“Ia Outou Mataala,” Auā ua Oo Mai le Itu Aso o le Faamasinoga!

O loo faavae lenei suʻesuʻega i le polosiua Ia Faaauau Ona Mataala! lea na tatala i le tauaofiaga itumalo na faia i le 2004/2005 i le lalolagi aoao.

“Ia outou mataala . . . auā tou te lē iloa po o lē fea aso e sau ai lo outou Alii.”—MATAIO 24:42.

1, 2. O le ā le mea na faatusa i ai e Iesu lona afio mai?

O LE ā sau mea e fai pe a e iloa, o loo fealualuaʻi lemū se gaoi ma gaoia fale i lou nuu? E te mataala e puipuia lou aiga ma au mea tāua. O le mea moni, e lē faasilasila maia e se gaoi le taimi e sau ai. Ae e sau faalilolilo i le taimi e te lē o mafaufau i ai.

² Na masani ona taʻua e Iesu gaoioiga a se gaoi i ana talafaatusa. (Luka 10:30; Ioane 10:10) Na fetalai Iesu i mea o le a tutupu i ona pō o le iʻuga, a o toeitiiti ona ia faaoo mai le faaumatiaga. Na lapataʻi mai o ia: “O lea, ia outou mataala ai; auā tou te lē iloa po o lē fea aso e sau ai lo outou Alii. Ia outou iloa lenei mea, ana iloa e le matai o le aiga po o lē fea itu pō e sau ai le gaoi, po ua na leoleoina, a e lē tuua e ia lona fale ia elia.” (Mataio 24:42, 43) Na faatusa e Iesu lona afio mai i le sau o se gaoi, o se mea e lē faatalitalia.

3, 4. (a) O ā mea e fai e i latou e usiusitai i le lapataʻiga a Iesu i lona afio mai? (e) O ā ni fesili ua lāgā ai?

³ E fetaui lelei le talafaatusa, auā e lē iloa le aso tonu lava e afio mai ai Iesu. Na fetalai foʻi Iesu i le valoaga lava lenā: “O lea aso ma lea itu aso e lē iloa e se tasi, e lē iloa lava e agelu i le lagi, e lē iloa foʻi e le Atalii, ua na o le Tamā lava.” (Mataio 24:36) O le ala lea na timaʻi atu ai Iesu i ē na faafofoga i lana lauga: “Ia outou nofo sauni.” (Mataio 24:44) Po o le ā lava le aso e afio mai ai Iesu e faaoo mai le faasalaga a Ieova, ae e nofo sauni ma amio lelei i latou e usiusitai i le lapataʻiga a Iesu.

⁴ Ua lāgā ai ni fesili tāua: Pe na patino le lapataʻiga a Iesu i tagata o le lalolagi, po o le mea ea e tatau foʻi i Kerisiano moni ona “mataala”? Aiseā e tāua ai ona “mataala,” ma e faapefea ona mataala?

O Ai ua Patino i ai le Lapataʻiga?

5. E faapefea ona tatou iloa o Kerisiano moni e patino i ai le lapataʻiga ina ia “mataala”?

⁵ O le afio mai o le Alii, e pei o le sau o se gaoi i tagata o le lalolagi auā e faataligatuli i le lapataʻiga i le puapuaga tele o loo faaloloʻi mai. (2 Peteru 3:3-7) Ae ā Kerisiano moni? Na tusi atu Paulo i ona uso faaleagaga: “Auā ua outou iloa lelei lava, o le aso o le Alii [Ieova] e pei o le gaoi i le pō, e faapea ona oo mai ai.” (1 Tesalonia 5:2) Ua tatou mautinoa lelei e ‘oo mai le aso o Ieova.’ Po o lona uiga la, e lē tāua ona tatou mataala? Ia mātau mai, na fetalai atu Iesu i ona soo: “O le itu aso tou te lē manatunatu ai, e sau ai le Atalii o le tagata.” (Mataio  24:44) A o timaʻi atu Iesu i ona soo ina ia saʻili le Malo, na lapataʻi atu o ia: “Ia nofo sauni foʻi outou; auā o le itu aso tou te lē manatunatu ai, e sau ai le atalii o le tagata.” (Luka 12:31, 40) Ioe, o soo o Iesu na patino i ai lana lapataʻiga ina ia “mataala.”

