Fesoasoani i Tagata Saina i Mekisikō

“E TAGO atu . . . tagata e toʻatinoagafulu ai gagana uma o nuu ese; latou te tago atu lava i le pito ofu o le sa Iutā ma faapea atu, Tatou te ō ma outou; auā ua matou faalogo, o loo iā te outou le Atua.” (Sakaria 8:23) Ua taunuu lenei valoaga matagofie i le atulaulau uma. O loo piiama atu tagata mai “gagana uma o nuu ese” iā Isaraelu faaleagaga ina ia tapuaʻi i le Atua. E naunau tele Molimau a Ieova i le taunuuga o lenei valoaga. Ua aʻoaʻoina e le toʻatele o i latou se isi gagana, ona o le galuega talaʻi i le atulaulau uma.

O le mea tonu lenā o loo fai e Molimau a Ieova i Mekisikō. E pe tusa ma le 30,000 tagata e tautatala i le faa-Saina i Mekisikō. E toʻa 15 i latou na auai i le faamanatuga o le maliu o Keriso i le 2003 i le aai o Mekisikō. O i inā na iloa ai e Molimau a Ieova le toʻatele o tagata Saina e mafai ona talaʻi atu i ai. Ina ia maua la nisi e talaʻi atu i tagata Saina, na faia ai se aʻoga mo le tolu masina e aʻoaʻo ai Molimau a Ieova i Mekisikō e talaʻi atu i le gagana Saina. E toʻa 25 Molimau a Ieova na aʻoʻoga ai. Ina ua uma le aʻoga, na auai atu se tagata aloaʻia e tautala i le faa-Saina i le faauuga, e faaalia ai le tāua o le aʻoga i tagata Saina. Na ofo e se faalapotopotoga Saina i Mekisikō ni sikolasipi mo ni tagata e toʻatolu, e ō i atunuu mamao e faalelei ai la latou gagana Saina.

Na tele aogā o le aʻoga. Ina ua uma ona aʻoaʻoina ni faamatalaga pupuu, na amata loa ona talaʻi atu tagata aʻoga i le gagana Saina, i pisinisi i le aai o Mekisikō. E 21 suʻesuʻega faale-Tusi Paia na latou amataina. Na telē le fesoasoani na maua mai i le polosiua O le ā e Manaomia e le Atua Mai iā i Tatou? i le gagana Saina, lea e tusia i mataʻitusi Roma.

Na faapefea la ona fai e Molimau o ē na faatoʻā aʻoaʻoga i le aʻoga, suʻesuʻega faale-Tusi Paia i le gagana Saina? Na pau le tala na latou iloa muamua fai o le “Qing Du [faitau faamolemole],” ona faasino lea i se palakalafa ma le fesili. A uma ona faitau ma tali mai le tagata i le faa-Saina, ona latou faapea atu lea “Shei shei [Faafetai]” ma le “Hen Hao [Lelei tele].”

Na faapena ona amata le suʻesuʻega faale-Tusi Paia a se fafine e talitonu i le Tusi Paia. Ina ua uma le suʻesuʻega lona tolu, na fia iloa e le Molimau pe e malamalama moni le fafine i le suʻesuʻega. O lea, na ō faatasi ai  le Molimau ma se uso e tautala i le gagana Saina. Ina ua fai atu le uso i le fafine pe e iai sana fesili, na faapea mai le fafine: “Pe e tatau ona ou iloa aau pe a ou fia papatiso?”

E leʻi umi ae faavae loa se Suʻesuʻega Tautusi a le Faapotopotoga, lea na auai ai tagata e toʻa 9 e iloa faa-Saina, ma tagata Mekisikō e toʻa 23. O se tasi na auai o se fomaʻi Saina. Na maua e lea fomaʻi Le Olomatamata ma le Ala Mai! faa-Sepania mai lana tagata gasegase. Na iai se tasi na faaliliuina ni nai fuaiupu mo le fomaʻi ona e lē iloa faa-Sepania. Ina ua iloa e le fomaʻi e taulaʻi atu lenei mekasini i le Tusi Paia, na ia talosaga atu i le tagata gasegase pe e mafai ona maua ni ana lomiga Saina. O le mea lenā na tupu. Na faia foʻi fuafuaga e ala i le ofisa o Molimau a Ieova i Mekisikō, ina ia asiasi atu se Molimau e iloa faa-Saina i le fomaʻi. Na iai le Tusi Paia a le tinā o le fomaʻi i Saina, ma na fiafia le fomaʻi e faitau i ai. Ina ua fuafua le fomaʻi e siitia atu i Mekisikō, na fai i ai lona tinā e faitau pea i le Tusi Paia. O lea, na ia tatalo ai mo se tasi e fesoasoani iā te ia e iloa atili le Atua. Na ia faapea mai: “Ua tali e le Atua aʻu tatalo!”

Na auai foʻi se aiga Saina i le suʻesuʻega tautusi. Na nofo totogi i latou i le fale a se fafine Mekisikō na suʻesuʻeina le Tusi Paia ma Molimau a Ieova. E ui ina tau lē malamalama le aiga Saina i le faa-Sepania, ae na faalogologo pea i talanoaga faale-Tusi Paia. Mulimuli ane, na latou talosaga atu i le Molimau a Ieova, pe e iai ni ana lomiga Saina. Na sosoo ai ma le faia o la latou suʻesuʻega faale-Tusi Paia i le gagana Saina. E leʻi umi ae faapea mai loa le aiga ua latou fia talaʻi i tagata Saina, ma ua fia tuuina atu o latou ola iā Ieova.

E faigatā tele le aʻoaʻoina o le gagana Saina. Ae e pei ona taʻua i mea na tutupu, ua toʻatele tagata mai gagana eseese e aofia ai le gagana Saina, ua aʻoaʻoina le finagalo o Ieova i Mekisikō ma isi atunuu o le lalolagi, ona o le fesoasoani a Ieova.

[Ata i le itulau 17]

O le aʻoga i le gagana Saina i le aai o Mekisikō

[Ata i le itulau 18]

O loo faia e se Molimau a Ieova Mekisikō se suʻesuʻega faale-Tusi Paia i le faa-Saina

[Ata i le itulau 18]

Talaʻiga mai lea fale i lea fale i le gagana Saina i le aai o Mekisikō