Le Suafa o le Atua i Tusi Paia Tuai Siamani
Le Suafa o le Atua i Tusi Paia Tuai Siamani
E FAITAU afe ona taʻua le suafa o Ieova le Atua, i le New World Translation of the Holy Scriptures i le gagana Siamani, lea na lomia i le 1971. * Ae e lē o le Tusi Paia Siamani muamua lenā o loo iai le suafa o le Atua. E aliali mai o le Tusi Paia Siamani muamua lava na iai le suafa o Ieova, na lomia toetoe 500 tausaga ua tuanaʻi e Ioane Eki, o se faifeʻau o le lotu Katoliko.
Na fanau Ioane Eki i le 1486 i le itu i saute o Siamani. Na avea o ia ma faiaʻoga i le aʻoga faafaifeʻau a le iunivesite i Ingolstadt, ina ua 24 ona tausaga seʻia oo i lona maliu i le 1543. O le taimi foʻi lenā na soifua ai Matini Luteru, ma na uō i laʻua. Na taulamua Matini i le amataina o lotu Porotesano mulimuli ane, ae na tū malosi Ioane e lagolago le lotu Katoliko.
Na faatonuina Eki e le alii sili i Pavaria e faaliliu le Tusi Paia i le gagana Siamani ma na lomia i le 1537. Ua faapea mai se tusi, na mulimulituʻi le faaliliuga a Eki i uluaʻi tusitusiga o le Tusi Paia “ma e tatau ona amanaʻia lana galuega lelei na fai.” (Kirchliches Handlexikon) O le faaliliuga lenei a Ioane Eki i le Esoto 6:3: “O aʻu o le Alii, o lē na faaali atu iā Aperamo, Isaako, ma Iakopo i loʻu igoa o le Atua e ona le malosi uma lava; ou te leʻi faailoa atu, loʻu igoa o Adonai iā te i latou.” Na faaopoopo e Eki le faaupuga lenei i autafa o le itulau: “O le suafa o Adonai Jehoua.” E talitonu le toʻatele o tagata popoto o le Tusi Paia, o le taimi muamua lenei na taʻua ai le suafa o le Atua i se Tusi Paia Siamani.
Ae ua loa tausaga o taʻua le suafa o le Atua. O le suafa o “Ieova” ua faasino atu i le Atua moni e toʻatasi lea na tusia muamua i le faa-Eperu. (Teuteronome 6:4) Na tusia toetoe 2,000 tausaga ua tuanaʻi i le gagana Eleni, fetalaiga a Iesu i lona faaali atu o le suafa o le Atua. (Ioane 17:6) Ua lomia le suafa o le Atua i le anoanoaʻi o gagana. Ua toe o se aga ona taunuu lea o upu o loo i le Salamo 83:18, o le a iloa e tagata uma o Ieova o le Silisili ese i le lalolagi uma.
[Faamatalaga pito i lalo]
^ pala. 2 Na lomia muamua i le faa-Peretania e Molimau a Ieova i le 1961. O loo maua i ni vaega po o le tusi atoa i le silia i le 50 gagana.
[Ata i le itulau 32]
O le Tusi Paia a Eki na toe lomia i le 1558, ma faamatalaga o i autafa o le itulau i le suafa o Ieova i le Esoto 6:3