‘O Loʻu Fesoasoani e Mai iā Ieova Lea’

Ua Talia e le Toʻatele le Tapuaʻiga iā Ieova

O VALOAGA o le Tusi Paia na faasino mai i o tatou aso, na faapea mai o le a lolofi atu tagata mai atunuu uma i le tapuaʻiga ua faamaualugaina a Ieova. O se faataʻitaʻiga, na folafola atu e Ieova e ala i lana perofeta o Hakai e faapea: “Ou te lūlūina foʻi nuu uma; ona oo mai ai lea o mea ua manaʻomia e nuu uma; ou te faatumuina foʻi lenei fale i le pupula.” (Hakai 2:7) Na valoia e Isaia ma Mika faapea, o ō tatou taimi—“o aso e gata ai”—o le a tapuaʻi ai tagata iā Ieova i le auala e taliaina e ia.—Isaia 2:2-4; Mika 4:1-4.

Po ua taunuu moni na valoaga i aso nei? Seʻi o tatou iloiloina la ia mea moni. I le sefulu tausaga ua mavae, e silia i le 3,110,000 tagata fou ua tuuina atu iā Ieova i le silia i le 230 atunuu. O le mea moni, o le toʻaono mai le toʻasefulu o Molimau o loo auauna i le lalolagi atoa, na papatiso i totonu o le sefulu tausaga ua tuanaʻi. I le 2004, e tusa ai ma se fuafaatatau, e taʻi lua minute ma faaopoopo atu i totonu o le faapotopotoga Kerisiano se auauna fou a le Atua ua tuuina atu! *

Ua pei aso nei o le uluaʻi senituri ona, “ua faatuatua foʻi le vao tagata e toʻatele, ma liliu mai i le Alii.” E ui lava o le faateleina o le faitau aofaʻi e lē o se faamaoniga lenā o le faamanuia a le Atua, ae ua mafai ona iloa ai, o loo iai “le aao o [Ieova]” i ona tagata. (Galuega 11:21) Aiseā ua liliu atu ai le faitau miliona i le tapuaʻiga iā Ieova ma ua faapefea ona aafia ai oe i lenei faatelega?

Ua Tosina Mai Tagata Loto Faamaoni

I ni faaupuga tuusaʻo, na taʻua e Iesu faapea: “E lē mafai se tasi ona sau iā te aʻu, pe a lē tosina mai e le Tamā ua auina mai aʻu.” (Ioane 6:44) O lea la, o Ieova ua māfua ai ona tosina mai tagata “ua saunia i le ola e faavavau.” (Galuega 13:48) E mafai e le agaga o le Atua ona faagaee tagata ia iloa o latou manaʻoga faaleagaga. (Mataio 5:3) O se loto fuatiaifo ua ōia, o le fia maua o se faamoemoe, po o se mala ua aafia ai, e ono saʻili ai nisi i le Atua ma aʻoaʻoina e faatatau i ana fuafuaga.—Mareko 7:26-30; Luka 19:2-10.

E toʻatele tagata ua tosina i le tapuaʻiga iā Ieova, ona ua fesoasoani iā i latou le polokalame tau aʻoaʻoga a le Tusi Paia i le faapotopotoga Kerisiano e tali ai fesili ua iso ai.

Sa iai se fesili na atuatuvale ai se tagata e faatauina atu fualaau faasāina e igoa iā Davide i Italia e faapea, “Afai o iai se Atua, aiseā ua saga puapuagatia ai tagata i faiga lē tonu?” Sa faalēnaunau tele o ia i lotu, o lea na ia faia ai lea fesili ina ia faatupu ai se finauga. Ua ia faapea mai: “Ou te leʻi manatu o le a ou maua se tali e talafeagai ma faamalieina ai. Ae o le Molimau na ma talanoa sa ese le onosai ma faamaonia mai lava mea na ia fai mai ai i mau o le Tusi Paia. O lenā talanoaga sa iai se aafiaga telē iā te aʻu.” I aso nei, ua suia e Davide lona olaga ma o loo auauna nei iā Ieova.

