‘O le Mataʻu iā Ieova—O le Poto Lava Lea’

“SEʻI tatou faalogo ia i le iʻuga o ia mea uma, Ia e mataʻu i le Atua, ma e anaana i ana poloaʻiga; auā o mea ia e tatau i tagata uma.” (Failauga 12:13) Maʻeu se faaiʻuga atamai na faia e le tupu o Solomona i Isaraelu anamua ona o le faagaeega a le Atua! Na malamalama foʻi le tamā matua o Iopu i le aogā o le mataʻu i le Atua, ona na ia faapea mai: “Faauta, o le mataʻu i le Alii, o le poto lava lea; o le ʻalo ese i le amio leaga, o le mafaufau lea.”—Iopu 28:28.

Ua matuā faatāuaina e le Tusi Paia le mataʻu iā Ieova. Aiseā e atamai ai lo tatou ati aʻe o le āva ma le mataʻu i le Atua? O le ā le auala e aogā ai iā i tatou le mataʻu i le Atua—i tagata taʻitoʻatasi, faapea foʻi ma se vaega o tagata tapuaʻi moni? O loo taliina nei fesili e fuaiupu e 26 seʻia oo i le 35 o le Faataoto e 14. *

Puna o le “Faatuatuaga Malosi”

Ua faapea mai Solomona: “O le mataʻu iā Ieova, o i ai le faatuatuaga malosi; o i ai foʻi le malu mo lana fanau.” (Faataoto 14:26) O le puna o le faatuatuaga o le tagata e mataʻu i le Atua, e leai se isi na i lo le Atua faamaoni e ou le malosi uma lava o Ieova. E lētioa la a vaai atu lenā tagata i le lumanaʻi, ma se faatuatuaga malosi! E faafualoa ma manuia lona lumanaʻi.

O le ā la se lumanaʻi o i latou e tuu atu lo latou faatuatuaga i le lalolagi—i ana fuafuaga, i ana faalapotopotoga, mafaufauga o tagata, ma ana oloa? Po o le ā lava le lumanaʻi o loo latou faamoemoe i ai, e puupuu lava, ona ua taʻu mai e le Tusi Paia faapea: “E mavae atu foʻi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioane 2:17) Po o iai ea la se māfuaaga e tatou te ‘mananaʻo ai i le lalolagi, po o mea o i ai i le lalolagi’?—1 Ioane 2:15.

O ā ni gaoioiga e fai e mātua matataʻu i le Atua ina ia faamautinoa ai o le a iai “le malu” mo a latou fanau? Na pese le faisalamo e faapea, “Le fanau e, inā ō mai ia, inā faalogologo mai ia iā te aʻu; ou te aʻoaʻo atu iā te outou ia matataʻu iā Ieova.” (Salamo 34:11) Pe afai e faataatia e mātua se faataʻitaʻiga ma avatu aʻoaʻoga ina ia matataʻu ai i le Atua, e foliga mai o le a latou tutupu aʻe e avea ma tama ma teine e iai le faatuatuaga malosi iā Ieova.—Faataoto 22:6.

Na faaauau mai Solomona e faapea: “O le mataʻu iā Ieova, o le puna o le ola lea, e ʻalo ese ai i mailei e oti ai.” (Faataoto 14:27) O le mataʻu iā Ieova “o le puna o le ola lea” auā o le Atua moni o “le puna o le vai ola.” (Ieremia 2:13) O le iloa o Ieova ma Iesu Keriso e mafai ona tatou maua ai le ola e faavavau. (Ioane 17:3) O le mataʻu i le Atua tatou te ʻalo ese ai i mailei e oti ai. E faafefea? Ua taʻua i le Faataoto 13:14: “O le tulafono a lē ua poto, o le puna o le ola lea, e ʻalo ese ai i mailei e oti ai.” Pe a tatou matataʻu i le Atua, usitaia ana tulafono, ma taʻitaʻi e lana Afioga o tatou ala, pe e lē puipuia ai ea i tatou mai amioga ma faalogona ia e vave feoti ai?

