E Tāua Tele le Mātaulia o Faailoga!

“Sa ou manatu muamua, e na o le tigā o le ulu na maua ai la ma tama o Aneterea. Ae sa lē toe fiafia e ʻai ma ua maualuga lona fiva. Sa oo ina matuā tigā lona ulu, ma sa ou popole ai. Ina ua sau laʻu tane i le fale, na ma ō ai loa e ave Aneterea i le fomaʻi. Sa ia siakiina po o ā āuga ma ave saʻo ai loa i le falemaʻi. Sa sili atu ona matuiā le faafitauli na i lo o le tigā o le ulu. Sa maua Aneterea i le fiva faiʻai. Na togafitia o ia ma vave ai loa ona toe malosi.”—O Gertrud, o se tinā mai i Siamani.

ATONU e masani le toʻatele o mātua ma le mea lea na tupu iā Gertrud. E latou te mātaulia ia faailoga e iloa ai, ua maʻi la laʻua tama. E ui lava e lē o maʻi uma e matuiā, ae e lē mafai ona lē amanaʻia e mātua āuga e iloa ai ua mamaʻi a latou fanau. O le mātaulia o faailoga ma faia gaoioiga talafeagai, e ono ʻalofia ai se tulaga matuiā e tupu mai. E tāua tele lenei mataupu.

E moni lenei mea pe a oo i mataupu e ese mai i le soifua mālōlōina. O se faaaʻoaʻoga o lenei mea, o le mala o le tsunami po o galu lolo, ia na tutupu i vaipanoa o le Vasa Initia iā Tesema 2004. Sa iloa e faalapotopotoga faalemalo i Ausetalia ma Hawaii le mafuiʻe tele i le itu i mātū o Sumatra, ma muaʻi iloa ai se tulaga lamatia o le a mulimuli mai. Ae peitaʻi, e leʻi iai ni auala na mafai ai ona oo atu ni lapataʻiga i tagata i na vaipanoa, ma latou faia ai ni gaoioiga. O le iʻuga, e sili atu i le 220,000 soifua na maumau ai.

Faailoga e Sili Atu Ona Tāua

A o iai Iesu Keriso i le lalolagi, na ia faamatala atu i lana ʻaufaalogologo se lesona e uiga i le mātaulia o faailoga ma gaoioiga e tusa ai. Sa ia fetalai e uiga i se mea e sili mamao atu ona tāua. Ua faapea mai le Tusi Paia: “Ona ō mai ai lea o le ʻau faresaio ma le ʻau satukaio, ua latou tofotofo iā te ia, ua fai mai ia faaali atu iā te i latou se faailoga mai le lagi. A ua tali atu o ia, ‘A oo i le afiafi ua outou fai ane, E laofie; auā ua mūmū mai le lagi. O le taeao foʻi ua outou fai ane, E uaga le asō; auā ua mūmū mai, ma faamalumalu  ifo le lagi. Ua outou iloa ona mātauina amio a le lagi, a o faailoga o tausaga tou te lē mafaia ea?’”—Mataio 16:1-3.

I le taʻua o “faailoga o tausaga,” na fetalai ai Iesu e faapea, sa tatau ona iloa e lana ʻaufaalogologo Iutaia o le uluaʻi senituri, le mataʻutia o le taimi lea na latou soifua ai. Ua toeitiiti lava ona oo ane lea o se mala i le faiga o mea faa-Iutaia lea e ono aafia ai i latou uma. I ni nai aso a o leʻi maliu, na fetalai atu ai Iesu i ona soo e uiga i se isi faailoga; le faailoga o lona faatasi mai. E matuā tāua lava mo tagata uma i aso nei le mea lea na ia fetalai ai i lenā taimi.