6. Aiseā e tatau ai ona tatou “mataala”?

⁶ Aiseā e tatau ai ona tatou “mataala” ma “nofo sauni”? Auā na fetalai Iesu: “E i ai i le vao o tagata e toʻalua, e avea le tasi, a e tuua le tasi. E olo faatasi fafine e toʻalua i le mea e olo aʻi saito, e avea le tasi, a e tuua le tasi.” (Mataio 24:40, 41) O le a “avea” pe faaolaina ē e nofo sauni pe a faaumatia tagata amio leaga. O le a “tuua” isi ia faaumatia ona sa latou pupū i le faamalieina o o latou lava manaʻoga. E ono lavevea ai foʻi tagata na talitonu i le upu moni ae ua lē toe mataala.

7. O le lē iloa o le aso o le faaumatiaga e faaalia ai le ā?

⁷ O le lē iloa o le aso tonu e faaumatia ai lenei lalolagi, e faaalia ai le saʻo o le māfuaaga e tatou te auauna ai i le Atua. I le ā le itu? Atonu ua foliga mai ua tuai le oo mai o le faaumatiaga. O le mea e faanoanoa ai, ona o le manatu lenā ua faavaivaia ai nisi Kerisiano i le auaunaga iā Ieova. Peitaʻi, na tatou lotomalilie e auauna iā Ieova ma o tatou loto atoa, i le taimi na tuuina atu ai o tatou ola iā te ia. O ē e iloa Ieova, latou te malamalama e lē fiafia lona finagalo i tagata e faatoʻā maelega i lana auaunaga, pe a matuā lalata i le faaumatiaga. E silasila o ia i loto o tagata.—1 Samuelu 16:7.

8. E faapefea ona tatou mataala ona o le alofa iā Ieova?

⁸ O le fiafiaga sili mo i tatou le faia o le finagalo o Ieova, ona tatou te alolofa moni iā te ia. (Salamo 40:8; Mataio 26:39) Tatou te fia auauna iā te ia e oo i le faavavau. E tāua pea iā i tatou lenā faamoemoe matagofie e ui e leʻi oo mai le iʻuga e pei ona tatou manatu i ai. O le māfuaaga sili tatou te mataala ai, ona o le aso o Ieova o se aso tāua lea i le faataunuuga o lona finagalo. Tatou te faatatauina fautuaga o i le Afioga a le Atua ma faamuamua lona Malo i o tatou olaga, ona tatou te mananaʻo moni lava e faafiafia le Atua. (Mataio 6:33; 1 Ioane 5:3) Seʻi o tatou iloiloina la, le tāua o lo tatou mataala i a tatou filifiliga e fai atoa ai ma o tatou olaga i aso faisoo.

O Faapeʻī Mai Lou Olaga?

9. Aiseā e tāua tele ai ona malamalama tagata i le uiga moni o mea o loo tutupu i aso nei?

⁹ Ua silafia e le toʻatele o tagata, o loo tutupu i aso uma faafitauli tugā ma mea mataʻutia. Atonu foʻi latou te lē o fiafia i o latou olaga. Ae po o latou malamalama moni lava i mea o loo tutupu i le lalolagi? Po o latou iloa ea ua tatou ola nei i le “gataaga o le lalolagi?” (Mataio 24:3) Po o latou silafia o se faamaoniga o “aso e gata ai,” le sasao faaafi o uiga e pei o le manatu faapito, sauā ma le leai o se amio atua? (2 Timoteo 3:1-5) Ioe, e tāua tele ona latou malamalama i le uiga o mea o loo tutupu, ma ia toe iloilo totoʻa o latou olaga.

