Ia Loto Maulalo
Ia Loto Maulalo
“E te faaolaina ē ua loto maulalo.” —2 SAMUELU 22:28, NW.
1, 2. O le ā le mea e tutusa uma ai le toʻatele o pule o le lalolagi?
UA MOLIMAU piramita o Aikupito e uiga i tagata na pulea lenā atunuu. Ua iai foʻi nisi tagata taʻutaʻua, e pei o Sanerivi o Asuria, Alesana le Sili o Eleni ma Kaisara Iulio o Roma. E iai le mea e tasi ua lauiloa uma ai na tagata, e lē o ni tagata loto maulalo.—Mataio 20:25, 26.
2 Pe e te talitonu na saʻilia e se tasi o na pule e pei ona taʻua, tagata sa tigāina i o latou malo o ē na manaʻomia se faamāfanafanaga? E leai! E lē mafai foʻi ona e talitonu na latou ō atu i aiga puapuagatia ma faalaeiau iā i latou na. E matuā ese o latou uiga agaʻi i tagata ma uiga o le Pule silisili ese o le aoao o mea, o Ieova le Atua!
Faaaʻoaʻoga Sili o le Faamaulalo
3. E feagai faapefea le Pule silisili ese ma ona tagata?
3 E lē masuʻesuʻeina le silisili ese ma le maualuga o Ieova, ae ui i lea o ona fofoga “e fetaufetuliaʻi i le lalolagi uma, na te fesoasoani iā te i latou o ē ua sao o latou loto iā te ia.” (2 Nofoaiga a Tupu 16:9) O le ā le mea e faia e Ieova pe a ia silafia tagata tapuaʻi ua tigāina ona o tofotofoga eseese? E mafai ona faapea atu, o loo “nonofo” o ia faatasi ma i latou na e ala i lona agaga paia, e “faamāfanafana i ē ua loto maulalo, ma faamāfanafanaina loto o ē ua loto momomo.” (Isaia 57:15) O lea la, ua faamāfanafanaina ona tagata tapuaʻi ma ua sili atu ai ona faaauupegaina e auauna iā te Ia ma le olioli. E mataʻina le faamaulalo o le Atua!
4, 5. (a) Na faapefea ona manatu le faisalamo i le pulega a le Atua? (e) O le ā le uiga o le “faamaulalo” o le Atua ina ia fesoasoani i “tagatālautele”?
4 E leai se tasi i le aoao o mea na ia faamaulalo o ia lava e pei o le Alii silisili ese ina ia fesoasoani i tagata agasala. Na tusi le faisalamo: “Ua sili lava Ieova i luga o nuu ese uma lava, o lona mamalu ua sili i le lagi. O ai ea sē tusa ma Ieova lo tatou Atua, o lē faamaualugaina e ia lona afioaga? O lē faamaulaloina e ia ia ia e silasila mai i le lagi atoa ma le lalolagi. Na te faatulaʻiina mai le tagatālautele nai le efuefu, na te faaeaina lē ua mativa nai le faatāfuna.”—Salamo 113:4-7.
5 O Ieova e mamā ma paia ma e lē faamaualuga. (Mareko 7:22, 23) O le upu “faamaulalo,” e mafai ona uiga atu i le sau i lalo mai se tulaga mamalu pe sau i se tulaga maulalo ina ia feutagaʻi ma se tasi e faatauvaa. Maʻeu le talafeagai ona faailoa mai e le Salamo 113:6 o le tulaga faamaulalo o lo tatou Atua, i lona uaʻi mai i manaʻoga o ona tagata tapuaʻi lē lelei atoatoa!—2 Samuelu 22:36.
Le Māfuaaga o le Loto Maulalo o Iesu
6. O le ā le faaaʻoaʻoga sili o le faamaulalo o Ieova?
6 O le gaoioiga sili o le faamaulalo ma le alofa o le Atua, o le auina mai lea o lona Alo pele i le lalolagi ma soifua aʻe o se tagata ina ia maua ai e tagata le faaolataga. (Ioane 3:16) Na aʻoaʻo i tatou e Iesu i le upu moni e uiga i lona Tamā o i le lagi ma foaʻi mai lona soifua lelei atoatoa ina ia “aveesea le agasala a le lalolagi.” (Ioane 1:29; 18:37) Na lotomalie Iesu e fai le finagalo o le Atua, ma na matuā lelei ona ia faaatagiaina atu o lona Tamā e aofia ai ma le faamaulalo o Ieova. O le faaaʻoaʻoga sili lenā o le loto maulalo ma le alofa na faataatia e se tasi o atalii o le Atua. E leʻi talisapaia e tagata uma le loto maulalo o Iesu, na manatu ona fili iā te ia o le “tagata ua aupito faatauvaa.” (Tanielu 4:17) Ae ui i lea, na iloa e Paulo e tatau ona faaaʻoaʻo ona uso talitonu iā Iesu ma faamaulalo i a latou feutagaʻiga o le tasi ma le isi.—1 Korinito 11:1; Filipi 2:3, 4.