 “Le Mamalu o le Tupu”

O le tele lava o le taimi o le nofoaiga a le tupu o Solomona, sa avea o ia ma tupu e mataʻu ma usiusitai iā Ieova. Na avea lenā ma mea na manuia ai lana pulega. O le ā se mea e iloa ai le lelei o le pulega a se tupu? Ua tali mai le Faataoto 14:28 e faapea: “O le toʻatele o le nuu, o i ai le mamalu o le tupu; a o le ausage, e i ai le malaia o le alii.” E fua le manuia o se tupu i le manuia o ona tagatānuu. Pe afai e toʻatele tagata e mananaʻo i lana pulega, o lona uiga e lelei la lana pulega. O i latou na i lalo o le pulega a Solomona, “e pau mai i le tasi sami [sami Ulaula] e oo atu i le tasi sami [sami Metitirani]; e pau mai le vaitafe [Eufirate] e oo atu i tuluʻiga o le lalolagi.” (Salamo 72:6-8) Sa iloga lana pulega i le filemu ma le tamaoaiga e leʻi faapea ona iai muamua. (1 Tupu 4:24, 25) Sa manuia le pulega a Solomona. I le isi itu, o le lē fiafia o tagata e taʻuleagaina ai se alii maualuga.

I lenei la tulaga, o le ā se faamatalaga e faatatau i le mamalu o le Solomona Sili, le Tupu ma o le Mesia, o Iesu Keriso? Seʻi manatu i ona tagata ua iai i le taimi nei. E mai le tasi pito o le lalolagi seʻia oo i le isi pito o le lalolagi, ua silia i le ono miliona tane ma fafine faatuatua i le Atua ua latou filifili e ola i lalo o lana pulega. Ua latou faatuatua iā Iesu ma ua autasi i le tapuaʻiga moni a le Atua soifua. (Ioane 14:1) E oo ane i le iʻuga o le Afe Tausaga o le Pulega a Iesu, ua māeʻa ona toe faatutūina mai i latou uma ua finagalo i ai le Atua. O le a faatumulia le lalolagi i tagata fiafia amiotonu, ua faaalia lo latou loto faafetai mo lo latou Tupu. O le faamaoniga lenā e iloa ai le manuia o le pulega a Keriso! Seʻi o tatou uumau i lo tatou faamoemoe ofoofogia o le Malo.

Faamanuiaga Faaleagaga ma Faaletino

O le āva ma le mataʻu i le Atua e aumai ai iā i tatou le filemu o le loto ma le toʻafimālie o le mafaufau. Ua māfua lenā tulaga ona o le atamai, e tele ona vala e aofia ai le faautaga poto ma le mafaufau lelei. Ua faapea mai le Faataoto 14:29: “O lē ua faatoʻatoʻa, e tele lona mafaufau; a o lē ua itagofie, e faaeaina i luga e ia le valea.” O le mafaufau lelei ua tatou iloa ai, o le lē pulea o le ita e iai ona aafiaga leaga i lo tatou itu faaleagaga. O loo lisi mai i inei mea e taofia ai i tatou mai le ‘fai o le malo o le Atua ma o tatou tofi,’ e iai le “feitagaʻi, o le femisaʻi, o le losilosi vale, o le lotoa, o le finau vale.” (Kalatia 5:19-21) Ua fautuaina i tatou ia aua neʻi teulotoina le ita e tusa lava pe tatou te saʻo. (Efeso 4:26, 27) O le lē toʻa e oo atu ai i le faia o upu valea ma fai ai gaoioiga e tatou te salamō mulimuli ane ai.

O le leaga o aafiaga o le ita i le tino, ua faapea mai ai le tupu o Isaraelu: “O le loto lelei, o le ola lea o le tino; a o le matauʻa, o le mea e pala ai ivi lea.” (Faataoto 14:30) O maʻi e māfua mai i le ita e aofia ai faalētonu o le āla ea, toto maualuga, maʻi ate, ma aafiaga leaga o le atealii. Ua faapea mai foʻi fomaʻi, o le ita e faatupuina pe atili leaga ai maʻi e pei o le puta papala, mūmū afi, maʻi sela, maʻi o le paʻu, ma faafitauli i totoga e faamalū ai meaʻai. Ae i le isi itu, “o le loto filemu, o le ola lea o le tino.” (Faataoto 14:30, New International Version) E sili atu la, le ‘tausisi i mea e tupu ai le filemu, ma mea e fefaamāfanafanaʻi ai.’—Roma 14:19.

O le Mataʻu i le Atua Tatou te Lē Faailoga Tagata Ai

Ua faapea mai Solomona: “O lē ua faasauā i le tagata mativa, e faalumaina e ia Lē na faia o ia; a o lē ua āva iā te ia, ua alofa o ia i le tagata mativa.” (Faataoto 14:31) O le tagata e mataʻu i le Atua e na te iloa e tasi lava Lē na faia tagata uma o Ieova le Atua. O lea la, o le tagata mativa o le uso a tagata o ia, ma o le auala e feagai ai ma ia, e viiviia pe faalumaina ai Lē na faia tagata. Ina ia avatu i le Atua le viiga, e tatau ona tatou feagai ma le tonu ma isi ma ia lē faailoga tagata. E tatau ona maua e le Kerisiano mativa le tausiga faaleagaga e  aunoa ma le faailoga tagata. E ao ona tatou talaʻi atu le tala lelei o le Malo o le Atua i tagata matitiva ma tagata mauʻoa.

