Ia Leoleoina Oe e “Afioga” a Ieova

I LE 490 T.L.M. i le taua taʻutaʻua a Malafoni, na fesagaʻi ai pe a ma le 10 i le 20 afe tagata Atenai ma le ʻautau e sili ona toʻatele a Peresia. O le vala autū i le malosiaga o Eleni, o le savavali faaputuputu faatasi o fitafita. O a latou talita fesāuaʻi, na avea e pei o se pa puipui e lē motusia, ma e faatutū i luga a latou tao. Na manumalo ai lenei ʻautau malosi a Atenai mai i ʻautau e sili ona toʻatele a Peresia.

O loo auai Kerisiano i se taua faaleagaga. O loo latou faasagatau i fili matuā malolosi; o faipule lē vaaia o lenei lalolagi amioleaga, ia o loo faamatalaina i le Tusi Paia o “alii o le pōuliuli o lenei lalolagi, . . . ma agaga leaga i mea o i le lagi.” (Efeso 6:12; 1 Ioane 5:19) O loo manumalo pea tagata o le Atua; e lē ona o so latou lava malosi, ae ona o Ieova. O loo leoleoina ma faatonuina e Ieova ona tagata, e pei ona fai mai ai le Salamo 18:30: “Ua se ario ua teʻa ma le otaota afioga a Ieova; o ia lava o le talita o i latou uma o ē faatuatua iā te ia.”

Ioe, e ala i ana “afioga” ua faamamāina, ia o loo i le Tusi Paia, ua puipui ai e Ieova ana auauna faamaoni mai mea e lamatia ai lo latou itu faaleagaga. (Salamo 19:7-11; 119:93) Na tusi Solomona e uiga i le poto mai le Afioga a le Atua faapea: “Aua e te lafoaʻi iā te ia, ona tausia lea o oe e ia; ia e alofa iā te ia, ona leoleoina lea o oe e ia.” (Faataoto 4:6; Failauga 7:12) E faapefea ona leoleo i tatou e le poto mai le Atua faasaga i mea e lamatia ai? Seʻi iloilo se faaaʻoaʻoga i Isaraelu anamua.

Se Nuu na Puipuia e le Poto Mai le Atua

Sa puipuia ma taʻitaʻia e le Tulafono a le Atua le nuu o Isaraelu i mea uma. O se faaaʻoaʻoga, o tulafono e faatatau i taumafa, le tumamā, ma le faleesea o tagata sa maua i maʻi leaga, na puipuia ai i latou mai le tele o faamaʻi na pesia ai isi nuu. Na faatoʻā iloa e le ʻausaienitisi le saʻo o tulafono a le Atua i le senituri lona 19, ina ua maua i suʻesuʻega le iai o mea ola ninii (bacteria). O isi tulafono lelei e pei o le umia o fanua, le toe faatauina atu, le faamagaloina  o aitalafu, ma le nonōina atu o tupe, na fesoasoani i tagata Isaraelu i le faavaeina o se nuu mautū lelei ma lelei foʻi le tamaoaiga. (Teuteronome 7:12, 15; 15:4, 5) Sa fesoasoani foʻi le Tulafono a Ieova i le faasaoina o le tulaga lelei o le laueleele o tagata Isaraelu! (Esoto 23:10, 11) O poloaʻiga faasaga i tapuaʻiga sesē, sa leoleoina ai le itu faaleagaga o tagata, sa puipuia ai i latou mai le pulea e temoni, le faia o taulaga i tamaiti, ma le tele lava o isi mea leaga, faapea ma faiga e faavalevalea ai, o le ifo lea o tagata i tupua e leai ni ola.—Esoto 20:3-5; Salamo 115:4-8.

E manino la, o “afioga” a Ieova, “e lē se upu faatauvaa” lea mo tagata Isaraelu; ae o le ola ma le faafualoaina lea o aso o i latou e utagia ia afioga. (Teuteronome 32:47) E moni foʻi lea i aso nei i ē tausia afioga poto a Ieova, e ui lava e lē o toe nonofo Kerisiano i lalo o le feagaiga o le Tulafono. (Kalatia 3:24, 25; Eperu 8:8) O le mea moni, na i lo o se tulafono tusitusia, ua taʻitaʻia ma leoleoina Kerisiano i taʻiala a le Tusi Paia.

