Fesili Mai le ʻAufaitau

O le ā le tāua iā Isaraelu anamua o le malamalama faavavega, lea sa aliali mai i le Mea e Sili ona Paia o le fale fetafaʻi ma le malumalu, lea na taʻua i nisi taimi o le Sekina?

O Ieova, o le Tamā alofa ma o Lē na te puipuia ona tagata, na ia faia ni gaoioiga ina ia iloa ai e Isaraelu lona faatasi mai. O se tasi o auala na ia faataunuu ai lenei mea, e ala lea i se ao pupula, lea sa fesootaʻi lelei atu i lona nofoaga o le tapuaʻiga.

O lenā malamalama uiga ese, na faaatagia ai le faatasi lē vaaia ai o Ieova. Sa aliali mai i le Mea e Sili ona Paia i le fale fetafaʻi ma le malumalu lea na fausia e Solomona. O lenā malamalama faavavega, e leʻi faapea ai sa iai moni Ieova i inā. E lē afio le Atua i ni fale e faia e tagata. (2 Nofoaiga a Tupu 6:18; Galuega 17:24) O lenei malamalama uiga ese i le malumalu o le Atua, sa faamautinoa atu ai i le ositaulaga sili, faapea Isaraelu uma e ala atu iā te ia, sa puipuia ma tausia i latou e Ieova.

Na taʻua lenei malamalama i le gagana Arama lea na faaaogā ina ua mavae le tusiaina o le Tusi Paia, o le Sekina (shekhi·nahʹ), o le uiga o lea upu “o le mea e afio ai” po o “le afioaga.” E lē o maua i le Tusi Paia le upu lenei, ae o loo maua i faaliliuga o le Tusi Paia Eperu i le gagana Arama, ia ua taʻua o le Targums.

Ina ua avatu faatonuga i le fausiaina o le fale fetafaʻi, na fetalai atu Ieova iā Mose: “Ia e faaee foʻi le nofoa o le alofa i luga o le atolaau; e te tuu foʻi i le atolaau o le tulafono ou te avatu ai iā te oe. Ta te fetaiaʻi ma aʻu i lea mea, ma ou tautala atu iā te oe ai luga o le nofoa o le alofa, ai le va o kerupi e lua i luga o le atolaau.” (Esoto 25:21, 22) O le Atolaau lea e taʻua, o se pusa sa ufiufi atoa i le auro, ma na tuu i le Mea e Sili ona Paia. Sa iai Kerupi auro e lua i luga o le ufiufi o le Atolaau.

O fea na fetalai mai ai Ieova? Na ia tali mai ina ua ia fetalai atu iā Mose: “E faaali aʻu i le ao i luga ae o le nofoa o le alofa.” (Levitiko 16:2) Sa faapepepepe lenei ao i luga o le ufiufi o le Atolaau paia i le va o kerupi auro. E lē o faailoa maia i le Tusi Paia po o le ā le maualuga na iai lenā ao, po o le ā foʻi le maualuga na iai i luga aʻe o kerupi.

O lenei ao pupula, sa faamalamalamaina ai le Mea e Sili ona Paia. O le mea moni, sa na o le pau lava lenā o le mea na faamalamalamaina ai lenā potu. Na mafai e le ositaulaga sili ona iloa mea ina ua ia ulu atu i lenā potu tuloto i le Aso o le Togisala ona o lea malamalama. Sa tū ai o ia i le mea na afio ai Ieova.

Pe iai se uiga o lenei malamalama faavavega mo Kerisiano? Sa iloa e le aposetolo o Ioane i se vaaiga, se aai “e leai se po i lea mea.” Ua faia aʻe le aai, o Ierusalema fou, i Kerisiano faauuina ua toe faatutūina, o ē o pule faatasi ma Iesu. O le malamalama o lenei aai faafaatusa, e lē mai le lā po o le masina. O le mamalu o Ieova le Atua, ua faamalamalamaina ai lenei faalapotopotoga, e pei ona faamalamalamaina e le ao Sekina le Mea e Sili ona Paʻia. Ua avea le Tamaʻi Mamoe, o Iesu Keriso, ma “lamepa” o le aai. I lea, ua faasusulu atu ai e lenei “aai” lona malamalama faaleagaga ma lona fiafia i tagata ua togiolaina mai atunuu uma ina ia taʻitaʻia i latou i le auala saʻo.—Faaaliga 21:22-25.

Ona ua latou maua na faamanuiaga e tele mai lugā, ua mautinoa ai e tagata tapuaʻi o Ieova e faapea, o Ieova o lo latou Leoleo e puipuia i latou, ma o lo latou Tamā alofa.