Ia Savavali Pea e Pei o Iesu Keriso

“O lē faapea o loo tumau ia i totonu iā te ia [o le Atua], e tatau ona savali o lenā tagata faapei ona savali o ia [Iesu].”—1 IOANE 2:6.

1, 2. O ā mea e aofia ai i le vaavaai atu iā Iesu?

NA TUSI Paulo: “Ia tatou taufetuli ma le onosai i le ala tanu o i o tatou luma, ma ia vaavaai atu iā Iesu, o lē na te taʻitaʻiina ma lē na te faaatoatoaina le faatuatua.” (Eperu 12:1, 2) O le savavali i le ala faamaoni, e manaʻomia ai le vaavaai atu iā Iesu Keriso.

² O le upu i le uluaʻi gagana ua faaliliuina “ia vaavaai atu,” e pei ona maua i le Tusi Paia Kerisiano Eleni, o lona uiga, “ia taulaʻi atu le vaai i se mea e aunoa ma le faalavelavea,” “liliu ese mai se tasi mea ina ia vaai atu i se isi mea,” ma ia “matuā vaai totoʻa.” Ua taʻua e se tasi o tusi: “O le taimi lava e uaʻi ese ai le vaai a le tagata tamoʻe Eleni mai le tuuga ma le sini o loo tamoʻe atu iai, ae liliu atu i le ʻaumaimoa, e fai ifo ai lona saosaoa. E faapena foʻi se Kerisiano.” O mea e faatosina ese ai, e mafai ona taofia ai lo tatou agaʻigaʻi i luma faaleagaga. E tatau ona tatou vaavaai atu iā Iesu Keriso. O ā mea tatou te vaavaai atu ai i Lē na te taʻitaʻiina i tatou? O le upu Eleni ua faaliliuina i “Lē na te taʻitaʻiina,” o lona uiga, “o se tasi na te taʻitaʻia i so o se mea ma faataatia le faaaʻoaʻoga.” O le vaavaai atu iā Iesu, e manaʻomia ai le mulimuli i lana faaaʻoaʻoga.

3, 4. (a) O ā mea e manaʻomia ona tatou fai ina ia savavali ai e pei o Iesu Keriso? (e) O ā fesili e ao ona tatou uaʻi atu i ai?

³ Ua taʻua i le Tusi Paia: “O lē faapea o loo tumau ia i totonu iā te ia [o le Atua], e tatau ona savali o lenā tagata faapei ona savali o ia [Iesu].” (1 Ioane 2:6) E ao ona tatou tumau i le Atua e ala i le tausia o poloaʻiga a Iesu e pei ona sa ia tausia poloaʻiga a lona Tamā.—Ioane 15:10.

⁴ O lea la, o le savavali e pei o Iesu, e ao ai ona tatou matuā vaavaai atu iā te ia o Lē na te taʻitaʻiina i tatou ma mulimuli i ona tulaga aao. E ao ona iloiloina fesili tāua nei: O faapefea ona taʻitaʻiina i tatou e Keriso i aso nei? E faapefea i lo tatou faataʻitaʻi i le auala na savali ai Iesu ona aafia ai i tatou? O ā aogā o le piiama atu i le faaaʻoaʻoga ua saunia e Iesu Keriso?

Le Auala o Taʻitaʻia ai e Iesu Ona Soo

5. O le ā le folafolaga na faia e Iesu i ona soo a o leʻi afio i le lagi?

⁵ A o leʻi afio i le lagi, na faailoa atu Iesu Keriso o lē na toe faatūina i ona soo, ma tofia iā i latou se galuega tāua. Na ia fetalai: “O lenei, ia outou ō atu e fai nuu uma lava ma soo.” I lenā taimi, na folafola atu ai foʻi e Lē na te taʻitaʻiina, o le a ia faatasi ma i latou a o latou faataunuu lenei tofiga, i lona fetalai atu: “Faauta foʻi, ou te iā te outou i aso uma lava, e oo lava i le  gataaga o le lalolagi.” (Mataio 28:19, 20) E faapefea ona faatasi Iesu ma ona soo i lenei taimi o le faaiʻuga o lenei faiga o mea?

6, 7. E faapefea ona taʻitaʻia i tatou e Iesu e ala i le agaga paia?

