Pe e Tāua Manatu o Isi e Uiga iā i Tatou?

E TOETOE lava o tagata uma e mananaʻo ia viia i latou. O ni upu faamālō, e lagona ai le fiafia, auā e iloa ai ua mafai ona tatou faataunuuina se mea. Pe a fiafia mai tagata i mea tatou te faia, e atili ai ona tatou mananaʻo e faaleleia. Ae i le tuufaafeagai, e ese o tatou faalogona pe a iloa, e lē o fiafia mai isi iā i tatou. O se tali faasiasia mai, po o se faaupuga lē fiafia, e ono nutimomoia ai o tatou loto. O manatu o isi e uiga iā i tatou, e ono afāina ai o tatou lagona e uiga iā i tatou lava.

O se mea sesē le lē amanaʻia o manatu o isi e uiga iā i tatou. E aogā mo i tatou pe a mātaʻitū mai e isi a tatou amio. Pe a faavae i taʻiala maualuluga tau amio, e mafai ona aogā manatu o isi e uunaʻia ai i tatou e faia mea lelei, ma saʻo ai a tatou amio. (1 Korinito 10:31-33) Ae peitaʻi, o manatu o tagata lautele, e masani lava ona lē talafeagai. Seʻi mafaufau i manatu sesē sa iai i le au ositaulaga sili ma isi e uiga iā Iesu Keriso, ina ua “latou alalaga mai, ‘Inā faasatauro ia, inā faasatauro ia iā te ia!’” (Luka 23:13, 21-25) E tatau ona lē amanaʻia manatu o isi pe a faavae i faamatalaga sesē pe taaʻina i le matauʻa po o le faailoga tagata. O lea la, e manaʻomia ai ona tatou filifili pe talafeagai lea manatu pe leai, ma tali atu e tusa ai.

O Manatu o Ai e Tāua?

E tatou te mananaʻo ia fiafia mai i latou e tatou te vavalalata i le tapuaʻiga moni. E aofia ai tagata o ō tatou aiga o ē o i le upu moni, faapea o tatou uso ma tuafāfine Kerisiano. (Roma 15:2; Kolose 3:18-21) E tāua tele iā i tatou le alofa ma le faaaloalo o uso talitonu, ma le “fefaamāfanafanaʻi.” (Roma 1:11, 12) Ona o le ‘loto maulalo, tatou te manatu ai, e sili isi iā i tatou.’ (Filipi 2:2-4) E lē gata i lea, tatou te mananaʻo ia fiafia “taʻitaʻi” po o toeaina o le faapotopotoga iā i tatou.—Eperu 13:17.

E tatau foʻi “ona logoleleia o [i tatou] e i latou o i tua.” (1 Timoteo 3:7) Maʻeu le lelei pe a faaaloalo mai o tatou tauaiga lē talitonu, i latou e tatou te faigaluega faatasi, ma tuaoi! Pe tatou te lē taumafai ea e fai lelei a tatou amio i le talaʻiga ina ia tali lelei mai tagata i le feʻau o le Malo? E viia le Atua pe a taʻuleleia a tatou amio i le nuu e faapea, o i tatou o ni tagata amio mamā, amio saʻo, ma faamaoni. (1 Peteru 2:12) Ae peitaʻi, e lē mafai lava ona tatou solia taʻiala a le Tusi Paia ina ia fiafia mai ai isi; e lē tatau foʻi ona tatou faafiaamiotonu, ina ia fiafia mai ai i latou. E tatau ona tatou iloa, e lē mafai ona tatou faafiafia tagata uma. Na fetalai Iesu: “Afai a ni tagata o le lalolagi outou, po ua alofa mai le lalolagi i ona tagata; a e lē ni ō le lalolagi outou, a ua ou filifilia outou nai le lalolagi, o le mea lea e ʻinoʻino ai le lalolagi iā te outou.” (Ioane 15:19) O ā mea e mafai ona tatou faia ina ia faaaloalo mai iā i tatou o ē tetee i le upu moni?

