Ia Avea ma Faifeʻau Fetuutuunaʻi

“Ua avea aʻu ma mea uma mo tagata uma, ina ia iʻu lava ina ola nisi iā te aʻu.”—1 KORINITO 9:22.

1, 2. (a) O ā auala na manuia ai Paulo i lana auaunaga o se faifeʻau fetuutuunaʻi? (e) Na faapefea ona faamatalaina e Paulo lona manatu i lona tofiga?

NA MAFAI ona ia talanoa i tagata atamamai ma ē loto maulalo e fai faleʻie. Na ia faatalitonuina tagata aloaʻia o Roma ma tagata Ferukia e leʻi aʻoaʻoina. Na aogā ana tusitusiga i tagata Eleni o ē na talitonu i le tele o mea eseese ma tagata Iutaia e tasi le taulaʻiga o latou talitonuga. Sa lē mafaafitia ona manatu ma na pāʻia loto o tagata i ana faamatalaga ootia. Na ia talanoa i manatu e ioe faatasi i ai ina ia mafai ai ona faatuatua nisi iā Keriso.—Galuega 20:21.

² O loo tatou talanoa i le aposetolo o Paulo, ma e aunoa ma se masalosalo sa manuia o ia i lana auaunaga o se faifeʻau fetuutuunaʻi. (1 Timoteo 1:12) Na ia maua le faatonuga mai iā Iesu ina ia “momoli [le] igoa [o Iesu] i luma o nuu ese, ma tupu, ma le fanauga a Isaraelu.” (Galuega 9:15) O le ā lona manatu i lona tofiga? Na ia faalauiloa mai: “Ua avea aʻu ma mea uma mo tagata uma, ina ia iʻu lava ina ola nisi iā te aʻu. Ou te faia foʻi le mea nei ona o le tala lelei, ina ia tatou tofutofusia faatasi ma aʻu.” (1 Korinito 9:19-23, LT) O le ā se mea ua tatou aʻoaʻoina mai i le faaaʻoaʻoga a Paulo e fesoasoani ia fetuutuunaʻi ma taulau manuia ai i la tatou talaʻiga ma le aʻoaʻo atu?

Na Taulau Paulo i le Faafetaiaʻia o le Luʻi

3. O ā manatu o Paulo i Kerisiano a o leʻi liliuina o ia?

³ Pe na onosai ma magafagafa Paulo i lona olaga atoa ua tatau i ai le tofiga lea na tuuina atu iā te ia? E mautinoa e leai! O le mapo lotu na avea muamua ai Saulo (o le igoa muamua lea o Paulo) o sē e faasauā i soo o Keriso. A o tauleʻaleʻa o ia na ia ioe i le fasiotia o Setefano. Mulimuli ane, sa ia saʻilia ma le lē alofa Kerisiano. (Galuega 7:58; 8:1, 3; 1 Timoteo 1:13) Na mapugatamaʻi pea o ia i le “faamataʻu ma le fasioti i le au soo o le Alii.” E leʻi faamalieina o ia i le saʻilia o ē talitonu i na o Ierusalema, ae na oo atu lana saʻiliga ma le ita i le itu i mātū e oo atu lava i Tamaseko.—Galuega 9:1, 2.

4. O ā suiga sa tatau ona faia e Paulo ina ia faataunuu ai lona tofiga?

⁴ Atonu na manatu Paulo o le a faaleagaina le faa-Iutaia e lenei talitonuga fou, auā o le a faafefiloi talitonuga a nuu ese ma le faa-Iutaia, ma atonu o le māfuaaga lenā na matuā ita ai o ia i le Faa-Kerisiano. Ia manatua, sa avea muamua Paulo o se “faresaio,” ma o le uiga o lea igoa o se “tasi e vavae ese.” (Galuega 23:6) Seʻi manatu i le matuā faateʻia o Paulo ina ua ia iloa ua filifilia o ia e le Atua e talaʻia Keriso i tagata o Nuu Ese! (Galuega 22:14, 15; 26:16-18) Na teena e Faresaio le aai faatasi ma i latou na manatu i ai o ni tagata agasala! (Luka 7:36-39) E lē masalomia le matuā manaʻomia o ni taumafaiga ina ia toe suia ona manatu, ma ia talafeagai ma le finagalo o le Atua ina ia faaolaina tagata mai atunuu uma.—Kalatia 1:13-17.

