Tatou te Savavali i le Suafa o Ieova lo Tatou Atua
Tatou te Savavali i le Suafa o Ieova lo Tatou Atua
“O i tatou foʻi, tatou te savavali i le suafa o Ieova lo tatou Atua e faavavau faavavau lava.”—MIKA 4:5.
1. E faapeʻī le tulaga tau amio i aso o Noa, ma na faapefea ona ese mai ai Noa?
O ENOKA le uluaʻi tagata na taʻua i le Tusi Paia sa savavali ma le Atua. O Noa le tagata lona lua. Ua taʻu mai e le tala iā i tatou: “O Noa o le tagata amiotonu ia ma le sao i ē tupulaga ma ia; sa la feooaʻi o le Atua ma Noa.” (Kenese 6:9) E oo ane i aso o Noa, ua toetoe liliuese tagata uma mai le tapuaʻiga mamā. Na faateteleina le leaga o tulaga o mea ina ua faiavā agelu lē faamaoni i fafine e ui e lē talafeagai, ma maua ai a latou fanau o ni tagata maualuluga, o ē “malolosi” ma le “taʻua anamua.” E lētioa la ona matuā tumu le lalolagi i le sauā! (Kenese 6:2, 4, 11) Ae ui i lea, sa amio saʻo pea Noa ma avea o ia ma “lē [e] talaʻi le amiotonu.” (2 Peteru 2:5) Ina ua faatonuina o ia e le Atua ia fausia se vaa mo le faasaoina, na faia e Noa “e faapei ona poloaʻi atu ai le Atua iā te ia i mea uma, sa faapea lava ona fai e ia.” (Kenese 6:22) E moni, sa savavali Noa ma le Atua.
2, 3. O le ā le faaaʻoaʻoga lelei sa faia e Noa mo i tatou i aso nei?
2 Na faaaofia e Paulo i lana lisi o molimau faamaoni Noa ina ua ia tusi: “O le faatuatua na fausia ai e Noa le vaa ina ua mataʻu, e ola ai lona aiga, ina ua aʻoaʻoina e le Atua i mea e leʻi vaaia i ia ona pō, na ia faasalaina ai le lalolagi, ua na maua ai foʻi le amiotonu, o le amiotonu lea e i le faatuatua.” (Eperu 11:7) Maʻeu se faaaʻoaʻoga ina a lelei! Na matuā talitonu Noa i le faataunuuina o fetalaiga a Ieova, o le ala lea na ia faaaogā ai le tele o lona taimi, malosi ma alāʻoa ina ia usitaia poloaʻiga a le Atua. I se tulaga faapena, ua teena e le toʻatele tulaga manuia i galuega ua ofo mai e le lalolagi ma faaaogā o latou taimi, malosi ma alāʻoa e usiusitai ai i poloaʻiga a Ieova. Ua taʻuaogāina lo latou faatuatua ma o le a iʻu i le faaolaina o i latou atoa ai foʻi ma isi.—Luka 16:9; 1 Timoteo 4:16.
3 Atonu sa faigatā ona faatuatua Noa ma lona aiga e pei ona sa faigatā iā Enoka, le tamā o le tamā o lona tamā, o lē o loo faamatala mai i le mataupu muamua. Sa pei aso o Noa o aso o Enoka, sa toʻaitiiti i latou i le tapuaʻiga moni, e na o le toʻavalu na faamaoni ma faasaoina i le Lolo. Sa talaʻi e Noa le amiotonu i se lalolagi sauā ma amio lē mamā. E lē gata i lea, sa latou fausia ma lona aiga se vaa telē lava e sauniuni ai mo le lolo, e ui lava e leai se tasi na vaai muamua i se lolo. E lē taumatea o se mea uiga ese lenā iā i latou na matamata ane.
4. O le ā le mea sesē a i latou na ola faatasi ma Noa sa faamatilatila e Iesu?
4 O le mea e mataʻina ai, ina ua taʻua e Iesu aso o Noa, e leʻi fetalai o ia i faiga sauā, tapuaʻiga sesē po o amio lē mamā, e ui e leaga tele na mea. O le mea sesē lea na faamatilatila e Iesu, o le faataligatuli o tagata e utagia le lapataʻiga na avatu. Na ia fetalai, “ua latou aai ma inu, ua latou fai avā . . . ua oo lava i le aso na ulu atu ai Noa i le vaa.” O le ā le sesē o le aai, ma inu ma faiavā? Sa na o mea “masani” lava o le olaga na latou fai! Peitaʻi, na latalata ane le lolo ma sa talaʻi e Noa le amiotonu. Mataio 24:38, 39.