⁶ Na fetalai Iesu: “O le Fesoasoani, o le Agaga Paia lea, e auina mai e le Tamā i loʻu igoa, o ia lava na te aʻoaʻo iā te outou i mea uma lava; e faamanatu mai foʻi o ia iā te outou i mea uma ua ou fai atu ai iā te outou.” (Ioane 14:26) O le agaga paia lea e auina mai e ala i le suafa o Iesu, e na te taʻitaʻia ma faamalosia i tatou i aso nei. O loo ia faamalamalamaina i tatou faaleagaga ma fesoasoani ia malamalama i ‘mea loloto a le Atua.’ (1 Korinito 2:10) E lē gata i lea, o uiga o le Atua “o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le amio mamā,” o ‘fua ia o le agaga.’ (Kalatia 5:22, 23) E mafai ona tatou maua nei uiga e ala i le fesoasoani a le agaga paia.

⁷ A o tatou suʻesuʻeina le Tusi Paia ma taumafai e faatatauina mea ua tatou aʻoaʻoina, ua fesoasoani le agaga o Ieova iā i tatou ia maua le poto, faautauta, atamai, iloa, faamasinoga tonu ma le mafaufau. (Faataoto 2:1-11) E fesoasoani foʻi le agaga paia iā i tatou e onosaia tofotofoga ma tulaga faigatā. (1 Korinito 10:13; 2 Korinito 4:7; Filipi 4:13) Ua lapataʻia Kerisiano ina ia faamamā i latou i “mea uma e leaga ai le tino atoa ma le agaga, ia faaatoatoaina lo [latou] faapaiaina.” (2 Korinito 7:1) Pe e mafai moni lava ona tatou ola e ōgatusa ma faatonuga a le Atua ia paia po o ia mamā, e aunoa ma le fesoasoani o le agaga paia? O se tasi o auala o loo taʻitaʻia ai i tatou e Iesu i aso nei, o le agaga paia, lea ua tuuina atu e Ieova le Atua i lona Alo le pule e faaaogā ai.—Mataio 28:18.

8, 9. E faapefea ona maua le taʻitaʻiga a Keriso e ala i le “auauna faamaoni ma le mafaufau”?

⁸ Seʻi o tatou iloiloina le isi auala o loo taʻitaʻia ai e Keriso le faapotopotoga i aso nei. I le taʻua o lona faatasi mai ma le faaiʻuga o le faiga o mea, na fetalai ai Iesu: “O ai foʻi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso? Amuia lea auauna, pe a sau lona alii e maua o ia o loo faapea ona fai. E moni, ou te fai atu iā te outou, e tofia o ia e pule i ana mea uma.”—Mataio 24:3, 45-47.

⁹ O le “alii,” o Iesu Keriso. O le “auauna,” o le vaega o Kerisiano faauuina i le lalolagi. Ua tuuina atu i lenei vaega le tausia o mea a Iesu i le lalolagi ma saunia taumafa faaleagaga i ona itu aso. O se vaega toʻaitiiti o ovasia agavaa mai le “auauna faamaoni ma le mafaufau,” lea o loo faia aʻe ai le Vaega Pule o loo auauna o ni sui o le vaega faauuina. O loo latou taʻitaʻia le galuega talaʻi o le Malo i le lalolagi aoao ma gafa ma le saunia mai o taumafa faaleagaga i ona itu aso. O lea la, ua taʻitaʻia e Keriso le faapotopotoga e ala i le “auauna faamaoni ma le mafaufau,” ma lana Vaega Pule lea ua faauuina uma e le agaga.

10. E tatau faapefea ona tatou manatu i toeaina, ma aiseā?

¹⁰ O se isi faailoaga mai o le taʻitaʻiga a Keriso, o “mea alofa i tagata,” o toeaina Kerisiano po o ovasia. Ua tuuina mai i latou ina ia “faaatoatoaina ai le au paia, latou te fai ai le galuega a auauna, ia atiina aʻe ai le tino o Keriso.” (Efeso 4:8, 11, 12) Ua taʻua i le Eperu 13:7 e faatatau iā i latou: “Ia outou manatua o outou taʻitaʻi, o ē ua folafola atu le afioga a le Atua iā te outou; ia outou faaaʻoaʻo i lo latou faatuatua, ma ia mafaufau i le iʻuga o a latou amio.” O loo taʻimua toeaina i le faapotopotoga. Talu ai o loo faaaʻoaʻo toeaina iā Iesu Keriso, e tāua ai la ona faaaʻoaʻo i lo latou faatuatua. (1 Korinito 11:1) E mafai ona faaalia lo tatou lotofaafetai mo le faatulagaga a toeaina, e ala i le usiusitai ma gauaʻi i nei “mea alofa i tagata.”—Eperu 13:17.

