi nei. Pe a fua atu i le tali mai a tagata i le mataʻutia o le oti, ua lāgā ai ni fesili. Seʻi tomānatu i au tali i nei fesili. Pe tatau ona tatou manatu māmā i le oti, ae uaʻi atu i mea fai o le olaga? Po o le a tatou lē fiafia la i le olaga ona o le popole i le oo mai o le oti? Pe lē mafai la ona iloa e i latou o loo faavauvau, le mea moni e oo i ē pele ua maliliu? Pe tumau pea le avea o le oti o se mea e lē mafaamatalaina?