“Ua Faaumatia le Oti i le Manumalo”

SEʻI faapea o loo e faitauina se nusipepa ua faaulutalaina i le ulutala lea ua taʻua i luga, na i lo le faitau i ai e uiga i se teineitiiti ua pule i lona lava ola. Ioe, e augapiu ma se nusipepa e mafai ona faia lenā faamatalaga. Ae ua aliaʻe mai na upu i se tusi ua faitau afe tausaga le umi talu ona iai—o le Tusi Paia.

O loo manino le faamatalaina o le oti i le Tusi Paia. E lē gata o loo faailoa mai ai le māfuaaga ua tatou feoti ai, ae ua faamatala mai ai foʻi le tulaga o le tagata pe a oti, ma le faamoemoe mo ē pele ua maliliu. O le mea mulimuli, o loo faasino le Tusi Paia i se taimi sili ona tāua, lea o le a moni ai ia upu: “Ua faaumatia le oti i le manumalo.”—1 Korinito 15:54.

Ua faamatala mai e le Tusi Paia le oti i ni faaupuga e masani ai na i lo ni taʻu e faigatā ona malamalama i ai. O se faaaʻoaʻoga, o loo faatusa le oti i le “moe,” ma ua faamatalaina foʻi tagata feoti o ē o ‘momoe i le oti.’ (Salamo 13:3; 1 Tesalonia 4:13; Ioane 11:11-14) Ua mātauliaina foʻi le oti o se “fili.” (1 Korinito 15:26) O le mea e sili ona tāua, ua fesoasoani mai le Tusi Paia ina ia tatou malamalama i le māfuaaga ua faatusa ai le oti i le moe, aemaise le faapologaina e le oti o tagata, ma le auala o le a faatoʻilaloina ai lenei fili.

Aiseā ua Tatou Feoti Ai?

O loo faamatala mai e le tusi muamua o le Tusi Paia, le auala na faia ai e le Atua le uluaʻi tamāloa o Atamu, ma tuu i le parataiso. (Kenese 2:7, 15) Ina ua amata lona olaga i inā, na tuuina atu iā te ia ni galuega e faia, faatasi ai ma se faasāsāaga. Na fetalai atu le Atua e tusa ai o se laau i le faatoʻaga o Etena: “Aua e te ʻai  ai; auā o le aso e te ʻai ai e te oti ai lava.” * (Kenese 2:17) O lea la, na malamalama lelei Atamu, e lē tatau ona oo le oti iā te ia. E pau le māfuaaga e oti ai, o le solia lea o le tulafono a le Atua.

Ae pagā lea, na lē usiusitai Atamu ma Eva. Sa la lē amanaʻiaina le finagalo o Lē na faia i laʻua, ma na la selesele i āuga. Na faailoa atu e le Atua iʻuga o la laʻua agasala, i le fetalai atu: “O le efuefu oe, e te toe foʻi atu lava i le efuefu.” (Kenese 3:19) Ua aafia i laʻua i le ila—o le lē lelei atoatoa. O lo la tulaga lē lelei atoatoa po o le agasala, ua māfua ai ona la feoti.

O lenei ila—o le agasala, ua tuufaasolo atu i fanau a Atamu ma Eva, o tagata uma lava. O lona uiga, e tai pei o se faamaʻi tuufaasolo. E lē gata ua melea ai e Atamu le avanoa e ola ai i se olaga e saʻoloto mai le oti, ae ua ia avatu foʻi le tulaga o le lē lelei atoatoa i ana fanau. Ua nofo pologa tagata i le agasala. Ua faapea mai le Tusi Paia: “O lenei, faapei ona oo mai o le agasala i le lalolagi i le tagata e toʻatasi, o le oti foʻi ona o le agasala, ona oo mai ai lea o le oti i tagata uma lava, auā ua agasala uma lava.”—Roma 5:12.

Ua ‘Oo Mai le Agasala i le Lalolagi’

E lē mafai ona vaaia e mata lenei tofi tuufaasolo po o le agasala. Ua faasino atu le “agasala” i le lē lelei atoatoa i le itu tau amio ma le faaleagaga, lea na tuufaasolo mai i o tatou uluaʻi mātua, ma e iai ona āuga faaletino. Ae ui i lea, ua taʻu mai e le Tusi Paia, ua saunia e le Atua se vaifofō. Ua faamatala mai e Paulo: “O le oti, o le totogi lea o le agasala; a o le ola faavavau, o le mea foaʻifuaina mai lea e le Atua, i lo tatou Alii o Keriso Iesu.” (Roma 6:23) I lana tusi muamua i Korinito, na avatu ai e Paulo se faamautinoaga lea sa matuā logoleleia iā te ia: “Faapei ona oti uma iā Atamu, e faapea foʻi ona faaolaina uma iā Keriso.”—1 Korinito 15:22.

