O Ai E te Anaana i ai, o le Atua po o Tagata?

“E tusa ona sili o lo matou anaana i le Atua i lo matou anaana i tagata.”—GALUEGA 5:29.

1. (a) O le ā le mau autū o lenei suʻesuʻega? (e) Aiseā na puʻe faamalosi ai le ʻauaposetolo?

NA MATUĀ lotoa alii o le faamasinoga sili o Iutaia. Ua leai ni pagota, o aposetolo ia o Iesu Keriso o lē na faasala i le oti e le faamasinoga sili i vaiaso na muamua atu. Ua sauni alii faamasino e faasala ona aposetolo. Ae ina ua ō atu fitafita e aumai le ʻauaposetolo, e leai nisi o tuu mai i le falepuipui e ui ina mausalī le falepuipui. E leʻi leva lava ae iloa e fitafita, o loo iai aposetolo i le malumalu i Ierusalema e aʻoaʻo atu le nuu ma le lototele e uiga iā Iesu Keriso. O le māfuaaga tonu lenā na lafo ai i latou i le falepuipui! Ona ō atu lea o fitafita i le malumalu, ma puʻe faamalosi le ʻauaposetolo ma ave i le fale faamasino.—Galuega 5:17-27.

2. O le ā le faatonuga a se agelu i le ʻauaposetolo?

² Na faasaʻoloto e se agelu le ʻauaposetolo mai le falepuipui. Aiseā, pe ina ia sao ai mai sauāga? E leai. Na faasaʻolotoina i latou ina ia faalogo tagata o Ierusalema i le tala lelei iā Iesu Keriso. Na faatonu e le agelu le ʻauaposetolo ina ia “tautala atu i le nuu i upu uma lava o lenei olataga.” (Galuega 5:19, 20, LT) O lea la, ina ua ō atu fitafita i le malumalu, o loo talaʻi mai le ʻauaposetolo ona o le anaana i le faatonuga a le agelu.

3, 4. (a) O le ā le tali a Peteru ma Ioane ina ua faatonuina i laʻua e aua le toe talaʻi? (e) O le ā le tali a isi aposetolo?

 ³ I se taimi muamua atu, na tulaʻi ai ni ʻautalaʻi maelega e toʻalua o Peteru ma Ioane, i luma o le faamasino sili o Iosefa Kaiafa. O le mea lenā na faamanatu i ai e le faamasino sili, ina ua ia faapea atu: “Pe na matou lē matuā fai atu ea iā te outou ia soia le toe aʻoaʻo i lenā igoa [o Iesu]? Faauta foʻi, ua outou faatumu i Ierusalema i la outou aʻoaʻoga.” (Galuega 5:28) Na lē tatau ona faateʻia Kaiafa ina ua toe vaai atu iā Peteru ma Ioane i le fale faamasino. Ina ua faatonuina muamua i laʻua e aua le toe talaʻi, na la tali atu: “Pe tonu i luma o le Atua, ona ma faalogo iā te outou, a e ma te lē faalogo i le Atua, inā filifili ia outou. Auā ma te lē mafaia ona lē tautala i mea ua ma vaai i ai ma faalogo i ai.” E pei lava o le perofeta o Ieremia, na lē mafai e Peteru ma Ioane ona lē tautatala atu e uiga i lo la tofiga e talaʻi atu i isi.—Galuega 4:18-20; Ieremia 20:9.

⁴ O le taimi lenā na maua ai e aposetolo uma le avanoa e faailoa atu ai lo latou taofi, e faatatau i le faatonuga a le ʻaufaamasino. Na iai foʻi Peteru, Ioane ma le aposetolo fou o Matatia. (Galuega 1:21-26) Ina ua faatonuina i latou e aua le toe talaʻi, na latou tali atu ma le lototetele: “E tusa ona sili o lo matou anaana i le Atua i lo matou anaana i tagata.”—Galuega 5:29.

O Ai e Anaana i ai, o le Atua po o Tagata?

5, 6. Aiseā na lē anaana ai aposetolo i le faatonuga a alii faamasino?

