O Lē Fea Aʻoaʻoga E te Manuia Ai?

PE NA iai se taimi na lofitūina ai oe i faafitauli, ma e lagona ai e pei ua e lē iloa se mea o le a fai? Seʻi tomānatu i le mafatia e ono iʻu i ai pe a sesē le auala ua e taumafai e foʻia ai nisi o nei faafitauli! E leai se tasi e mafai ona ia foʻiaina ma le manuia faafitauli uma, ma faia ni faaiʻuga poto i taimi uma. O le māfuaaga lea e tāua ai aʻoaʻoga. O fea e te maua ai aʻoaʻoga e fesoasoani iā te oe e faafetaiaʻia ai ma le manuia faafitauli?

E faatāuaina e le toʻatele o talavou ma ē matutua aʻoaʻoga masani. Ua faapea mai nisi o le ʻaufaitofā, e latou te “matuā talitonu e lē mafai ona e mauaina se galuega lelei, pe a leai se faailoga mai se kolisi.” Peitaʻi, e lē o faamalieina nisi o manaʻoga o tagata i meafaitino ua maua. O se faaaʻoaʻoga, pe e mafai e aʻoaʻoga e maualuluga atu ona fesoasoani iā te oe, ina ia avea ai o se matua po o se uō lelei? O le mea moni, o tagata o loo viiviia ona ua ausiaina le poto, e ono faaalia uiga lē lelei, lē lelei le faiā ma le aiga, po o le pule foʻi i le soifua.

Ua saʻili atu nisi i lotu mo se taʻitaʻiga ma manatu i ai o se puna o aʻoaʻoga. Peitaʻi, ua latou faanoanoa ona e lē o maua ai se fesoasoani aogā e fesagaʻia ai faafitauli o le olaga. Ina ia faataʻitaʻia lenei manatu, ua faapea mai Emilia * mai Mexico: “I le 15 tausaga ua mavae, sa ou manatu ai e lē o toe umi se taimi ma te faatasi ai ma laʻu tane. Sa ma tauupu i taimi uma. Sa lē mafai ona ou taofia lana inu ʻava malosi. Sa masani ona ou tuua la ma fanau laiti i le fale na o i latou, ae ou alu e saʻili mai o ia. Sa ou matuā fiu lava. E tele taimi na ou alu ai i le lotu e saʻili mo se vaifofō. E ui na faitau mai le Tusi Paia i nisi taimi, ae e leai se fautuaga na faatatau patino i loʻu tulaga. E leʻi sau foʻi se tasi ma taʻu mai iā te aʻu le mea e tatau ona fai. Sa lē faamalieina aʻu i le tau na ona saofaʻi ma fai faafia ni tatalo i le lotu.” Ua faanoanoa nisi i le vaai atu i o latou faifeʻau e lē o faia ni faaaʻoaʻoga lelei i o latou olaga. O le iʻuga, ua toʻatele ua lē toe maufaatuatuaina lotu faapea o se puna o aʻoaʻoga, lea e manaʻomia ina ia taulau manuia ai.

O lea la, atonu e te fesili ifo iā te oe lava: “O lē fea aʻoaʻoga e tatau ona ou maua ina ia manuia ai loʻu olaga?” Pe e maua le tali o lenei fesili tāua i le faa-Kerisiano moni? O le a talanoaina nei fesili i le mataupu o sosoo mai.

[Faamatalaga pito i lalo]