“O i Latou o Ē Folau i Vaa i le Sami”

I LE faafeagai ma le uafu i le aai o Gloucester, i Massachusetts, i Amerika, o loo tū ai se maa faamanatu, o se faatagata apamemea o se tagata, o loo tū i le foeuli o se vaa, e pei o loo uli lona vaa e asa atu i se matagi malosi. Ua faamanatu ai i le faitau afe o tagata faifaiva o Gloucester e faapea, na maliliu i le sami. I le pito i lalo o le tulaga o le faatagata, o loo tusia ai upu o le Salamo 107:23, 24: “O i latou o ē folau i vaa i le sami, o ē fai galuega i le vasa tele; o i latou ia latou te vaaia galuega a le Alii, ma ona vavega e fai i le moana.”

O le fagogota i vaipanoa o le Atalani e tele ai iʻa, o se galuega e lamatia. I le faagasologa o tausaga, e 5,368 tane mai Gloucester, lea ua sili atu nei i le 30,000 lona faitau aofaʻi, ua iloa, na maliliu a o fagogota i le sami. Ua tusia foʻi i le maa faamanatu e faapea: “O nisi sa fememeaʻi i le ūū o matagi ma galu tetele, ona o le malolosi o matagi mai mātū i sasaʻe. O nisi na maliliu ona sa tafea ese se tamaʻi vaa mai le vaafaaola lea sa aveina i latou i le vaipanoa e fagogota ai. Sa fetoʻai nisi vaa ona o matagi, ma gogoto ai. A o isi na fetaui ma vaa tetele i le alāvaa.”

Ua avea le faatagata ma molimau i galuega fitā ma le mataʻutia na fesagaʻi ma na tagata faifaiva i le faagasologa o senituri. Seʻi manatu i loimata maligi ona o le faanoanoa i le maliliu o tane, tamā, o tuagane, ma fanau. Peitaʻi, e lē faagaloina e Ieova ia fafine ua oti a latou tane, o tamaiti mātuaoti, po o i latou na maliliu i le sami. Sa faasino atu Ioane i lenei mea o le a tupu i le lumanaʻi: “Ua avaʻe foʻi e le sami ē na oti sa i ai, ua avaʻe foʻi e le oti ma seoli ē na oti sa i ai.” (Faaaliga 20:13) I le toe tū, o le a vaai moni ai i latou na “folau i vaa i le sami” i “galuega a le Alii.”