⁵ Na anaana aposetolo i tulafono. E masani foʻi ona latou faalogo i faatonuga a alii faamasino. Peitaʻi, po o le ā lava le aloaʻia o se tagata, e lē iā te ia le pule e faatonu ai se isi tagata e solia se poloaʻiga a le Atua. O Ieova o le “Silisili ese i le lalolagi uma.” (Salamo 83:18) O ia e “faamasinoina le lalolagi uma.” O ia foʻi o le fai tulafono sili ma le Tupu e faavavau. I le silasila mai a le Atua, e lē saʻo taumafaiga a alii faamasino ina ia faalēaogā tulafono a le Atua.—Kenese 18:25; Isaia 33:22.

⁶ O le mea lenei ua iloa e tagata sili ona popoto i tulafono. O se faaaʻoaʻoga, na taʻua e le alii faamasino lauiloa mai Peretania i le senituri lona 18 e suafa iā William Blackstone, e lē tatau ona fai e tagata ni tulafono e feteenaʻi ma tulafono a le Tusi Paia. O lea la, na fia pule le fono a Iutaia ina ua latou faatonuina le ʻauaposetolo e aua le toe talaʻi. Na lē mafai ona anaana aposetolo i lenā faatonuga.

7. Aiseā na feita ai ositaulaga sili i le galuega talaʻi?

⁷ Na feita ositaulaga sili ona o le maumauaʻi o aposetolo e talaʻi. O nisi o ositaulaga na iai i le fono, o ni Satukaio o ē e lē talitonu i le toe tū, lea na aofia ai ma Kaiafa. (Galuega 4:1, 2; 5:17) Ae na tausisi pea le ʻauaposetolo i la latou mau e faapea, ua toe tū mai Iesu nai le oti. Na taumafai foʻi nisi ositaulaga sili e faamalie taʻitaʻi o le malo o Roma. Ina ua tuu atu e Pilato le avanoa e fai ai Iesu ma o latou tupu a o faagasolo le faamasinoga o Iesu, na alalaga atu ositaulaga sili: “E leai so matou tupu, na o Kaisara.” (Ioane 19:15) * Na taʻutino atu le ʻauaposetolo ua toe tū mai Iesu, ma na latou aʻoaʻo atu foʻi “e leai lava se isi igoa i lalo o le lagi ua foaʻiina mai i tagata, e mafaia ona faaolaina ai o i tatou” seʻi vaganā ai le suafa o Iesu. (Galuega 2:36; 4:12) Na popole ositaulaga neʻi talitonu tagata iā Iesu o lē ua toe tū, ma avea ai Iesu ma o latou taʻitaʻi, ona ō mai lea o le ʻau Roma ma ‘faaumatia la latou mea atoa foʻi ma lo latou nuu.’—Ioane 11:48.

8. O le ā le fautuaga poto a Kamalielu mo ē na iai i le fono?

 ⁸ E aliali mai e tele toʻatugā o le a fetaiaʻi ma aposetolo o Iesu Keriso. Na taupulepule alii faamasino o le fono e fasioti i latou. (Galuega 5:33) Ae na iai se suiga mataʻina na tupu. Na tulaʻi ane Kamalielu o lē e aʻoaʻo i le tulafono, ma lapataʻi ē na iai i le fono ina ia fai lelei sa latou filifiliga. O lana fautuaga poto lenei: “Afai ua tupu mai tagata lenā sauniga ma lenā galuega, e faaumatia ia; a e afai ua tupu mai le Atua, tou te lē mafai ona faaumatia.” Ona toe faapea atu lea o Kamalielu: “Ina neʻi iloa ua outou fai taua i le Atua lava.”—Galuega 5:34, 38, 39.

9. O le ā le mea na faamaonia ai e tupu mai le Atua le galuega a aposetolo?

⁹ O se mea e ofo ai, ona na talia e le ʻaufaamasino le fautuaga a Kamalielu. Na latou “aami foʻi le ʻau aposetolo, ua sasa iā te i latou, ma fai atu, ia soia le tautala i le igoa o Iesu; ona tuuina atu lea iā te i latou e ō.” Ae e leʻi fefefe aposetolo. Na i lo lea, na latou maumauaʻi e anaana i le faatonuga a le agelu e ō e talaʻi. Ina ua tatalaina i latou, “ua lē mapu foʻi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei o Iesu le Keriso.” (Galuega 5:40, 42) Na faamanuia Ieova iā i latou. E faapefea? “Ua tupu foʻi le afioga a le Atua; ua matuā faatoʻateleina le ʻau soo i Ierusalema.” O le isi mea e mataʻina ai, ona “ua anaana foʻi ositaulaga e toʻatele lava i le faatuatua.” (Galuega 6:7) Ai se tigā o loto o ositaulaga sili! Ioe, na faamaonia ai, e tupu mai le Atua le galuega a aposetolo!

