Viiviia Ona o le Naunau i le Tusi Paia

O MARIANA, o se Molimau a Ieova i le itu i saute o Italia, ua 18 ona tausaga ma o lona tausaga mulimuli foʻi lea i le aʻoga maualuga. E auai atu o ia i le aʻoga lava e tasi lea e auai ai foʻi isi Molimau talavou.

Ua tusi mai Mariana: “Mo ni nai tausaga, sa matou faitauina ai le mau o aso taʻitasi mai le Tusi Paia, lea e aumaia i le tusi, Iloiloina o le Tusi Paia i Aso Taʻitasi, i le taimi o la matou mālōlōga. E na o le pau lava le nofoaga na mafai ona matou faia ai lenei mea, o le auala e ui atu ai i le potu o faiaʻoga. E lē toʻafilemu le nofoaga. O le tele o faiaʻoga, e autilo atu iā i matou a o latou ui ane, ma e afe mai nisi i le fia iloa po o ā a matou mea ia e fai. O lenei mea, e masani ona matou maua ai le avanoa e taliina ai nisi o a latou fesili. I se fua faatatau, i aso taʻitasi, e afe mai ai se faiaʻoga. O isi lava e afe mai ma nofo mo sina taimi e faalogologo i a matou talanoaga faale-Tusi Paia, ma faaalia le loto faafetai ona o lo matou naunau i mea faaleagaga. Na valaaulia i matou i se tasi taimi e le pule lua o le aʻoga ina ia faia la matou talanoaga i le potu o faiaʻoga.

“Ina ua vaai i le nofoaga sa masani ona talanoaina ai la matou mau, na talosaga atu ai loʻu faiaʻoga i le pule aʻoga, pe mafai ona faia la matou talanoaga i se tasi o potu aʻoga, e lelei e lē pisa. Sa faatagaina e le pule aʻoga, ma na viiviia i matou e loʻu faiaʻoga i luma o le vasega atoa, ona o le faaaʻoaʻoga lelei ua matou faataatia. Ua matou fiafia uma lava ona o le faaeaga sili ua tuuina mai e Ieova iā i matou.”