Auala e Feagai ai ma o Tatou Faalogona

PE E foliga mai e pulea oe e faalogona lē lelei i nisi taimi? Pe e vave ona e lē malie, fiu, pe e te itaitagofie? Pe e masani ona lofitūina oe i popolega o le olaga? O le ā se mea e mafai ona fesoasoani iā te oe?

O uiga faaalia ona o faalogona, o mea na e masani ai le olaga o le tagata. O le a sili atu ona manaia le olaga pe a pulea lelei o tatou faalogona. Peitaʻi, ua faailoa mai e le Tusi Paia, “o le sauā e faavalea ai lava le tagata poto.” (Failauga 7:7) I se lalolagi o loo taatele ai faiga sauā ma faalavelave faafuaseʻi, o ai se tasi e lē aafia ai ona faalogona i mea tutupu i lona siʻomaga? Ae peitaʻi, ua taʻua foʻi i le Tusi Paia: “Ua leai se mea e sili ona lelei i le tagata, na ona ia olioli o ia i ana lava galuega.” (Failauga 3:22) E sili atu ona olioli i le olaga, pe a lelei o tatou faalogona. E faapefea ona tatou tausisia faalogona aogā ae lafoaʻi faalogona e afāina ai?

O le faia o fuafuaga aogā, e masani ona faaitiitia ai o tatou faalogona lē lelei. O se faaaʻoaʻoga, pe a tatou popole i ni tulaga e lē mafai ona tatou foʻia, pe e lē sili ea ona lelei pe a suia mea e masani ona tatou faia, po o lo tatou siʻomaga, na i lo le popolevale? O le alu e savalivali, pe faalogologo i se musika mālie, faia se faamalositino, po o le faia o se galuega agalelei mo se tasi o loo manaʻomia se fesoasoani, atonu e mafai ona tatou maua ai se mapusaga, ma fiafia ai.—Galuega 20:35.

Ae peitaʻi, o le auala sili e faateʻa ai mafaufauga sesē, o le faatuatua atu lea i Lē na faia i tatou. Pe a iai pea ni mafaufauga sesē, e manaʻomia ona ‘tuuina atu i le Atua mea uma tatou te popole ai’ e ala i le tatalo. (1 Peteru 5:6, 7) Ua faamautinoa mai e le Tusi Paia e faapea: “Ua latalata mai Ieova i ē ua loto momomo; . . . E tele lava mea leaga e oo i lē ua amiotonu; a e laveaʻiina o ia e Ieova ai ia mea uma.” (Salamo 34:18, 19) E faapefea ona tatou mautinoa, o le a avea Ieova ma o tatou ‘fesoasoani, ma faaola’? (Salamo 40:17) Tatou te iloa faapea e ala i le suʻesuʻeina o le Tusi Paia ma mafaufau loloto i faaaʻoaʻoga o le naunau mai o le Atua mo le lelei o ana auauna.