Pe E te “Mauʻoa i le Atua”?

E TELE talafaatusa lelei na fofogaina e Iesu Keriso, lea na aofia ai se talafaatusa i se tamāloa mauʻoa. Na fuafua lenei tamāloa e fai ni ona fale saito tetele auā sona lumanaʻi manuia. Ae ua taʻua le tamāloa o “le vale” i le talafaatusa a Iesu. (Luka 12:16-21) Aiseā ua fai ai lenā faamatalaga mamafa?

E aliali mai e leʻi ano lenei tamāloa mauʻoa i le Atua a o fai ana fuafuaga. E leʻi faafetai foʻi o ia i le Atua mo fua o le laueleele. (Mataio 5:45) Na gugutu o ia ma faapea ane: “Loʻu agaga e, ua iā te oe mea lelei e tele ua teuina mo tausaga e tele; inā nofonofo filemu ia, inā ʻai ia, ma inu ma ia e olioli.” Na manatu o ia o ana galuega e pei o se “pa maualuga” e saogalemu ai.—Faataoto 18:11.

A o tusi lana tusi, na lapataʻi mai Iakopo e uiga i le faamaualuga: “Faauta mai ia, outou o ē fai ane, ‘O le asō po o taeao tatou te ō atu ai i lea aai, po o le tasi aai, ma nonofo ai i le tausaga e tasi, ma faatau, ma maua ai oloa;’ a e lē iloa e outou se mea e tupu a taeao. Auā pe se ā lo outou ola? O le puao lava lea, ua aliali mai i se itu aso itiiti, ona mou ai lea.”—Iakopo 4:13, 14.

O le mea lenā na tupu, auā o le tala lenei na fai atu i le tamāloa mauʻoa: “O oe na le vale, e aamiina atu lou agaga nai iā te oe i le pō nanei; a e fai ma ai mea ia ua e saunia?” O le a oti le tamāloa a o leʻi taunuu ona moomooga, e pei o le puaoa o le a mou atu. Po o tatou iloa ea le manatu tāua? Na fetalai Iesu: “O loo faapea foʻi lē faaputu ʻoa iā te ia, a e lē mauʻoa i le Atua.” Ae faapefea oe, pe e te “mauʻoa i le Atua”?