O le mea moni, na faia e Iesu se vaega tāua i le aveeseina o le agasala ma le oti. Na ia fetalai, na ia afio mai i le lalolagi ina ia “foaʻiina atu lona ola e fai ma togiola e sui aʻi tagata e toʻatele.” (Mataio 20:28) E talitutusa lenei tulaga ma le ave faamalosia o se tasi, lea e na o le pau le auala e mafai ona toe tatala mai ai, o le totogi lea o se togiola o lona uiga o se aofaʻiga patino o se tupe. Ae o le togiola lea e mafai ona faasaʻolotoina i tatou mai le agasala ma le oti, o le soifua lelei atoatoa o Iesu. *—Galuega 10:39-43.

Ina ia saunia le togiola, na auina mai e le Atua Iesu i le lalolagi e tuu atu lona soifua e fai ma taulaga. ‘Auā ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia maua ai e se tasi e faatuatua iā te ia le ola e faavavau.’ (Ioane 3:16) A o leʻi maliu Keriso, ‘sa ia molimau i le upu moni.’ (Ioane 18:37) A o feagai ma lana talaʻiga i le lautele, sa ia puʻea ni avanoa e faailoa atu ai le mea moni e uiga i le oti.

‘Ua na Ona Moe le Teine’

Na silafia e Iesu mea uma e faatatau i le oti a o iai i le lalolagi. Sa ia faavauvau ona o le toesea o tagata sa ia masani ai, ma na ia silafia  foʻi o le a ia maliu a o leʻi taitai lona soifua. (Mataio 17:22, 23) E aliali mai i ni nai masina a o leʻi maliu Iesu, na muamua maliu lana uō o Lasalo. Ua fesoasoani lenā mea na tupu, ia tatou iloa ai le silafaga a Iesu i le oti.

Ina ua logotala Iesu ua maliu Lasalo, na ia fetalai atu: “O loo moe la tatou uō o Lasalo; a e ou te alu e fafagu iā te ia.” Na manatu le ʻausoo afai o loo moe Lasalo, o lona uiga la o loo ola o ia ma o le a toe malosi. O lea, na faamanino atu e Iesu: “Ua oti Lasalo.” (Ioane 11:11-14) E manino mai, na malamalama lelei Iesu i le oti e pei o loo moe le tagata. Ae atonu e faigatā ona tatou malamalama i le oti, peitaʻi ua tatou malamalama lelei i le mea e tupu pe a tatou momoe. A o momoe lelei i le pō, tatou te lē malamalama i mea e tutupu i lenā pō atoa, auā o lea ua tatou lē iloa se mea mo sina taimi. O le aano tonu lenā o loo faamatala mai ai e le Tusi Paia le tulaga o ē ua maliliu. Ua faapea mai le Failauga 9:5: “O ē ua oti, latou te lē iloa se mea.”

Sa faatusatusa atu e Iesu le oti i le moe, auā e mafai ona toe alafaʻi tagata mai le oti ona o le mana o le Atua. I se tasi aso, na asiasi atu ai Iesu i se aiga sa faavauvau ona o le oti o se teineitiiti. Na ia fetalai atu: “E leʻi oti le teine, ua na ona moe.” Ona ia faalatalata atu lea i le teine ua oti ma tago i lona lima, ma na “tulaʻi aʻe” o ia. O lona uiga, sa toe tū o ia mai le oti.—Mataio 9:24, 25.

Na faapena foʻi ona toe faatūina e Iesu lana uō o Lasalo mai le oti. Peitaʻi, a o leʻi faia lenā vavega, sa ia faamāfanafana atu iā Mareta le tuafafine o Lasalo i lona fetalai atu: “E toe tū mai lou tuagane.” Na ia tali mai ma le mautinoa: “Ua ou iloa e toe tū mai lava ia i le toe tū i le aso gataaga.” (Ioane 11:23, 24) Sa faatalitalia e Mareta o le a toe faatutūina uma auauna a le Atua i le lumanaʻi.

O le ā tonu lava le uiga o le toe tū? O le uiga moni o le upu Eleni mo le “toe tutū,” (a·naʹsta·sis) o le “laulaututū.” Ua faailoa mai ai le toe tū mai le oti. Atonu e faigatā ona talitonu i ai nisi, ae ina ua mavae ona taʻua e Iesu o le a faalogo i latou ua maliliu i lona siʻufofoga, na ia fetalai atu: “Aua tou te ofo i lenei mea.” (Ioane 5:28) Ona o le toe faatutūina e Iesu o tagata a o i ai i le lalolagi, ua tatou talitonu ai i le folafolaga a le Tusi Paia e faapea, o ē ua maliliu ia o loo manatua e le Atua, o le a toe alafaʻi mai i o latou “tofāga” uumi. Ua valoia mai e le Faaaliga 20:13: “Ua avaʻe foʻi e le sami ē na oti sa i ai, ua avaʻe foʻi e le oti ma seoli [tuugamau] ē na oti sa i ai.”