E Lē Manuia Ē e Fai Taua i le Atua

10. Aiseā atonu na mautinoa ai Kaiafa i lona tofiga, ma aiseā na iʻuvale ai lona faatuatua i tagata?

¹⁰ Na tofia e pule o Roma ositaulaga sili Iutaia i le uluaʻi senituri. Na tofia Iosefa Kaiafa o sē mauʻoa e Valerusi Karatusi, ma na umi ona avea o ia ma ositaulaga sili pe a fua i ē na muamua atu iā te ia. Atonu na manatu Kaiafa e ala ona umi ona ia umia lenei tofiga,  ona o lona poto i mataupu faaupufai ma le lelei o la laʻua mafutaga ma Pilato, ae e lē faapea o le fesoasoani mai a le Atua. Ae na iʻuvale lona faatuatua i tagata. Ina ua mavae tausaga e tolu talu ona tulaʻi aposetolo i luma o le fono, e leʻi toe fiafia pule o Roma iā Kaiafa ma aveesea ai lona tofi o se ositaulaga sili.

11. O le ā le mea na tupu iā Ponotio Pilato ma le faiga o mea faa-Iutaia, ma o le ā sou taofi i lenā mea?

¹¹ O le kovana Suria o Lukio Vitelu, o lē na maualuga atu iā Pilato, o ia lenā na faatonuina le aveesea o le tofi o Kaiafa. E leʻi mafai e Pilato le uō vavalalata a Kaiafa, ona suia lenā faatonuga. Ina ua atoa le tausaga talu ona aveesea le tofi o Kaiafa, na aveesea foʻi le tofi o Pilato ma amia o ia i Roma e tali atu i ni moliaga matuiā faasaga iā te ia. O taʻitaʻi Iutaia o ē na faatuatua iā Kaisara, na ‘faaumatia a latou mea ma lo latou nuu’ e Roma. Na tupu lenā mea i le 70 T.A. ina ua faatamaʻia e ʻautau Roma le aai o Ierusalema, e aofia ai le malumalu ma le maota fono. Ioe, ua moni ai upu a le faisalamo: “Aua tou te faatuatua i alii, po o le fanau a tagata, e lē o i ai se olataga”!—Ioane 11:48; Salamo 146:3.

12. E faapefea ona faamaonia o se gaoioiga poto le usiusitai i le Atua pe a fua i le soifuaga o Iesu?

¹² Ua tofia e le Atua Iesu Keriso o lē ua toe tū mai, e fai ma Ositaulaga Sili i le malumalu sili faaleagaga. E leai se tagata e mafai ona aveesea lenā tofiga. Ua tauaao e Iesu le “faiva o ositaulaga e tumau pea.” (Eperu 2:9; 7:17, 24; 9:11) Ua tofia foʻi e le Atua Iesu e fai ma Faamasino i ē ola ma ē ua oti. (1 Peteru 4:5) Ona o lea, e pule Iesu pe e toe tutū mai Iosefa Kaiafa ma Ponotio Pilato.—Mataio 23:33; Galuega 24:15.

