Savavali ma le Atua i Nei Taimi Faigatā
Savavali ma le Atua i Nei Taimi Faigatā
“Na la feooaʻi [pe savavali] foʻi o Enoka ma le Atua; ua lē iloa foʻi e ia, auā na avea o ia e le Atua.”—KENESE 5:24.
1. O ā nisi o vala ua matuā leaga ai o tatou aso?
TAIMI faigatā! O upu tonu lava na e faamatala ai tausaga o vevesiga ma faiga sauā o loo soifua ai tagata, talu le fanau mai o le Malo o le Mesia i le 1914. Talu mai lenā taimi, ua soifua tagata i “aso e gata ai.” O mala e pei o oge, faamaʻi, mafuiʻe ma taua ua pagatia ai tagata i se tulaga e leʻi tupu muamua lava. (2 Timoteo 3:1; Faaaliga 6:1-8) E lē sao mai ai i latou o tapuaʻi iā Ieova. O le mea moni, ua tatou fesagaʻi uma lava ma faigatā ma tulaga faalētonu i lenei lalolagi. Ua faigatā le olaga ona o faafitauli tau le tamaoaiga, fevesiaʻiga faaupufai, solitulafono ma faamaʻi.
2. O ā luʻi ua fesagaʻi ma auauna a Ieova?
2 E lē gata i lea, ua onosaia e auauna a Ieova le tele o sauāga a o tau Satani faasaga i ē “tausi i poloaʻiga a le Atua, ma ua taofi le mau iā Iesu.” (Faaaliga 12:17) E ui o le toʻatele o i tatou e leʻi mafatia i sauāga, ae e ao i Kerisiano moni uma lava ona tau faasaga iā Satani ma le agaga lea o loo ia faatuputupulaʻia i tagata. (Efeso 2:2; 6:12) E ao ona tatou mataala ina neʻi afāina i lenā agaga, ona o loo iai i fale faigaluega, i aʻoga ma i so o se mea lava tatou te miomiō faatasi ai ma i latou e lē o mananaʻo i le tapuaʻiga mamā.
Savavali ma le Atua, ae Lē o Nuu Faapaupau
3, 4. O le ā le auala ua ese ai Kerisiano mai le lalolagi?
3 I le uluaʻi senituri, sa tau malosi foʻi Kerisiano faasaga i le agaga o lenei lalolagi, ma o le pogai lenā na ese ai i latou mai i ē o i fafo o le faapotopotoga Kerisiano. Na faamatala e Paulo le eseesega ina ua ia tusi: “O lenei, ou te fai atu iā te outou, ma taʻutino atu lenei mea ona o le Alii, aua tou te toe savavali faapei o nuu faapaupau, o ē savavali i le valea o o latou loto. O loo faapouliuligia o Efeso 4:17-19.
latou mafaufau, o liliueseina i latou i le ola o i le Atua, ona o le valea ua iā i latou, ona o le maaa o latou loto. Ua latou lē lagona se mea, ua tuuina atu i latou e i latou i le matāitu, e fai mea leaga uma lava ma le tuʻinanau i ai.”—4 E matuā manino le faamatalaina e na upu o le pogisa faaleagaga, ma le leaga o amioga a tagata o lenei lalolagi, e lē gata i aso o Paulo ae faapena foʻi i o tatou aso! E pei o le uluaʻi senituri, ua ‘lē toe savavali faapei o nuu faapaupau’ Kerisiano i aso nei. Na i lo lea, ua latou olioli i le faaeaga sili o le savavali ma le Atua. O le mea moni, ua masalosalo nisi i le manatu e mafai e tagata faatauvaa lē lelei atoatoa ona savavali ma Ieova. Peitaʻi, ua taʻu mai e le Tusi Paia e mafai. E lē gata i lea, e finagalo Ieova ia latou savavali ma ia. I le senituri lona valu T.L.M., na tusia ai e Mika upu nei: “Se ā . . . se mea e finagalo ai Ieova iā te oe, pe a lē o ia mea, ia fai le amiotonu, ia naunau i le alofa, ma ia feooaʻi ma lou Atua ma le loto faamaulalo?”—Mika 6:8.
E Faapefea Ona Savavali ma le Atua ma Aiseā?