7, 8. (a) Na faapefea ona silafia e Iesu le faamaulalo? (e) O le ā le talosaga na faia e Iesu iā i latou o le a avea ma ona soo?
7 Na faamamafa e Paulo le faaaʻoaʻoga mataʻina a Iesu ina ua ia tusi: “Ia iā te outou foʻi lenei manatu o iā Keriso Iesu, o lē sa uiga faatasi ma le Atua, e leʻi manatu ia o se mea e uu mau lona tulaga tutusa ma le Atua; a ua sasaa atu o ia e ia lava, o fai mona le uiga o le pologa, i lona fanau mai faapei o tagata. A o iloa o ia i ona foliga e faapei o se tagata, ua faamaulalo o ia e ia lava, ua na anaana ua oo ina maliu, o le maliu lava lea i le satauro.”—Filipi 2:5-8.
8 E ono tomānatu nisi, ‘Na faapefea ona silafia e Iesu le faamaulalo?’ Na ia iloa lea uiga ona sa māfana la laʻua mafutaga ma lona Tamā i le lagi mo se vaitaimi e lē mailoa, ma na auauna ai o ia o le “tufuga” a le Atua i le faia o mea uma lava. (Faataoto 8:30) Ina ua mavae le fouvalega i Etena, na iloa ai e le ulumatua sa faamaulalo lona Tamā i ana feutagaʻiga ma tagata agasala. A o iai i le lalolagi, na faaatagia atu e Iesu le faamaulalo o lona Tamā ma na ia talosaga atu: “Ia outou amoina laʻu amo, ma ia outou faaaʻoaʻo iā te aʻu, auā o aʻu lē agamalu ma le loto maulalo; ona maua lea e outou o le mālōlōga mo outou agaga.”—Mataio 11:29; Ioane 14:9.
9. (a) O le ā se uiga lelei o tamaiti na fiafia i ai Iesu? (e) O le ā le lesona na aʻoaʻo atu e Iesu e ala i se tamaitiiti?
9 Talu ai na moni le faamaulalo o Iesu, na lē fefefe ai tamaiti e ō atu iā te ia, ma na latou tosina atu iā te ia. Na naunau o ia i tamaiti ma uaʻi atu iā i latou. (Mareko 10:13-16) O le ā se uiga o tamaiti na fiafia i ai Iesu? E mautinoa, sa iai uiga lelei o tamaiti e leʻi mafai ona faaalia i nisi taimi e nisi o soo o Iesu. O le tulaga masani lava e manatu tamaiti i tagata matutua e sili atu iā i latou. E te iloa lenei mea i le tele o a latou fesili ua fai. Ioe, pe a faatusatusa atu i le tele o tagata matutua, e faigofie ona aʻoaʻoina tamaiti ma e lē aafiagofie i uiga mimita. I se tasi o mea na tupu, na faatū ai e Iesu se tamaitiiti i luma o Ona soo ma fetalai atu: “E moni, ou te fai atu iā te outou, a lē liua outou, ma avea ia pei o tamaiti, tou te lē sao lava i le malo o le lagi.” Na faaauau ona ia fetalai atu: “O lenei o sē faamaulalo o ia iā te ia e pei o le tamaitiiti nei, e sili lea i le malo o le lagi.” (Mataio 18:3, 4) Na taʻua e Iesu le tulafono: “Auā so o sē faamaualuga e ia iā te ia, e faamaulaloina lea; a o lē faamaulalo e ia iā te ia, e faamaualugaina lea.”—Luka 14:11; 18:14; Mataio 23:12.
10. O ā fesili o le a tatou talanoaina?
10 Ua lāgā e lenei mea moni ni fesili tāua. E tāua tele le loto maulalo i lo tatou mauaina o le ola e faavavau. Peitaʻi, aiseā e faigatā ai i Kerisiano i nisi o taimi ona loto maulalo? Aiseā e faigatā ai iā i tatou ona tuu ese le mimitavale ma tali atu ai i faigatā ma tofotofoga ma le loto maulalo? O le ā se mea o le a fesoasoani iā i tatou ina ia tatou loto maulalo ai?—Iakopo 4:6, 10.
