Fesili Mai le ʻAufaitau

Aiseā e faapea atu ai, o faaupuga nei o loo faasino atu iā Iesu ae e lē o Ieova: E “na o ia o lē soifua pea lava” ma “e leʻi vaaia o ia e se tasi tagata, e lē mafai foʻi ona vaai i ai”?

Na tusi Paulo: “E faailoa mai lea mea e ia i ona lava aso, o ia o le Alii e manuia mona ua toʻatasi, o le Tupu o tupu, ma le Alii o alii; o loo na o ia o lē soifua pea lava, o lē afio i le malamalama e lē masao i ai se tasi; e leʻi vaaia o ia e se tasi tagata, e lē mafai foʻi ona vaai i ai. Ia iā te ia le viiga ma le mana e faavavau.”—1 Timoteo 6:15, 16.

E masani ona manatu le ʻaufaitofā e faapea: ‘E lē mafai ona faasino atu nei faaupuga i se tasi e ese mai i le Atua e pei o: “na o ia o lē soifua pea lava,” o “le Alii e manuia mona ua toʻatasi” ma o lē “e leʻi vaaia o ia e se tasi tagata, e lē mafai foʻi ona vaai i ai.”’ E moni, o na faaupuga e mafai ona faamatala ai Ieova. Ae peitaʻi, ua faaalia i mau o loo muamua e faapea, i le 1 Timoteo 6:15, 16, sa faasino patino atu lava Paulo iā Iesu.

I le faaiʻuga o le fuaiupu e 14, o loo taʻua ai e Paulo “le faaali mai o lo tatou Alii o Iesu Keriso.” (1 Timoteo 6:14) I lea, ina ua tusia e Paulo i le fuaiupu e 15 e faapea, “e faailoa mai lea mea e ia i ona lava aso, o ia o le Alii manuia mona ua toʻatasi,” o loo ia faasino atu i se faailoaga o Iesu, ae lē o Ieova le Atua. O ai la “le Alii manuia mona ua toʻatasi”? E talafeagai ona faapea atu, o Iesu lea sa faasino atu i ai Paulo. Aiseā? Ua manino mai i faamatalaga atoa, o loo faatusatusa e Paulo ia Iesu ma tagata ua avea ma pule. O Iesu moni lava lea na tusi ai Paulo e faapea, “O le Tupu o tupu [o tagata o loo pule o ni tupu], ma le Alii o alii [tagata].” * Ioe, pe a faatusatusa Iesu ma na tagata, ua na o Iesu “o le Alii manuia mona ua toʻatasi.” Ua foaʻiina atu iā Iesu “le pule, ma le viiga ma le malo, ina ia auauna iā te ia o nuu uma, ma atu nuu, ma gagana eseese.” (Tanielu 7:14) E leai se pule i le lalolagi e mafai ona ia faia lenā faaupuga!

Ae faapefea le faaupuga e “na o ia o lē soifua pea lava”? Ua toe faia ai foʻi i inei se faatusatusaga o Iesu ma tupu o le lalolagi. E leai ni tupu po o ni taʻitaʻi o malo e mafai ona faapea e soifua pea, ae e mafai e Iesu. Na tusi Paulo: “Ua tatou iloa ua toe tū mai Keriso nai ē ua oti, e lē toe maliu lava o ia, e lē toe pule le oti iā te ia.” (Roma 6:9) O lea, ua avea ai Iesu ma uluaʻi tagata ua faamatalaina i le Tusi Paia e faapea, ua ia maua le meaalofa e lē toe mafai ona maliu. E moni lava, i le taimi na tusia ai e Paulo nei upu, sa na o Iesu lava na maua le ola e lē toe mafai ona faaumatia.

E tatau foʻi ona manatua, e sesē pe ana faapea mai Paulo, e na o Ieova e lē mafai ona maliu, talu ai e lē toe mafai foʻi ona maliu Iesu ina o tusia e Paulo nei upu. Ae e mafai ona faapea mai Paulo, e na o Iesu lava e lē mafai ona maliu pe a faatusatusa atu i tupu o le lalolagi.

E lē gata i lea, ina ua uma ona toe faatūina mai Iesu ma afio atu i le lagi, ua mafai ona faamatalaina o ia o lē “e leʻi vaaia o ia e se tasi tagata, e lē mafai foʻi ona vaai i ai se tasi.” E moni, o le a vaaia Iesu e ona soo faauuina pe a maliliu ma toe faatutūina aʻe i latou o ni agaga i le lagi. (Ioane 17:24) Ae e leai se tagata i le lalolagi e mafai ona vaai iā Iesu i lona tulaga faamamaluina. O lea, ua saʻo le faapea atu, talu mai le toe faatūina o Iesu ma lona afio aʻe i le lagi, “e leʻi vaaia o ia e se tasi.”

O le mea moni, i le uluaʻi iloaina o lenei mea, e foliga mai o le faamatalaga lea e maua i le 1 Timoteo 6:15, 16, e mafai ona faatatau atu i le Atua. Ae o le faamatalaga atoa a Paulo, ma le faafesootaʻi faatasi o isi mau; ua faaalia ai sa faasino atu Paulo iā Iesu.

[Faamatalaga pito i lalo]