5. E faapefea e tagata lē lelei atoatoa ona savavali ma le Atua?
5 E faapefea ona tatou savavali ma le Atua e ona le mana uma ma e lē vaaia? E manino le mata o le vai, e lē mafai ona tatou savavali ma le Atua e pei ona tatou savavali ma se isi tagata. I le Tusi Paia, o le faaupuga “savavali,” e mafai ona uiga e faapea, “ia mulimuli i se ala maʻoti.” * O lona uiga la, o se tasi e savavali ma le Atua, e tatau ona mulimuli i le ala ua saunia mai e le Atua ma e fiafia i ai lona finagalo. O le tausisia o lenā ala, e tū ese ai i tatou mai isi tagata. Peitaʻi, e na o le pau lea o le filifiliga talafeagai mo se Kerisiano. Aiseā? E anoanoaʻi māfuaaga.
6, 7. Aiseā o se ala sili ai le savavali ma le Atua?
6 Muamua, o Ieova na faia i tatou, o ia o le puna o lo tatou ola, ma o Lē ua saunia mea uma tatou te moomia e tausia ai o tatou ola. (Faaaliga 4:11) O lea la, ua iā te ia le pule e faatonuina ai le auala tatou te savavali ai. E lē gata i lea, o le savavali ma le Atua o le ala aupito i aogā lenā. Ua saunia e Ieova le faamagaloga o agasala ma le faamoemoe o le ola e faavavau mo i latou o loo savavali ma ia. Ua saunia foʻi e lo tatou Tamā alofa o i le lagi fautuaga atamai e fesoasoani iā i latou na, ina ia manuia o latou olaga i le taimi nei, e ui i o latou tino augavale, ma o loo soifua i se lalolagi o loo pulea e Satani. (Ioane 3:16; 2 Timoteo 3:15, 16; 1 Ioane 1:8; 2:25; 5:19) O se isi māfuaaga e ao ai ona tatou savavali ma le Atua, ona o lo tatou lotomalilie e faia faapea, e saosaolaumea ai i le filemu ma le autasi o le faapotopotoga.—Kolose 3:15, 16.
7 O le māfuaaga mulimuli ma e sili ona tāua, pe a tatou savavali ma le Atua, e faaalia ai o loo tatou sapasapaia le itu a Ieova i le finauga o le pule silisili ese, lea na lāgā i le faatoʻaga i Etena. (Kenese 3:1-6) E tatou te faaalia i le auala o tatou ola ai, o loo tatou ʻau ma Ieova ma o loo faalauiloa atu ma le lototele e na o Ia lava o le Pule silisili ese. (Salamo 83:18) I lenei auala ua tatou gaoioi ai e ōgatusa ma a tatou tatalo ina ia faapaiaina le suafa o le Atua ma ia faia lona finagalo. (Mataio 6:9, 10) E popoto i latou ua filifili e savavali ma le Atua! E mafai ona latou iloa o loo latou savavali i le ala saʻo ona o Ieova e “poto ia.” E lē taitai faia e ia se mea sesē.—Roma 16:27.
8. Ua faapefea ona pei aso o Enoka ma Noa o o tatou aso?
8 E mafai faapefea ona soifua se tasi e tusa ma tapulaa faa-Kerisiano i nei taimi matuā faigatā, ma e toʻatele e lē mananaʻo e auauna iā Ieova? E tatou te maua le tali pe a
talanoa e uiga i tane faamaoni o aso anamua o ē na faamaoni i taimi matuā faigatā. O le toʻalua o i latou na o Enoka ma Noa. Sa soifua i laʻua i aso e pei o taimi nei o loo tatou ola ai. Sa taatele le amioleaga. I aso o Noa, na tumu le lalolagi i le sauā ma amioga lē mamā. Peitaʻi na teena e Enoka ma Noa le agaga o le lalolagi i o la taimi ae faaauau pea ona savavali ma Ieova. Na mafai faapefea ona la faia lenā mea? Ina ia tali lenā fesili, o le a talanoaina i le mataupu lenei le faaaʻoaʻoga a Enoka. I le mataupu o loo sosoo mai, o le a talanoaina ai le faaaʻoaʻoga a Noa.Na Savavali Enoka ma le Atua i Taimi Faigatā