Po o le a faatutūina la i latou ia, ma toe ola matutua ma feoti e pei ona sa tupu iā Lasalo? E lē o le finagalo lenā o le Atua. Ua faamautinoa mai e le Tusi Paia iā i tatou le taimi o le a ‘lē toe i ai se oti,’ o lona uiga o le a lē toe iai se tasi e ola matua ma maliu.—Faaaliga 21:4.

O le oti o se fili. E tele foʻi isi fili o tagata, e pei o le maʻi ma le olaga matua, lea ua māfua ai le tele o mafatiaga. Ua folafola mai e le Atua o le a ia faatoʻilaloina nei mea uma, ma mulimuli ane aveesea le fili sili o tagata. “O le toe fili e faaumatia, o le oti lea.”—1 Korinito 15:26.

Pe a faataunuuina lenā folafolaga, o le a ola fiafia tagata uma i se olaga lelei atoatoa e lē pisia i le agasala ma le oti. Ae i lenei taimi, o se  faamāfanafanaga le iloaina o loo mālōlō ē pele iā i tatou, ma afai o loo manatua i latou e le Atua, o le a toe faatutūina i lana taimi atofaina.

E Lelei le Olaga pe a Malamalama i le Tulaga o Ē ua Maliliu

O le iai o se malamalamaga manino i le oti ma le faamoemoe mo i latou ua maliliu, o le a suia ai la tatou vaaiga i le olaga. Na aʻoaʻoina e Ian lea na taʻua i le mataupu ua mavae atu, faamatalaga mai le Tusi Paia e uiga i le oti ina ua pe a ma le 25 ona tausaga. Sa ia faapea mai: “Sa matuā nenefu loʻu mafaufau po o fea o i ai loʻu tamā. O lea ina ua ou iloa o loo moe o ia, sa ou mafatia.” Peitaʻi, ina ua faitauina e Ian le folafolaga a le Atua o le a toe faatutūina i latou ua maliliu, sa ia matuā olioli i le iloaina o le a ia toe feiloaʻi i lona tamā. Na ia faapea mai: “O le taimi muamua lea i loʻu olaga ua ou lagona ai le filemu.” O le malamalamaga saʻo e faatatau i le oti, na avatu ai iā te ia le filemu moni, lea na toʻamālie ai lona loto.

Na maliu le tama a Clive ma Brenda e 21 tausaga o Setefano, i le faalavelave tau taavale lea na taʻua i le mataupu ua mavae atu. E ui na la iloaina aʻoaʻoga a le Tusi Paia e faatatau i le oti, ae na la mafatia pea ona o le toesea o si a la tama. Ioe, o le oti o se fili, ma e tigā lona tui. O lo la malamalamaga faale-Tusi Paia e faatatau i le tulaga o ē ua maliliu, na auauaʻi mālie ona faaitiitia ai lo la faavauvau. Na faapea mai Brenda: “O lo ma malamalamaga e faatatau i le oti, ua fesoasoani iā i maʻua e toe toʻalemu ma faaauau ai pea i le olaga. Ioe, o aso uma ma te mafaufau ai i le taimi o le a toe ala mai ai Setefano.”

“Le Oti e, o Fea o i ai Lou Tui?”

E manino mai, o le malamalama lelei i le tulaga o ē ua maliliu, e fesoasoani iā i tatou ia iai se manatu saʻo i le olaga. E lē tatau ona avea le oti o se mea e lē mafaamatalaina. E mafai ona tatou olioli i le olaga e aunoa ma le matataʻu i lenei fili o loo taufaamataʻu mai. E lē gata i lea, o le iloaina e lē mafai e le oti ona faamuta e faavavau o tatou ola, o le a tatou teena ai so o se faanaunauga e faamalieina manaʻoga faaletino uma, ona o le manatu e “puupuu le olaga.” O le iloaina foʻi o loo manatua e le Atua o ē pele ia ua momoe i le oti, ma faatalitali i le toe tū, o le a faatoʻafilemu ai i tatou ma uunaʻia ai ina ia faaauau pea i le olaga.

Ioe, tatou te vaavaai atu ma le naunautaʻi i le lumanaʻi i le taimi o le a soloiesea atoatoa ai e Ieova le Atua, Lē foaʻi ola, le oti e faavavau. Maʻeu se fiafiaga o le a iai pe a tatou fesili atu: “Le oti e, o fea o i ai lou manumalo? Le oti e, o fea o i ai lou tui?”—1 Korinito 15:55.

[Faamatalaga pito i lalo]

[Ata i le itulau 5]

O le lē usiusitai o Atamu ma Eva na māfua ai ona la feoti

[Ata i le itulau 6]

Na tago Iesu i le lima o le teine, ona tulaʻi aʻe lea o ia

[Ata i le itulau 7]

E toʻatele o loo faatalitali i le taimi e toe tutū mai ai ē pele iā i latou, e pei ona sa faia iā Lasalo