Ua faapea mai le tupu poto ina ua ia faasino atu i se isi aogā o le mataʻu i le Atua: “Ua tulia le amio leaga i lona lava leaga; a o le amiotonu, e iā te ia le faatuatua pe a oti o ia” ae ua faapea mai nisi faaliliuga “a o le amiotonu, e malu ai o ia i lana amio saʻo.” (Faataoto 14:32) E faapefea ona tulia le amioleaga? Ua manatu nisi e faapea, e lē toe lelei le olaga o se tagata amioleaga pe a oo i ai ni mala. I le isi itu, pe a tutupu ni mala, o le tagata e mataʻu i le Atua e malu o ia i lana amio saʻo i le Atua. O lona faatuatua atoatoa iā Ieova, e tusa lava pe oo ai i le oti ae na te faaalia pea le maumauaʻi lea sa iai iā Iopu, lea na faapea mai: “Seʻia oo lava i loʻu oti ou te lē faateʻaina lava laʻu amio saʻo.”—Iopu 27:5.

O le tausia o le faamaoni e manaʻomia ai le mataʻu i le Atua ma le poto. Ma o fea e maua ai le poto? Ua tali mai le Faataoto 14:33 e faapea: “O loo nofo mau le poto i le loto o lē ua mafaufau; a o mea ua i totonu o ē valelea e faailoaina.” Ioe, e mafai ona maua le poto i le loto o le tagata e mafaufau. Ae i le ā le itu, e iloa ai le poto i ē valelea? E tusa ai ma se faamatalaga a se tasi tusi, “o le tagata valea, e naunau e faailoa mai lona poto, ma sasaa uma mai mea e manatu i ai e poto, ae o le faia faapea ua iʻu ai ina aliali mai lona valea.”

“E Viia le Nuu”

E ao ona tatou malamalama e lē na o tagata taʻitoʻatasi e aafia ai i le mataʻu i le Atua, ae e mafai foʻi ona aafia ai se nuu atoa, o lea na faapea mai ai le tupu o Isaraelu: “O le amiotonu e viia ai le nuu; a o le agasala, o le luma lea o le nuu.” (Faataoto 14:34) Maʻeu le faataʻitaʻia manino ai o lenei mea moni i le tulaga o le nuu o Isaraelu! O le pipii atu i tapulaa maualuluga a le Atua, na iʻu ai i le faamaualugaina o Isaraelu i nuu na siʻomia ai o ia. Ae peitaʻi, o le faaauau pea ona lē usiusitai, na oo atu ai i se tulaga e faalumaina ai ma iʻu ai ina teena Isaraelu e Ieova. Ua faatatauina lenei taʻiala i tagata o le Atua i aso nei. E ese le faapotopotoga Kerisiano mai le lalolagi, ona o loo pipii atu i taʻiala amiotonu a le Atua. O lea, ina ia tausia lenā tulaga maualuga, e ao ona ola tagata taʻitoʻatasi i se olaga mamā. O le faia o le agasala e taʻuleagaina ai i tatou, e taʻuvalea ai le faapotopotoga faapea foʻi ma le Atua.

O le manatu i mea e faafiafia ai se tupu, ua faapea mai ai Solomona: “O le alofa o le tupu, o loo i ai i le auauna poto; a o lona toʻasā, o loo i ai lea i lē e tupu ai le mā.” (Faataoto 14:35) Ua taʻua i le Faataoto 16:13 e faapea: “O le mea e fiafia ai tupu, o laugutu e tautala i upu tonu; ma lē ua tautala i upu saʻo, e alofagia lea e i latou.” Ioe, e fiafia lo tatou Taʻitaʻi, o lo tatou Tupu o Iesu Keriso, pe a tatou faia mea ma le amiotonu ma faaaogā o tatou lau fofoga e talaʻia ai le Malo ma le faia o soo. O lea la, seʻi o tatou faaauau ona maelega i lea galuega a o tatou olioli i faamanuiaga e maua mai le matataʻu i le Atua moni.

[Faamatalaga pito i lalo]

[Ata i le itulau 15]

E mafai ona aʻoaʻoina le mataʻu i le Atua