11. E faapefea ona taʻitaʻia e Iesu ona soo i aso nei, ma o ā mea e aofia ai i le savavali e pei o ia?

¹¹ Ioe, o loo taʻitaʻia e Iesu ona soo i aso nei  e ala i le agaga paia, “le auauna faamaoni ma le mafaufau” ma toeaina o le faapotopotoga. O lo tatou savavali e pei o Iesu, e ao ona tatou malamalama i lana taʻitaʻiga ma gauaʻi i ai. E ao foʻi ona tatou faaaʻoaʻo i le auala na ia savali ai. Na tusi Peteru: “Na valaauina outou ona o lea lava mea; auā na tigāina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” (1 Peteru 2:21) E faapefea ona aafia ai i tatou ona o le mulimuli i le faaaʻoaʻoga lelei atoatoa a Iesu?

Ia Agamalu i le Faatinoina o le Pule

12. O le ā le vala o le faaaʻoaʻoga a Keriso e faatatau faapitoa lava i toeaina o le faapotopotoga?

¹² E ui na maua e Iesu mai lona Tamā le tele o le pule e sili na i lo se isi lava, ae na agamalu o ia i le faatinoina o lenā pule. E ao i tagata uma o le faapotopotoga, aemaise lava ovasia ona iloa lo latou “agamalu e tagata uma lava.” (Filipi 4:5; 1 Timoteo 3:2, 3) Talu ai e iai i toeaina le pule i le faapotopotoga, e tāua ai la iā i latou ona mulimuli i tulaga aao o Keriso i le faatinoina o le pule.

13, 14. E mafai faapefea ona faaaʻoaʻo toeaina iā Keriso a o latou faalaeiau isi e auauna i le Atua?

¹³ Na silafia e Iesu e iai le mea e gata mai ai le malosi o ona soo. Na te leʻi tāpā ni mea e sili atu na i lo mea e mafai ona avatu e ona soo. (Ioane 16:12) Na i lo le fai faamalosi, na faalaeiau e Iesu ona soo ina ia “finafinau” i le faia o le finagalo o le Atua. (Luka 13:24) Na ia faia lenei mea e ala i le tausolomua ma taumafai e pāʻia o latou loto. I se tulaga tutusa, e lē tatau i toeaina i aso nei ona faamalosia tagata e auauna i le Atua e ala i le faamāsiasi o i latou. Na i lo lea, ua faalaeiau atu toeaina iā i latou ia auauna iā Ieova ona o le alofa mo ia ma Iesu, faapena foʻi ma tagata lautele.—Mataio 22:37-39.

¹⁴ E leʻi ʻinaʻinā Iesu i le faatinoina o lana pule e ala i le pulea o soifuaga o tagata. E na te leʻi faataatia foʻi ni mau tapulaa e faigatā ona ausia po o le faia foʻi o le anoanoaʻi o ni tulafono. Na ia faagaeetia isi, e ala i le pāʻia o o latou loto i taʻiala ia na faavae ai tulafono na tuu atu iā Mose. (Mataio 5:27, 28) I le faaaʻoaʻo iā Iesu Keriso, e ʻaloese toeaina mai le faia o ni a latou lava tuutuuga po o le maumaututū e saʻo o latou taofi. I mataupu tau i laʻei ma teuga po o evaevaga ma faafiafiaga, e taumafai toeaina e pāʻia loto e ala i le faaaogāina o taʻiala a le Atua, e pei o ia e faatulaga mai i le Mika 6:8; 1 Korinito 10:31-33; ma le 1 Timoteo 2:9, 10.

Ia Agaalofa ma Faamagalo Atu

15. Na faapefea ona gaoioi Iesu e tusa ai ma masei o ona soo?

¹⁵ Na tuu e Keriso se faaaʻoaʻoga mo i tatou e mulimuli ai i le auala na ia tauaao ai mea sesē ma masei o ona soo. Seʻi o tatou talanoaina ni mea se lua na tutupu i lona pō mulimuli i le lalolagi. Ina ua taunuu i Ketesemane, ona ō ane lea o Iesu ma “Peteru, ma Iakopo, ma Ioane,” ona ia fetalai atu lea iā i latou ia “mataala.” Ona afio atu teisi lea o ia i luma “ona faapaʻū lea o ia i le eleele, ma tatalo.” Ina ua toe foʻi mai o ia i ona soo, “ua maua i latou o momoe.” O le ā le mea na faia e Iesu? Na ia fetalai atu: “Ua manaʻo i ai le loto, a o le tino ua vaivai.” (Mareko 14:32-38) Na i lo le ʻinaʻinā loa ma aʻoaʻi Peteru, Iakopo ma Ioane, na ia agaalofa atu iā i latou! I le pō  lava lenā, na faafitia faatolu ai e Peteru Iesu. (Mareko 14:66-72) Na faapefea ona feutagaʻi Iesu ma Peteru mulimuli ane ai? “Ua toe tū le Alii, ua faaali foʻi o ia iā Simona [Peteru].” (Luka 24:34) Ua taʻua i le Tusi Paia: “Na iloa foʻi o ia e Kefa, ona iloa lea e le toʻasefulu ma le toʻalua.” (1 Korinito 15:5) Na i lo le ita, na faamagalo e Iesu le aposetolo ua salamō ma faamalosiau o ia. Mulimuli ane, na tuuina atu e Iesu iā Peteru ni tiute tauave tāua tele.—Galuega 2:14; 8:14-17; 10:44, 45.

