Amaketo—Po o se Iʻuga Mataʻutia o le Lalolagi?

AMAKETO! Po o le taʻua o lenei upu, e oso aʻe ai i lou mafaufau se faaumatiaga mataʻutia o mea uma, po o le susunuina foʻi o le lalolagi? Ua lauiloa i tagata uma ia Amaketo. Ua tele foʻi ina faaaogā e nisi lenei upu e faamatala ai le lumanaʻi mataʻutia mo tagata. Ua masani ona faaalia i ata tifaga, vaaiga mataʻutia e faatatau i se Amaketo o loo fotuaʻi mai. Ae ua lē manino i le toʻatele le uiga o le upu Amaketo. E ui i le tele o taofi eseese e tusa ai ma le uiga o le upu, ae o le tele o na taofi, e lē o ōgatusa ma mea o loo aʻoaʻo mai e le Tusi Paia, le puna o le upu Amaketo.

Talu ai o loo faafesootaʻia e le Tusi Paia ia Amaketo ma “le gataaga o le lalolagi,” pe e te lē ioe la e tāua tele lo tatou matuā malamalama i le uiga moni o le upu? (Mataio 24:3) E lē gata i lea, o se mea talafeagai ona tatou saʻili i le Afioga a le Atua, ina ia iloa le uiga o Amaketo, ma lona uiga mo oe, ma lou aiga.

O se saʻiliʻiliga faapena, o le a faaalia ai e faapea, na i lo o le aumaia o se iʻuga mataʻutia, o le a aumaia e Amaketo se amataga fiafia mo tagata o ē e naunau e soifua i se lalolagi fou amiotonu. O le a e fiafia i le mauaina o se malamalamaga manino e uiga i lenei mea moni tāua mai le Tusi Paia, a o e faitau i le uiga moni o Amaketo i le isi mataupu lea e sosoo mai.

[Pusa i le itulau 3]

O LE Ā SOU TAOFI E UIGA IĀ AMAKETO?

• O se taua mataʻutia faaniukilia

• O se faatamaʻiaga o le siʻosiʻomaga

• O se fetoʻaiga o se paneta ma le lalolagi

• O le faaumatiaina e le Atua o ē amioleaga