Se Nuu na Puipuia e Taʻiala a Ieova

E ono tapulaa faatatauga o Tulafono, ma e mafai ona muta. Ae peitaʻi, o taʻiala i le Tusi Paia, o ni upu moni faavae, e masani lava ona lautele atu ma tumau ona faatatauga. O se faataʻitaʻiga, seʻi manatu i le taʻiala lea e taʻua i le Iakopo 3:17, lea e faapea mai sona vaega: “A o le poto mai lugā e muamua ona mamā, i le ua filemu.” E faapefea ona puipuia e lenā taʻiala ia tagata o le Atua i aso nei?

Ina ia mamā, o lona uiga, ia mamā le amio. O lea, o i latou o ē faatāuaina le tulaga mamā, e ʻalofia ai e lē na o amioga lē mamā, ae o amioga e oo atu ai i le faia o na amio, e aofia ai le tuʻinanau i feusuaʻiga lē mamā ma le matamata i ata matagā. (Mataio 5:28) E faapena foʻi ni uō e fai ni tuugātala, o ē ua ave i fale le fautuaga i le Iakopo 3:17 ina ia ʻalofia faiga e iʻu ai ina lē pulea i laʻua. Ae o le tausisia o le tulaga mamā, ona ua fiafia i taʻiala a Ieova e lē maileia ai i laʻua. La te manatu i ai e faapea, o a la amio, o le a finagalo malie mai ai Ieova iā i laʻua ona o lo la lē solia o Ana tulafono. Ua la iloa foʻi o Ieova e silasila “i le loto” ma gaoioi mai e tusa ai. (1 Samuelu 16:7; 2 Nofoaiga a Tupu 16:9) O na tagata popoto, e latou te puipuia o latou tino mai le tele o faamaʻi pipisi ia ua salalau atu i aso nei ona o feusuaʻiga, ma ua taofia ai foʻi mai le faaleagaina o o latou mafaufau ma faalogona.

Ua faapea mai foʻi le Iakopo e 3:17, o le poto mai le Atua e “filemu.” O loo taumafai Satani e faaliliu ese i tatou mai iā Ieova e ala i le faatupuina o le agaga sauā i o tatou loto, ona o le faitau o tusi, matamata i ata tifaga, faalogo i musika, ma taaloga i komepiuta, ia e lē lelei. O nisi taaloga i komepiuta e faaoso ai i le tagata taalo le fiafia i faiga sauā, ma le fasioti tagata! (Salamo 11:5) Ua iloa le taulau o Satani ona o le faatuputeleina o le solitulafono o faiga sauā. E faatatau i na solitulafono, na taʻua ai e se nusipepa a Ausetalia i nai tausaga ua mavae, ia Robert Ressler e faapea, o fasioti tagata ia sa ia faatalanoaina i le va o le 1970-1979, na oso o latou faanaunauga leaga ona o le matamata i ata mataga tau feusuaiga ae “ua sili atu ona matagā ata i aso nei.” (The Sydney Morning Herald) I lea, na faapea mai e Ressler “ailoga e toe lelei tagata i le lumanaʻi; auā e mautinoa, i le senituri fou o le a faateleina ai tagata fasioti tagata.”

E moni lava, i ni nai masina talu ona faasalalau mai lenā tala, ae fasiotia e se tagata sa umia se fana ia tamaiti laiti e toʻa 16 ma le faiaʻoga, i se aʻoga faataʻitaʻi i le taulaga o Dunblane, i Sikotilani, ona ia pule lea i lona lava ola. I le masina na sosoo ai, na tafana ai e se isi tamāloa e leaga le mafaufau ni tagata se toʻa 32 i le aai toʻafilemu o Port Arthur, i Tasemania, i Ausetalia. I tausaga talu ai nei, na segia ai mauli o tagata Amerika i le fasiotia o le tele o ni tamaiti i nisi o aʻoga, ua fesili ai tagata e faapea, Aiseā ua tutupu ai nei mea? Iā Iuni 2001, na lipotia ai i nusipepa a le lalolagi uma se mea na tupu i Iapani, ina ua alu atu se tagata e leaga le mafaufau ma se agaese i se faleaʻoga,  ma tatui ni tamaiti se toʻavalu o le vasega muamua ma le lua, ma feoti ai, ma tatipi isi tagata e toʻa 15. O le mea moni, ua matuā felefele māfuaaga o nei mea leaga, ae o se tasi o māfuaaga, o le faateleina o faiga sauā i televise i aso nei. Na tusi mai se tusitala Ausetalia o Phillip Adams e faapea: “Afai e mafai e se faasalalauga faapisinisi e faia mo le 60 sekone ona uunaʻi tagata e faatauina mai ni mea se tele mai faleoloa, o le mea moni lava la, e mafai e se ata tifaga e faaali mo le lua itula ona suia uiga o tagata.” Ua faaalia ai le moni o lenā manatu, ina ua aveesea e leoleo le 2,000 vitiō o faiga sauā ma feusuaʻiga matagā mai le aiga o le tamāloa lea na tafanaina le aai o Port Arthur.