O Ē Lototetele e Talaʻi le Malo i Ona Pō Nei

13. O ā galuega na tupu mai i tagata, ma o ā galuega na tupu mai i le Atua i ona pō nei? E faapefea ona e iloa lenā mea?

¹³ E pei o le uluaʻi senituri, ua toʻatele foʻi ē e “fai taua i le Atua” i ona pō nei. (Galuega 5:39) O se faaaʻoaʻoga, na tautō Hitila e faaumatia Molimau a Ieova i Siamani ona o le lē fāʻalo iā te ia. (Mataio 23:10) E foliga mai na matuā faaauupegaina Hitila ma ana ʻau e faaumatia Molimau a Ieova. Na aoaoina e ʻau a Hitila le faitau afe o Molimau a Ieova ma auina atu i latou i nofoaga o faasalaga mamafa. Na iʻu ina latou fasiotia nisi o Molimau a Ieova. Peitaʻi ane, e leʻi mafai e ʻau a Hitila ona gausia le faamaoni o Molimau a Ieova e tapuaʻi tau lava o le Atua. E leʻi mafai foʻi ona latou faaumatia uma Molimau a Ieova. Na tupu mai i le Atua galuega a nei Kerisiano ae lē o tagata, ma e lē mafai ona faaumatia galuega a le Atua. O tagata faamaoni o ē na sao mai i nofoaga o faasalaga mamafa a Hitila, o loo faaauau pea e oo mai i le asō ona latou auauna iā Ieova ma le ‘loto atoa, agaga atoa, ma le manatu atoa.’ Peitaʻi, ua atoa nei le 60 tausaga talu ona oti Hitila ma lepetia ai lana vaega o le ʻau Nasi.—Mataio 22:37.

14. (a) O ā mea ua faia e tagata tetee e tau faaleaga ai i auauna a le Atua, ma o ā ni iʻuga? (e) Pe e iai ea ni aafiaga tumau i tagata o le Atua ona o nei mea? (Eperu 13:5, 6)

¹⁴ O loo faaauau ona fai taua tagata iā Ieova ma ana auauna talu mai ona pō o Hitila.  I nisi o atunuu i Europa, ua faufau ai lotu ma malo ina ia faaigoa Molimau a Ieova o se ‘lotu mavae e mataʻutia.’ O le tuuaʻiga foʻi lenā na fai i Kerisiano o le uluaʻi senituri. (Galuega 28:22) O le mea moni, ua amanaʻia e le Faamasinoga o Aiā Tatau i Europa e faapea, o Molimau a Ieova o se lotu fai mea maopoopo ae e lē o se lotu mavae. E lē taumatea ua iloa e tagata tetee lenā mea. Ae ua faaauau pea ona latou fai upuleaga i Molimau a Ieova. Ona o nei tala tau faaleaga, ua vāea ai nisi o Kerisiano mai a latou galuega. Ua faileaga fanau a Molimau a Ieova i aʻoga. Ona o le mataʻu i tagata, ua soloia ai e tagata e ana falemautotogi, maliega o a latou fale ua loa tausaga o fai ai sauniga a Molimau. E iai taimi ua teena ai e le malo talosaga a tagata e avea ma sitiseni, ona o i latou o Molimau a Ieova! Ae e lē faavaivai ai Molimau a Ieova.

15, 16. O le ā se tali a Molimau a Ieova i Falani i teteega i la latou galuega talaʻi, ma aiseā e faaauau ai ona latou talaʻi?

¹⁵ O se faaaʻoaʻoga, e masani ona fetuutuunaʻi ma lelei tagata i Falani. Ae ua iai tagata tetee ua latou faatūina ni tulafono e fuafua e taofi ai le galuega talaʻi. O le ā se tali a Molimau a Ieova i Falani? Ua atili ai ona latou toʻaʻaga e talaʻi, ma maua ai ni iʻuga mataʻina. (Iakopo 4:7) O se mea e ofo ai, na faateleina i le 33 pasene le aofaʻi o suʻesuʻega faale-Tusi Paia i se tasi masina i Falani! E lē taumatea o loo lilivau le Tiapolo i le vaavaai mai o talia e tagata lotofiafia le tala lelei i Falani. (Faaaliga 12:17) O loo mautinoa e o tatou uso Kerisiano i Falani, o le a taunuu upu a Isaia: “O auupega uma e faia e tau ma oe e lē manuia ia; o laulaufaiva uma e finau atu iā te oe i le faamasinoga e te faasalaina ia.”—Isaia 54:17.

¹⁶ E tigā Molimau a Ieova i le sauāina o i latou. Ae ui i lea, e lē mafai ona latou lē tautatala i mea ua latou faalogo i ai, ona o le anaana i le faatonuga a le Atua i Kerisiano uma. E taumafai e avea i latou ma tagatānuu lelei. Ae e sili atu lo latou anaana i le Atua pe a feteenaʻi tulafono a le Atua ma tulafono a tagata.