Ua auai atu nisi i le vaega faalelalolagi o le faalapotopotoga a Ieova ona o lo latou saʻilia  o se fuafuaga o le olaga. Sa alu atu se tamaʻitaʻi o ia o se fomaʻi o le mafaufau mai Zagreb, i Croatia, i se fomaʻi iloga e saʻili se vaifofō mo ona faafitauli tau faalogona. Na matuā faateʻia o ia, ona na taʻu atu iā te ia e le fomaʻi le numera o le telefoni o le ofisa o le lālā o Molimau a Ieova i Zagreb, faapea ma le igoa o se Molimau e iloa e le fomaʻi lea. Na faapea atu le fomaʻi: “Vaai, ou te manatu e mafai ona fesoasoani atu nei tagata iā te oe. Afai ou te auina atu oe i le lotu, e na o faatagata e leai ni ola e maua ai—e leai se tasi e tautala, ma e leai se malamalamaga faaleagaga e maua mai ai. Ou te manatu e leai sou fesoasoani e maua mai le lotu. Na ou auina atu isi maʻi i Molimau a Ieova, ma ou te manatu e sili atu foʻi lenā mo oe.” Na asiasi ane ma le agalelei se ulugalii Molimau i le tamaʻitaʻi lea, ma e leʻi umi ae amata loa sa latou suʻesuʻega faale-Tusi Paia. I ni nai vaiaso, ae faapea mai ma le fiafia le fomaʻi o le mafaufau, o le mauaina o le poto i fuafuaga a le Atua ua ia maua ai se fuafuaga i lona olaga.—Failauga 12:13.

Pe a oo ni puapuaga i se tagata, ua iloa e le toʻatele, e na o upu moni mai le Tusi Paia e mafai ona maua ai faamāfanafanaga moni. I Eleni, na paʻū ai se tamaitiiti e fitu tausaga mai luga o le faleaʻoga ma oti ai. I ni nai masina mulimuli ane, ae tau atu loa i ai tuafāfine Molimau e toʻalua i lenei tinā, ma taumafai e faamāfanafana iā te ia i le talanoaina o le faamoemoe o le toe tū. (Ioane 5:28, 29) Sa maligi loimata o lenei tinā ina ua faalogo i lea faamoemoe. Na fesili atu tuafāfine: “Afai e te fia iloa atili le Tusi Paia, o āfea la e ma te toe asiasi mai ai?” Na tali mai le fafine, “O le taimi lenei.” Sa avatu loa e le fafine ia tuafāfine i lona fale, ma amata ai loa se suʻesuʻega faale-Tusi Paia. O loo auauna nei lona aiga atoa iā Ieova.

Po o Faia Sau Vaega?

O mea faapena, e masani lava ona tutupu i le lalolagi atoa. O loo aoaoina ma aʻoaʻoina e Ieova le anoanoaʻi o tagata tapuaʻi faamaoni mai so o se atunuu. O loo faamoemoe lenei vaega e mai so o se atunuu e faasaoina pe a oo mai le iʻuga o lenei faiga o mea leaga, ma ola i se lalolagi fou amiotonu.—2 Peteru 3:13.

Ona o le faamanuia a Ieova, ua agaʻi atu ai ma le lē mataofia lenei galuega o le aoaoina mai o tagata e leʻi faapea ona iai muamua, i lona mutaaga. (Isaia 55:10, 11; Mataio 24:3, 14) Po o e auai ma le maelega i lenei galuega o le talaʻia o le Malo? Afai o loo e faia faapea, e te mautinoa la, o loo iai le lagolagosua a le Atua, ma faapea ona faaleo atu upu a le faisalamo: ‘O loʻu fesoasoani e mai iā Ieova lea.’—Salamo 121:2.

[Faamatalaga pito i lalo]

[Faamatalaga faaopoopo i le itulau 9]

“E lē mafai se tasi ona sau iā te aʻu, pe a lē tosina mai e le Tamā ua auina mai aʻu.”—IOANE 6:44

[Pusa i le itulau 8]

O AI O MĀFUA AI LENEI FAATELEGA?

“Afai e lē atiina aʻe e Ieova le fale, e galulue fua i latou o ē atiina aʻe.”—Salamo 127:1.

“O le Atua ua faatupuina. O lenei, e lē o lē totō, e lē o lē faasūsū; a e peitaʻi o le Atua o lē na te faatupuina.”—1 Korinito 3:6, 7.