9. O ā faamatalaga ua tatou maua e uiga iā Enoka?
9 O Enoka, o le uluaʻi tagata lea o loo taʻua i le Tusi Paia na savavali ma le Atua. Ua taʻua i le Tusi Paia: “Na la feooaʻi foʻi o Enoka ma le Atua talu ina fanauina e ia o Metusela.” (Kenese 5:22) Ina ua uma ona taʻua le umi o le soifuaga o Enoka, e ui lava e umi pe a faatusatusa mai i soifuaga o tagata i aso nei, ae e puupuu pe a faatusatusa atu i na aso, ona faapea mai lea o le tala: “Na la feooaʻi foʻi o Enoka ma le Atua; ua lē iloa foʻi e ia, auā na avea o ia e le Atua.” (Kenese 5:24) E aliali mai na faamutaina e Ieova lona soifua i le maliu, a o leʻi faapuapuagatiaina o ia e ona fili. (Eperu 11:5, 13) E ese mai i na fuaiupu pupuu, e lē tele nisi faamatalaga e uiga iā Enoka i le Tusi Paia. Peitaʻi, mai i faamatalaga ua tatou maua ma isi foʻi faailoaga, ua iai māfuaaga lelei e talitonu ai, na faigatā taimi o Enoka.
10, 11. (a) Na faapefea ona salalau atu le leaga ina ua mavae le fouvale o Atamu ma Eva? (e) O le ā le feʻau faavaloaga na talaʻia e Enoka, ma e lē taumatea na faapefea ona tali atu i ai tagata?
10 O se faaaʻoaʻoga, seʻi o tatou talanoaina le auala na vave ona faaleagaina ai tagata ina ua agasala Atamu. Ua taʻua i le Tusi Paia, na avea le ulumatua a Atamu o Kaino, ma uluaʻi fasioti tagata ina ua ia fasiotia lona uso o Apelu. (Kenese 4:8-10) Ina ua mavae le oti mataʻutia o Apelu, na toe fanau ai se isi atalii o Atamu ma Eva ma faaigoa iā Setu. E tatou te faitau ai e uiga iā te ia e faapea: “Ua fanaua foʻi e Setu lona atalii, ua faaigoa foʻi iā te ia, o Enosa. O ona pō ia na amata ai ona valaau tagata i le suafa o Ieova.” (Kenese 4:25, 26) Ae pagā lea, ona sa valaau tagata “i le suafa o Ieova,” i se auala e lē tusa ma le tapuaʻiga mamā. * Ina ua mavae le tele o tausaga talu le fanau mai o Enosa, na fatuina ai e Lameko, o lē na tupuga mai iā Kaino, se pese i ana avā e toʻalua. I lenā pese na ia faailoa atu ai lona fasiotia o se tauleleʻa o lē na faamanuʻalia o ia. Na ia lapataʻi atu foʻi: “Afai e faafitu ona tauia o se fasiga o Kaino, e faafitugafulu ma le fitu o se taui o se fasiga o Lameko.”—Kenese 4:10, 19, 23, 24.
11 Ua faaalia mai i nei manatu e pei ona taʻua, na vave ona salalau atu i ē na tupuga iā Atamu le leaga lea na amataina e Satani i le faatoʻaga o Etena. I lenā lalolagi, na avea ai Enoka ma perofeta a Ieova, o ana faamatalaga e malolosi tele ma e faatatau foʻi i o tatou aso. Ua lipotia mai e Iuta, le valoaga a Enoka: “Faauta, e afio mai le Alii ma ona au paia e manomano, e faamasino ai i tagata uma, ma faasalaina ai ē ua amio faalēmataʻu uma lava o iā i latou, ona o a latou galuega faalēmataʻu uma ua latou faia ma le faalēmataʻu, ona o a latou upu faatautala foʻi na fai iā te ia e tagata agasala ua faalēmataʻu.” (Iuta 14, 15) O le a taunuu na upu uma iā Amaketo. (Faaaliga 16:14, 16) Peitaʻi, e mafai ona tatou iloa i aso foʻi o Enoka, na lē malilie ai le toʻatele o ‘tagata agasala ma le faalēmataʻu’ ina ua latou faalogo i le valoaga a Enoka. O se matuā agalelei iā Ieova le aveesea o le perofeta a o leʻi fasiotia o ia e na tagata!
Aiseā na Mafai ai e Enoka Ona Savavali ma le Atua?
