Latou te Faailoa Atu le Tala Lelei i Ē Logonoa

“UA LATOU aumaia se tulaga faaleagaga i lenei nofoaga!” O le auala lenā na faamatalaina ai e le pule o se nofoaga mo tagata matutua, asiasiga a Molimau a Ieova i lenei nofoaga i Navalcarnero, Madrid i Sepania. Aiseā na ia faia ai lenei faamatalaga?

O nisi o tagata e nonofo i lenei nofoaga o le Rosas del Camino, e logonoa. Peitaʻi, talu ai na faia e Molimau ni taumafaiga e aʻoaʻo le gagana faa-Sepania mo ē Logonoa, ua mafai ai ona latou fesootaʻi ma nei tagata. Sa viiviia e le pule ia Molimau mo le faaavanoaina o lo latou taimi e aunoa ma se totogi, ina ia aʻoaʻo atu mataupu mai le Tusi Paia iā i latou ua lē atoa le malosi. Sa ia mātauina āuga lelei o le aʻoaʻoina o le tala lelei o le Malo i nei tagata. Na faapena foʻi ona matuā faatāuaina e i latou o ē pō le vaai ma ē logonoa asiasiga a Molimau.

O loo suʻesuʻe nei e Eulogio e pō lana vaai ma e logonoa le Tusi Paia ma Molimau a Ieova. I se tasi o aso, a o faia le suʻesuʻega, na alu atu ai se tamā matua ma tuu atu i le Molimau se solo na tusia e tagata matutua uma, o se faailoaga o lo latou loto faafetai. O le ulutala o le solo e faapea, “O le Avea o se Molimau.” Na faapea mai se tasi o vaega: “O i latou o ni tagata ua aʻoaʻoina lelei, o loo manuia o latou olaga, ma ua latou maua le poto mai iā Ieova. Ua latou feasiasiaʻi i aiga ona latou te faatuatua iā Ieova.”

O le faatuatua tonu lava lea iā Ieova ua māfua ai ona aʻoaʻoina e le toʻatele o Molimau i le lalolagi, le gagana a tagata logonoa o loo i o latou atunuu. I lenei auala ua latou faailoa atu ai iā i latou na, le feʻau manaia o le faamoemoe mo le lumanaʻi o loo i le Tusi Paia.