Le Māfuaaga e Faigatā ai Ona Loto Maulalo
11. Aiseā e lē o se mea e fou lo tatou tauivi ina ia loto maulalo?
11 E lē na o oe o e tauivi ina ia loto maulalo. I tuā i le 1920, na taʻua ai i se tasi o Olomatamata le fautuaga a le Tusi Paia i le loto maulalo: “Ua faalaeiauina i tatou o soo moni ina ia loto maulalo i aso taʻitasi, i le iloaina ua matuā faatāua e le Atua lenei uiga.” Ona sosoo mai lea ma lenei taʻutinoga: “E ui lava i nei apoapoaʻiga a le Tusi Paia e uiga i le loto maulalo, ae foliga mai o lenei uiga e aupito sili ona faigatā ona faatinoina e tagata o le Alii, ona o le tino augavale.” Ua faamatilatila e lenā manatu le māfuaaga e ao ai i Kerisiano moni ona tauivi ina ia loto maulalo, talu ai o faanaunauga agasala o le tino augavale, tatou te momoo ia viiviia tatou e isi. O le māfuaaga ona tatou te tupuga mai i le ulugalii na agasala, o Atamu ma Eva, o ē na lolo atu i faanaunauga manatu faapito.—Roma 5:12.
12, 13. (a) Ua avea faapefea le lalolagi ma toʻatugā i le loto maulalo o Kerisiano? (e) O ai ua ia faafaigatā la tatou tauiviga ina ia loto maulalo?
12 O se isi māfuaaga e ono faigatā ai ona tatou loto maulalo, ona o loo siʻomia i tatou e se lalolagi o loo uunaʻia tagata ina ia sili i isi. Ua taatele i lenei lalolagi ia sini e faananau mo le faamalieina o “le tuʻinanau o mata, ma le faalialia o lenei olaga.” (1 Ioane 2:16) E ao i soo o Iesu ona lelei o latou mata ma taulaʻi atu i le faia o le finagalo o le Atua, na i lo le lolo atu i faanaunauga o le lalolagi.—Mataio 6:22-24, 31-33; 1 Ioane 2:17.
13 O le māfuaaga lona tolu e faigatā ai ona faamaulalo, ona o loo pulea lenei lalolagi e lē na faapogaia le faamaualuga, o Satani le Tiapolo. (2 Korinito 4:4; 1 Timoteo 3:6) O loo faatupuina e Satani ona uiga leaga. O se faaaʻoaʻoga, na ia fia maua le tapuaʻiga mai iā Iesu e ala i le ofo atu iā te ia o “malo uma o le lalolagi ma o latou matagofie.” Talu ai na loto maulalo Iesu na ia teena ma le maumauaʻi le ofo a le Tiapolo. (Mataio 4:8, 10) E faapena foʻi ona tofotofoina e Satani Kerisiano ina ia latou saʻilia le viiga mai isi. Peitaʻi, ua tauivi Kerisiano loto maulalo e mulimuli i le faaaʻoaʻoga a Iesu, ma avatu le viiga i le Atua ma faamamaluina ai o ia.—Mareko 10:17, 18.
Le Auala e Faamaulalo Moni Ai
14. O le ā le uiga o le “fia faalalolalo”?
14 I lana tusi i tagata Kolose, na lapataʻi atu ai Paulo i le faafoliga e loto maulalo ina ia viiviia ai e tagata. Na faamatalaina e Paulo lenā mea o le “fia faalalolalo.” O ē e na ona faafoliga mai e loto maulalo, e lē o ni tagata faaleagaga i latou. Na i lo lea, e “faafefetefuaina” i latou ona o le mimita. (Kolose 2:18, 23, LT) Na faasino atu e Iesu i na faaaʻoaʻoga o le faafoliga e loto maulalo. Na ia taʻusalaina Faresaio i a latou tatalo faalialiavale ma anapopogi ma mata faanoanoa ina ia iloa ai e tagata. I sona eseesega, ina ia aogā a tatou lava tatalo i luma o le Atua, e ao ona faia ma le loto maulalo.—Mataio 6:5, 6, 16.