O i latou e pipiimau atu i taʻiala i le Tusi Paia, ua puipuia o latou mafaufau ma loto mai i na faafiafiaga uma e faatupu ai le tuʻinanau i faiga sauā. I lea, o le a lē mafai ai ona aafia o latou mafaufau ma faanaunauga i “le agaga o lenei lalolagi.” Na i lo o lea, ua “aʻoaʻoina mai e le Agaga Paia [o le Atua]” i latou, ma ua taumafai ina naunau i ona fua, ia e aofia ai le filemu. (1 Korinito 2:12, 13; Kalatia 5:22, 23) E latou te faia lenei mea e ala i le suʻesuʻeina e lē aunoa o le Tusi Paia, tatalo, ma mafaufau loloto i mea e atiina aʻe ai. E latou te ʻalofia ai foʻi le auaumea ma ē e iai faanaunauga sauā, ae filifili e auaufaatasi ma ē e pei o i latou, o loo moomoo mo le lalolagi fou filemu a Ieova. (Salamo 1:1-3; Faataoto 16:29) Maʻeu le lelei o le puipuiga ua saunia e le poto mai le Atua!

Ia Leoleo e “Afioga” a Ieova Lou Loto

Ina ua faaosoosoina i le vao, na faamaonia e Iesu le sesē o Satani i lona fetalai e tusa ma le Afioga a le Atua. (Luka 4:1-13) Ae peitaʻi, e leʻi finau Iesu ma le Tiapolo ina ia iloa po o ai e saʻo. Ae na ia lagolago lana tetee i mau, ma fetalai atu Iesu e tusa ma lona finagalo. O le pogai lenā na lē taulau ai togafiti a le Tiapolo iā Iesu e pei ona sa taulau ai i le faatoʻaga i Etena. O le a lē taulau foʻi togafiti a Satani iā i tatou, pe afai e faatumuina o tatou loto i afioga a Ieova. E leai se mea e sili atu ona tāua e mafai ona tatou faia, “auā [o le loto] e tupu mai ai le amio” ma le ola.—Faataoto 4:23.

E lē gata i lea, e tatau ona leoleoina pea o tatou loto, aua neʻi faavaivai. O le lē taulau o Satani i le vao, e leʻi taofia ai lona tofotofoina atili o Iesu. (Luka 4:13) O le a maumauaʻi foʻi o ia iā i tatou i le faia o togafiti eseese e lepetia ai lo tatou faamaoni. (Faaaliga 12:17) I lea, ia faataʻitaʻi iā Iesu i le matuā naunau i le Afioga a le Atua, ma tatalo foʻi e lē aunoa mo le agaga paia ma le poto. (1 Tesalonia 5:17; Eperu 5:7) O lea la, ua folafola mai e Ieova i ē e sulufaʻi atu iā te ia e faapea, o le a lē afāina i latou i le itu faaleagaga.—Salamo 91:1-10; Faataoto 1:33.

E Leoleo e le Afioga a le Atua le Faapotopotoga

E lē mafai ona taofia e Satani le “motu o tagata” lea na valoia, o le a faasaoina atu nai le puapuaga tele. (Faaaliga 7:9, 14) Ae peitaʻi, o loo taumafai pea o ia ma le lotoa e faaleagaina ia Kerisiano ina ia lē maua ai e nisi le finagalo malie o Ieova. Sa taulau lenā togafiti iā Isaraelu anamua, ma iʻu ai ina feoti le 24,000 i faitotoʻa lava o le Nuu Folafolaina. (Numera 25:1-9) E moni, o Kerisiano na faia ni mea sesē ae ua salamō moni, ua maua le fesoasoani alofa ina ia toe faafoʻisia i o latou tulaga faaleagaga. Ae o tagata agasala e lē salamō, e pei o Semeri i aso anamua, na lamatia ai le tulaga mamā tau amio ma le faaleagaga o isi. (Numera 25:14) I le pei o fitafita o le vaegaau o ē na lafoaʻia o latou talita, ua lamatia e lē gata o i latou, a o a latou aumea foʻi.