16. E faapefea ona tatou savavali e pei o Iesu pe a lē faia e o tatou uso se mea na tatou faamoemoe i ai, ia pe agaleaga mai foʻi?

¹⁶ Pe afai e lē faia e o tatou uso se mea na tatou faamoemoe i ai pe agaleaga mai ona o le tino augavale, pe lē ao ea ona tatou agaalofa ma faamagalo atu e pei ona sa faia e Iesu? Na faalaeiau e Peteru ona uso talitonu: “Ia loto gatasi outou uma, ia fealofani, ia alolofa i le au uso, ia mutimuti vale i le alofa, ia agalelei; aua le taui atu le leaga i le leaga, po o le agatele mai i le agatele atu; a ia outou faamanuia atu.” (1 Peteru 3:8, 9) Ae faapefea pe afai e lē lelei le auala e faia ai i tatou e se isi, ma e lē pei o Iesu i le faaalia o le agaalofa ma le faamagalo mai? E tusa lava po o le tulaga lenā, ae ao lava ona tatou taumafai e faaaʻoaʻo iā Iesu ma gaoioi e pei ona sa ia faia.—1 Ioane 3:16.

Ia Faamuamua le Auaunaga o le Malo

17. E faapefea ona iloa na faamuamua e Iesu le faia o le finagalo o le Atua i lona soifuaga?

¹⁷ E iai foʻi le isi auala, e ao ona tatou savavali ai e pei o Iesu Keriso. O le mea sa sili ona tāua i le soifuaga o Iesu, o le faalauiloaina o le tala lelei o le Malo o le Atua. Ina ua uma ona talaʻi atu i le fafine Samaria e lata ane i le aai o Sukara i Samaria, na fetalai atu Iesu i ona soo: “O laʻu mea e ʻai, ia ou faia le finagalo o lē na auina mai aʻu, ma faaiʻu lana galuega.” (Ioane 4:34) Sa malosi Iesu ona o le faia o le finagalo o lona Tamā, auā sa tausia, faamalieina ma faafouina ai o ia e pei lava o mea e ʻai. Pe a tatou faaaʻoaʻo iā Iesu e ala i le taulaʻi atu i le faia o le finagalo o le Atua, o le a tatou maua foʻi se olaga fiafia ma faamalieina.

18. O ā faamanuiaga e maua ona o le faalaeiauina o fanau e auai i le auaunaga faataimi atoa?

¹⁸ Pe a faalaeiau e mātua a latou fanau e auai i le auaunaga faataimi atoa, o le a maua ai e a latou fanau le tele o faamanuiaga faapena foʻi ma mātua. Na faalaeiau e se tamā o se masaga tama, lana fanau ina fai le auaunaga paeonia ma o la sini a o laiti lava. Ina ua uma a la aʻoga na paeonia loa le masaga. Na tusi mai lenei tamā e uiga i lona olioli: “E leʻi faia e la ma fanau se mea ma te faanoanoa ai. E ma te faapea atu ma le lotofaafetai, ‘O le fanau, o le tofi lea mai iā Ieova.’ (Salamo 127:3) E faapefea ona maua e fanau aogā mai le auai i le auaunaga faataimi atoa? Ua faapea mai se tinā e toʻalima lana fanau: “Ua fesoasoani le auaunaga paeonia i laʻu fanau e mafuta vavalalata atu ai iā Ieova, faaleleia ai a latou lava suʻesuʻega, fesoasoani iā i latou e faaaogā ma le poto o latou taimi ma faamuamua ai mea faaleagaga i o latou olaga. E ui lava sa tatau iā i latou uma ona faia ni suiga, ae leai ma se tasi e salamō ona o le auala ua latou filifilia.”