10. O ā mea e tatau ona tatou faia ina ia mataala ai?

¹⁰ Ae ā i tatou? Tatou te faia i aso uma filifiliga e aafia ai a tatou galuega, soifua mālōlōina, aiga ma la tatou tapuaʻiga. Ua tatou malamalama i le Tusi Paia ma taumafai foʻi e mulimuli i ai. O lea la, ia fesili ifo iā i tatou lava: ‘Po ua ou lē ano i mea faaleagaga ona o loʻu soona popole i mea a le olaga nei? Po o aafia aʻu filifiliga e fai i le poto ma mafaufauga o lenei lalolagi?’ (Luka 21:34-36; Kolose 2:8) Ia faatuatua pea iā Ieova ma o tatou loto atoa, ae aua le faalagolago i lo tatou lava atamai. (Faataoto 3:5) Ioe, ona tatou ‘fetagofi atu lea i le ola moni,’ o le ola e faavavau i le lalolagi fou a le Atua.—1 Timoteo 6:12, 19.

11-13. O ā ni mea tatou te aʻoaʻoina mai faaaʻoaʻoga i (a) aso o Noa? (e) aso o Lota?

 ¹¹ E tele faaaʻoaʻoga o i le Tusi Paia e fai ma lapataʻiga mo i tatou ina ia mataala. O se faaaʻoaʻoga, o aso o Noa. A o leʻi taitai ona oo mai le Lolo, na lapataʻia e le Atua tagata. Ae e leʻi ano i ai tagata seʻi vaganā ai Noa ma lona aiga. (2 Peteru 2:5) O le mea lenā na fetalai ai Iesu: “E pei o ona pō o Noa, e faapea foʻi pe a sau le Atalii o le tagata. Auā e pei ona faia i ona pō a o leʻi oo le lolo, ua latou aai ma inu, ua latou fai avā foʻi ma faaavaga, ua oo lava i le aso na ulu atu ai Noa i le vaa, na lē iloa [pe lē ano] foʻi . . . i latou ina seʻia oo le lolo, ma aveesea i latou uma; e faapea foʻi pe a sau le Atalii o le tagata.” (Mataio 24:37-39) O le ā se mea tatou te iloa mai lenā tala? E ao ona tatou uaʻi totoʻa i o tatou olaga, aemaise pe afai ua alu uma lo tatou malosi i le faia o mea masani o le olaga nei, ma ua tatou lē ano ai i fetalaiga a le Atua ina ia faamuamua mea faaleagaga.—Roma 14:17.

¹² O le isi faaaʻoaʻoga, o aso o Lota. Na tamaoaiga le aai o Sotoma lea na nonofo ai Lota ma lona aiga. Peitaʻi, na amio leaga tagata Sotoma. Na auina mai e Ieova ana agelu ina ia faaumatia le aai. Na tauanau atu agelu iā Lota ma lona aiga ina ia sosola ese mai Sotoma, ma aua le tepa i tua. Na latou tuua le aai ona o le fesoasoani a agelu. Peitaʻi, e foliga mai na alu tele le ulu o le avā a Lota i lona fale i Sotoma. Na lē usiusitai o ia ma tepa i tua, ma fano ai lona ola. (Kenese 19:15-26) Na lapataʻi mai Iesu: “Ia outou manatua le avā a Lota.” Po o tatou faalogo ea i lenā lapataʻiga?—Luka 17:32.

¹³ Na faasaoina tagata na faalogo i lapataʻiga a le Atua, e pei o Noa ma lona aiga, ma Lota ma ona afafine. (2 Peteru 2:9) Tatou te manatu mamafa i nei faaaʻoaʻoga ma lapataʻiga o loo iai. E faalaeiauina foʻi i tatou ona ua tatou iloa mai ai, e laveaʻiina tagata amiotonu. Ua tatou mautinoa ai o le a taunuu le folafolaga a le Atua “i le lagi fou ma le lalolagi fou,” lea “e mau ai le amiotonu.”—2 Peteru 3:13.

“Ua Oo Mai le Itu Aso o Lana Faamasinoga”!

14, 15. (a) O ā mea e aofia ai i “le itu aso” o le faamasinoga? (e) E faapefea ona tatou ‘matataʻu i le Atua ma avatu iā te ia le viiga’?

