“Talaʻi le Saʻolotoga i le Tafeaga”

I LE amataga o le faiva a Iesu, na ia folafola atu ai faapea, o se vaega o lana feʻau ia “talaʻi le saʻolotoga i le tafeaga.” (Luka 4:18) I le mulimuli atu i le faaaʻoaʻoga a lo latou Matai, ua talaʻia ai e Kerisiano moni le tala lelei o le Malo i “tagata uma lava,” faasaʻoloto i latou mai le saisaitia faaleagaga, ma fesoasoani e faaleleia o latou olaga.—1 Timoteo 2:4.

Ua aofia i le galuega i aso nei le talaʻi atu iā i latou o loo saisaitia moni lava—i latou o loo faafalepuipuiina ona o solitulafono eseese na fai, ma ua latou talisapaia se saʻolotoga faaleagaga. Ia alo mai ma le fiafia, ae seʻi fai atu se lipoti e faalaeiauina ai e faatatau i le talaʻiga o loo faia e Molimau a Ieova, i le falepuipui i Ukraine, ma isi vaega o Europa.

Suia Mai Fualaau Faasāina i le Avea ma Kerisiano

E 38 tausaga o le olaga o Serhii, * ae o le 20 tausaga na faaalu i le falepuipui. E uma lava ona tausaga aʻoga o iai lava i le falepuipui. Ua ia faapea mai: “I tausaga ua mavae, sa ou falepuipui ai ona o le fasioti tagata, ma o loo totoe pea tausaga ou te falepuipui ai. Na ou faia amioga sauā i le falepuipui, ma e matuā fefefe lava isi pagota iā te aʻu.” Pe na ia lagona ai ea le saʻoloto ona o le faia faapea? E leai. Sa pulea le olaga o Serhii mo le tele o tausaga e fualaau faasāina, ʻava malosi, ma le faaaogāina o le tapaa.

Sa talaʻi atu se tasi o pagota iā te ia e faatatau i upu moni o le Tusi Paia. Sa pei lenā o se malamalama ua susulu mai i se mea pogisa. I ni nai masina, ae taofia loa e ia le faaaogāina o fualaau faasāina, avea o ia ma se tagata talaʻi o le tala lelei, ma papatiso ai loa. Ua ola nei Serhii i se olaga pisi i le falepuipui e auauna o se faifeʻau faataimi atoa a Ieova. Ua mafai ona ia fesoasoani atu i pagota e toʻafitu e suia o latou olaga ma avea ma ona uso faaleagaga i le falepuipui. Ua magalo le toʻaono, ae o loo iai pea Serhii i le falepuipui. E lē o faanoanoa o ia i lenei mea ona o loo fiafia, o loo mafai ona ia fesoasoani atu i isi ina ia maua se saʻolotoga mai saisaitiaga faaleagaga.—Galuega 20:35.

O se tasi o tagata aʻoga a Serhii i le falepuipui o Victor, o ia o se tagata sa faatauina atu fualaau faasāina, ma pulea e fualaau. Ina ua magalo mai le falepuipui, sa faaauau pea ona faia e Victor se agaʻigaʻi i luma faaleagaga ma oo ai lava ina faauu mai le Aʻoga mo Toleniga i le Faiva i Ukraine. O loo auauna nei o ia o se  faifeʻau paeonia faapito i Moldova. Ua faapea mai Victor: “Sa amata ona ou ulaula i le 8 o oʻu tausaga, faaaogāsesē le ʻava malosi i le 12 o oʻu tausaga, ma i le 14 o oʻu tausaga ua ou faaaogāina fualaau faasāina. Sa ou manaʻo e suia loʻu olaga, ae sa lē taulau aʻu taumafaiga uma. O lea i le 1995, i le taimi lava na ma mafaufau ai ma laʻu avā e ma te ō ese mai aʻu aumea leaga, ae fasiotia loa o ia e se tagata e maua i se ituaiga o maʻi faalemafaufau (homicidal maniac) lea e pau lava le mea e manaʻo ai o le fasioti o tagata. Sa matuā pagātia lava loʻu olaga. ‘O fea o iai nei si aʻu avā? O le ā e tupu pe a oti se tagata?’ Sa ou tuufesili pea ae lē maua lava se tali. Sa atili ai ona ou faaaogā fualaau faasāina ina ia tau faateʻa ai loʻu faavauvau. Sa puʻea aʻu ona o le faatauina atu o fualaau faasāina, ma faafalepuipui ai mo le lima tausaga. O inā na fesoasoani mai ai Serhii i le mauaina o tali i aʻu fesili. Sa ou taumafai i le tele o taimi e tuu fualaau faasāina, o lea la ua ou mafaia nei, ona o le fesoasoani mai le Tusi Paia. E ese le malosi o le Afioga a le Atua!”—Eperu 4:12.