12. Aiseā na ese ai Enoka mai i ē na latou ola faatasi?
12 I tuā i le faatoʻaga o Etena, na usiusitai Atamu ma Eva iā Satani, ma na fouvale Atamu iā Ieova. (Kenese 3:1-6) Na ese le auala na mulimuli ai la laʻua tama o Apelu, ma na finagalo malie ai Ieova iā te ia. (Kenese 4:3, 4) E faanoanoa ona o le toʻatele o le fanau a Atamu e leʻi pei o Apelu. Ae peitaʻi, sa faapena Enoka, o lē na soifua mai i le faitau selau o tausaga mulimuli ane ai. O le ā le eseesega o Enoka ma le toʻatele o isi na tupuga mai iā Atamu? Na tali e Paulo lenā fesili ina ua ia tusi: “O le faatuatua na aveeseina ai Enoka ina ia lē oo iā te ia le oti, na lē iloa foʻi o ia, auā na avea o ia e le Atua; auā a o leʻi aveeseina na taʻua ai o ia o lē ua fiafia i ai le Atua.” (Eperu 11:5) O Enoka o se tasi o le ‘faapotopotoga e toʻatele o molimau’ o ē na muamua i le ʻau Kerisiano ma ua fai ma faaaʻoaʻoga sili o le faatuatua. (Eperu 12:1) O le faatuatua na mafai ai e Enoka ona tumau i le amio saʻo a o soifua e silia i le 300 tausaga, lea e sili atu i le faatoluina tausaga o le toʻatele o i tatou i aso nei!
13. O le ā le ituaiga o faatuatua sa iā Enoka?
13 Na faamatala e Paulo le faatuatua o Enoka ma isi molimau ina ua ia tusi: “O le faatuatua, o le faalagolago lea i mea ua faamoemoe i ai, o le mautinoa lea o mea e lē o vaaia.” (Eperu 11:1) Ioe, o le faatuatua o le matuā talitonu lea e faavae i faamautinoaga, o le a faataunuuina mea uma lava ua tatou faamoemoe i ai. Talu ai sea faamoemoega malosi ua mafai ai ona tatou iloa mea e ao ona faamuamua i o tatou olaga. O lenā faatuatua, na mafai ai e Enoka ona savavali ma le Atua e ui lava e leʻi faia faapena e tagata o lenā lalolagi.
14. O ā mea atonu na iloa e Enoka lea na faamausalī ai lona faatuatua?
14 E faavae le faatuatua moni i le iloa o mea saʻo. O ā mea na iloa e Enoka? (Roma 10:14, 17; 1 Timoteo 2:4) E lē taumatea, na ia malamalama lelei i mea na tutupu i Etena. Atonu foʻi na ia faalogo i tala e uiga i le olaga i le faatoʻaga i Etena, lea atonu sa iai pea i lenā taimi ae na faasā ai tagata. (Kenese 3:23, 24) Na ia iloa foʻi le finagalo o le Atua, ina ia tumu le lalolagi i fanau a Atamu ma ia faia e pei o le uluaʻi Parataiso. (Kenese 1:28) E lē gata i lea, e mautinoa na faatāua e Enoka le folafolaga a Ieova o le saunia lea o se Fanau, e na te tuʻimomomo le ulu o Satani ma aveese āuga o le taufaasesē a Satani. (Kenese 3:15) Ioe, o le valoaga a Enoka, o loo tusia i le tusi o Iuta, o loo valoia ai le faaumatiaga o le fanau a Satani. Talu ai sa faatuatua Enoka, e tatou te iloa, na tapuaʻi o ia iā Ieova o Lē “na te tauia mai o ē matuā saʻili iā te ia.” (Eperu 11:6) O lea la, e ui e leʻi maua e Enoka le malamalamaga lea ua tatou maua, ae na lava ma totoe mea na ia iloa ina ia mausalī lona faatuatua. O lenā faatuatua, na ia tausisia ai le faamaoni i taimi faigatā.
Mulimuli i le Faaaʻoaʻoga a Enoka
15, 16. E mafai faapefea ona tatou mulimuli i ala o Enoka?
15 I le pei o Enoka, tatou te mananaʻo e faafiafia le finagalo o Ieova i taimi faigatā i aso nei, e ao la ona tatou mulimuli i le faaaʻoaʻoga a Enoka. E ao ona tatou ave i fale le malamalamaga saʻo e uiga iā Ieova ma lona finagalo. Peitaʻi e lē gata ai i inā. E ao ona taʻitaʻia o tatou ala e lenā malamalamaga saʻo. (Salamo 119:101; 2 Peteru 1:19) E ao ona faatonutonuina i tatou e le finagalo o le Atua, ma taumafai e faafiafia o ia i o tatou mafaufauga ma gaoioiga.