15. (a) O le ā le mea e ao ona tatou faia ina ia tausisia ai le loto maulalo? (e) O ā nisi o faaaʻoaʻoga lelei o le loto maulalo?
15 Ua mafai ona fesoasoani i Kerisiano ina ia tausisia le loto maulalo moni, e ala i le taulaʻi atu i faaaʻoaʻoga sili o le faamaulalo, o Ieova ma Iesu Keriso. O le faia faapea e aofia ai le suʻesuʻeina e lē aunoa o le Tusi Paia, ma lomiga faale-Tusi Paia ua saunia e le “auauna faamaoni ma le mafaufau.” (Mataio 24:45) E tāua tele na suʻesuʻega i ovasia Kerisiano, ina “neʻi faamaualugaina [o latou loto] i [o latou] uso.” (Teuteronome 17:19, 20; 1 Peteru 5:1-3) Ia mafaufau i le anoanoaʻi o faaaʻoaʻoga a i latou na tauia ona o le loto maulalo, e pei o Ruta, Hana, Elisapeta ma le toʻatele o isi. (Ruta 1:16, 17; 1 Samuelu 1:11, 20; Luka 1:41-43) Ia manatunatu foʻi i le tele o faaaʻoaʻoga lelei a tane lauiloa o ē na tausisia le loto maulalo i le auaunaga iā Ieova, e pei o Tavita, Iosia, Ioane le papatiso ma Paulo. (2 Nofoaiga a Tupu 34:1, 2, 19, 26-28; Salamo 131:1; Ioane 1:26, 27; 3:26-30; Galuega 21:20-26; 1 Korinito 15:9) Ae faapefea le tele o faaaʻoaʻoga i aso nei o le loto maulalo i le faapotopotoga Kerisiano? E ala i le manatunatu loloto i nei faaaʻoaʻoga, ua fesoasoani ai i Kerisiano moni ina ia “loto maulalo o le tasi i le tasi.”—1 Peteru 5:5.
16. Ua fesoasoani faapefea le faiva faa-Kerisiano iā i tatou ina ia loto maulalo?
16 O le auai pea i le faiva faa-Kerisiano e mafai foʻi ona fesoasoani iā i tatou ia loto maulalo ai. E mafai e le loto maulalo ona tatou taulau ai pe a talanoa atu i tagata tatou te tau atu i ai i le galuega talaʻi ma isi nofoaga. E matuā moni lenei mea aemaise lava pe a lē fiafia pe lē mafaufau mai le tagata e ona le fale i le feʻau o le Malo. E masani ona fesiligia o tatou talitonuga, ae e mafai ona fesoasoani le loto maulalo i Kerisiano e “tali atu ma le agamalu ma le ava.” (1 Peteru 3:15) Ua siitia atu auauna loto maulalo a le Atua i oganuu fou ma fesoasoani i tagata mai aganuu ma tulaga eseese. E ono tauivi ma le loto maulalo i latou na, ma le faigatā o le aʻoaʻoina o se gagana fou, ina ia fesoasoani ai i ē o loo latou mananaʻo e taʻu atu i ai le tala lelei. E faamālō atu iā i latou na!—Mataio 28:19, 20.
17. O ā tiute tauave faa-Kerisiano e moomia ai le loto maulalo?
17 E toʻatele ua latou faataunuuina tiute faa-Kerisiano ona o le loto maulalo, ua latou faamuamua manaʻoga o isi na i lo i latou lava. O se faaaʻoaʻoga, e manaʻomia e se tamā Kerisiano ona loto maulalo, ina ia faatulaga ese se taimi mai ona ia lava manaʻoga e sauniuni pe taʻitaʻia ai se suʻesuʻega aogā ma le fanau. E fesoasoani foʻi le loto maulalo i le fanau e ava ma usiusitai ai i o latou mātua, o ē e lē lelei atoatoa. (Efeso 6:1-4) O avā e iai tane e lē tapuaʻi faatasi e masani ona fesagaʻi ma tulaga e manaʻomia ai le loto maulalo, a o latou taumafai e maua a latou tane e ala i a latou “amio mamā ma le faaaloalo.” (1 Peteru 3:1, 2) A o tatou tausia manaʻoga o mātua ua mamaʻi ma ua matutua, e aogā foʻi le loto maulalo ma le alofa lē manatu faapito.—1 Timoteo 5:4.