Sa tatau ona avea ana upu ma lana amio o se lapataʻiga iā i latou. Peitaʻi, na “lē iloa foʻi e i latou ina seʻia oo le lolo, ma aveesea i latou uma.”—5. O ā uiga na manaʻomia e Noa ma lona aiga?
5 Pe a toe tepa i tua i na taimi, tatou te iloa ai le saʻo o mea sa faia e Noa i lona olaga. Ae peitaʻi, i aso a o lumanaʻi le Lolo, sa manaʻomia ai le loto tele ina ia ese mai i isi tagata uma. Sa manaʻomia foʻi se talitonuga maumauaʻi ina ia mafai ai e Noa ma lona aiga ona fausia le vaa telē ma faatumu i meaola o ituaiga eseese. Faamata na moomoo nisi tagata faamaoni o lenā aiga ina ia latou ola i le olaga masani na i lo le tu ese mai isi tagata? E tusa lava pe sa iai ni manatu faapea, ae e leʻi faavaivaia ai i latou. Ina ua mavae le tele o tausaga, e umi atu na i lo le taimi e ao ona onosai ai se tasi o i tatou i lenei faiga o mea, sa faasaoina Noa i le Lolo ona o lona faatuatua. Ae peitaʻi, na faaoo e Ieova lana faasalaga iā i latou na ola i olaga masani, ma manatu māmā i le taimi na latou ola ai.
Ua Toe Pagātia Tagata i Sauāga
6. O le ā le tulaga na iai pea ina ua mavae le Lolo?
6 Ina ua matūtū le lolo, na iai se amataga fou o le soifuaga o tagata. Peitaʻi, na faaauau pea ona lē lelei atoatoa tagata ma na “leaga o manatu o loto o tagata e afua mai ina o tama iti.” (Kenese 8:21) E lē gata i lea, e ui lava na lē toe mafai e temoni ona fai ni o latou tino tagata, ae sa malolosi pea a latou taaʻiga. Na vave ona faaalia e lenā lalolagi faalēmataʻu o loo “nofo toʻilalo” i lē ua leaga, ma e pei lava o aso nei, sa tatau i ē na tapuaʻi moni ona tau faasaga i “togafiti a le tiapolo.”—1 Ioane 5:19; Efeso 6:11, 12.
7. Na faapefea ona faateleina faiga sauā i le lalolagi ina ua mavae le Lolo?
7 Na toe faatumulia le lalolagi i faiga sauā aemaise talu mai aso o Nimarota. Ona o le faateleina o le aofaʻi o tagata ma le agaʻigaʻi i luma o le malamalama i le fausiaina o mea, ua atili ai ona faateleina tulaga sauā i le lalolagi. I aso ua mavae, sa iai le pelu ma le tao, ū ma aufana ma kariota. Mulimuli ane, na iai ituaiga o fana tuai ma fanafanua, ona aliaʻi mai lea i le amataga o le senituri lona 20 o ituaiga o fana fou ma auupega o taua faaonapōnei. Na aliaʻi i le Taua Muamua a le Lalolagi auupega sili ona mataʻutia e pei o vaalele, tanetau, vaamaulu ma kasa oona. I lenā taua, na fasiotia ai i na auupega le faitau miliona o tagata. Pe na iloa ea e isi o le a tupu na mea? Ioe.
8. Ua faapefea ona taunuu le Faaaliga 6:1-4?
8 Na afio Iesu i lona nofoālii o le Tupu o le Malo o le Atua i le lagi i le 1914, ma na amata ai “le aso o le Alii.” (Faaaliga 1:10) I le tusi o Faaaliga, o loo faaata ai Iesu o tiʻetiʻe i se solofanua paʻepaʻe o se Tupu manumalo. O loo mulimuli atu i ona tua isi tagata tiʻetiʻe solofanua lea e taʻitasi ma fai ma ata o puapuaga eseese. O se tasi o i latou, o loo tiʻetiʻe i se solofanua mūmū, ma ua avatu iā te ia le pule e “aveeseina le filemu i le lalolagi, a e latou te fefasiaʻi ai; ua avatu foʻi iā te ia le pelu tele.” (Faaaliga 6:1-4) Ua fai lenei solofanua ma le tagata o loo tiʻetiʻe ai ma ata o faiga taua, ma o le pelu tele e fai ma ata o le tele ma le mataʻutia o faiga taua i aso nei ma ona auupega malolosi. O na auupega i aso nei, ua aofia ai auupega faaniukilia ia e mafai ona faaumatia ai le faitau sefulu afe o soifua. E aofia ai foʻi roketi ia e feaveaʻia na auupega ma e mafai ona malaga i le faitau afe o maila ina ia taunuu i le mea o taulaʻi i ai, faapea foʻi ma auupega e faaaogā ai kasa oona ma siama e faaumatia ai le anoanoaʻi o tagata.