5. E faapefea ona tatou faaaʻoaʻo iā Paulo i la tatou faiva?

⁵ Atonu e ao foʻi ona tatou faia lea lava mea. Pe a tatou feiloaʻi i tagata mai isi atunuu ma gagana eseese i la tatou oganuu, e tatau ona faia ni taumafaiga e iloilo o tatou uiga ma ia aua neʻi faailogaina tagata ona e ese o latou  lanu. (Efeso 4:22-24) E tusa pe tatou te iloa pe leai foʻi, ae ua taaʻina o tatou mafaufauga ona o o tatou aiga ma aʻoaʻoga. E mafai ai ona oo iā i tatou manatu ma uiga faailoga tagata ma lē fetuutuunaʻi ai. E ao ona aveese mai iā i tatou na uiga pe afai tatou te mananaʻo ia taulau manuia i le saʻilia ma le fesoasoani i ē e pei o ni mamoe. (Roma 15:7) O le mea lenā sa faia e le aposetolo o Paulo. Na ia taliaina le luʻi ina ia faalautele atu ai lana faiva. Na uunaʻia o ia e le alofa ma atiina aʻe tomai o le aʻoaʻo atu ia e aogā ona faaaʻoaʻo i ai. O le suʻesuʻeina o le faiva a le “aposetolo o nuu ese,” e faaalia ai na ia uaʻi atu, fetuutuunaʻi ma fesuisuiaʻi i lana talaʻiga ma lana aʻoaʻo atu i isi. *—Roma 11:13.

Sa Fetuunaʻi Atu Paulo i Tulaga na Tulaʻi Mai

6. Na faapefea ona uaʻi atu Paulo i talaaga o ē na ia talaʻi i ai, ma o le ā le iʻuga?

⁶ Na uaʻi atu Paulo i talitonuga ma talaaga o ē na ia talaʻi i ai. Ina ua talanoa atu i le tupu o Akeripa II, na faailoa atu e Paulo o le tupu, o se tasi e “silafia i tu ma suʻega uma lava o loo iā Iutaia.” Ona faaaogā lea ma le atamai e Paulo o lona iloa o talitonuga o Akeripa e talanoa ai ma ia i mataupu e silafia lelei e le tupu. O le manino ma le mautinoa o fefulisaʻiga a Paulo, na iʻu ina faapea mai ai Akeripa: “O se mea itiiti ona e faaliliuina lea o aʻu e fai ma Kerisiano.”—Galuega 26:2, 3, 27, 28, LT.

7. Na faapefea ona fetuutuunaʻi Paulo ina ua talaʻi atu i se motu o tagata i Lusa?

⁷ Na fetuutuunaʻi foʻi Paulo. Mātau le eseesega o lana faamatalaga ina ua ia taumafai e taofia le motu o tagata i le aai o Lusa mai le tapuaʻia o i laʻua ma Panapa e pei o ni atua. Sa manatu i tagata nei lea e tautatala i le gagana a Lukaonia, e leʻi lelei a latou aʻoaʻoga ma e talitonu i talitonuga faanuupō. E tusa ai ma le Galuega 14:14-18, na faasino atu e Paulo i le foafoaga  ma le tele o mea lelei e maua mai ai e faamaonia ai e sili ona lelei le Atua moni. Sa manino lana faamatalaga ma e foliga mai sa taofia ai tagata mai le ‘faia o taulaga’ iā i laʻua.

8. O ā auala na fetuutuunaʻi ai Paulo e ui i ona manatu malolosi i nisi taimi?

⁸ O le mea moni, e lē lelei atoatoa Paulo ma i nisi taimi sa malolosi ai ona manatu e uiga i nisi o mea. O se faaaʻoaʻoga, na faalumaina ma le lē tonu Paulo i se tasi aso, ma na ia tali atu i ni upu malolosi i se Iutaia e igoa iā Anania. Peitaʻi, ina ua taʻu atu iā Paulo na ia faifai e aunoa ma sona iloa i le faitaulaga sili, na vave lava ona ia faatoese. (Galuega 23:1-5) I Atenai, na tigā lona loto ina ua ia ‘matamata i le aai ua tumu i tupua.’ Peitaʻi, i lana lauga i le Areopako, e leʻi faaalia sona loto tigā. Na i lo lea, na ia talanoa atu i tagata Atenai i fono, ma fefulisaʻi i mea latou te malamalama ai e ala i le faasino atu i la latou fata faitaulaga “Mo le Atua e lē Iloa,” ma taʻua se tasi o a latou fatu pese.—Galuega 17:16-28.

