Fesili Mai le ʻAufaitau

Pe e afāina ai le faiā a se tasi ma Ieova ona o le taalo i taaloga sauā i komepiuta?

Na tusi le tupu o Isaraelu anamua o Tavita e faapea: “E tofotofo e Ieova i lē ua amiotonu; a ua inosia e lona finagalo lē fai amio leaga, ma lē fiafia i le faasauā.” (Salamo 11:5) O le uluaʻi upu i le gagana Eleni mo le “inosia,” e mafai ona uiga atu i le avea “o se tasi ma fili.” O le mea lea, e so o se tasi e fiafia i le faasauā, ua avea o ia ma fili o le Atua. O le fesili la e manaʻomia ona tatou iloiloina: Pe mafai i le taalo i nisi o taaloga i le komepiuta ona faatupu ai le fiafia o se tasi i faiga sauā?

O taaloga sauā i komepiuta, ua viiviia ai le faaaogāina o auupega. E masani ona toleni ai le tagata taalo ina ia tomai i le faaaogāina o auupega o taua. Na taʻua i le mekasini o le Economist e faapea: “Ua atili faalagolago atu le vaegaau a Amerika i taaloga i komepiuta e avea o ni mea faigaluega e toleni ai fitafita. O nisi o taaloga ua faaaogāina e le vaegaau, o taaloga ia ua faatauina atu i faleoloa.”

Ioe, o i latou e taaalo i taaloga sauā i komepiuta, e latou te lē o faamanuʻaliaina moni ni tagata. Ae o le ā se mea ua iloa e uiga i le tulaga o o latou loto ona o le filifilia o nei taaloga? (Mataio 5:21, 22; Luka 6:45) O le ā sou manatu i se tagata e fiafia e tatui, tafana, tatipi, ma fasiotia tagata e ui e lē o faia i ni tagata moni? E faapefea pe a taalo lenā tagata mo le tele o itula i vaiaso taʻitasi i na taaloga sauā, ma e toetoe pulea ai lona olaga atoa? E mautinoa lava e te manatu ai, ua ia atiina aʻe se naunau i faiga sauā, e pei foʻi ona atiina aʻe e se tagata e matamata i ata matagā le tuʻinanau i amioga lē mamā.—Mataio 5:27-29.

O le ā le tele e ʻinoʻino ai Ieova i se tagata e fiafia i le faasauā? Na faapea mai Tavita, “ua inosia e lona finagalo” tagata faapena. I aso o Noa, na faaalia ai e Ieova lona toʻasā tele iā i latou sa fiafia i le faasauā. Na fetalai atu Ieova iā Noa: “Ua oo mai i oʻu luma le iʻuga o tagata uma; auā ua tumu le lalolagi i le sauā ona o i latou; faauta foʻi, o aʻu lava, ou te faaumatia i latou atoa ma le lalolagi.” (Kenese 6:13) Na faaumatia e le Atua moni le lalolagi atoa o tagata talu ai lo latou faasauā. Ae e na o Noa ma lona aiga na ia faasaoina; o le toʻavalu lenā e leʻi fiafia i le faasauā.—2 Peteru 2:5.

O tagata e fia avea ma uō a Ieova, ua ‘tuʻi i a latou pelu e fai ma uʻamea o suōtosina, o latou tao foʻi e fai ma polo e teu aʻi vine.’ Na i lo o le aʻoaʻo e fiafia i faiga sauā, ae latou te lē “toe aʻoaʻo foʻi i taua.” (Isaia 2:4) Ina ia tumau ona avea ma uō a le Atua na i lo o le avea ma ona fili, e tatau ona tatou “alo ese i le leaga, a ia fai mea lelei.” E manaʻomia ona tatou “saʻili i le filemu ma tausisi i ai.”—1 Peteru 3:11.

Ae faapefea la pe afai e masani ona tatou taaalo i taaloga sauā i le vitiō? E manaʻomia la ona tatou faia se faaiʻuga mautū e faafiafia Ieova e ala i le ʻalo ese mai le faia o mea e na te inosia. O le mea moni, e tatau ona tatou tatalo mo le fesoasoani a le agaga paia o le Atua ina ia taofia lenei faiga e faaleagaina ai faaleagaga. E mafai lava ona tatou taofia pe afai e faatinoina i o tatou olaga uiga e pei o le filemu, agalelei, ma le taofia o manaʻo o le tino.—Luka 11:13; Kalatia 5:22, 23.