Suia Tagata Solitulafono Faauamaaa

O Vasyl e na te lē faaaogāina ni fualaau faasāina, ae e leʻi saʻoloto o ia mai le nofo saisaitia. Na ia faamatalaina faapea: “Sa pulea aʻu e le ituaiga o fusuaga lea e faataga ai le tuʻi ma le kiki (kickboxing). Sa ou aʻoaʻoina lava e aʻu aʻu i le auala e tuʻi ai le tagata e aunoa ma le iloa o ni totoulia i o latou tino.” Sa faaaogā e Vasyl ana auala sauā e faoa ai mea a tagata. “Na ou falepuipui faatolu, lea na oo ai ina tatala e laʻu avā la ma faaipoipoga. I le lima tausaga mulimuli o loʻu faasalaga, na oo ina ou masani lelei ai i lomiga a Molimau a Ieova. Na uunaʻia ai aʻu e faitau le Tusi Paia, ae sa ou aafia pea i le mea o loo oʻu fiafia tele i ai—fusuaga e faataga ai le tuʻi ma le kiki.

“Ina ua mavae le ono masina o faitauina le Tusi Paia, ae iai loa se mea na suia ai loʻu olaga. O le manumalo i se fusuaga sa lē toe aumaia ai iā te aʻu le faamalieina lea sa ou mauaina muamua. O lea sa amata ai loa ona ou toe iloiloina loʻu olaga e tusa ai ma le Isaia 2:4 ma ou iloa ai, seʻi vaganā ua suia loʻu mafaufau, e faaalu lava loʻu olaga atoa o loo totoe i le falepuipui. Sa ou lafoaʻia mea sa ou faaaogāina i laʻu taaloga ae amata ona ou galue e faaleleia oʻu uiga. Sa lē faigofie le tauiviga, ae o le manatunatu loloto ma le tatalo, sa faifai mālie ai ona fesoasoani iā te aʻu e taofia oʻu uiga leaga. I nisi o taimi, ou te talosaga atu ai iā Ieova ma loimata ina ia foaʻi mai iā te aʻu le malosi e tuu ai lea taaloga ua pulea ai loʻu olaga. Mulimuli ane, sa ou taulau manuia i aʻu taumafaiga.

“Sa toe faatasi lo matou aiga ina ua ou magalo mai le fale puipui. O loo oʻu faigaluega nei i le mea e eli ai le koale. Ua lava ai loʻu taimi e auai i  le galuega talaʻi ma laʻu avā ma faataunuu oʻu tiute i totonu o le faapotopotoga.”

O Mykola ma ana uō na latou gaoia nisi o faletupe i Ukraine. Sa oo ai ina falepuipui mo le sefulu tausaga. A o leʻi falepuipui, e na o le tasi lava le taimi na ulu ai Mykola i se falesā—e sauni e gaoi lenā falesā. E leʻi sao lana gaoi, ae o lana asiasiga lenā na manatu ai faapea atonu e tumu le Tusi Paia i tala e fiu e faalogo i ai e faatatau i faifeʻau Orthodox, o molīgaʻo, ma aso mālōlō faalelotu. Ua ia faapea mai: “Ou te lē iloa tonu lava pe aiseā, ae na amata loa ona ou faitauina le Tusi Paia. Sa matuā faateʻia aʻu i le iloa e matuā ese lava ma le mea sa ou mafaufau i ai!” Sa manaʻo i se suʻesuʻega faale-Tusi Paia ma na papatiso o ia i le tausaga e 1999. Pe a toe tepa atu iā te ia i le taimi nei, e faigatā ona talitonuina o lenei auauna o le faiva lotomaulalo, sa avea muamua ma tagata faaauupegaina na gaoia faletupe!

Sa tuuina atu se faasalaga oti iā Vladimir. A o faatali lona faasalaga oti, na ia tatalo ma folafola atu i le Atua faapea, afai o le a faasaoina lona ola o le a ia auauna iā te Ia. Ae o le taimi lenā na suia ai loa le tulafono, ma faafeoloolo ai loa lona faasalaga e falepuipui mo le olaga atoa. Ina ia tausia pea lana folafolaga, na amata loa ona saʻili Vladimir mo le tapuaʻiga moni. Sa ia auai loa i se aʻoga fetusiaʻi ma maua ai lona tipiloma mai le lotu Aso Fitu, ae e leʻi faamalieina ai o ia.