Ua Tatou Utagia Lapataʻiga a Ieova
9. E faapeʻī le lalolagi i aso nei pe a faatusatusa atu i le lalolagi a o lumanaʻi le Lolo?
9 I aso o Noa, na faaumatia e Ieova tagata ona o faiga sauā ia na māfua mai i tagata amioleaga ma fanau a agelu. Ae faapefea o tatou aso? Pe na sili atu ona matuiā faiga sauā i na aso na i lo tatou aso? E mautinoa e leai! E lē gata i lea, e pei o aso o Noa, o loo faia e tagata mea i aso fai soo, ma ola i olaga masani, ma mumusu e utagia lapataʻiga ua avatu. (Luka 17:26, 27) O lea la, faamata e iai se māfuaaga o le a tatou masalosalo ai pe e toe faaumatia e Ieova le fanau a tagata? E leai.
10. (a) O le ā le lapataʻiga o loo taʻua pea i valoaga a le Tusi Paia? (e) E na o le ā lava le auala atamai i aso nei?
10 I le faitau selau o tausaga a o lumanaʻi le Lolo, na valoia ai e Enoka le faaumatiaga o le a oo mai i o tatou aso. (Iuta 14, 15) Na fetalai foʻi Iesu i le “puapuaga tele” lea o loo faaloloʻi mai. (Mataio 24:21) Na lapataʻi mai foʻi isi perofeta e faatatau i lenā taimi. (Esekielu 38:18-23; Tanielu 12:1; Ioelu 2:31, 32) E tatou te faitau foʻi i le Faaaliga i se faamatalaga mataʻutia o le iʻuga. (Faaaliga 19:11-21) Ua tatou faaaʻoaʻo iā Noa ma ua maelega i le faiva o ni tagata talaʻi o le amiotonu. Ua tatou utagia lapataʻiga a Ieova ma fesoasoani ma le alofa i o tatou tuaoi ia faia faapea. O le faia faapea ua tatou savavali ai ma le Atua e pei o Noa. O le mea moni, e tāua mo se tasi e fia ola ona savavali ma le Atua. E faapefea ona tatou faia faapea e ui ina fesagaʻi ma faafitauli i aso uma? E ao ona tatou faatuatua malosi i le faataunuuina o le finagalo o le Atua.—Eperu 11:6.
Ia Savavali Pea ma le Atua i Taimi Faigatā
11. E faapefea ona pei i tatou o Kerisiano i le uluaʻi senituri?
11 I le uluaʻi senituri, na taʻua Kerisiano faauuina i lenā taimi o “le Ala.” (Galuega 9:2) Na faaautū o latou olaga atoa i le faatuatua iā Ieova ma Iesu Keriso. Na latou mulimuli i tulaga aao o lo latou Matai. O loo faia foʻi faapena e Kerisiano faamaoni i aso nei.
12. O le ā le mea na tupu ina ua uma ona fafagaina faavavega e Iesu le motu o tagata?
Ioane 6:10-15) I lenā pō na malaga atu ai o ia i se isi nofoaga. O le teena e Iesu o le avea ma tupu, e lē taumatea na lē fiafia ai le toʻatele. Auā foʻi ua lava ma totoe lona agavaa e avea ai ma tupu, ma sa iā te ia le mana e faamalie ai manaʻoga o tagata. Peitaʻi, e leʻi oo i le taimi atofaina a Ieova e fai ai o ia ma Tupu. E lē gata i lea, o le Malo o Iesu e i lugā i le lagi, ae lē i le lalolagi.