16 E leai ni faamaumauga tatou te iloa ai pe na iai nisi na auauna iā Ieova i taimi o Enoka, peitaʻi e manino mai a lē na o ia po o se vaega itiiti foʻi. Ua na o se vaega toʻaitiiti foʻi i tatou i le lalolagi, peitaʻi tatou te lē faavaivai ai. E fesoasoani Ieova iā i tatou e tusa lava po o ai o faasagatau mai. (Roma 8:31) Na lapataʻia ma le lototele e Enoka le faaumatiaga o tagata amio faalēmataʻu. O lea la, ua tatou loto tetele ai ma talaʻi atu le “tala lelei o le malo” e ui i tauemuga, teteega ma sauāga. (Mataio 24:14) E leʻi soifua Enoka i le tele o tausaga e pei o nisi na latou ola faatasi. Peitaʻi, e leʻi tuu atu le faamoemoe o Enoka i lenā lalolagi, ae sa ia taulaʻi atu i se mea e sili atu ona matagofie. (Eperu 11:10, 35) E tatou te taulaʻi atu foʻi i le faataunuuga o le finagalo o Ieova. O lea la, tatou te lē saʻilia mea uma o i lenei lalolagi. (1 Korinito 7:31) Na i lo lea, tatou te faaaogā lo tatou malosi ma alāʻoa e auauna ai iā Ieova.
17. O le ā le malamalamaga ua tatou maua e leʻi maua e Enoka, o lea la o le ā le mea e ao ona tatou faia?
17 Na faatuatua Enoka o le a aliaʻi mai le fanau lea na folafola mai e le Atua i Lana taimi atofaina. Ua toetoe 2,000 tausaga talu ona aliaʻi mai lenā Fanau, o Iesu Keriso. Na ia faia le togiola, ma faaavanoa le ala i le ola e faavavau mo i tatou, faapena foʻi ma molimau faamaoni i aso anamua e pei o Enoka. Ua avea lenā Fanau ma tupu o le Malo o le Atua. Na ia lafo ifo Satani mai le lagi i le lalolagi ma ua matuā puapuagatia ai tagata i le lalolagi. (Faaaliga 12:12) Ioe, e tele atu le malamalamaga ua tatou maua na i lo lea na maua e Enoka. Tau ina ia mauaa lo tatou faatuatua e pei o ia, ma ia taaʻina ai mea uma tatou te faia i lo tatou mautinoa e uiga i le faataunuuina o folafolaga a le Atua. Tau ina ia tatou savavali ma le Atua e pei o Enoka, e ui lava o loo tatou ola i taimi faigatā.
[Faamatalaga pito i lalo]
^ pala. 5 Tagaʻi i le Insight on the Scriptures, tusi muamua, itulau 220, palakalafa e 6, lomia e Molimau a Ieova.
^ pala. 10 Na talanoa Ieova ma Atamu a o lumanaʻi aso o Enosa. Na talia e Ieova le taulaga a Apelu. Na talanoa foʻi le Atua ma Kaino a o leʻi tupu aʻe le lotoleaga iā te ia ma avea ai ma fasioti tagata. O lea la, o le ‘valaau i le suafa o Ieova,’ e foliga mai sa faia i se isi auala ese ae e lē tusa ma le tapuaʻiga mamā.
O le a Faapefea Ona E Tali?
• O le ā le uiga o le savavali ma le Atua?
• Aiseā o se ala sili ai le savavali ma le Atua?
• Aiseā na mafai ai e Enoka ona savavali ma le Atua e ui i taimi faigatā?
• E mafai faapefea ona tatou faaaʻoaʻo iā Enoka?
[Fesili mo le Suʻesuʻega]
[Ata i le itulau 15]
O le faatuatua na ‘feoaʻi ai Enoka ma le Atua’
[Ata i le itulau 17]
E tatou te matuā talitonu, o le a taunuu folafolaga a Ieova
[Faamatalaga i Ata i le itulau 13]
Fafine, taufaasiʻusiʻuga o le itu taumatau : FAO ata/B. Imevbore; fale ua solo i lalo: San Hong R-C Picture Company