¹⁴ O le ā se mea tatou te faatalitalia e tupu a o tatou mataala? O loo taʻua i le tusi o Faaaliga, mea o le a tutupu faasolosolo a o faataunuu le finagalo o le Atua. Ina ia tatou nofo sauni, e matuā tāua ona utagia mea o loo taʻua i le Faaaliga. Ua faamatala mai i le valoaga mea e tutupu “i le aso o le Alii,” lea na amata ina ua avea Keriso ma tupu i le lagi i le 1914. (Faaaliga 1:10) Ua faailoa mai i le Faaaliga se agelu “ua iā te ia le tala lelei faavavau e folafola atu.” Ua alaga le agelu: “Ia outou matataʻu i le Atua, ma avatu iā te ia le viiga, auā ua oo mai le itu aso o lana faamasinoga.” (Faaaliga 14:6, 7) O le “itu aso” o le faamasinoga o se taimi puupuu, lea e aofia ai le faalauiloa atu ma le  faaooina mai o le faasalaga o loo taʻua i le valoaga. O le taimi tonu lenā o loo tatou ola ai.

¹⁵ Ua pulunaunauina i tatou a o leʻi iʻu le itu aso o le faamasinoga, ina ‘ia matataʻu i le Atua ma avatu iā te ia le viiga.’ E faapefea? E tatau ona tatou ʻinoʻino i le leaga ona o le mataʻu i le Atua. (Faataoto 8:13) O le a tatou faalogologo lelei i le Atua ona o lo tatou āva iā te ia. Po o le ā lava lo tatou pisi, ae tatou te toʻaʻaga e faitau le Tusi Paia. Tatou te lē manatu māmā i lana faatonuga e auai i sauniga faa-Kerisiano. (Eperu 10:24, 25) E tāua iā i tatou le faaeaga o le faalauiloaina o le tala lelei o le Malo o le Atua. Tatou te talaʻi ma le maelega. Tatou te faatuatua iā Ieova i aso uma ma o tatou loto atoa. (Salamo 62:8) Tatou te faaaloalo iā Ieova e ala i le gauaʻi i lana Pule Silisili ese, ona ua tatou iloa e Pule o ia i le aoao o mea. Po o e mataʻu moni i le Atua ma faapena ona e vivii atu iā te ia?

16. Aiseā e faapea atu ai ua faataunuu le Faaaliga 14:8 i le faamasinoga o Papelonia le aai tele?

¹⁶ Ua faamatala mai i le Faaaliga mataupu e 14, isi mea o le a tutupu i le itu aso o le faamasinoga. O loo taʻua muamua ai Papelonia le aai tele, po o lotu sesē uma: “Ona mulimuli atu ai lea o le tasi agelu, ua faapea atu, Ua paʻū, ua paʻū Papelonia o le aai tele.” (Faaaliga 14:8, LT) Ioe, ua paʻū Papelonia le aai tele i le silafaga a le Atua. Na faasaʻoloto auauna faauuina a Ieova i le 1919 mai le faapologaina ona o aʻoaʻoga ma tū a Papelonia, lea ua autausagā o talitonu i ai tagata. (Faaaliga 17:1, 15) O lea la, ua mafai ai ona latou matuā taulaʻi atu i le tapuaʻiga moni. O le taimi lenā na amata ai ona latou uaʻi atu i le talaʻia o le tala lelei o le Malo o le Atua i le atulaulau uma.—Mataio 24:14.

17. E faapefea ona tatou ō ese mai iā Papelonia le aai tele?

¹⁷ E lē na o le pau lenā o le faamasinoga a le Atua iā Papelonia le aai tele. Ua toe o se aga ona faaumatia atoatoa lea o ia. (Faaaliga 18:21) O le ala lea ua timaʻi mai ai le Tusi Paia i tagata uma lava: “Ia outou ō ese iā te ia [Papelonia le aai tele], ina neʻi faatasia outou i ana agasala.” (Faaaliga 18:4, 5) E faapefea ona tatou ō ese mai iā Papelonia le aai tele? E lē lava le lē toe auai i lotu sesē. O loo iai aafiaga a Papelonia i le tele o aso faamanatu ma tū o loo lauiloa i aso nei, aemaise le manatu māmā o tagata i feusuaʻiga lē mamā, ma le viiviia o faafiafiaga e iai faiga faataulāitu ma le tele o isi mea. Ina ia tumau i le mataala, e tāua ona faamaonia e ala i a tatou gaoioiga ma mea e moomoo i ai, ua tatou matuā vavae ese mai iā Papelonia le aai tele.

