Po o le Atua po o se Tagata?

“O AʻU nei o le malamalama o le lalolagi, o lē mulimuli mai iā te aʻu, e lē savali o ia i le pōuliuli, a e iā te ia le malamalama o le ola.” (Ioane 8:12) O upu nei sa fetalai i ai Iesu. Na tusi se tagata poto i le uluaʻi senituri e uiga iā Iesu e faapea: “Ua iā te ia le oloa uma o le poto atoa ma le malamalama, ua lilo ai.” (Kolose 2:3) Ua faapea mai atili le Tusi Paia: “O le ola faavavau foʻi lenei, ia latou iloa oe le Atua moni e toʻatasi, atoa ma lē na e auina mai, o Iesu Keriso lea.” (Ioane 17:3) E manaʻomia ona tatou iloa le mea saʻo e uiga iā Iesu ina ia faamalieina o tatou manaʻoga faaleagaga.

E toʻatele tagata mai i itu eseese o le lalolagi ua faalogo e uiga iā Iesu Keriso. Ua lē fesiligia foʻi le aafiaga o le talafaasolopito o tagata i lona soifuaga. O le mea moni, i le tele o vaega o le lalolagi o loo faaaogāina ai se kalena ua faavaeina i le tausaga o loo faapea na fanau mai ai Iesu. Ua faamatalaina e le World Book Encyclopedia e faapea: “A o leʻi oo i le tausaga na fanau mai ai Iesu ua faasino ai e le toʻatele i na tausaga o le T.L.M. po o tausaga a o lumanaʻi le Mesia, ae mo tausaga ina ua mavae le maliu o Iesu ua faasino i ai faapea o le T.A. po o tausaga o le Alii.”

Peitaʻi o loo i ai pea feteenaʻiga i manatu po o ai moni lava Iesu. Ua manatu nisi, o ia ua na o se tagata mataʻina i le talafaasolopito o le lalolagi. Ae o nisi ua tapuaʻi atu iā te ia ma taʻua o ia o le Atua e ona le malosi uma lava. O nisi o tagata lotu Hinitū ua faatusaina Iesu Keriso i lo latou atua liutino tagata o Krishna. Pe sa na o se tagata ea Iesu, po o ia o sē ua tatau ona tapuaʻi atu i ai? O ai moni lava o ia? O fea na afio mai ai o ia? Sa faapeʻī ona uiga? O fea o loo iai nei o ia? I le mataupu o loo sosoo mai o le a tatou iloa ai, e maua tali moni lava o nei fesili i le tusi o loo taʻua ai le tele o faamatalaga e uiga iā Iesu.