Ia Faaaloalogia i Tatou e Tagata Tetee

Na lapataʻi mai Iesu: “E inosia foʻi outou e tagata uma ona o loʻu igoa; a o lē tumau seʻia oo atu i le gataaga, e faaolaina o ia.” (Mataio 10:22) O lenei ʻinoʻino e māfua ai tuuaʻiga  matuiā i nisi taimi. E ono manatu pule o malo o ē o feita i Molimau a Ieova, o i tatou o ni tagata e “tetee” ma “fouvale” i le malo. Ua faia e tagata tetee ni tuuaʻiga sesē e faapea, o i tatou o se lotu e saveʻu ai le filemu ma e tatau ona soloia. (Galuega 28:22) E mafai ona faafetaiaʻia nei tuuaʻiga sesē, i nisi taimi. E faapefea? E ala i le mulimuli i le fautuaga a Peteru: “Ia saunia pea lava outou e tali atu ma le agamalu ma le ava iā i latou uma o ē fesili mai iā te outou i le uiga o le faamoemoe o loo iā te outou.” (1 Peteru 3:15) E lē gata i lea, e tatau ona tatou faaaogā ‘upu e ola ai, e lē mataʻuleagaina, ina ia faamāina ai o lē tetee mai, ina ua lē maua e ia se mea leaga e talatala ane ai iā te i tatou.’—Tito 2:8.

A o taumafai e taʻumamāina lo tatou igoa ua faalumaina, e lē tatau ona tatou lotovaivai pe a tuuaʻia i mea lē tonu. Na faitioina Iesu le Alo lelei atoatoa o le Atua e faapea, na upuleaga o ia, sa fouvale i le malo ma na galulue ma temoni. (Mataio 9:3; Mareko 3:22; Ioane 19:12) Na faalumaina foʻi le aposetolo o Paulo. (1 Korinito 4:13) Sa lē amanaʻia uma e Iesu ma Paulo na faitioga, ma faaauau pea ona maelega i a la galuega. (Mataio 15:14) Sa la iloa, e lē taitai ona maua le loto malilie o la fili iā te i laʻua, talu ai “o le lalolagi uma o loo nofo toʻilalo i loo leaga.” (1 Ioane 5:19) O loo tatou fesagaʻi foʻi ma luʻi faapena i aso nei. E lē tatau ona tatou fefefe pe a faasalalau atu e i latou o ʻinoʻino mai ni tala pepelo e uiga iā i tatou.—Mataio 5:11.

O Manatu e Sili Ona Tāua

E eseese lava manatu o tagata e uiga iā i tatou, e faalagolago i uunaʻiga o o latou loto ma mea na latou faalogo ai e uiga iā i tatou. Ua viiviia ma faamamaluina i tatou e nisi, ae ua faitioina ma inosia e isi. Peitaʻi, afai o taʻitaʻia i tatou e taʻiala a le Tusi Paia, e lava ma totoe lenā ia tatou fiafia ai ma maua ai le filemu.

Na tusi Paulo: “O tusi paia uma lava e mai le Agaga o le Atua ia, e aogā foʻi ia e aʻoaʻo ai, e aʻoaʻi ai, e faatonu ai, e faapoto ai foʻi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” (2 Timoteo 3:16, 17) E tatou te mauaina le finagalo malie o Ieova le Atua ma lona Alo o Iesu Keriso, pe a tatou talia ma le lotofaafetai le Afioga a le Atua e avea ma taʻiala i mea uma lava. Ae o le mea moni, e sili atu ona tāua manatu o Ieova le Atua ma lona Alo. O o la manatu e uiga iā i tatou, e atagia atu ai lo tatou tāua moni. O le laualuga o mea uma, e faalagolago o tatou ola i lo laʻua finagalo malie iā i tatou.—Ioane 5:27; Iakopo 1:12.

[Faamatalaga faaopoopo i le itulau 30]

“O le viiga, na ou māsiasi ai, talu ai, sa moomoo i ai loʻu loto.”—LE FATUSOLO INITIA O RABINDRANATH TAGORE

[Ata i le itulau 31]

E tāua manatu o o tatou uso talitonu

[Faamatalaga i Ata i le itulau 30]

Culver Pictures