E Foʻia Faafitauli Ona o le Loto Maulalo
18. E faapefea ona fesoasoani le loto maulalo iā i tatou e foʻia faafitauli?
18 O auauna uma lava a le Atua, e lē lelei atoatoa. (Iakopo 3:2) I nisi taimi, e tulaʻi mai ai ni feeseeseaʻiga po o le lē femalamalamaaʻi i ni Kerisiano se toʻalua. E ono iai se māfuaaga o le faitio o le tasi i le isi. E masani lava, e mafai ona foʻia na tulaga e ala i le faatatauina o le fautuaga lenei: “Ia fefaapalepaleaʻi, ma ia fefaamagaloaʻi outou, pe afai ua agaleagaina se tasi e se tasi; faapei ona faamagalo mai le Alii iā te outou, ia faapea foʻi outou.” (Kolose 3:13) E moni, e lē faigofie ona mulimuli i lenei fautuaga ae peitaʻi, o le a fesoasoani le loto maulalo i se tasi e faatatauina ai.
19. Afai tatou te talanoa atu i se tasi na faatigā iā i tatou, o le ā se mea e ao ona manatua?
19 I nisi taimi, e manatu se Kerisiano e lē mafai ona faagalo se mea matuiā a se tasi na fai iā te ia. O lea, o le a fesoasoani le loto maulalo iā te ia e talanoa atu i lenā tagata ina ia toe lelei lo laʻua va. (Mataio 18:15) I nisi taimi, o se tasi o māfuaaga e faaauau ai pea ona iai faafitauli i le va o Kerisiano, atonu o le faamaualuga o le isi po o i laʻua uma foʻi e faailoa atu o la sesē. I nisi taimi ua faia foʻi e lē o loo tausolomua e talanoa atu i le isi, i se tulaga fiaamiotonu ma faitio. I sona eseesega, e telē se aogā o le loto maulalo e foʻia ai feeseeseaʻiga.
20, 21. O le ā se tasi o fesoasoani sili ia loto maulalo ai?
20 O le laasaga autū e mafai ona loto maulalo ai se tasi, o le tatalo lea mo le fesoasoani a le Atua ma lona agaga. Ia aua neʻi galo, e “foaʻi mai e le Atua le alofa tunoa [e aofia ai lona agaga paia] i ē faamaulalo.” (Iakopo 4:6) O lea la, pe afai e iai se lua feeseeseaʻiga ma se uso talitonu, ia tatalo iā Ieova e fesoasoani iā te oe, ina ia faailoa atu ma le loto maulalo sau mea sesē matuiā pe itiiti foʻi ua māfua ai le faafitauli. Pe afai na agaleaga mai se isi iā te oe ae ua faapea mai ma le loto, “Faamalie atu ua ou sesē,” ia loto maulalo ma faamagalo atu. Pe afai e faigatā lou faia faapea, ia saʻili le fesoasoani a Ieova i le tatalo ina ia aveese so o se uiga faamaualuga o loo i lou loto.
21 O le malamalama i le tele o aogā e maua ona o le loto maulalo, e ao ona uunaʻia ai i tatou e maua ma tausisia lenei uiga tāua. I le faia faapea, maʻeu ni faaaʻoaʻoga matagofie ua tatou maua iā Ieova le Atua ma Iesu Keriso! Ia aua neʻi galo le faamautinoaga a le Atua: “O le taui o le faamaulalo ma le mataʻu iā Ieova, o le oloa lea, ma le viiga, ma le ola.”—Faataoto 22:4.
Manatu e Manatunatu Loloto Ai
• O ai faaaʻoaʻoga sili o le faamaulalo?
• Aiseā e faigatā ai ona loto maulalo?
• O ā nisi o faaaʻoaʻoga e fesoasoani iā i tatou e loto maulalo ai?
• Aiseā e tāua ai le tausisia o le loto maulalo?
[Fesili mo le Suʻesuʻega]
[Ata i le itulau 26]
Na faamaulalo moni lava Iesu
[Ata i le itulau 28]
Ua faalaeiauina e le lalolagi tagata ina ia taumafai e sili i isi
[Faamatalaga i Ata]
WHO photo by L. Almasi/K. Hemzǒ
[Ata i le itulau 29]
O le loto maulalo ua fesoasoani iā i tatou e talanoa atu i isi tagata i la tatou faiva
[Ata i le itulau 30]
E masani ona foʻia feeseeseaʻiga i le ufiufi ma le loto maulalo o le mataupu i le alofa
[Ata i le itulau 31]
E tele auala e faaalia ai e Kerisiano le loto maulalo