12 Ua faaalia le tāua o le faatuatua i se mea na tupu i le faiva a Iesu. I se tasi o mea na tupu, na fafagaina faavavega ai e Iesu se motu o tagata pe tusa ma le 5,000. Na maofa ma fiafia tagata. Ae ui i lea, matau le mea na sosoo ai. E faitauina faapea: “Ua iloa e ia tagata le faailoga na faia e Iesu, ona faapea lea o i latou, ‘E moni, o lea lava perofeta lenei, o lē maliu mai i le lalolagi.’ Ua silafia foʻi e Iesu, o le a ō mai i latou e puʻe iā te ia, ina ia latou faia o ia ma tupu, ona toe maliu ese ai lea o ia e toʻatasi i le mauga.” (13, 14. O le ā le manatu na faaalia e le toʻatele, ma na tofotofoina faapefea lo latou faatuatua?
13 Ae ui i lenā mea, na mulimuli atu tagata iā Iesu ma na latou mauaina o ia “i le tasi itu o le vai,” e pei ona taʻua e Ioane. Aiseā na latou mulimuli ai iā Iesu e ui na ia teena a latou taumafaiga e fai o ia ma tupu? Sa faaletino le vaaiga a le toʻatele, auā na latou taʻua meataumafa na saunia e Ieova i le vaomatua i ona pō o Mose. Sa latou manatu, e tatau iā Iesu ona saunia ni meataumafa mo i latou. Na silafia e Iesu o latou faanaunauga sesē, o lea na amata ai ona ia aʻoaʻoina i latou i upu moni faaleagaga, ia e mafai ona fesoasoani e toe fetuunaʻi o latou mafaufauga. (Ioane 6:17, 24, 25, 30, 31, 35-40) I le tali atu, na muimui nisi faasaga iā te ia, aemaise lava ina ua ia fetalai i lenei tala faatusa: “E moni, e moni, ou te fai atu iā te outou, afai tou te lē aai i le tino o le Atalii o le tagata, a lē inu foʻi i lona toto, ua lē i totonu iā te outou le ola. O lē ʻai i loʻu tino ma inu i loʻu toto, ua iā te ia le ola faavavau; ou te toe faatūina foʻi o ia i le aso gataaga.”—Ioane 6:53, 54.
14 O talafaatusa a Iesu, na masani ona uunaʻia ai tagata e faaalia pe na latou faanaunau moni lava e savavali ma le Atua. O le fuafuaga foʻi lenā o lenei tala faatusa. Na faapogaia ai le matuā lē fiafia o le toʻatele. Tatou e faitau ai e faapea: “Ua faalogologo ai isi ona soo e toʻatele, ona faapea ai lea o i latou, ‘O le upu faigatā lenā; o ai ea se na te mafaia ona faalogologo i ai?’” Na toe fetalai Iesu, e tatau ona latou saʻilia le uiga faaleagaga o ana fetalaiga. Na ia fetalai: “O le agaga lea e tupu ai le ola, e lē aogā le tino i se mea; o upu ou te fai atu iā te outou, o le agaga ia, o le ola foʻi ia.” Peitaʻi, e toʻatele lava e leʻi faalogo, ma ua taʻua i le tala: “Talu ai ua ō ese isi o ona soo e toʻatele i tua, a e leʻi toe feoaʻi i latou ma ia.”—Ioane 6:60, 63, 66.
15. O le ā le vaaiga saʻo sa iai i isi soo o Iesu?
15 Peitaʻi ane, e ese le auala na tali atu ai isi soo o Iesu. O le mea moni lava ia, e leʻi malamalama lelei nei soo i fetalaiga a Iesu. Peitaʻi, na faaauau pea ona latou faatuatuaina Iesu. Na faaalia atu e Peteru o se tasi o na soo faamaoni lagona o i latou na tumau iā Iesu ina ua ia faapea atu: “Le Alii e, a matou ō ea Ioane 6:68) Maʻeu se uiga ma se faaaʻoaʻoga ina a lelei!
iā te ai? O iā te oe upu o le ola faavavau.” (16. E ono tofotofoina faapefea i tatou, ma o le ā le vaaiga saʻo e tatau ona iā i tatou?
16 E ono tofotofoina foʻi i tatou i aso nei, e pei ona tofotofoina soo o Iesu. I lo tatou tulaga, atonu ua tatou lē fiafia ona ua lē vave faataunuuina folafolaga a Ieova e tusa ma o tatou lava manaʻoga. E tatou te ono manatu foʻi, ua faigatā tele ona malamalama i faamatalaga i a tatou lomiga faale-Tusi Paia. Atonu tatou te lē fiafia i se amio a se uso Kerisiano. Faamata e saʻo pe a tatou lafoaʻia le savavali ma le Atua ona o nei māfuaaga po o se isi māfuaaga faapena? E leai! O soo na tuulafoaʻia Iesu, na latou faaalia se vaaiga faaletino. E tatau ona tatou ʻalofia lenā mea.