9. Na faapefea ona fesuisuiaʻi Paulo ina ua ia feagai ma aofia eseese?

⁹ I le feagai ai ma aofia eseese, na fesuisuiaʻi ai e Paulo ana faamatalaga. Na ia amanaʻia aganuu ma le siʻomaga na taaʻina ai o latou mafaufauga. Ina ua ia tusi i Kerisiano i Roma, na ia iloa lelei na nonofo i latou i le laumua o le malo e sili ona malosi i lenā taimi. O se manatu tāua o le tusi a Paulo i Kerisiano i Roma e faapea, ua faalēaogāina le malosi o le agasala a Atamu lea e faaleagaina ai, i le mana o Keriso e togiola ai. Na ia talanoa i Kerisiano i Roma ma isi tagata i faaupuga na pāʻia ai o latou loto.—Roma 1:4; 5:14, 15.

10, 11. Na faapefea ona faafetaui atu e Paulo ana tala faatusa i lana ʻaufaalogologo? (Tagaʻi foʻi i le faaopoopoga pito i lalo.)

¹⁰ O le ā le mea na faia e Paulo ina ua ia manaʻo e faamatala upu moni loloto o le Tusi Paia i lana aofia? Na agavaa Paulo i le faaaogāina o tala faatusa e masani ai tagata ma faigofie ona malamalama ina ia faamanino ai ni manatu lavelave faaleagaga. O se faaaʻoaʻoga, na iloa e Paulo na masani lelei tagata Roma ma le tulaga o le nofo pologa po o le avea ma auauna i le malo o Roma. O le mea moni, o le toʻatele o tagata na ia tusi atu i ai atonu o ni pologa. O lea la, na faaaogā ai e Paulo se tala faatusa i le tulaga o auauna po o pologa e faamalosia ai lana faamatalaga i le filifiliga a se tasi e gauaʻi a lē i le agasala, o le amiotonu.—Roma 6:16-20.

¹¹ Ua taʻua i se tasi tusi: “I Roma, e mafai e lē ana le pologa po o le auauna ona faasaʻoloto o ia, po o le faatau foʻi e le pologa o lona saʻolotoga e ala i le totogi atu i lē ana o ia. Sa mafai foʻi ona maua le saʻolotoga pe a tuu atu i se atua e na te fai mo ia le pologa.” Sa mafai foʻi ona galue se pologa ua saʻoloto mo lona matai ma maua se totogi. E foliga mai na manatu Paulo i lenei faiga, ina ua ia tusi faatatau i lē fea matai e ao ona usiusitai i ai se tasi—o le agasala po o le amiotonu. Ua faasaʻolotoina Kerisiano i Roma mai le agasala ma o le Atua lea ua pulea i latou. Ua latou saʻoloto e auauna i le Atua, peitaʻi e mafai foʻi ona latou filifili e auauna i le agasala—lo latou matai muamua, pe a latou faanaunau i ai. O lenā tala faatusa faigofie e uiga i se mea na latou masani ai, na ono uunaʻia ai Kerisiano i Roma ina ia fesili ifo iā i latou lava, ‘O lē fea matai o oʻu auauna i ai?’ *

Aʻoaʻo Mai le Faaaʻoaʻoga a Paulo

12, 13. (a) O ā taumafaiga e manaʻomia i aso nei ina ia pāʻia ai loto o tagata eseese? (e) O le ā se mea ua e iloa e aogā pe a talaʻi i tagata e eseese o latou talaaga?