O lea, ua poloaʻi mai ai le Tusi Paia: “Ai se tasi ua taʻuusoina a e faitaaga, pe matapeʻapeʻa, pe ifo i tupua, pe agatele, pe onā, pe fao mea; aua lava neʻi tou feoaʻi, aua foʻi tou te aai faatasi ma lē o faapea. . . . Ia faateʻaeseina e outou lenā tagata amio leaga iā te outou.” (1 Korinito 5:11, 13) Pe e te ioe o lenei “afioga” poto e fesoasoani e leoleoina le faapotopotoga  Kerisiano ina ia amio mamā ma ia mamā faaleagaga?

I se faaeseesega, o le toʻatele o tagata i lotu ua faapea mai o Kerisiano, faapea tagata ua liliu ese mai le upu moni, ua manatu, e lē toe aogā vaega o le Tusi Paia na e feteenaʻi ma manatu o tagata e uiga i amioga tatau i aso nei. I lea, ua latou talia ai ituaiga uma o agasala matuiā, e oo lava i le ʻaufailotu. (2 Timoteo 4:3, 4) Ae peitaʻi, seʻi mātau, o le Faataoto 30:5, lea e faasino atu i “afioga” a Ieova e pei o se talita, o loo lagolagoina e le poloaʻiga lea e i le fuaiupu e 6: “Aua e te faaopoopo se upu i ana afioga; neʻi aʻoaʻi atu o ia iā te oe, ona taʻupepeloina ai lea o oe.” Ioe, o i latou e suivaia le Tusi Paia, o ni tagata pepelo faaleagaga; o ē e aupito sili ona pepelo i tagata uma! (Mataio 15:6-9) Seʻi o tatou loto faafetai ona o le avea o se tasi o le faalapotopotoga e faatāua le Afioga a le Atua.

E Puipuia e le “Nanamu” Lelei

Ona o le pipii o tagata o le Atua i le Tusi Paia ma talaʻi atu le feʻau faamāfanafana o loo iai, ua latou faasalalau atu ai se “nanamu” lelei o le ola e fiafia ai Ieova. Ae ua pei o “le manogi o le oti” i tagata amio leaga ē o faasalalau atu lenā feʻau. Ioe, o le manogi o ē amio leaga, ua latou lē lagona ai se toʻafilemu, ma oo ai ina fia taui ma sui iā i latou o loo faasalalau atu le ‘nanamu o Keriso.’ I le isi itu, o tagata o loo faasalalauina atu ma le maelega le tala lelei, ua avea ma ‘nanamu iā Keriso i ē ua faaolaina.’ (2 Korinito 2:14-16) O na tagata lotofaamaoni e masani ona lē fiafia i le faafiaamiotonu ma le tala pepelo o taʻitaʻi lotu ia ua mātaulia ai lotu sesē. I lea, pe a tatou faitau le Afioga a le Atua ma talanoa atu iā i latou i le feʻau o le Malo, ua tosina atu i latou iā Keriso ma fia malamalama atili ai.—Ioane 6:44.

O lea, aua le faavaivai pe a lē tali lelei mai nisi i le feʻau o le Malo. Na i lo o lea, ia manatu i le “nanamu” lelei iā Keriso o se puipuiga faaleagaga, e tutuli ese ai tagata o le a afāina ai le tulaga faaleagaga, lea e fiafia i ai tagata o le Atua, ae i le taimi e tasi, ua tosina mai ai ē loto faamaoni.—Isaia 35:8, 9.

Ona o le maopoopo o savaliga a ʻautau Eleni i Malafoni, ma le taofimau ma lo latou malosi atoa o a latou talita, sa manumalo ai e ui lava i tulaga faigatā. Ua faapena foʻi ona faamautinoa atu i Molimau faamaoni a Ieova o le a manumalo i le taua faaleagaga, auā o lo latou “tofi lenā.” (Isaia 54:17) O lea, seʻi avea Ieova ma o tatou malu i le ‘taofi i le upu o le ola.’—Filipi 2:16.

[Ata i le itulau 31]

‘O le poto mai lugā e mamā, i le ua filemu’