‘O Loʻu Fesoasoani e Mai iā Ieova Lea’

O le Alofa Lē Manatu Faapito e Maua ai Faamanuiaga a Ieova

SEʻI tomānatu i tala e tolu ia e iai mea e tutusa uma ai: E malaga se tamāloa i se uila vilivae i le vaomatua o Cameroon. Na te uia ni auala palapalā ma ni vaivai ma faafesagaʻia tulaga lamatia, mo le tele o itula ina ia faamalosia isi. E iva maila [15 kilomita] e savavali ai ni tama se toʻalua i Zimbabwe ma sopoʻia ni vaitafe tatafe malolosi, a o tuu o la ofu ma seevae i luga o o la ulu ina neʻi susū, ina ia aʻoaʻoina se vaega o tagata e nonofo i se nuu maotua. I se isi vaipanoa, e ala pō ai se fafine i le fā i le vaveao ina ia asia ma aʻoaʻo atu i se tamaʻitaʻi tausimaʻi, auā e na o le pau lea o le taimi e avanoa ai lenei tamaʻitaʻi.

O le ā le mea e tutusa uma ai nei tagata? O i latou uma o ni faifeʻau faataimi atoa o Molimau a Ieova, ma o loo latou aʻoaʻo atu le upu moni o le Tusi Paia i isi. E aofia ai ni paeonia sauatoa ma faapitoa, misionare, ovasia femalagaaʻi, ma le faitau afe o ē galulue tauofo i aiga Peteli i le lalolagi aoao. O se vala mataʻina o i latou uma, o lo latou alofa lē manatu faapito. *

Uunaʻiga Saʻo

Ua utagia e Molimau a Ieova le apoapoaʻiga a Paulo iā Timoteo: “Ia e taumafai ina ia avea oe ma lē ua fiafia mai i ai le Atua, o lē faigaluega e leai se mea e mā ai, na te talaʻitonuina le upu moni.” (2 Timoteo 2:15) Ae o le ā se mea ua uunaʻia ai le faitau afe o Molimau e auauna o ni faifeʻau faataimi atoa?

Pe a fesiligia auauna faataimi atoa i le māfuaaga ua latou finafinau ai i le auaunaga iā Ieova, e aofia ai i a latou tali le alofa mo le Atua ma tuaoi. (Mataio 22:37-39) E matuā talafeagai lenei mea, auā a aunoa ma le uunaʻiga a le alofa, o le a lē aogā uma na taumafaiga e tusa lava po o le ā le tele.—1 Korinito 13:1-3.

Auaunaga Lē Manatu Faapito

Ua talia e Kerisiano tuuina atu uma le valaau a Iesu: “Ai se tasi e fia mulimuli mai iā te aʻu, ia faafiti o ia iā te ia, ma ave lona satauro, i le mulimuli mai iā te aʻu.” (Mataio 16:24) O le faafitia o i tatou lava, o lona uiga o le lotomalilie lea e ola mo Ieova le Atua ma Iesu Keriso, ma usitaia a la faatonuga. Ona o lenei tulaga, o loo auauna ai le toʻatele ma le lē manatu faapito i le faiva faataimi atoa.

E toʻatele Molimau ua faia ni taumafaiga se tele ina ia faalautele atu la latou auaunaga iā Ieova. Seʻi tomānatu foʻi iā Júlia o se paeonia sauatoa i São Paulo, i Pasili. Ua ia faapea mai: “Na telefoni mai se uso Saina ma fesili mai iā te aʻu pe ou te lotomalie e aʻoaʻoina le gagana Saina. Talu ai ua ou matua, sa ou lē manatu ai e aʻoaʻoina se gagana fou. Ae ina ua mavae ni nai aso, sa ou taliaina loa lea galuega fitā. I le taimi lenei, ua mafai ona ou faia se taulimaga faale-Tusi Paia i le gagana Saina.”

 Ua lipotia mai e le ofisa o Molimau a Ieova i Peru e faapea: “I ni nai tausaga ua mavae atu, na siitia ai le faitau selau o paeonia sauatoa o ē na faaalia le lototele ma le alofa lē manatu faapito, i oganuu e leʻi tofiaina i ai ni faapotopotoga. Ua latou siitia atu i taulaga mamao ia e lē o i ai ni meafaitino faaonapōnei, ma tau lē maua ai foʻi ni avanoa faigaluega. Ua finagalo malilie nei uso ma tuafāfine, e faia soo se mea lava ina ia tutumau ai i o latou tofiga. Ae o le mea e sili ona tāua, o a latou galuega i le faiva, o se faamanuiaga lea i le tele o vaipanoa. Ua lipotia mai e ovasia femalagaaʻi e faapea, ua faatūina ni vaega fou ona o le fesoasoani a nei paeonia alolofa lē manatu faapito.”

O nisi Kerisiano ua tuu o latou soifua i se tulaga lamatia ina ia fesoasoani i uso talitonu. (Roma 16:3, 4) Ua lipotia mai e se ovasia femalagaaʻi i se vaipanoa o loo faia ai ni taua i Aferika: “A o leʻi ma taunuu atu i le poloka mulimuli o le auala i le va o fanua lea e iai tagata fouvale ma lea e pulea e le malo, sa siʻomia i maʻua ma laʻu avā e ni taʻitaʻi ʻau se toʻafā mai le ʻaufouvale ma o latou soātau, o ē na fia iloa po o ai i maʻua. A o latou siakiina o ma pepa faamaonia, sa latou iloa ai o loo ma nonofo i le fanua lea e pulea e le malo, ma na latou masalosalo ai loa. Na tuuaʻia aʻu faapea o se sipai. Na latou manatu ai loa o le a togi aʻu i se lua. Na ou faamatala atu o ma tulaga, ma mulimuli ane na latou tuu i maʻua e ō.” Maʻeu le loto faafetai o faapotopotoga, ona o le taunuu atu ma le manuia o lenei ulugalii alofa lē manatu faapito e asia i latou!

E ui i tulaga faigatā ua fesagaʻia e nei auauna faataimi atoa, ae ua faateleina pea lo latou faitau aofaʻi i le lalolagi aoao. (Isaia 6:8) Ua faatāuaina pea e lenei ʻaufaigaluega maelega le faaeaga e auauna iā Ieova. O le alofa lē manatu faapito lava lea e tasi, o loo viiaina ai e le faitau miliona o isi Ieova. Ua matuā faamanuiaina ai i latou e Ieova. (Faataoto 10:22) O le mautinoa i lana faamanuiaga ma lana lagolagosua, ua faaatagia ai e i latou manatu o le faisalamo o lē na pese: ‘O loʻu fesoasoani e mai iā Ieova lea.’—Salamo 121:2.

[Faamatalaga pito i lalo]

[Faamatalaga faaopoopo i le itulau 9]

“E fai taulaga ma le loto ou tagata i le aso o lou malosi.”—SALAMO 110:3

[Pusa i le itulau 8]

E FAAPELEPELE E IEOVA ANA AUAUNA MAELEGA

“Ia outou tumau, ma le lē faagaeetia, ia alualu lo outou faamalosi i le galuega a le Alii ma le lē aunoa, ina ua outou iloa e lē se mea faalēaogā lo outou tautigā i le Alii.”—1 Korinito 15:58.

“Auā e lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa.”—Eperu 6:10.