Aua le Fefefe

17. (a) Aiseā e lē tatau ai ona fefefe i ē feitai mai iā i tatou? (e) O le ā so tatou manatu e ao ona iai i ē e sauā mai?

¹⁷ E mataʻutia le tulaga o ē feitai mai iā i tatou, ona o loo latou fai taua i le Atua. Aua neʻi o tatou fefefe iā i latou, ae ia tatou tatalo mo ē e sauā mai iā i tatou, ona o le poloaʻiga lenā a Iesu. (Mataio 5:44) Afai o iai nisi e tetee i le Atua ma lo latou lē iloa e pei o Saulo o Taso, tatou te tatalo o le a faapupula e Ieova o latou fofoga i le upu moni. (2 Korinito 4:4) Na avea Saulo ma aposetolo o Paulo, ma na matuā puapuagatia o ia i sauāga mai taʻitaʻi o le malo i na ona pō. Peitaʻi, na ia faamanatu atu pea i uso talitonu ina ia “usiusitai i alii sili ma faipule, ia gauaʻi, ia nofo sauniuni foʻi i latou i galuega lelei uma lava, aua neʻi upu leaga i se tasi [e aofia ai tagata matuā tetee], aua neʻi faamisa, a ia faapalepale, ma ia faaali atu le agamalu uma i tagata uma lava.” (Tito 3:1, 2) O loo taumafai Molimau a Ieova i Falani atoa foʻi ma isi atunuu, ina ia mulimuli i lenei fautuaga.

18. (a) O ā auala e ono laveaʻi ai e Ieova ona tagata? (e) O le ā le mea o le a oo i ai?

 ¹⁸ Na fetalai atu le Atua iā Ieremia: “Ou te iā te oe e laveaʻi iā te oe.” (Ieremia 1:8) E faapefea ona laveaʻi i tatou e Ieova mai sauāga i aso nei? Atonu na te faaaogāina se faamasino e iai le utaga mamao e pei o Kamalielu. Pe e na te faamautinoa ua aveesea se tagata piʻopiʻo ma tetee o le malo ae sui atu i se tagata e loloto le tofā. Peitaʻi, e iai taimi e lē taofia ai e Ieova sauāga e oo i ona tagata. (2 Timoteo 3:12) Afai e lē taofia e le Atua sauāga, e na te foaʻi maia le malosi ina ia tatou lavā tatali na sauāga. (1 Korinito 10:13) E tusa lava pe e lē taofia e le Atua sauāga, ae tatou te lē faaluafesasi i le mea o le a oo i ai: O ē fai taua i tagata o le Atua o loo latou fai taua i le Atua, ma e lē taulau ē o fai taua i le Atua.

19. O le ā le mau o le tausaga 2006, ma aiseā e talafeagai ai?

¹⁹ Na fetalai Iesu i ona soo o le a oo puapuaga iā i latou. (Ioane 16:33) O le ala lea ua matuā talafeagai ai upu o loo i le Galuega 5:29: ‘Ia anaana i le Atua i lo tagata.’ Ona o lea, ua filifilia ai lenei mau faamāfanafanaloto e fai ma mau o le tausaga 2006 mo Molimau a Ieova. Ia tatou filifili i lenei tausaga seʻia oo i le faavavau, e anaana i le Atua po o ā lava mea e tulaʻi mai!

[Faamatalaga pito i lalo]

O le ā Sau Tali?

• O le ā se faaaʻoaʻoga lelei na fai e aposetolo mo i tatou a o latou fetaiaʻi ma teteega?

• Aiseā e tatau ai ona sili lo tatou anaana i le Atua i lo tagata?

• O ai o loo fai taua i ai ē e tetee mai iā i tatou?

• O le ā le mea o le a oo iā i latou e lavā tatali sauāga?

[Fesili mo le Suʻesuʻega]

[Faamatalaga faaopoopo i le itulau 23]

O le mau o le tausaga 2006: ‘Ia anaana i le Atua i lo tagata.’—Galuega 5:29

[Ata i le itulau 19]

“E tusa ona sili o lo matou anaana i le Atua i lo matou anaana i tagata”

[Ata i le itulau 21]

Na faatuatua Kaiafa i tagata ae lē o le Atua