E ui i lea, ina ua uma ona ia faitauina mekasini o le Olomatamata ma le Ala Mai! i le faletusi a le falepuipui, na tusi atu ai loa Vladimir i le ofisa o le lālā o Molimau a Ieova i Ukraine, ma talosagaina se tasi e asiasi ane iā te ia. Ina ua asiasi atu uso iā te ia, ua uma ona ia manatu iā te ia o se Molimau ma ua talaʻi foʻi i le falepuipui. Sa avatu le fesoasoani iā te ia ina ia agavaa ai e avea ma tagata talaʻi o le Malo o le Atua. I le taimi na tusia ai lenei mataupu o loo faatali Vladimir ma isi tagata talaʻi e toʻafitu i lenā falepuipui mo le papatisoga. Ae e iai le faafitauli. E tuufaatasi i le sela e tasi i le falepuipui pagota o loo solo atoa e tutusa o latou talitonuga faalotu, o lea la, na tuufaatasi ai Vladimir ma ana uō pagota ona e tutusa lo latou faatuatuaga faaletapuaʻiga. O ai la e latou te talaʻi atu i ai? E latou te talaʻi atu le tala lelei i leoleo o le falepuipui, faapea ma le tusia o ni tusi.

Na siitia atu Nazar mai Ukraine i le atunuu o Czech lea na auaufaatasi ai ma se ʻaugāoi. Na oo ai ina falepuipui mo le tolu ma le ʻafa tausaga. A o iai o ia i le falepuipui, na tali atu o ia i asiasiga a Molimau a Ieova mai le aai o Karlovy Vary, na ia aʻoaʻoina le upu moni, ma suia atoa lona olaga i se olaga lelei. I le iloaina o lenei suiga iā Nazar, na faapea atu ai se tasi o leoleo o le falepuipui i pagota sa iai faatasi ma Nazar i le sela: “Afai e pei outou o lenā tagata mai Ukraine, o le a oo ina suia laʻu galuega.” Sa faapea mai le isi leoleo: “E ese le popoto o nei Molimau. E sau le tagata i le falepuipui o avea ma tagata solitulafono; ae magalo atu ua avea o se tagata lelei ma faamaoni.” O lea ua magalo Nazar ma ua toe foʻi nei i le aiga. Na ia aʻoaʻoina le faakamuta ma oo ai ina faaipoipo, ma ua auauna nei o ia ma lana avā i le faiva faataimi atoa. Maʻeu lona loto faafetai ona o asiasiga a Molimau a Ieova na alu atu i le falepuipui!

Faaalia le Loto Faafetai o le Ofisa o Leoleo ma Falepuipui

E lē na o pagota o loo lagona le loto faafetai mo le auaunaga ua saunia e Molimau a Ieova. Na faapea mai Miroslaw Kowalski o ia o se tautuu upu a se tasi o falepuipui i Polani e faapea: “E matou te talisapaia tele la latou asiasiga. E iai ni talaaga faanoanoa o nisi o pagota. Atonu e leʻi faia lava i ai ni faiga lelei i o latou olaga faaletagata soifua . . . E ese le tāua o le fesoasoani [a Molimau a Ieova] ona e lē lava la matou ʻaufaigaluega ma tagata e fesoasoani i pagota.”

Na tusi atu i le ofisa o le lālā se tagata e vaaia se isi falepuipui i Polani ina ia faateleina la latou galuega i lana falepuipui. Aiseā? Na ia faamatala e faapea: “O le faisoo o asiasiga a sui o le Olomatamata e fesoasoani i pagota e ati aʻe ai uiga lelei, ma taofia ai o latou uiga sauā.”

Na lipotia mai i se nusipepa i Ukraine se pagota na maua i le loto mafatia lea sa taumafai e pule i lona ola, peitaʻi na fesoasoani i ai Molimau a Ieova. Na taʻua e le lipoti: “O loo ua amata nei ona faasolosolo ina lelei lagona mafatia o lenei pagota. E gauaʻi o ia i faatulagaga a le falepuipui ma ua avea o ia ma faataʻitaʻiga i isi pagota.”

 Oo Aogā i Fafo Atu o le Falepuipui

O aogā o le galuega o loo faia e Molimau a Ieova e lē muta mai i totonu o le falepuipui. E faaauau pea ona maua e pagota aogā pe a magalo atu i tua. E toʻalua ni Kerisiano o Brigitte ma Renate, na fesoasoani i fafine ua magalo i le auala lenei mo ni tausaga. Na lipotia mai e se nusipepa Siamani o le Main-Echo Aschaffenburg e faapea: “E la te tausia pagota fafine mo le tolu i le lima masina pe a magalo mai i tua, ma faalaeiau i latou ina ia maua se fuafuaga o le olaga. . . . Ua iloa i laʻua o ni tagata tauofo ua faamaonia e le falepuipui mo le vaavaaia o amio a tagata o loo nofo vaavaaia. . . . E ese foʻi le lelei o a la feutagaʻiga ma tagata o le ofisa i le falepuipui.” Ua tuuina atu e nisi o latou ola iā Ieova ona o lenei ituaiga o fesoasoani o loo faia.