“O i Tatou e Lē o ni Ē Tuumuli”
17. Ua faapefea ona tatou maua fesoasoani ina ia savavali ai pea ma le Atua?
17 Na tusi Paulo: “O tusi paia uma lava e mai le Agaga o le Atua ia.” (2 Timoteo 3:16) Ua fetalai manino mai Ieova iā i tatou e ala i le Tusi Paia: “O le ala lava lenei, ia outou savavali ai.” (Isaia 30:21) O le usiusitai i le Afioga a le Atua, e fesoasoani iā i tatou e ‘faaeteete ina ia tatou savavali ma le faautauta.’ (Efeso 5:15) O le suʻesuʻeina o le Tusi Paia ma manatunatu loloto i mea ua aʻoaʻoina, e mafai ai ona faaauau ona tatou ‘savavali i le upu moni.’ (3 Ioane 3) Ua moni ai fetalaiga a Iesu, ‘o le agaga e tupu ai le ola, ae lē aogā le tino i se mea.’ Na pau le taʻitaʻiga maufaatuatuaina e faatonutonuina o tatou ala, o le taʻitaʻiga faaleagaga lea e auala mai i le Afioga a Ieova, lona agaga ma lana faalapotopotoga.
18. (a) O le ā le gaoioiga lē poto ua faia e isi? (e) O le ā le faatuatua e ao ona tatou atiina aʻe?
18 I aso nei, o ē ua lē malilie ona o o latou manatu faaletino pe ona o le lē faataunuuina o mea na faamoemoe i ai, e masani lava ona saʻili i mea o i le lalolagi ina ia faamalieina ai o latou manaʻoga. Ua galo iā i latou le tāua o le faaauau ona “mataala,” ma ua latou filifili ai e saʻilia sini manatu faapito na i lo le faamuamua o le auaunaga o le Malo. (Mataio 24:42) E lē o se mea poto le savavali i na ala. Ia mātau upu a Paulo: “O i tatou e lē o ni ē tuumuli i le malaia, a o ni ē faatuatua e ola ai le agaga.” (Eperu 10:39) I le pei o Enoka ma Noa, o loo tatou ola i taimi faigatā, ae e pei foʻi o i laʻua ua faamanuiaina i tatou ona o le savavali ma le Atua. O le faia faapea, ua tatou mautinoa ai o le a tatou vaaia le faataunuuina o le finagalo o Ieova, le aveesea lea o le amioleaga, ma le oo mai o se lalolagi fou amiotonu. Maʻeu se faamoemoe ina a matagofie!
19. Ua faapefea ona faamatalaina e Mika le ala o ē tapuaʻi moni?
19 Na taʻua e le perofeta a le Atua o Mika, o tagata o le lalolagi ua latou “taʻitasi ma savali i le igoa o latou atua.” Ona ia taʻua lea o ia ma isi tagata tapuaʻi faamaoni e faapea: “O i tatou foʻi, tatou te savavali i le suafa o Ieova lo tatou Atua e faavavau faavavau lava.” (Mika 4:5) Afai e tutusa lou faanaunauga ma Mika, ia mafuta vavalalata atu iā Ieova i nei taimi faigatā o loo tatou ola ai. (Iakopo 4:8) Tau ina ia avea foʻi ma o tatou faanaunauga le savavali ma Ieova lo tatou Atua i le taimi nei e oo i le faavavau!
O le a Faapefea Ona E Tali?
• O ā mea e tutusa ai aso o Noa ma aso nei?
• O le ā le ala na mulimuli ai Noa ma lona aiga, ma e faapefea ona tatou faaaʻoaʻo i lo latou faatuatua?
• O le ā le vaaiga sesē na faaalia e nisi o soo o Iesu?
• O le ā le gaoioiga ua faanaunau Kerisiano moni e fai?
[Fesili mo le Suʻesuʻega]
[Ata i le itulau 20]
E pei o aso o Noa, ua pupū tagata i aso nei i mea fai i aso fai soo
[Ata i le itulau 21]
I le avea o ni tagata talaʻi o le Malo, “o i tatou e lē o ni ē tuumuli”