18. E tusa ai o le Faaaliga 14:9, 10, o le ā le mea e faautauta i ai Kerisiano o ē e mataala?

¹⁸ E iai foʻi se isi vala o ‘le itu aso o le faamasinoga,’ o loo taʻua i le Faaaliga 14:9, 10. Ua faapea mai se isi agelu: “Ai se tasi e ifo i le manu feʻai ma lona faatagata, ma talia le faailoga i lona muaulu po  o lona lima, e inu lava ia i le uaina o le toʻasā o le Atua.” Aiseā? Auā foʻi o le manu feʻai ma lona faatagata, ua fai ma faatusa o pulega a tagata o ē e lē amanaʻia le pule a Ieova. O Kerisiano o ē e mataala, e faautauta neʻi taaʻina pe faailogaina o latou uiga ma gaoioiga, ma avea ai i latou ma ē auauna i ē e teena le pule silisili ese a Ieova. Ua iloa e Kerisiano ua faatūina le Malo o le Atua i le lagi, lea o le a faaumatia pulega a tagata, a o ia e tumau e faavavau.—Tanielu 2:44.

Aua Neʻi Galo, ua Lata Mai le Iʻuga!

19, 20. (a) O ā mea e mautinoa o le a faia e Satani a o tatou matuā lalata atu i le iʻuga? (e) O ā mea ia tatou maumauaʻi e fai?

¹⁹ O le a matuā saputu mai omiga ma tofotofoga a o tatou matuā lalata atu i le iʻuga. Ona o o tatou tino augavale ma le lalolagi amioleaga o loo tatou nonofo ai, ua lutia ai i tatou i maʻi, le soifua matua, le maliu o sē e pele, o faalogona tigā, le faanoanoa ona o le lē talilelei mai i le talaʻiga ma le tele o isi faalavelave. Aua neʻi galo, o loo talotalo Satani ina ia tatou faavaivai, e ala i le lē toe talaʻi po o le solia foʻi o tulafono a le Atua, ona o le matuā saputu mai o puapuaga. (Efeso 6:11-13) Ioe, e lē o le taimi lenei e faavaivai ai auā ua lata tele mai le iʻuga!

²⁰ Na silafia e Iesu o le a tele faaosoosoga ina ia tatou faavaivai ai. O le ala lea na ia apoapoaʻi mai ai: “Ia outou mataala . . . auā tou te lē iloa po o lē fea aso e sau ai lo outou Alii.” (Mataio 24:42) I le ma lea, ia tatou mataala e tusa ai o aso o loo tatou ola ai. Ia tatou nofouta i togafiti a Satani e ono faavaivaia ai i tatou. Ia tatou maumauaʻi e talaʻi le tala lelei o le Malo o le Atua i se agaga aasa. Ia manatua ua lata tele mai le iʻuga, ma ia tatou utagia le lapataʻiga a Iesu: “Ia outou mataala.” O le faia faapea, o le a tatou viia ai Ieova ma o le a tatou tofo ai foʻi i faamanuiaga e oo i le faavavau.

O le ā Sau Tali?

• E faapefea ona tatou iloa o Kerisiano moni o loo patino i ai le lapataʻiga a Iesu ina ia “mataala”?

• O ā faaaʻoaʻoga o i le Tusi Paia e fai ma lapataʻiga mo i tatou ina ia “mataala”?

• O le ā le itu aso o le faamasinoga, ma o le ā le mea ua pulunaunauina i tatou e fai a o leʻi iʻu lenā aso?

[Fesili mo le Suʻesuʻega]

[Ata i le itulau 23]

Na faatusa e Iesu lona afio mai i le sau o se gaoi

[Ata i le itulau 24]

Ua lata mai le faaumatiaga o Papelonia le aai tele

[Ata i le itulau 25]

Ia tatou maumauaʻi e talaʻi le tala lelei i se agaga aasa