¹² I le pei o Paulo, e ao foʻi ona tatou uaʻi  atu, fetuutuunaʻi ma fesuisuiaʻi ina ia pāʻia loto o tagata eseese tatou te talanoa atu i ai. Ina ia fesoasoani iā i latou ia iloa le tala lelei, tatou te faanaunau e faia le mea e sili atu na i lo le na o le asia o i latou, momoli atu se feʻau lava saunia po o le tuu foʻi i ai o ni lomiga faale-Tusi Paia. E ao ona tatou taumafai e malamalama i o latou manaʻoga ma popolega, mea e fiafia ma lē fiafia i ai, mea e faafatuulu ai ma o latou manatu i talitonuga. E ui e manaʻomia ai le faautaga mamao ma taumafaiga, ae ua lotomalilie tagata talaʻi o le Malo i le lalolagi aoao e faia faapea. O se faaaʻoaʻoga, ua lipotia mai e le ofisa o le lālā o Molimau a Ieova i Hagakeri: “E amanaʻia e uso aganuu ma tū a tagata mai isi atunuu, ma latou te lē manatu e ao ona faamasani ia tagata mai fafo i aganuu a Hagakeri.” E taumafai Molimau i so o se vaipanoa e faia le mea lava lea e tasi.

¹³ I se tasi o atunuu i Sasaʻe Mamao, e manatu mamafa le toʻatele i le soifua mālōlōina, aʻoaʻoina o tamaiti ma aʻoaʻoga. E taumafai tagata talaʻi o le Malo i inā e faamatilatila na mataupu, na i lo le talanoa o mataupu e pei o le faaleagaina o le siʻosiʻomaga po o mataupu faigatā tau le va fealoaʻi. I se tulaga tutusa ua mātauina e tagata talaʻi i se aai tele i Amerika, e manatu mamafa tagata i la latou oganuu i mataupu e pei o faiga faapiʻopiʻo, le tele naʻuā o taavale i le auala tele ma solitulafono. Ua taulau Molimau i le talanoaina o nei mataupu e amata ai talanoaga faale-Tusi Paia. Ua faamautinoa e faiaʻoga agavaa, ua latou faalaeiau ma faamāfanafana atu e tusa lava po o ā mataupu latou te filifilia e talanoa ai. Ua latou faamamafa ai le aogā o le faatatauina o taʻiala o le Tusi Paia i le taimi nei ma le faamoemoe matagofie ua finagalo i ai le Atua mo le lumanaʻi.—Isaia 48:17, 18; 52:7.

14. Ia faamatala auala e mafai ona tatou fetuunaʻi ai i manaʻoga eseese ma tulaga o tagata.

¹⁴ E aogā foʻi le eseese o mea e talanoa ai i le faiva, talu ai e eseese aganuu a tagata, tulaga tau aʻoaʻoga ma talaaga faalelotu. O le talanoa atu i tagata e talitonu i le Atua ae lē o le Tusi Paia, e ese mai le talanoa atu iā i latou e talitonu e leai se Atua. O le a ese le taulimaga tatou te faaaogāina i se tasi e taliaina aʻoaʻoga a le Tusi Paia, ma se tasi e manatu e leaga tusi faalotu uma auā e faasesē ai. E manaʻomia ai foʻi le fetuutuunaʻi i le faafoeina o tulaga eseese tau aʻoaʻoga a tagata tatou te talanoa atu i ai. O faiaʻoga tomai latou te faaaogāina fefulisaʻiga ma faataʻitaʻiga talafeagai i tulaga e tulaʻi mai.—1 Ioane 5:20.

 Fesoasoani mo Faifeʻau Fou

15, 16. Aiseā e ao ai ona aʻoaʻoina faifeʻau fou i le faiva?

¹⁵ E leʻi manatu Paulo tau lava o le faaleleia o lana aʻoaʻo atu. Na ia silafia sa tatau ona aʻoaʻoina talavou, e pei o Timoteo ma Tito, ina ia avea ma faifeʻau agavaa. (2 Timoteo 2:2; 3:10, 14; Tito 1:4) I se tulaga faapena, ua iai se manaʻoga i aso nei mo le saunia ma le aʻoaʻoina o tagata i le faiva.

¹⁶ I le 1914, pe tusa ma le 5,000 tagata talaʻi sa iai i le lalolagi aoao, ae i aso nei, pe tusa ma le 5,000 tagata fou o loo papatisoina i vaiaso taʻitasi! (Isaia 54:2, 3; Galuega 11:21) Pe a amata ona auaufaatasi tagata fou ma le faapotopotoga Kerisiano ma ua mananaʻo e auai i le faiva, e tatau ona aʻoaʻoina ma faatonuina i latou i le faia o le galuega. (Kalatia 6:6) E tāua lo tatou faaaogāina o auala a lo tatou Matai o Iesu, ina ia aʻoaʻo ma faamasani soo i le faiva. *

17, 18. E faapefea ona tatou fesoasoani i ē fou ina ia mafai ona latou faia le talaʻiga?

