Aso Mālōlō—Po o le a Taulau ai ea Ou Moomooga?

“Sa faatulagaina e Peteru [le Sili] ni sauniuniga faapitoa o le Tausaga Fou, e faia i falesā uma lava iā Ianuari 1. E lē gata i lea, sa ia faatonuina foʻi e tatau ona teuteu pou o fale i lālā laau lanu meamata, ma ia faaalia e tagatānuu uma o Moscow lo latou ‘fiafia i le faamanuia leotetele’ lea e le tasi i le isi o le Tausaga Fou.”—Peter the Great—His Life and World.

O Ā MEA o loo e naunau i ai i nei aso mālōlō? Ua manatu tagata o le lalolagi aoao o loo taulaʻi atu lenei vaitau i le Kerisimasi, le aso ua latou manatu na fanau ai Keriso, ae o loo aofia ai foʻi ma le faamanatuina o le Tausaga Fou. O lea la e lē tasi se aso e mālōlō ai. Atonu e mālōlō uma ai mātua ma le fanau. O lea, e foliga mai o se taimi talafeagai mo aiga e faifai mea faatasi ai. Peitaʻi, ua faamamafa e nisi le “Kerisimasi,” ona latou te mananaʻo e viiviia Keriso i lenei taimi o le tausaga. Atonu foʻi la e te manatu o se aso sili ona tāua lenā.

E tusa pe ina ia viiviia ai Keriso, faifai mea faatasi ma le aiga, po o mea uma na, ae e faitau miliona tane, avā, ma fanau i le lalolagi aoao ua tatali atu ma le naunautaʻi i lenei taimi. Ae faapefea lenei tausaga? Po o le ā avea ea o se taimi faapitoa mo le aiga ma le Atua? Pe afai o le a auaufaatasi ai le aiga, po o le a taulau ai ea ou moomooga pe leai?

Ua mātauina e le toʻatele o ē o loo naunau i le itu faaletapuaʻiga o lenei vaitau, e masani lava ona faamanatuina e tagata le Kerisimasi ma le Tausaga Fou e aunoa ma le agaga o Keriso. E moni lava, ua avea o se taimi e na ona fetufaaʻi ai meaalofa, o se avanoa e fai ai ni patī lea e ono faaalia ai amioga e lē faamamaluina ai Keriso, po o se taimi e faatasitasi ai le aiga. O le tele o taimi, o nei faatasiga o loo aafia ai nisi i le soona aai tetele ma le inu tele i le ʻava malosi, ma faapogaia ai misa lea e iʻu ai i faiga sauā i le aiga. Atonu sa e mātauina lenā tulaga pe sa e aafia ai foʻi.

Afai e moni lea mea, e foliga mai la ua tau leai ni suiga talu mai le taimi o le tupu o Rusia, o Peteru le Sili lea na faamatalaina i le amataga. Talu ai lo latou lē fiafia i le tulaga lea ua iai nei, ua naunau le toʻatele ia avea nei aso mālōlō ma se taimi mo manatunatuga faaletapuaʻiga, ma auaufaatasiga lelei faaleaiga. Ua oo ina tauivi ai nisi mo se suiga, e faaaogā faaupuga e pei o le: o Iesu o le māfuaaga o le Kerisimasi. Ae pe e mafai moni ona faia se suiga? Pe e faamamaluina moni ai Keriso pe a iai se suiga? Pe e iai ni māfuaaga e suia ai manatu agaʻi i nei aso mālōlō?

Ina ia maua ni tali faamalieloto, seʻi o tatou tilofaʻia lenei mataupu e tusa ai ma manatu o tagata mai se tasi o atunuu, o ē e ao ona lotofaafetai i lenei taimi o le tausaga.