E oo lava i tagata faigaluega i le falepuipui o loo latou maua aogā mai le galuega tau aʻoaʻoga faale-Tusi Paia o loo faia e Molimau a Ieova. Mo se faaaʻoaʻoga, o Roma o se tagata e maualuga lona tulaga i le ʻautau, ma o ia foʻi o se fomaʻi o le mafaufau i se falepuipui i Ukraine. Ina ua asiasi atu Molimau i lona fale, na talia e ia se suʻesuʻega faale-Tusi Paia. Na ia iloa ai e lē mafai ona ō atu Molimau e asiasi i pagota i le mea o loo faigaluega ai. Ona ia talosaga atu lea i le alii pule o le fale puipui mo se faatagaga e faaaogā ai le Tusi Paia i lana galuega o loo fai i pagota. Na talia lana talosaga, ma pe tusa e toʻasefulu pagota na faaalia le fiafia. Sa faaauau pea ona tufa atu e Roma lona poto o loo faateleina pea o le Tusi Paia i nei pagota, ma na maua ai iʻuga lelei i ana taumafaiga. Ina ua magalo nisi, na faaauau ona latou faia ni agaʻigaʻi i luma ma avea ma Kerisiano papatisoina. O le vaaia o le mana o le Afioga a le Atua, na oo ai ina manatu mamafa Roma i lana suʻesuʻega o loo fai. Na ia tuua le ʻautau ma faaauau lana polokalame tau aʻoaʻoga faale-Tusi Paia. O le taimi lenei, o loo la talaʻi faatasi ma se tasi na falepuipui muamua.

Na tusi se tasi o pagota e faapea: “Ua tausia i matou i inei e le Tusi Paia, lomiga faale-Tusi Paia, ma suʻesuʻega faale-Tusi Paia.” O loo faamatalaina e nei upu le manaʻoga o loo iai i nisi o falepuipui mo lomiga faale-Tusi Paia. Na lipoti mai e se tasi o faapotopotoga i Ukraine la latou galuega o le aʻoaʻoina o le Tusi Paia i se tasi o falepuipui: “Na faaalia e le pulega o le falepuipui lo latou loto faafetai mo lomiga na matou avatu. E matou te tuuina atu iā i latou kopi e taʻi 60 o lomiga taʻitasi o Le Olomatamata ma le Ala Mai!” Na tusi mai se tasi o faapotopotoga e faapea: “E matou te tausia se falepuipui e 20 ni tamaʻi potu tusi e iai. E matou te tuu i potu tusi taʻitasi a tatou lomiga autū. E oo atu lava i le 20 pusa o lomiga e ave.” I se tasi o falepuipui, e tausia e leoleo se faila o a tatou mekasini i le potu tusi ina ia maua e pagota aogā mai lomiga taʻitasi uma e maua mai.

I le 2002 na faatulaga ai e le ofisa o le lālā i Ukraine se matagaluega faapitoa e gafa ma mataupu tau i le Falepuipui. E oo mai i le taimi nei, ua fesootaʻi atu le matagaluega lea e gafa ma mataupu i le falepuipui i falepuipui e 120 ma tofia faapotopotoga e vaaia o latou manaʻoga. E mauaina ni tusi pe tusa e 50 mai pagota i masina taʻitasi, o le toʻatele lava e talosaga mai i ni lomiga po o le talosaga mai foʻi mo se suʻesuʻega faale-Tusi Paia. E auina atu e le lālā tusi, mekasini, ma polosiua iā i latou seʻia taunuu i ai uso mai faapotopotoga ua tofia i ai.

Na tusi le aposetolo o Paulo i ona uso Kerisiano: “Ia manatua ē ua noanoatia.” (Eperu 13:3) Na ia mafaufau iā i latou na faafalepuipuiina ona o lo latou faatuatua. I aso foʻi nei, o loo manatua e Molimau a Ieova i latou o loo i nofoaga o faasalaga, asiasi atu i falepuipui, ma “talaʻi le saʻolotoga i le tafeaga.”—Luka 4:18.

[Faamatalaga pito i lalo]

[Ata i le itulau 9]

Falepuipui i L’viv, Ukraine

[Ata i le itulau 10]

Mykola

[Ata i le itulau 10]

Vasyl ma lana avā o Iryna

[Ata i le itulau 10]

Victor