¹⁷ E lē faapea na ona maua lava e Iesu o le motu o tagata ma fetalai atu i ona aposetolo e amata se talanoaga ma i latou. Na muamua ona ia faamamafa le tāua o le talaʻiga ma faalaeiau ia finafinau i le tatalo e faatatau i la latou faiva. Ona ia faia lea o ni faatulagaga se tolu: o le galulue taʻitoʻalua, se oganuu ua tofia i ai ma le feʻau. (Mataio 9:35-38; 10:5-7; Mareko 6:7; Luka 9:2, 6) E tatau foʻi ona tatou faia faapea. E tusa lava po o tatou fesoasoani i a tatou lava fanau, se tagata aʻoga fou, po o so o se tasi ua leva e leʻi toe talaʻi, e tāua ona faia se taumafaiga e saunia ai se fesoasoani i lenei auala.

¹⁸ E manaʻomia e tagata fou le tele o le fesoasoani ina ia mafai ona latou fai le galuega talaʻi. Pe e mafai ona e fesoasoani iā i latou e sauniunia ma faataʻitaʻi se taulimaga faigofie toe lelei? A o iai i le fanua, tuu atu se avanoa latou te vaavaai ai i lau faaaʻoaʻoga a o e faia le lua pe tolu fale. E mafai ona e mulimuli i le faaaʻoaʻoga a Kitiona, o lē na fai atu i ona tagata tau: “Ia outou vaavaai mai iā te aʻu, ma ia faaaʻoaʻo mai ai lava.” (Faamasino 7:17) Ona tuu lea iā te ia o le avanoa e faataʻitaʻi ai. Ia faamālō i ē fou mo a latou taumafaiga, ma afai e talafeagai ia ofo i ai ni fautuaga pupuu mo le faaleleia atili.

19. O le ā lou faanaunauga a o e taumafai e matuā faaiʻuina lau faiva?

¹⁹ Ina ia matuā ‘faaiʻuina la tatou faiva,’ ua tatou maumauaʻi e fetuutuunaʻi i a tatou talanoaga, ma tatou te mananaʻo e fesoasoani i faifeʻau fou e faia faapea. Pe a tatou manatunatu i le tāua o lo tatou sini—o le faaooina atu o le poto e uiga i le Atua lea e maua ai le faaolataga—tatou te mautinoa e aogā taumafaiga uma ina ia avea i tatou “ma mea uma mo tagata uma, ina ia iʻu lava ina ola nisi iā te [i tatou].”—2 Timoteo 4:5; 1 Korinito 9:22.

[Faamatalaga pito i lalo]

Pe E te Manatua?

• O ā auala e mafai ona tatou faataʻitaʻi ai iā Paulo i la tatou faiva?

• O ā suiga i o tatou manatu e ono manaʻomia?

• E faapefea ona tatou faalaeiau atu pea i le galuega talaʻi?

• O le ā le mea e manaʻomia e faifeʻau fou ina ia mafai ona fai le galuega talaʻi?

[Fesili mo le Suʻesuʻega]

[Faamatalaga faaopoopo i le itulau 29]

Na uaʻi atu Paulo, fetuutuunaʻi ma fesuisuiaʻi i lana talaʻiga ma le aʻoaʻo atu

[Faamatalaga faaopoopo i le itulau 31]

Na faia e Iesu ni faatulagaga se tolu: o le galulue taʻitoʻalua, se oganuu ua tofia i ai ma le feʻau

[Ata i le itulau 28]

Na taulau Paulo i le pāʻia o loto o tagata eseese e ala i le fetuutuunaʻi

[Ata i le itulau 30]

E manatu faifeʻau agavaa i talaaga tau aganuu a i latou o talaʻi atu i ai

[Ata i le itulau 31]

O faifeʻau fetuutuunaʻi e fesoasoani i ē fou e sauniuni mo le faiva