19. O ā fuafuaga i le lumanaʻi e ao i talavou ona iloiloina?

¹⁹ Talavou e, o ā outou sini mo le lumanaʻi? Po o e galue malosi ina ia maua se tulaga  maualuga i se galuega? Po o e taumafai e avea le galuega faataimi atoa ma au galuega? Na fautua mai Paulo: “Ia faaeteete outou ina ia outou savavali ma le faautauta, aua neʻi faapei o ē valelea, a ia faapei o ē popoto; ia faaaogāina e outou aso o lenei olaga, auā o ona po nei ua leaga. O lenei, aua neʻi faavalea outou, a ia outou iloa le finagalo o le Alii.”—Efeso 5:15-17.

Ia Faamaoni

20, 21. O le ā le auala na faamaoni ai Iesu, ma e mafai faapefea ona tatou faaaʻoaʻo i ai?

²⁰ Ina ia savavali e pei o Iesu, e ao ona tatou faaaʻoaʻo i lona faamaoni. Ua taʻua i le Tusi Paia e faatatau i le faamaoni o Iesu: “Sa uiga faatasi ma le Atua, e leʻi manatu ia o se mea e uu mau lona tulaga tutusa ma le Atua; a ua sasaʻa atu o ia e ia lava, o fai mona le uiga o le pologa, i lona fanau mai faapei o tagata. A o iloa o ia i ona foliga e faapei o se tagata, ua faamaulalo o ia e ia lava, ua na anaana ua oo ina maliu, o le maliu lava lea i le satauro.” Na sapasapaia ma le faamaoni e Iesu le pule silisili ese a Ieova e ala i le gauaʻi e faia le mea sa finagalo i ai le Atua iā te Ia. Na anaana o ia ua oo ina maliu i le satauro. E ao ona iā i tatou foʻi “lenei manatu,” ma gauaʻi ma le faamaoni e faia le finagalo o le Atua.—Filipi 2:5-8.

²¹ Sa faamaoni foʻi Iesu i ona soo. E ui i o latou vaivaiga, ae sa alofa Iesu iā i latou e “oo i le gataaga.” (Ioane 13:1) I se tulaga tutusa, e lē tatau foʻi ona avea vaivaiga o o tatou uso ma pogai tatou te faitio ai.

Piiama Atu i le Faaaʻoaʻoga na Faataatia e Iesu

22, 23. O ā aogā ua maua ona o le piiama atu i le faaaʻoaʻoga na faataatia e Iesu?

²² Talu ai o i tatou o tagata e lē lelei atoatoa, e lē mafai ai la ona tatou savavali saʻo lava i tulaga aao o lo tatou Faaaʻoaʻo sili. Peitaʻi, e mafai ona tatou maumauaʻi e mulimulituʻi i ona tulaga aao. O le faia faapea, e manaʻomia ai lo tatou malamalama ma gauaʻi i le auala o taʻitaʻia e Keriso ma piiama atu i le faaaʻoaʻoga na ia faataatia.

²³ O le faaaʻoaʻo iā Keriso e maua ai le tele o faamanuiaga. Ua atili taulau manuia o tatou olaga ma faamalieina ai, ona o loo tatou taulaʻi atu i le faia o le finagalo o le Atua ae lē usiusitai i o tatou loto. (Ioane 5:30; 6:38) Ua tatou maua se lotofuatiaifo lelei. Ua avea ma faaaʻoaʻoga lelei le auala o tatou savavali ai. Na valaaulia e Iesu i latou uma o ē tigāina ma mafatia i avega, ina ia ō atu iā te Ia ma latou maua ai le faafouina o o latou agaga. (Mataio 11:28-30) Pe afai tatou te mulimuli i le faaaʻoaʻoga a Iesu, e mafai foʻi ona faafouina isi e ala i lo tatou miomiō faatasi. O lea la, tau ina ia tatou savavali pea e pei o Iesu.

Pe E te Manatua?

• Ua faapefea ona taʻitaʻia e Iesu ona soo i aso nei?

• E faapefea ona mulimuli toeaina i le taʻitaʻiga a Iesu i le faatinoina o lo latou pule mai le Atua?

• E faapefea ona tatou mulimuli i le faaaʻoaʻoga a Iesu pe a feagai ma masei o isi?

• E faapefea ona faamuamua e talavou le auaunaga o le Malo?

[Fesili mo le Suʻesuʻega]

[Ata i le itulau 23]

Ua fesoasoani toeaina Kerisiano iā i tatou ia mulimuli i le taʻitaʻiga a Keriso

[Ata i le itulau 24, 25]

Talavou e, o ā sini o outou faia ina ia maua ai se olaga faa-Kerisiano e faamanuiaina?